“Cada y Cual Necesita Carga con el Disuyo Responsibilidad”
“Cada y Cual Necesita Carga con el Disuyo Responsibilidad”
“Cada uno diaton ay dale cuenta con el Dios si cosa kita ya hace.”—ROMA 14:12, El Nuevo Testamento na Chavacano.
1. Cosa situacion ya enfrenta el tres joven Hebreo?
NECESITA hace un bien importante decision el tres joven Hebreo quien ta queda na Babilonia. Hay hinca ba sila con el un grande imagen, como cosa ta manda el ley de ese lugar? O gendeh sila adora con ese pero buta kanila na un bien caliente horno? Si Sadrac, Mesac y Abednego nuay tiempo para pregunta con maskin quien pero sabe sila si cosa hace. Nuay sila man alang-alang habla: “Quierre kame que sabe uste, O rey, que gendeh kame sirvi con el de uste maga dios o adora con el imagen de oro que ya hace uste levanta.” (Daniel 3:1-18) El tres Hebreo ya hace con el diila mismo decision.
2. Quien el ya influencia con Pilato para hace el decision acerca con Jesucristo y quierre decir ba de ese que gendeh mas le responsable na cosa ya sucede?
2 Despues del maga seis siglo, tiene un gobernador quien ya puede oi con el maga acusacion contra con el un gente. Despues le examina con el caso, ya queda le convincido que inocente el acusao. Pero, el maga gente quierre que sentencia muerte con este persona. No quierre sentencia muerte el gobernador con el gente pero ya sigui le na pressure del maga gente. Ya laba le con el de suyu mano y ya habla: “Gendeh yo responsable por el muerte de este gente.” Despues, ya permiti le que mata con el gente. En vez de hace con el de suyu responsibilidad que hace decision acerca con Jesucristo, si Poncio Pilato ya deja que el otro el decidi para con ele. Maskin pa ya laba le con el de suyu mano, responsable siempre le na cosa ya sucede con Jesus.—Mateo 27:11-26; Lucas 23:13-25.
3. Porque kita gendeh debe deja que el otro el hace decision para kanaton?
3 Quetal etu? Si necesita tu hace maga decision, igual ba tu con el tres Hebreo o ta deja tu que el otro el hace decision para contigo? Gendeh facil hace maga decision. Necesita mature el un persona para puede hace maga justo decision. Por ejemplo, el maga mayores necesita hace maga buen decision para con el diila maga menor de edad anak. Siempre, bien dificil hace decision si manada cosas kita necesita considera. Maskin pa el “maga gente espiritual”—maga anciano y siervo ministerial—puede ayuda kanaton para carga con el cuanto del diaton “maga problema,” gendeh sila puede hace maga decision para kanaton. Gendeh se diila responsibilidad. (Galacia 6:1, 2) Sino, si acerca na hacida de maga decision, “cada uno diaton ay dale cuenta con el Dios si cosa kita ya hace.” (Roma 14:12) Ya habla el Biblia: “Cada y cual necesita carga con el disuyo problema personal [“responsibilidad,” NWT].” (Galacia 6:5) Entonces, paquemodo kita puede hace maga buen decision? Una, debe kita admiti que tiene kita maga limitacion y aprende si cosa kita necesita hace por causa con ese.
Si Cosa el Necesita
4. Cosa importante leccion acerca na hacida de decision el ya aprende kita na desobediencia del primer man maridable?
4 Corto tiempo despues crea el Dios con el primer man maridable, ya hace sila un decision que ya causa bien grande problema. Ya iscuji sila come con el fruta del pono de saber del bueno y malo. (Genesis 2:16, 17) Porque sila ya hace con este decision? “Ya mira el mujer que bueno para come con el fruta del pono y ya desea le con ese. Si, bonito con ese mira,” ya habla el Biblia. “Poreso, ya saca le con el fruta de este y ya come. Despues, cuando junto le con el de suyu marido, ya dale tambien le con el de suyu marido y ya come le.” (Genesis 3:6) Ya hace si Eva con este decision cay ta pensa lang le con el de suyu mismo cuerpo. Despues, ya hace tambien se si Adan. Como resulta, el pecado y muerte “ya alcanza con todo el maga gente.” (Roma 5:12) El desobediencia de Adan y Eva ta enseña kanaton un importante leccion acerca na maga limitacion del gente: Si gendeh kita sigui con el guia del Dios, facil lang kita hace maga gendeh justo decision.
