Importante Pidi Perdon Para Tene Paz

EL UN conocido experto na lengguaje y si paquemodo ta actua el gente ya explica si cosa puede cumpli el maga gente si ta pidi sila perdon. Por ejemplo, puede solva el maga problema del dos nacion que nuay violencia. Si ta pidi perdon el gobierno, ta dale este mira que ta entende este con el sufrimiento que ya causa este na maga gente. Puede tambien este ayuda para tene kita otravez buen relacion con otro.

El Biblia ta dale mira que si sincero kita ta pidi perdon, un efectivo manera este para puede kita tene otravez buen relacion con otro. Por ejemplo, na ilustracion de Jesus acerca con el rebelloso anak, cuando ya bolbe na casa el anak y sincero ya pidi perdon, el de suyu tata ya ricibi con ele otravez na casa. (Lucas 15:17-24) Claro lang que el un persona debe gendeh queda orgulloso y sabe pidi perdon. Siempre, si humilde tu, mas facil lang tu pidi perdon.

Si Porque Importante Pidi Perdon

El un mujer na Israel de antes que si Abigail ya dale mira si paquemodo de importante que pidi perdon maskin pa el de suyu marido el quien yan kamali. Mientras ta esta na desierto, si David y el de suyu maga gente ya protege con el maga carnero del marido de Abigail que si Nabal. Pero cuando el maga gente de David ya pidi pan y agua, ya insulta kanila si Nabal y ya arria. Poreso, ya rabia si David y ya convida con el de suyu 400 gente para anda y mata con Nabal y con el todo maga hombre na de suyu casa. Cuando ya sabe se si Abigail, ya hace le encuentro con David. Cuando ya mira le con David, ya hinca le adelante de este. Despues, ya habla le: “Mi señor, conmigo ya lang tu disculpa; permiti que converza el de tuyu siervo mujer y oi si cosa habla el de tuyu siervo mujer.” Acabar, ya explica si Abigail el situacion con David y ya dale con ele comida y cosa para toma. Si David ya habla: “Bolbe na de tuyu casa con paz. Ya oi yo contigo y hace yo con el cosa tu ya pidi.”—1 Samuel 25:2-35.

Cay humilde si Abigail y ya pidi perdon, ya puede le salva manada vida. Si David ya rindi pa gane gracias con ele cay ya sangga le con este para mata maga inocente gente. Maskin pa gendeh si Abigail el quien ya maltrata con David y con el maga gente de este, conforme le que con ele disculpa y ya hace manera para tene paz con David.

Un ejemplo tambien si apostol Pablo de un persona quien conforme pidi perdon. Na un ocasion, ya defende le con el de suyu mismo cuerpo adelante del Sanhedrin, el alto corte del maga Judio. Ya queda bien rabiao el alto sacerdote que si Ananias na cosa ya habla si Pablo poreso ya manda le con aquellos quien cerca con Pablo que supla con el boca de este. Ya habla con ele si Pablo: “El Dios ay supla contigo cay igual lang tu mismo como un dindin pintao de blanco. Paquemodo man tu puede sinta alli para juzga conmigo asegun con el Ley, siendo tu mismo ta desobedece el Ley cay ya manda tu supla conmigo?” Cuando el maga gente alla ya habla que ya insulta si Pablo con el alto sacerdote, ya admiti dayun el apostol con el de suyu kamali y ya habla: “Maga hermano, noay yo sabe cay el Sumo Padre galeh aquel, cay el Escritura ta habla: No tu mal habla contra con el lider del dituyo maga gente.”—Maga Actividad 23:1-5, El Nuevo Testamento na Chavacano.

Justo el cosa ya habla si Pablo—el un juez gendeh debe queda violente. Maskin pa ansina, ya pidi le perdon na manera si paquemodo le ya converza con el alto sacerdote. * Por causa na cosa ya hace si Pablo, el Sanhedrin ya conforma que oi con el cosa le habla. Ciendo sabe si Pablo que tiene controversia entre na maga miembro del Sanhedrin, ya habla le kanila que ya lleva con ele na corte cay ta creé le na resureccion. Como resulta, ya tiene discusion el maga miembro y el maga Fariseo ya suporta con Pablo.—Maga Actividad 23:6-10.

