Usa con el Maga Espiritual Goal Para Dale Gloria con el Creador

“SI EL un gente no sabe si onde pantalan le anda, envano el direccion del aire.” Ta creé el otro que este maga palabra ya habla el un Roman philosopher del primer siglo que para tiene direccion el vida necesita tiene maga goal.

El Biblia ta habla kanaton acerca na manada gente quien tiene maga goal y ya hace esfuerzo para alcanza con ese. Si Noe ya trabaja por 50 año para “hace un grande barco [“arca,” NWT] para salva con disuyo familia.” Si profeta Moises ‘ya pone el de suyu corazon na premio.’ (Maga Hebreo 11:7, 26, El Nuevo Testamento na Chavacano) Y si Jehova ya dale assignment con Josue que saca con el tierra del Canaan.​—Deuteronomio 3:21, 22, 28; Josue 12:7-24.

Del primer siglo C.E., asigurao ya influencia na maga espiritual goal de Pablo el maga palabra de Jesus: “Este Buen Noticia acerca el Reino ay anuncia na entero mundo.” (Mateo 24:14) Ya manda si Jesus con Pablo que habla na maga nacion acerca con ele y ya ayuda si Pablo establicia maga congregacion na manada lugar.​—Maga Actividad 9:15; Colosa 1:23.

El maga siervo de Jehova pirmi ta dale honor con ele por medio que hace maga goal y pricura alcanza con ese. Paquemodo kita ahora puede hace maga espiritual goal? Cosa maga goal kita puede hace y cosa maga practical manera kita hace para alcanza con ese?

Paquemodo Kita Hace Maga Justo Goal?

El maga gente puede hace manada diferente goal pero el maga siervo de Jehova tiene diferente maga goal contra na maga gente del mundo. Para na manada gente, el de con todo importante goal amo que tiene sen y poder pero gendeh este debe el diaton maga goal. Sino, debe hace kita maga goal que ta dale honor con Jehova y hay ayuda kanaton para sirvi con ele. (Mateo 6:33) Ta hace kita con este cay ta ama kita con Jehova y con el maga gente.​—Mateo 22:37-39; 1 Timoteo 4:7.

Debe kita hace maga goal para mas sirvi con Jehova o para mejora el diaton maga Cristiano calidad. Pero maskin pa ansina, tiene vez posible dificil con este alcanza. Cosa kanaton puede ayuda para alcanza con el diaton maga goal?

Debe Tiene Kita Fuerte Deseo Para Alcanza con el Maga Goal

Puede kita aprende acerca na maga goal na manera si paquemodo si Jehova ya crea con el universo. El maga palabra “ya pasa el denoche y el didia” ta dale mira que ya organiza si Jehova con el de suyu trabajo na pagka-sunod-sunod del tiempo del creacion. (Genesis 1:5, 8, 13, 19, 23, 31) Tiene le goal para na cada dia y ya hace le con ese. (Revelacion 4:11) El patriarca que si Job ya habla que “si tiene [si Jehova] cosa quierre hace, ta hace le con ese.” (Job 23:13) Asigurao, bien satisfechao gayot si Jehova na “todo le ya hace” y ya habla le que “ese bien bueno”!​—Genesis 1:31.

Para puede kita alcanza con el diaton maga goal, debe kita tene fuerte deseo para hace con ese. Cosa kanaton hay ayuda para tene ese deseo? Maskin nuay pa le acaba crea con el tierra, sabe si Jehova que hay queda bonito el tierra. Si imita kita con Jehova y pensa acerca con el maga resulta y beneficio si alcanza kita con el diaton maga goal, hay tene gayot kita el deseo para hace con ese. Ese el experiencia del un 19-año que si Tony. Nuay le ulvida cuando primer vez le ya visita na branch office del maga Testigo de Jehova na Western Europe. Desde aquel tiempo, pirmi ta pregunta si Tony con el de suyu mismo cuerpo, ‘Cosa gaha el vida si queda y sirvi na ese clase de lugar?’ Cay pirmi le ta pensa acerca con ese, quierre le sirvi alla y ya hace le esfuerzo para alcanza con aquel goal. Despues del cuanto año, ya aproba con ele para sirvi na Bethel y bien alegre gayot le!

Si man junto kita con aquellos quien ya alcanza ya con el un goal, puede tambien se ayuda kanaton para tene el deseo que alcanza con el diaton goal. Cuando joven si Jayson, no quierre le predica pero despues le gradua high school, ya queda le un regular pioneer y quierre-quierre ya le predica. Cosa ya puede ayuda con Jayson para cultiva el deseo que queda pioneer? Ele ya habla: “Ya puede conmigo ayuda cuando pirmi yo tan cuento con el otro maga pioneer y tan junto kanila na ministerio.”

Puede Ayuda si Escribi Kita con el Diaton Maga Goal

Si habla kita el cosa kita ta pensa, mas queda este claro. Si Solomon ya escribi na Biblia que el justo maga palabra puede ayuda kanaton para hace maga buen decision na diaton vida. (Eclesiastes 12:11) Si escribi kita con ese maga palabra, gendeh kita pronto ulvida con ese. Este el razon si porque si Jehova ya manda con el todo maga rey de Israel que escribi un copia de maga Ley? (Deuteronomio 17:18) Puede kita escribi con el diaton maga goal y si cosa el diaton plano para alcanza con ese. Puede tambien kita escribi con el maga posible problema y si paquemodo kita con ese enfrenta. Y si man research kita si cosa kita necesita aprende y pidi ayuda del otro, mas facil para kanaton que alcanza con el diaton maga goal.