5. Cosa el guia que ya dale kanaton si Jehova y cosa kita debe hace para beneficia con ese?
5 Alegre kita cay si Dios Jehova ya dale kanaton guia! El Biblia ta habla kanaton: “Hay puede tu oi un voz na de tuyu atras que ta habla: ‘Este el camino. Camina ustedes aqui,’ en caso disvia tu para na derecha o na izquierda.” (Isaias 30:21) Tan cuento kanaton si Jehova por medio na de suyu inspirao Palabra, el Biblia. Debe kita estudia con el Escritura y tene exacto saber acerca con ese. Para puede hace maga justo decision, necesita kita “el comida duro [que] para del maga gente grande.” Tiene tambien kita abilidad de entendimiento para puede “distingui el bueno y el malo.” (Maga Hebreo 5:14) Puede kita man train con ese abilidad si aplica kita con el cosa kita ta aprende na Palabra del Dios.
6. Cosa el necesita para puede ayuda kanaton enbuenamente el diaton conciencia?
6 Necesita kita con el diaton conciencia para puede hace maga buen decision. Ta puede este ayuda kanaton para mira si cosa el justo y mali, y ta puede este “acusa o alaba” kanaton. (Roma 2:14, 15) Pero para puede ayuda kanaton enbuenamente el diaton conciencia, debe este base na Palabra del Dios y debe kita aplica si cosa kita ta aprende. Si gendeh kita man train con el diaton conciencia, posible kita hace maga gendeh justo decision base na maga tradicion alrededor kanaton y si cosa ta pensa el otro maga gente. Cosa sucede si pirmi kita ignora con el diaton conciencia y viola con el maga principio del Dios? Llega el tiempo, hay queda este dol un pellejo que marcao “con hierro bien caliente.” Como resulta, gendeh mas este queda sensitivo y gendeh mas habla kanaton si tiene kita ya puede hace malo. (1 Timoteo 4:2, El Nuevo Testamento) Pero si yan train kita con el diaton conciencia base na Palabra del Dios, puede este queda buen guia para kanaton.
7. Cosa el necesita para puede hace maga buen decision?
7 Entonces, si quierre kita hace maga buen decision, necesita kita tene exacto saber na Biblia y sabe si paquemodo aplica con ese. En vez de hace lang dayun decision, necesita kita una pensa enbuenamente y busca guia na Biblia. Y maskin pa necesita kita hace dayun decision igual con Sadrac, Mesac y Abednego, puede kita hace con ese cay sabe kita si cosa gayot ta habla el Biblia y yan train enbuenamente con el diaton conciencia. Considera kita dos aspeto del diaton vida que puede kita hace justo decision.
Con Quien Kita Debe Man Amigo?
8, 9. (a) Cosa el maga principio que ta dale mira que necesita kita evita con el maga mal asosacion? (b) El mal asosacion ba ta refiri lang con aquellos maga gendeh limpio na moral que personal kita tan junto? Explica.
8 “No deja con otro que hace loco con ustedes,” ya escribi si apostol Pablo. “El maga barcada malo ta hace cambia el custumbre bueno de un gente.” (1 Corinto 15:33) Si Jesucristo ya habla con el de suyu maga dicipulo: “Ustedes gendeh del mundo.” (Juan 15:19) Puede kita aprende na este maga principio que debe kita gendeh man amigo con aquellos quien ta comete sexual imoralidad, adulterio, ladronadas, burracherias y maga cosas igual ansina. (1 Corinto 6:9, 10) Pero, mientras ta omenta el diaton saber acerca na maga verdad na Biblia, ta realiza kita que peligroso tambien que mira con este clase de maga gente na maga salida, TV o Internet, o le acerca kanila na maga libro. Deverasan tambien se si asocia kita con aquellos na maga Internet chat room “quien ta esconde si quien sila.”—Salmo 26:4.
9 Quetal aquellos quien posible limpio na moral pero gendeh ta creé con el verdadero Dios? El Escritura ta habla kanaton: “El entero mundo talli na poder del demonio.” (1 San Juan 5:19) Ya ayuda este kanaton para entende que el mal asosacion gendeh lang ta refiri con aquellos quien gendeh limpio na moral. Poreso, bueno para kanaton si man amigo kita con aquellos lang quien ta ama con Jehova.
