Si Jehova​—Un Dios que Debe Kita Conoce

POSIBLE ba que tiene un cosa importante que falta na de tuyu vida? Si un poco lang el cosa tu sabe acerca con Dios, entonces tiene falta na de tuyu vida. Porque? Cay manada gente ya discubri que si conoce kita con Dios, hay beneficia gayot kita. Gane si hace kita se, hay beneficia dayun kita ahora hasta na futuro.

Quierre si Dios Jehova, el Autor del Biblia que conoce kita con ele. El salmista ya escribi: “Ojala sabe el maga gente que uste, el nombre Jehova, uste solamente el Bien Alto na entero mundo.” Sabe Le que beneficia kita si conoce kita con ele. “Yo, si Jehova, el de tuyu Dios, el Quien ta enseña contigo para na de tuyu mismo beneficio.” Paquemodo kita beneficia si conoce kita con Jehova, el de con todo Alto Dios?—Salmo 83:18; Isaias 48:17.

Uno na maga deverasan beneficio que puede kita obtene amo que puede kita ricibi guia si ta enfrenta kita problema cada dia, un deverasan esperanza na futuro y paz na pensamiento. Mas pa, si bien conoce kita con Jehova, puede kita obtene contestacion na maga bien importante pregunta na vida. Manada maga gente tiene ese maga pregunta. Cosa se?

Tiene Ba Proposito el De Tuyu Vida?

Maskin pa tiene progreso na tecnologia, tiene siempre maga individual que ta busca contestacion na maga importante pregunta: ‘Porque yo taqui? Cosa sucede conmigo? Cosa el proposito del vida?’ Si el un persona gendeh puede obtene contestacion que ta satisfecha le, hay queda nuay deverasan proposito de suyu vida. Ansina ba ta sinti el manada gente? Del 1997, yan interview con el manada gente na Germany acerca na proposito del vida y el media kanila ya habla que pirmi o tiene vez ta sinti sila que dol nuay proposito el vida. Baka ansina tambien el cosa ta sinti el maga gente na de ustedes lugar.

Si nuay proposito el vida, el un persona man dificil hace maga plano para na futuro. Por causa con ese, manada individual ta pricura tiene profesion o queda rico. Pero, gendeh siempre sila alegre y dol tiene cosa falta na diila vida. Gane el cuanto por causa na tristeza, no quierre mas vivi. Ese el cosa ya experiencia el un bonita mujer, quien asegun na International Herald Tribune ya engranda na “un rico familia y tiene alto estado de vida.” Pero maskin pa ansina, ta sinti le triste y dol nuay direccion el de suyu vida. Ya toma le sleeping pills y ya incuntra con ele muerto. Posible, tiene tu maga conoce que ansina tambien ya sucede na diila vida.

Pero tiene ba tu ya oi maga gente quien ta clama que el ciencia puede contesta con el todo pregunta diaton acerca na vida? El un German magasin Die Woche ya habla: “Maskin pa el ciencia manada cosa puede enseña kanaton, nuay este contestacion na maga espiritual y moral pregunta. El teoria de evolucion o maskin el otro complicao cientifico teoria gendeh puede dale kanaton comforta y seguridad.” Por medio na cosa ya discubri el ciencia, manada kita cosa ya puede aprende acerca na maga cosas que tiene vida, maga natural cycle y maga proceso que ta sustene vida. Pero, el ciencia gendeh puede habla kanaton si porque kita taqui y si cosa kanaton sucede. Si hay depende lang kita con este, gendeh kita puede obtene el contestacion na diaton maga pregunta acerca na proposito del vida. El resulta, como cosa ya habla el diario Süddeutsche Zeitung, “mas manada gente el quien necesita guia ahora.”

Tiene pa ba mas pa que con el Creador quien kanaton puede dale guia? Ciendo ele el quien ya crea con el gente, asigurao sabe le si porque kita taqui. El Biblia ta explica que si Jehova ya crea con el gente para queda na tierra y cuida con este. Quierre el Dios que imita kita con el de suyu maga calidad, igual como el justicia, sabeduria y amor. Si entende kita si porque si Jehova ya crea kanaton, sabe ya kita si porque kita taqui.—Genesis 1:26-28.

