Pregunta del Maga Quien Ta Le

El maga Testigo de Jehova ba ta acepta maskin cosa diutay fraction de sangre?

El importante contestacion amo que el maga Testigo de Jehova gendeh ta acepta sangre. Ta creé kame que nuay cambia el ley del Dios si acerca na sangre. Ahora, puede ya dividi con el sangre na cuatro importante parte y ese maga parte puede dividi na mas diutay parte que ta llama fraction. Para decidi si acepta ba con ese maga fraction, el un Cristiano debe pensa gendeh lang con el maga beneficio y posible peligro. El de con todo importante cosa para con ele amo que obedece si cosa ta habla el Biblia y si cosa el posible efecto del de suyu decision na de suyu relacion con Dios.

Claro el cosa ta habla el Biblia acerca na sangre. Considera kita con el cuanto cosa que puede ayuda kanaton para hace con el diaton decision.

Si Dios Jehova ya habla con el diaton tatarabuelo que si Noe que debe trata con el sangre como especial. (Genesis 9:3, 4) Despues del cuanto tiempo, el maga ley que ya dale na Israel ta dale mira que sagrao el sangre para con ele: “Si tiene maskin quien na casa de Israel o maskin quien estranjero . . . que ya come maskin cosa clase de sangre, asigurao hay desconoce yo con ese persona quien ya come sangre.” Si el un Israelita ya desobedece con el ley del Dios, puede tambien le influencia con otro; poreso ya omenta el Dios: “Hay mata yo con ele.” (Levitico 17:10) Despues del cuanto tiempo, na un miting na Jerusalem, el maga apostoles y maga anciano ya decidi que debe kita evita na sangre. Igual ese de importante na sexual imoralidad y idolatria que debe kita evita.—Maga Actividad 15:28, 29.

Cosa quierre decir que evita na sangre para na aquel maga Cristiano? Gendeh sila ta come o ta toma sangre y gendeh tambien sila ta come carne del animal que nuay hace sale el sangre. Gendeh tambien sila ta come comida que ya omenta sangre igual na blood sausage. Si hay usa sila con el sangre na uno de este maga manera, hay viola gayot sila con el ley del Dios.—1 Samuel 14:32, 33.

El mayoria del maga gente quien ta vivi na aquel tiempo gendeh ta pensa que malo come o toma sangre. Puede se kita mira na cosa ya escribi el un escritor que si Tertullian (ika-dos y ika-tres C.E.). Ya escribi le que el cuanto gente na Roma ta confirma con el diila contrata na uno y otro por medio de tomada de sangre. Ya habla tambien le que el maga gente ta toma sangre de aquellos quien ya mata na stadium para cura con el diila epilepsy.

Maskin pa el cuanto Romano ta hace con este maga practica para na diila salud, gendeh este justo para na maga Cristiano: “Gendeh kame ta come sangre maskin de animal,” ya escribi si Tertullian. El maga Romano ta usa maga comida que tiene sangre para pruba con el integridad del maga deverasan Cristiano. Si Tertullian ya omenta: “Ahora pregunta yo con ustedes, cosa clase de pensamiento este que asigurao ustedes que [el maga Cristiano] gendeh ta come sangre de animal pero hay toma sangre de gente?”

Manada gente ahora el gendeh ta pensa que contra na ley del Dios que acepta sangre si habla el diila doctor que necesita sila se hace. El maga Testigo de Jehova quierre continua vivi pero determinao tambien kame que obedece con el ley de Jehova acerca na sangre. Poreso, paquemodo kame ta obedece con ese ley ahora?

Despues del Guerra Mundial II, ya queda comon el abonada de sangre pero el maga Testigo de Jehova ta mira con este como contra na ley del Dios—y ta creé siempre kame con ese. Pero, desde aquel tiempo ya tiene ya progreso na medicina. Ahora, el mayoria del maga gente gendeh mas ta abona entero sangre sino el uno de este maga importante parte: (1) colorao celula; (2) blanco celula; (3) platelet; (4) plasma. Depende na condicion del paciente, el maga doctor posible habla que necesita abona colorao celula, blanco celula, platelet o plasma. Cay puede dividi con el sangre na este maga parte, puede usa con el sangre para cura maskin manada paciente. Ta creé el maga Testigo de Jehova que si acepta sila puro sangre o uno na este cuatro importante parte, ta viola sila con el ley del Dios. Y cay este el diila decision, ya puede este protege kanila contra na manada enfermedad igual na hepatitis y AIDS que puede hace pasa por medio na sangre.

Pero, este cuatro importante parte del sangre puede pa dividi na cuatro mas diutay parte o fraction. Paquemodo ta usa con ese maga fraction y cosa debe considera el un Cristiano si ta decidi acerca con ese?

Manada diferente parte el sangre. Maskin el plasma—que 90 por ciento agua—ta contene manada cosas igual na hormones, inorganic salt, enzyme y nutrient, incluido ya el maga mineral y sugar. El plasma ta contene tambien protein que ta llama albumin, maga protein que ta controla con el bleeding y maga antibody que tan contra na maga enfermedad. El maga doctor ta puede saca y usa con el manada protein na plasma. Por ejemplo, el un protein estaba na plasma puede usa para ayuda con el un persona quien facil lang tan bleed. El maga doctor puede tambien saca maga protein estaba na plasma para ayuda man contra con el un enfermedad. Tiene pa otro maga protein na plasma que puede usa el maga doctor pero este maga ejemplo ta dale mira que posible saca maga bien diutay parte estaba na plasma. *

Igual si paquemodo el plasma puede dividi na manada diferente fraction, el otro importante parte (colorao celula, blanco celula y platelet) puede tambien dividi na mas diutay parte. Por ejemplo, el maga fraction que estaba na maga blanco celula puede usa para cura cuanto infeccion y cancer. Puede usa con el maga fraction estaba na platelet para cura maga irida. Puede tambien hace con el maga medicina estaba na maga fraction del sangre. Este maga curada y medicina gendeh puede considera como abonada de sangre pero ta hace con este estaba na maga importante parte del sangre. El maga Cristiano ba debe acepta con este maga fraction na diila curada? Gendeh kita puede habla si cosa debe hace el cada uno. El Biblia gendeh ta dale detalle acerca na este maga curada poreso el cada Cristiano debe hace con el de suyu mismo decision base na de suyu conciencia.

