El Maga Milagro de Jesus—Cosa Tu Puede Aprende?

BAKA espanta tu que el maga istoria na Biblia acerca na vida de Jesus na tierra nuay usa con el palabra “milagro” na original lengguaje. El Griego palabra (dyʹna·mis) que tiene vez yan translate “milagro” literal quierre decir “poder.” (Lucas 8:46) Puede tambien con este man translate como “abilidad.” (Mateo 25:15) Asegun na un scholar, este Griego termino “ta hace claro con el grande trabajo que ya puede hace y particularmente, el poder que ya usa para cumpli con ese. Ya menciona con el suceso como expresion del poder del Dios.”

El otro Griego termino (teʹras) quierre decir “gendeh ordinario cosa” ta hace claro con el efecto de este na maga quien ta mira. Mas mucho, el maga gente y el maga dicipulo yan bilib y ya espanta na maga poderoso trabajo de Jesus.—Marcos 2:12; 4:41; 6:51; Lucas 9:43.

El ika-tres Griego termino (se·meiʹon) que ta refiri na maga milagro de Jesus quierre decir “señal.” “Tan focus [este] na mas hondo entendimiento del milagro,” ya habla el un scholar, si Robert Deffinbaugh. Ele ya omenta: “El señal amo un milagro que ta revela un verdad acerca con el diaton Señor Jesus.”

Ilusion o Poder Estaba con Dios?

Nuay habla el Biblia que el maga milagro de Jesus maga ilusion lang que ya hace para entretene con el maga gente. Maga expresion este del “poder de Dios,” igual na cosa ya sucede con el bata hombre con quien si Jesus ya hace sale demonio. (Lucas 9:37-43, El Nuevo Testamento) Este maga poderoso trabajo ba imposible para con el Dios Todopoderoso—el Uno quien tiene “grande energia”? (Isaias 40:26) Gendeh gayot!

El maga istoria na Evangelio ya menciona maga 35 milagro de Jesus. Pero, nuay revela si cuanto todo el milagro que ya hace le. Por ejemplo, el Mateo 14:14 ya habla: “Ya mira [si Jesus] bien mucho gayot maga gente, ya tene Le lastima canila y ya cura Le con el diila maga emfermo.” Nuay kanaton habla si cuanto enfermo le ya cura na ese ocasion.

El maga poderoso trabajo de Jesus claro ya dale mira que ele el Anak del Dios, el Mesias. El Escritura ya confirma que el poder que ya usa si Jesus para hace maga milagro amo estaba con Dios. Si apostol Pedro ya refiri con Jesus como “un gente quien ya queda recomendao del Dios entre con ustedes por el maga milagro, maga grande cosa-cosa y maga señal que el Dios ya hace entre con ustedes por medio disuyo, como ustedes mismo bien sabe.” (Maga Actividad 2:22) Na otro ocasion, si Pedro ya hace claro que “el Dios ya dale con [Jesus] el Espiritu Santo y el poder, y siendo el Dios talli con Ele, ya anda Le donde-donde, ya hace Le maga buen trabajo y ya cura con todo quien ya queda controlao del Demonio.”—Maga Actividad 10:37, 38.

El maga milagro de Jesus conectao na de suyu mensaje. El Marcos 1:21-27 ta revela el reaccion del maga gente na enseñanza de Jesus y na uno del de suyu maga milagro. El Marcos 1:22 ta habla que el maga gente “ya queda espantao por causa del disuyo maga insiñanza” y el versiculo 27 ta dale mira que el maga gente ya queda “bien espantao gayot” cuando ya hace le sale un demonio. El maga poderoso trabajo de Jesus y el de suyu mensaje ya dale prueba que ele el Mesias.

Nuay lang clama si Jesus que ele el Mesias. Junto na de suyu palabra y otro maga trabajo, el de suyu maga milagro ya dale evidencia que ele el Mesias. Cuando ya cuestiona con el de suyu papel y autoridad, si Jesus con coraje ya contesta: “Yo tiene otro testigo mas importante pa que con Juan [Bautista]: El mismo maga trabajo que yo ta hace y que el Tata ya encarga conmigo para hace, amo el testigo que el Tata ya imvia conmigo.”—Juan 5:36.

Maga Prueba que Deverasan el Maga Milagro

Porque kita puede asigura que deverasan el maga milagro de Jesus? Considera con el cuanto prueba.

Cuando ya hace le maga poderoso trabajo, si Jesus nuay saca el atencion del otro. Ya asigura le que Dios el ricibi con el alabanza y gloria na maskin cosa milagro que hace le. Por ejemplo, antes cura con el un bulak hombre, ya hace claro si Jesus que sucede quel “para dale mira el maga trabajo del Dios na disuyo persona.”—Juan 9:1-3; 11:1-4.