Cosa Tu Puede Hace?

Paquemodo si nuay tu incuntra satisfechao contestacion na este maga pregunta: ‘Porque yo taqui? Cosa conmigo sucede? Cosa el proposito del vida?’ El Biblia ta anima contigo que conoce pa mas con Jehova. Gane, si Jesus ya habla: “Este amo el Vida hasta para cuando: Que ay conoce sila con Uste, el unico y deverasan Dios, y que ay conoce tamen sila con Jesus, el Cristo, con quien Uste ya imvia.” Ta anima tambien contigo que cultiva maga buen calidad, especialmente el amor y hace de tuyu goal que vivi bajo na Reino del Dios que cerca ya llega. Si hace tu se, hay tiene proposito el de tuyu vida y tiene esperanza na futuro. Asegurao que el maga importante pregunta que tiene tu acerca na vida hay contesta gayot.—Juan 17:3; Eclesiastes 12:13.

Paquemodo este puede ayuda contigo? Mira kita si paquemodo este ya puede ayuda con el un gente que si Hans. * Del antes, ta creé si Hans con Dios pero gendeh este importante na de suyu vida. Ya usa le droga prohibido, imoral el de suyu vida, ya queda envuelto na crimen y quierre-quierre munta motor. “Pero gendeh gayot alegre de mio vida,” ya habla le. Cuando maga 25 año si Hans, ya decidi le que conoce con Dios por medio na lehida de Biblia. Cuando ya conoce le mas con Jehova y ya sabe si cosa el proposito del vida, ya cambia le con el de suyu manera de vida y ya bautiza como uno del maga Testigo de Jehova. Ahora, ta sirvi le full-time por diez año ya. Ya habla le: “El de con todo bonito manera de vida amo sirvi con Jehova. Nuay onde puede compara con este. Cay ya conoce yo con Jehova, ya tiene proposito el de mio vida.”

Siempre, gendeh lang el pregunta acerca na proposito del vida el ta pensa el manada. Mientras ta queda mas dificil el situacion del mundo, manada el quierre sabe el contestacion del otro importante pregunta.

Porque el Maga Mal Cosas Ta Sucede?

Si ta sucede el tragedia, el victima pirmi ta pregunta este: Porque este mal cosas ya sucede? Si sabe tu si porque ta sucede el mal cosas, facil para contigo para enfrenta con el tragedia y gendeh rabia. Considera el experiencia de Bruni.

“Cuanto año ya el ya pasa, ya muri el de mio anak,” ya habla el un mujer que si Bruni. “Ta creé yo con Dios poreso ya pidi yo comforta na padre na diamon lugar. Ya habla le conmigo que ya saca el Dios con Susanne para queda un angel alla na cielo. Bien dolorido gayot yo y ya odia yo con Dios cay ya saca le con el de mio anak.” Ya sufri si Bruni por largo tiempo. “Despues, uno del maga Testigo de Jehova el ya dale mira conmigo estaba na Biblia que nuay razon para odia yo con Dios. Nuay saca si Jehova con Susanne para man junto con ele como un angel. El de suyu enfermedad amo resulta del imperfeccion de gente. Si Susanne dol ta durmi lang y ta espera que resucita con ele si Jehova. Ya aprende tambien yo que ya hace el Dios con el maga gente para vivi hasta para cuando na paraiso tierra y cerca ya se sucede. Cuando ya sabe yo si cosa clase de persona si Jehova, ya queda yo cerca con ele y gendeh ya bien duele el cosa yo ya sinti.”—Salmo 37:29; Maga Actividad 24:15; Roma 5:12.

Millones de maga gente el afectao na diferente problema: personal tragedia, guerra, hambre o calamidad. Ya tiene alivio si Bruni cuando ya aprende le na Biblia que gendeh si Jehova el causa del maga dificultad, gendeh proposito de suyu que sufri el maga gente y gendeh dura hay termina le con el todo maldad. El maga mal cosas que mas manada ta sucede ahora ta dale mira que ta vivi ya kita na “ultimo maga dia.” Todo kita quierre que queda enbuenamente el diaton situacion y este cerca ya sucede.—2 Timoteo 3:1-5; Mateo 24:7, 8.