Cuando ya hace maga espiritual goal si Geoffrey, quien ya dura ya ta sirvi como un special pioneer na Asia, ya ayuda se con ele para tene paz. Cuando ya muri el de suyu mujer, bien dificil gayot el vida para con ele. Despues man adjust si Geoffrey na de suyu situacion, ya decidi le que hace maga goal que puede ayuda con ele para esta ocupao na ministerio. Ya escribi le con el de suyu maga plano y ya reza acerca con ese. Quierre si Geoffrey que puede le principia tres nuevo Bible study na fin del mes. Cada dia, tan repaso le con el de suyu maga actividad y cada diez dia, ta chequia le con el de suyu progreso. Ya alcanza ba le con el de suyu goal? Si, bien alegre si Geoffrey cay ya tiene le cuatro nuevo Bible study!

Hace Maga Diutay Goal Para Puede Alcanza con el Maga Grande Goal

Tiene maga goal que dol dificil para kanaton alcanza. Si Tony que ya menciona enante, quierre sirvi na Bethel pero ya sinti le que dol imposible se sucede. Ya sinti si Tony que gendeh le puede alcanza con el de suyu goal cay manada pa le maga cambio necesita hace na de suyu vida. Y gane, nuay pa le decidi que dedica con el de suyu vida con Dios. Pero, ya decidi si Tony que hace maga necesita cambio para queda le cualificao na bautismo. Despues le bautiza, ya decidi le man auxiliary pioneer y despues, yan regular pioneer. Ya escribi le na de suyu calendario si cuando le quierre principia con el de suyu cada goal. Despues del cuanto tiempo que yan pioneer le, ya sinti si Tony que puede gale tambien le alcanza con el de suyu goal que sirvi na Bethel.

Puede tambien kita alcanza con el maga grande goal si principia kita hace maga diutay goal. Si alcanza kita con el maga diutay goal, puede kita mira si cosa ya kita ya puede hace y anima se kanaton para alcanza con el maga grande goal. Si pirmi kita man repaso con el cosa ya kita ya puede hace, hay ayuda se kanaton que continua hace esfuerzo para alcanza con el diaton maga goal. Si continua kita reza con Jehova acerca na diaton maga goal, hay ayuda le kanaton. Si apostol Pablo ya anima que “reza firmi.”​—1 Tesalonica 5:17.

Continua Hace Esfuerzo y Queda Determinao

El diaton maga buen plano y fuerte deseo hay ayuda kanaton pero tiene vez, dol imposible siempre alcanza con el diaton maga goal. Puede kita aprende na ejemplo del dicipulo que si Marcos. Quierre le sigui con Pablo na de suyu segundo viaje como misionario pero nuay con ele lleva si Pablo y asigurao yan luya gayot si Marcos. (Maga Actividad 15:37-40) Necesita aprende si Marcos na de suyu maka-luya experiencia y man adjust con el de suyu maga goal. Ya hace gayot le se. Na uliji, ya menciona si Pablo maga buen cosas acerca con Marcos y alegre le yan junto con apostol Pedro na Babilonia. (2 Timoteo 4:11; 1 Pedro 5:13) Posible, el de suyu de con todo grande privilegio amo escribi con el inspirao istoria del vida y ministerio de Jesus.

Si ta hace kita maga espiritual goal, posible kita enfrenta maga dificultad. En vez de descanza, necesita kita mira con el diaton progreso, examina si puede pa ba kita alcanza con ese y hace maga necesita cambio. Si tiene maga sanggadura, necesita kita continua hace esfuerzo y queda determinao. Ya asigura kanaton el sabio rey que si Solomon: “Confia con Jehova na maskin cosa tu ta hace y el de tuyu maga plano hay tene buen exito.”​—Proverbio 16:3.

Pero tiene vez por causa na diaton circumstancia, dol imposible alcanza con el diaton maga goal. Por ejemplo, posible tiene kita problema na salud o obligacion na familia que ta sangga kanaton para alcanza con el cuanto goal. Ojala gendeh kita ulvida con el diaton de con todo importante goal, el vida hasta para cuando na cielo man o na Paraiso tierra. (Lucas 23:43; Filipo 3:13, 14) Paquemodo kita con este puede obtene? “El quien ta hace el querer del Dios ta queda hasta para cuando,” ya escribi si apostol Juan. (1 San Juan 2:17) Maskin pa posible gendeh kanaton permiti el diaton circumstancia para alcanza con el un particular goal, puede siempre kita “tene miedo na verdadero Dios y sigui con el de suyu maga mandamiento.” (Eclesiastes 12:13) El maga espiritual goal puede ayuda kanaton para esta focus na hacida del voluntad del Dios. Ojala usa kita con ese para dale gloria con el diaton Creador.

[Cajon]

Maga Espiritual Goal que Puede Considera

○ Le con el Biblia cada dia

○ Le con el cada issue del El Torre de Guardia y Awake!

○ Mejora con el calidad del diaton rezo

○ Cultiva con el fruta del sagrao espiritu

○ Pricura alcanza maga omento privilegio

○ Queda mas efectivo na predicacion y enseñada

○ Mejora con el diaton abilidad que predica na telefono, na informal manera y na lugar de negocio