Gendeh igual na maga magiquero y faith healer, si Jesus nuay usa hipnotismo, engaño, supersticion o anting-anting. Nota con el simple manera si paquemodo ya cura si Jesus con el dos bulak hombre. “Si Jesus ya tene lastima canila,” ya habla el Biblia, “ya agarra el diila maga ojos y insiguidas ya puede sila mira oleh. Despues ya sigui sila con Ele.” (Mateo 20:29-34) Nuay le hace maga ritual, ceremonia o maga cosas para man bilib el otro. Ya hace si Jesus con el de suyu maga milagroso trabajo na publico, donde ya puede mira el manada gente. Nuay le usa maga especial luz, stage o gamit. Diferente este con aquellos quien ta habla ahora que puede sila hace milagro pero gendeh ta puede dale prueba con ese.—Marcos 5:24-29; Lucas 7:11-15.

Tiene vez, ya menciona si Jesus que tiene fe aquellos quien ya beneficia na de suyu maga milagro. Pero maskin pa nuay fe el un persona, nuay se sangga con Jesus para hace milagro. Cuando talla le na Cafarnaum na Galilea, “ya lleva . . . con Jesus mucho maga gente controlao del maga demonio, y con un palabra ya arria Le con el maga demonio y ya cura Le con todo el maga emfermo.”—Mateo 8:16.

Ya hace maga milagro si Jesus para ayuda con el maga gente y gendeh para man bilib sila. (Marcos 10:46-52; Lucas 23:8) Y nuay hace milagro si Jesus para na de suyu mismo beneficio.—Mateo 4:2-4; 10:8.

Puede Ba Kita Confia con el Maga Evangelio?

Puede kita aprende acerca na maga milagro de Jesus si le kita con el cuatro Evangelio. Puede ba gayot kita confia con el cosa este ta habla acerca na maga milagro de Jesus? Si.

Como cosa ya menciona, ya hace si Jesus maga milagro enfrente del manada gente. Ya escribi con el cuanto Evangelio na tiempo cuando vivo pa el mayoria del maga gente quien ya puede mira con ese. Acerca na pagka-honesto del maga escritor del Evangelio, el libro The Miracles and the Resurrection ya habla: “Gendeh gayot justo para habla que aquellos quien ya escribi con el Evangelio yan imbusterias acerca na maga milagro para lang hace calayat el diila creencia. . . . Maga honesto escritor sila.”

El maga Judio quien tan contra con el maga Cristiano nunca ya habla que nuay sucede el maga milagro que puede le na maga Evangelio. Sino, ya cuestiona sila si onde estaba el poder para hace con ese. (Marcos 3:22-26) Maskin el maga critico na uliji nuay puede nega con el maga milagro de Jesus. Del primer y segundo siglo C.E., tiene maga escribida que ta confirma con el maga milagroso trabajo que ya hace si Jesus. Poreso, puede kita confia que deverasan el maga istoria na Evangelio acerca na de suyu maga milagro.

Cosa Clase de Gente si Jesus?

Para entende gayot kita con el maga milagro que ta le kita na maga Evangelio, necesita kita conoce con el gente quien ya hace con ese maga milagro. El maga Evangelio ta enseña kanaton que si Jesus tiene grande amor y compasion y deverasan le interesao na bien del maga gente.

Considera con el un leproso quien ya atraca con Jesus para pidi ayuda y ya habla: “Si quiere Uste, puede Uste cura conmigo.” Cay “ya tene lastima con ele,” si Jesus ya estira con el de suyu mano y ya agarra con el leproso, hablando: “Siempre, quiere Yo! Queda tu bueno!” Enseguidas, ya queda bueno el gente. (Marcos 1:40-42) Na ese manera, ya demonstra empatia si Jesus que ya manda move con ele para usa con el poder estaba con Dios para hace maga milagro.

Cosa ya sucede cuando ya puede man encuentro si Jesus un intierro estaba na ciudad de Naim? El joven hombre que ya muri amo el solo anak del un viuda. Cay “ya tene Le lastima” con el mujer, si Jesus ya atraca con ele y ya habla: “No mas llora.” Despues, ya hace le vivi otravez con el anak de este.—Lucas 7:11-15.

El un leccion que puede kita aprende na maga milagro de Jesus amo que “ya tene Le lastima” y ese el ya manda move con ele para ayuda con el maga gente. Pero, ese maga milagro ta dale tambien kanaton esperanza para na futuro. “Si Jesucristo gendeh ta cambia. Ele igual ayer como este dia y hasta para cuando,” ya habla el Maga Hebreo 13:8. Ta rula ya le ahora como el Rey na cielo y preparao usa con el milagroso poder que ya dale con ele el Dios para hace mas manada milagro que con el ya hace le cuando taqui le na tierra como un gente. Gendeh mas tarda, hay usa si Jesus con el de suyu poder para cura con el maga obediente gente. El maga Testigo de Jehova alegre contigo ayuda para aprende mas acerca con este bonito esperanza na futuro.

[Maga letrato]

El maga milagro de Jesus amo un expresion del “poder de Dios”

[Letrato]

Si Jesus amo un gente quien tiene grande amor