Cosa kita puede aprende na este dos ejemplo na Biblia? Na aquel dos ejemplo, cay ya pidi sila perdon, ya oi kanila el otro. Poreso si ta pidi kita perdon, puede este ayuda para tene kita paz con otro. Si ta admiti kita con el diaton kamali y ta pidi perdon, mas facil kita puede solva con el problema.

‘Pero Nuay Yo Cosa Ya Hace Malo’

Si ya sabe kita que ya sinti duele el un persona na cosa kita ya habla o ya hace, posible pensa kita que bien sensitivo lang le. Pero, ya conseja si Jesucristo con el de suyu maga dicipulo: “Si ta lleva tu el dituyo ofrecimiento para na altar, y ya puede tu acorda cay el dituyo hermano tiene reclamo contigo, deja lang anay el dituyo ofrecimiento alla adelante del altar, y anda una hace paz con tu hermano. Acabar, bira oleh y ofrece el dituyo ofrecimiento.”—Mateo 5:23, 24.

Por ejemplo, el un hermano posible sinti que tiene tu culpa que ya hace con ele. Na ese situacion, si Jesus ya habla que necesita tu “anda una hace paz con tu hermano,” ta sinti man tu que ya puede tu hace culpa o nuay. Na Griego lengguaje, el maga palabra de Jesus que ya usa aqui ‘quierre decir que sila dos necesita admiti con el diila maga kamali despues del diila conflicto.’ (Vine’s Expository Dictionary of Old and New Testament Words) El deverasan, si el dos persona gendeh tan entendijan, posible tiene sila dos kamali ciendo igual sila maga imperfecto. Poreso, necesita que sila dos admiti con el diila maga kamali.

El importante amo gendeh si quien el justo y si quien el mali sino si quien el una pricura hace paz. Cuando ya nota si apostol Pablo que ta lleva el maga Cristiano de Corinto con el diila maga hermano y hermana na corte por causa na personal problema igual na conflicto na financial, ya corecta le kanila: “Gendeh ba mas bueno era si aguanta ya lang cuando tiene ta hace malo con ustedes? Gendeh ba mas bueno era si ay deja ya lang ustedes engaña con ustedes?” (1 Corinto 6:7) Maskin ya habla se si Pablo cay no quierre le que el de suyu maga hermano y hermana lleva con uno y otro na corte, claro el principio na texto: Mas importante el paz entre na maga hermano y hermana contra si quien el justo y si quien el mali. Si acorda kita con este principio, mas pronto kita puede pidi perdon na mali que ta pensa el un persona que ya hace kita con ele.

Necesita Sincero Kita

Pero, el cuanto maga gente sobra ta usa con el maga palabra que debe era usa para pidi perdon. Por ejemplo, na Japan, ta puede oi manada beses con el palabra sumimasen que un comon expresion para pidi perdon. Ta puede pa gane usa con este para rindi gracias, si ta sinti tu triste cay nuay tu puede dale o hace un cosa para na un persona quien ya hace buen cosas contigo. Cay pirmi ta usa este el maga gente, manada el gendeh asigurao si sincero ba el otro si ta habla sila con este. Ansina tambien na otro maga cultura y lengguaje.

Na maskin cosa lengguaje, bien importante que queda sincero si ta pidi perdon. El palabra y tono del diaton voz debe dale mira que deverasan kita ta arripinti. Si Jesucristo ya enseña con el de suyu maga dicipulo na Sermon na Monte: “Asigura que el de ustedes ‘Si’ quierre decir si, el de ustedes ‘Gendeh,’ gendeh, cay el sobra con ese ta sale con el uno que malo.” (Mateo 5:37, NWT) Si ta pidi tu perdon, debe sincero! Para ilustra: El un hombre quien tan pila na check-in counter del airport ya pidi perdon cuando el de suyu maleta ya tupa con el mujer quien sunod con ele na pila. Cuanto minuto despues, cuando ya move el pila, ya tupa otravez el de suyu maleta con el mujer. El hombre ya pidi otravez perdon. Cuando ya sucede pa se otravez, el uban del mujer ya habla con ele que si sincero le ta pidi perdon, debe le asigura que el de suyu maleta gendeh otravez tupa con el mujer. Claro que si sincero kita ta pidi perdon, necesita kita asigura que gendeh kita otravez hace con ese kamali.