10. Cosa puede ayuda kanaton para hace justo decision acerca na diaton asosacion na maga gente del mundo?
10 Gendeh kita puede evita que man junto con aquellos na mundo y el Biblia gendeh tambien ta habla que debe kita hace con ese. (Juan 17:15) Si ta predica kita na ministerio, ta anda na escuela o ta anda na trabajo, ta puede kita man junto con el maga gente quien gendeh ta sirvi con Jehova. El un Cristiano que casao na un gendeh Testigo posible mas necesita man junto con el maga gente del mundo. Pero si pensa kita enbuenamente, puede kita entende que el limitao asosacion na maga gente del mundo diferente na cerca relacion kanila. (Santiago 4:4) Hay ayuda este kanaton para decidi si debe ba kita participa na maga actividad junto con el diaton maga classmate despues del clase o man junto con el diaton maga uban na trabajo despues del trabajo.
Si Ta Iscuji Trabajo
11. Cosa kita una considera si ta iscuji trabajo?
11 El Biblia puede ayuda kanaton para hace maga buen decision acerca si paquemodo “cuida con el . . . [diaton] mismo familia.” (1 Timoteo 5:8) Una, necesita kita pensa si cosa kita necesita hace na un trabajo. Gendeh gayot justo que iscuji un trabajo que claro ta condena el Biblia. Poreso, el maga verdadero Cristiano gendeh ta acepta trabajo que donde posible envuelto el idolatria, ladronadas, gendeh justo usada de sangre o otro pa maga practica que gendeh uyun na Biblia. Gendeh tambien kita tan imbusterias o ta engaña con otro maskin pa pidi se kanaton que hace el diaton amo.—Maga Actividad 15:29; Revelacion 21:8.
12, 13. Puera na mismo trabajo, cosa pa kita necesita considera si ta hace maga decision acerca na trabajo?
12 Paquemodo si gendeh claro si ta viola ba el un trabajo con el cosa ta habla el Biblia? Mientras ta omenta el diaton saber na verdad, tiene maga cosas que necesita kita pensa antes kita hace un decision. Paquemodo si na diaton trabajo posible kita queda envuelto na un practica que gendeh uyun na Biblia? Por ejemplo, aceptable ba que el diaton trabajo amo que contesta maga llamada para na un establicimiento del juego de sen? Importante tambien para sabe si quien paga contigo y si onde el de tuyu trabajo. Por ejemplo, el un Cristiano ba quien tiene de suyu negocio de pintada hay acepta un trabajo que pinta un iglesia donde posible dol ta suporta le con el falso religion?—2 Corinto 6:14-16.
13 Paquemodo si na un ocasion ya pidi kanaton el diaton amo que pinta un iglesia? Na este ocasion, necesita kita pensa si puede ba kita habla gendeh y sabe si cosa kita exacto necesita hace na ese trabajo. O paquemodo si el trabajo gendeh contra na Biblia, por ejemplo, hace hatud maga carta, incluido na maga lugar donde ta hace mal practica el maga gente? El cosa ta habla el Biblia na Mateo 5:45 puede ayuda kanaton para hace justo decision. Necesita tambien kita considera si man conciencia ba kita si hace kita con el un trabajo. (Maga Hebreo 13:18) Claro que para puede hace maga buen decision acerca na trabajo, necesita kita man train con el diaton conciencia.
“Considera con Ele Pirmi na Todo Cosa Tu Hace”
14. Si ta hace kita maga decision, cosa kita debe pirmi considera?
14 Quetal si acerca na maga decision acerca na otro cosas, igual na secular educacion o medical curada? Si necesita kita hace decision acerca na maskin cosa, debe kita mira una si cosa ta habla el Biblia y despues, pensa enbuenamente si paquemodo kita aplica con ese. “Confia con Jehova con todo de tuyu corazon y no confia con el de tuyu mismo entendimiento,” ya habla el un sabio rey na Israel de antes que si Solomon. “Considera con ele pirmi na todo cosa tu hace, y hay hace le derecho el de tuyu camino.”—Proverbio 3:5, 6.