El cuanto Cristiano gendeh ta acepta con el maskin cosa que estaba na sangre (maskin maga fraction que puede ayuda para man contra na maga enfermedad). Amo se el diila entendimiento na mandamiento del Dios que evita na sangre. Ta pensa sila que el ley na Israel ta pidi kanila que el sangre debe vacia na tierra. (Deuteronomio 12:22-24) Cosa el coneccion de este na blood fraction? Para prepara con este maga producto que ta ayuda man contra con el maga enfermedad y otro pa maga producto que estaba na maga fraction, necesita colecta con el sangre y man proceso con este. Cay nuay vacia con el sangre, el cuanto maga Cristiano gendeh ta acepta con este maga producto igual si paquemodo gendeh sila ta acepta con el abonada de entero sangre o el cuatro importante parte de este. Debe kita respeta con el diila decision.

Pero, otro el decision del otro Cristiano. Gendeh tambien sila ta acepta con el abonada de entero sangre, colorao celula, blanco celula, platelet o plasma. Pero, posible permiti sila con el diila doctor que cura kanila por medio de maga diutay fraction que ya saca na este cuatro importante parte. Pero maskin aqui, posible otro-otro siempre el diila decision. El un Cristiano posible acepta con el un curada estaba na plasma pero posible gendeh le conforma que cura con ele por medio na un cosa que ya saca na colorao o blanco celula. Poreso, porque decidi este maga Cristiano que acepta maga blood fraction?

El “Questions From Readers” na The Watchtower del Junio 1, 1990, ya habla que el maga protein de plasma estaba na nana ta transfiri para na sangre del de suyu baby mientras na barriga este. Poreso el nana, ta hace pasa maga blood fraction na de suyu anak que ta protege con este na maga enfermedad. Mas pa, si ya acaba ya el largor del vida del maga colorao celula del baby, el cuanto parte de este ta hace pasa con el de suyu nana y el cuerpo del nana hay quita con este. El cuanto Cristiano ta pensa cay ciendo puede pasa maga fraction na este manera estaba na un persona para na otro, puede tambien sila acepta maga blood fraction que ya saca estaba na plasma o celula del sangre.

Ciendo otro-otro el decision del maga Cristiano acerca si acepta ba o gendeh con el maga blood fraction, quierre decir ba de este que gendeh importante este decision? Importante este. Pero un cosa el asigurao, el cosa ya discuti arriba claro ta dale mira que el maga Testigo de Jehova gendeh ta acepta con el abonada de entero sangre y el maskin cosa del cuatro importante parte. El Biblia ya manda con el maga Cristiano que “No . . . come maga cosa-cosa que ya ofrece como sacrificio con el maga dios-dios, no come [“evita,” NWT] sangre o maga animal que ya hace cuga y no comete immoralidad.” (Maga Actividad 15:29) Pero antes kita decidi si acepta ba kita o gendeh maga fraction de este maga importante parte del sangre, debe kita pensa enbuenamente acerca con este y reza con Jehova.

Manada gente el conforme acepta con el maskin cosa curada que puede ayuda kanila, maskin pa tiene este mal efecto na diila salud, igual na maga producto de sangre. El maga Cristiano gendeh lang ta pensa acerca na diila fisical salud sino tiene pa otro cosa que mas importante que con ese. El maga Testigo de Jehova ta aprecia con el buen medical curada y ta pensa sila enbuenamente con el peligro o beneficio del maskin cosa clase de curada. Pero si acerca na producto de sangre, ta pensa sila enbuenamente si cosa el efecto de este con Dios y na diila relacion con el quien ya dale kanila vida.—Salmo 36:9.

Un bendicion gayot para na un Cristiano quien tiene confianza igual con el salmista quien ya escribi: “si Jehova gendeh man alang-alang dale maskin cosa bueno con aquellos quien ta mentena diila integridad. O Jehova . . . alegre el gente quien ta confia con uste.”—Salmo 84:11, 12.

[Footnote]

[Cajon]

MAGA SUGESTION QUE PUEDE PREGUNTA NA DOCTOR

Si necesita operacion o otro curada que posible envuelto el producto de sangre, pregunta este:

El todo ba quien envuelto na operacion sabe que como uno del maga Testigo de Jehova, gendeh yo ta acepta abonada de sangre (entero sangre, colorao celula, blanco celula, platelet o plasma) na maskin cosa circumstancia?

Si reseta medicina que posible estaba na plasma, colorao o blanco celula o platelet, pregunta este:

El medicina ba estaba na uno del cuatro importante parte del sangre? Si ansina, puede ba tu explica si cosa parte el incluido aqui?

Paquemodo de manada el medicina que estaba na sangre el posible usa y na cosa manera?

Si permiti el de mio conciencia que acepta con este fraction, cosa el peligro de este?

Si gendeh acepta el de mio conciencia con este fraction, cosa otro curada el posible usa?

Despues yo pensa enbuenamente acerca con este maga cosas, cuando yo puede habla contigo el de mio decision?