Si sincero kita, debe kita admiti que tiene kita ya hace kamali, pidi perdon y pricura compone con el mal resulta del diaton kamali. Y el persona quien ya sinti duele debe preparao perdona con el persona quien ya arripinti. (Mateo 18:21, 22; Marcos 11:25; Efeso 4:32; Colosa 3:13) Ciendo maga imperfecto kita todo, gendeh este pirmi pronto hace. Maskin pa ansina, bien importante que pidi perdon para tene paz.

Si Cuando Gendeh Debe Pidi Perdon

Maskin bien importante que pidi perdon para mentena el paz, el un sabio persona ta evita pidi perdon si gendeh justo para hace con ese. Por ejemplo, pone kita que envuelto el diaton integridad con Dios. Cuando taqui si Jesucristo na tierra, “ya queda Le mas bajo pa que canaton, cay Ele ya obedece hasta para muri” le na estaca. (Filipo 2:8) Pero, nuay le pidi perdon para na de suyu creencia para evita maga sufrimiento. Y nuay tambien le pidi perdon cuando ya manda el alto sacerdote: “Jura Uste con el Dios vivo y habla canamon: Uste ya ba el Cristo, el Anak del Dios?” En vez de man huya y pidi perdon, con coraje ya contesta si Jesus: “Uste se ta habla. Y ta habla yo con ustedes: Desde ahora ay mira ustedes con el Anak del Gente sintao na mano derecho del Poder del Dios y ta vene incima del maga celaje del cielo.” (Mateo 26:63, 64) Para con Jesus, mas importante que queda leal con Jehova contra mentena el paz con el alto sacerdote.

El maga Cristiano ta dale mira respeto y honor con el maga gente quien tiene autoridad. Pero, gendeh kita necesita pidi perdon para na diaton obediencia con Dios y na diaton amor na diaton maga hermano y hermana.—Mateo 28:19, 20; Roma 13:5-7.

Nuay Mas Cosa que Puede Destorba con el Paz

Ahora, ta hace kita maga kamali cay ya hereda kita el imperfeccion y pecado estaba na diaton tatarabuelo que si Adan. (Roma 5:12; 1 San Juan 1:10) Ya queda imperfecto si Adan cay yan rebelde le con el Creador. Pero de antes, perfecto y nuay pecado kanda Adan y Eva, y ya promete el Dios que hace le otravez perfecto con el maga gente. Hay quita le con el pecado y el todo efecto de este.—1 Corinto 15:56, 57.

Pensa si cosa hay sucede! Na de suyu consejo acerca na converzada, el hermano de Jesus que si Santiago ya habla: “Si tiene gente quien gendeh ta comete culpa na disuyo conversada, ele un gente perfecto y ta puede ele controla el disuyo entero cuerpo.” (Santiago 3:2) El un perfecto persona ta puede controla con el de suyu boca poreso gendeh mas le necesita pidi perdon na cosa le ya habla. Ta puede le “controla el disuyo entero cuerpo.” Bien bonito gayot si queda ya kita perfecto! Si llega ese tiempo, nuay mas cosa puede destorba con el paz entre na maga gente. Pero mientras nuay pa se sucede, si pidi kita perdon na kamali que ya hace kita, este hay ayuda kanaton para tene paz con otro.

[Footnote]

[Letrato]

Cosa kita puede aprende na ejemplo de Pablo?

[Letrato]

Si el todo perfecto ya, nuay mas cosa puede destorba con el paz