15. Cosa kita puede aprende na maga Cristiano del primer siglo acerca na hacida de decision?
15 Mas mucho, ta puede afecta con otro el maga decision que ta hace kita poreso necesita kita considera kanila. Por ejemplo, el maga Cristiano del primer siglo, gendeh mas necesita obedece con el mayoria del maga ley que ya dale el Dios con el maga Israelita acerca na comida. Puede sila iscuji come con el cuanto comida que ya prohibi na Ley. Pero, si acerca na carne de animal que posible ya ofrece una na maga falso dios, si apostol Pablo ya escribi: “Si el comida ta causa peca con un hermano na fe, hende na yo ay come carne, para hende yo ay causa con un hermano . . . para cae na tentacion.” (1 Corinto 8:11-13, El Nuevo Testamento) Ya anima con el maga Cristiano del primer siglo que dale mira consideracion con el conciencia del otro para gendeh sila man tisut. El diaton maga decision debe gendeh “puede ofende” con otro.—1 Corinto 10:29, 32, El Nuevo Testamento.
Pidi el Sabeduria del Dios
16. Na cosa manera el rezo puede ayuda kanaton si ta hace kita maga decision?
16 Bien importante el rezo si ta hace kita maga decision. “Si tiene de ustedes quien falta el saber,” ya habla si dicipulo Santiago, “pidi se con el Dios y ay dale se con ustedes, cay Ele ta dale con todo el maga gente con bondad y gendeh alang-alang.” (Santiago 1:5) Puede kita asigura que hay oi si Jehova con el diaton maga rezo y dale kanaton el sabeduria que necesita kita para hace maga buen decision. Si man cuento kita con el verdadero Dios acerca na diaton maga lingasa y pidi el de suyu guia, el sagrao espiritu puede ayuda kanaton para mas entende con el maga texto que ta considera kita y hace acorda kanaton el maga texto que posible ya ulvida kita.
17. Paquemodo puede ayuda kanaton el otro si ta hace kita maga decision?
17 Puede ba kanaton ayuda el otro si ta hace kita maga decision? Si, ya dale kanaton si Jehova maga mature hermano y hermana na congregacion. (Efeso 4:11, 12) Puede kita consulta kanila especialmente si importante el decision que hace kita. El maga hermano y hermana quien tiene hondo entendimiento na Biblia y experiencia na vida puede hace acorda kanaton el maga principio que tiene que hace na diaton decision y ayuda kanaton para “asigura el maga cosas que mas importante.” (Filipo 1:9, 10, NWT) Pero, acorda este: Debe kita con cuidao que gendeh deja con otro que hace decision para kanaton. Diaton se responsibilidad.
Pirmi Ba Bueno el Resulta?
18. Cosa kita puede habla acerca na resulta del un buen decision?
18 Pirmi ba bueno el maga resulta del maga decision que hace kita base na Biblia? Si. Maskin posible na primero, dol ta experiencia kita maga dificultad. Sabe si Sadrac, Mesac y Abednego que posible muerte el resulta del diila decision que gendeh adora con el grande imagen. (Daniel 3:16-19) Na igual manera, despues habla el maga apostoles con el Sanhedrin que debe sila obedece con Dios en vez con el maga gente, ya latiga kanila antes larga. (Maga Actividad 5:27-29, 40) Mas pa, posible afecta na resulta del diaton decision el “tiempo y maga suceso que gendeh ta expecta.” (Eclesiastes 9:11) Si experiencia kita dificultad maskin pa ya hace kita justo decision, puede kita asigura que hay ayuda kanaton si Jehova para aguanta y hay bendici le kanaton na futuro.—2 Corinto 4:7.
19. Cosa kita hace para tene kita coraje y hace el diaton mismo maga decision?
19 Entonces, si ta hace kita maga decision, debe kita mira si cosa ta habla el Biblia y despues, pensa enbuenamente si paquemodo kita aplica con el cosa kita ya aprende. Ta rindi gayot kita gracias con Jehova cay ta ayuda le kanaton por medio na de suyu sagrao espiritu y na maga mature hermano y hermana na congregacion! Por medio na de suyu guia y maga provision, puede kita tene el coraje y hace el diaton mismo maga decision.
Cosa Tu Ya Aprende?
• Cosa el necesita para puede hace maga buen decision?
• Na cosa manera el diaton pagka-mature ta afecta con el diaton decision si con quien man amigo?
• Cosa el cuanto importante cosas que debe kita considera si ta hace maga decision acerca na trabajo?
• Cosa puede ayuda kanaton si ta hace kita maga decision?
[Pregunta de Estudio]
[Letrato]
El desobediencia de Adan y Eva ta enseña kanaton un importante leccion
[Letrato]
Antes de hace un importante decision, mira si cosa ta habla el Biblia