Si Paquemodo Conoce con Dios

Si Hans y Bruni ta creé con Dios pero un poco lang el cosa sila sabe acerca con ele. Pero cuando ya dale sila tiempo para conoce enbuenamente con Jehova, ya beneficia sila. Ya puede sila obtene el justo contestacion na maga importante pregunta na vida. Por causa con ese, ya tiene sila paz na pensamiento y deverasan esperanza na futuro. Ansina tambien el cosa ya experiencia el millones de maga siervo de Jehova.

Para conoce con Jehova, necesita una estudia con el Biblia. Ta discuti este acerca con ele y si cosa le quierre que hace kita. Ese el cosa ya hace el cuanto del primer siglo. Si Lucas que un historian y doctor, ya menciona que el maga miembro na congregacion na Berea, na Grecia, “ya acepta . . . el Palabra [estaba con Pablo y Silas] con todo corazon y todo el dia ta estudia sila el maga Escritura para sabe si deverasan aquellos maga cosa-cosa.”—Maga Actividad 17:10, 11.

El maga Cristiano del primer siglo yan junto-junto tambien na maga congregacion. (Maga Actividad 2:41, 42, 46; 1 Corinto 1:1, 2; Galacia 1:1, 2; 2 Tesalonica 1:1) Ansina tambien na diaton tiempo ahora. El maga Testigo de Jehova tan junto-junto na maga miting na congregacion que ya hace para ayuda con el maga individual queda cerca con Jehova y sirvi con ele con alegria. Tiene pa otro beneficio si asocia tu junto na maga Testigo de Jehova. Igual si paquemodo el maga gente ta imita con el Dios con quien sila ta adora, el maga Testigo de Jehova tambien ta pricura dale mira el maga calidad que tiene si Jehova. Poreso si atende tu na maga miting del maga Testigo de Jehova, ayuda este contigo para conoce pa mas con Jehova.—Maga Hebreo 10:24, 25.

Necesita ba gayot grande esfuerzo para conoce con el Dios? Si, necesita gayot se. Gendeh ba necesita tu hace esfuerzo si quierre tu obtene con el un cosa? Pensa el esfuerzo que ta hace el un buen atleta na de suyu training. Por ejemplo, el un atleta de France que si Jean-Claude Killy ya habla si cosa necesita hace para queda un buen atleta: “Necesita tu prepara diez año antes principia el competicion y hace esfuerzo cada dia para man training.” Ya usa tu manada tiempo para na diez minuto competicion lang! Pensa si paquemodo de grande el beneficio si conoce pa tu mas con Jehova.

Queda Mas Cerca con Dios

Todo kita quierre que tiene proposito el diaton vida. Si ta sinti tu que nuay deverasan proposito el de tuyu vida o quierre tu sabe si porque ta sucede el maga problema, entonces queda determinao que conoce pa mas con Jehova. Si aprende tu acerca con ele, hay cambia el de tuyu vida y hay beneficia tu hasta para cuando.

Pirmi kita tiene cosa aprende acerca con Jehova. Gane aquellos quien ta sirvi con ele por manada año ya, tiene siempre maga nuevo cosas ta aprende acerca con ele. Si continua kita aprende acerca con Jehova, hay queda kita alegre y mas cerca con ele. Asigurao man uyun kita con el cosa ya escribi si apostol Pablo: “Que bien grande gayot el maga riqueza del Dios: Hondo gayot el disuyo saber y conocimiento. Imposible gayot penetra su pensamiento ni entende su maga camino. Cay quien ba el ya entende el pensamiento del Dios? O quien ba el ya puede dale con Ele consejo?”—Roma 11:33, 34.

[Footnote]

 [Blurb]

Tiene siempre maga individual que ta busca contestacion na maga importante pregunta: ‘Porque yo taqui? Cosa sucede conmigo? Cosa el proposito del vida?’

 [Blurb]

“Cuando ya sabe yo si cosa clase de persona si Jehova, ya queda yo cerca con ele”

 [Blurb]

“El de con todo bonito manera de vida amo sirvi con Jehova. Nuay onde puede compara con este. Cay ya conoce yo con Jehova, ya tiene proposito el de mio vida”