Pregunta del Maga Quien Ta Le

Nuay menciona el Biblia acerca na toasting poreso porque el maga Testigo de Jehova ta evita participa na toasting?

Comon el toasting de vino (o otro alcoholico tomada) maskin pa ta hace con este na diferente manera na otro-otro lugar. Tiene vez, aquellos quien tan toast ta hace bangga con el diila maga baso. Mas mucho, el persona quien ta principia man toast ta esperanza alegria, buen salud, un largo vida o maga cosas que semejante con ese. El otro quien ta entra man toast ta dale mira que tan uyun sila na cosa ta pidi o ta alza con el diila baso y toma con el vino. Para na manada, este practica gendeh malo pero tiene buen razon si porque el maga Testigo de Jehova gendeh ta practica con este.

Gendeh este quierre decir que el maga Cristiano no quierre queda alegre o tiene buen salud el otro. Na conclusion del maga carta para na maga Cristiano del primer siglo, el cuerpo gobernante ta usa con el maga palabra que puede man translate como “ojala tiene ustedes buen salud,” “tiene cuidao” o “ojala na buen condicion ustedes.” (Maga Actividad 15:29) Y el cuanto del maga siervo del Dios ta habla con el maga rey: “Ojala el de mio señor . . . hay vivi hasta para cuando” o “Ojala el rey hay vivi hasta para cuando.”​—1 Rey 1:31; Nehemias 2:3.

Pero, onde estaba este practica? El The Watchtower de Enero 1, 1968, ya coteja con el The Encyclopædia Britannica (1910), Volume 13, pagina 121: “El practica que usa un baso de vino para esperanza que tiene buen salud el otro posible estaba na maga religioso ritual de antes que ta sirvi como sacrificio para na maga dios y muerto. Si ta come el maga Griego y Romano, ta vacia sila ofrecimiento de tomada para na diila maga dios y tan toast sila para dale honor con el diila maga dios y na maga muerto.” El encyclopedia ta habla que posible ta toma tambien sila vino y ta esperanza que tiene buen salud el otro si ta hace sila con este maga sacrificio.

Deverasan pa ba siempre se na diaton tiempo? El 1995 International Handbook on Alcohol and Culture ya habla: “Si tan toast el maga gente ahora, posible gendeh este por causa na religioso ritual pero estaba este na practica de antes que ta sacrificia sagrao liquido que amo el sangre o vino para na diila maga dios y esperanza ‘buen salud!’ ”

El cuanto cosas, diseño o practica que estaba na falso religion de antes gendeh quierre decir que malo ya para na maga deverasan Cristiano. Considera con el fruta que ta llama granada. El un encyclopedia de Biblia ya habla: “El granada posible ya usa tambien como un sagrao simbolo del pagano religion.” Pero, ya manda siempre el Dios con el maga Israelita que decora de granada con el ropa del alto sacerdote y con el arigui del templo de Solomon. (Exodo 28:33; 2 Rey 25:17) Omento pa, el anillo de casamiento tiene tambien coneccion na religioso ritual de antes. Pero, mayoria del maga gente ahora no sabe acerca con ese y ta considera con el anillo de casamiento como un evidencia que casao ya el un persona.

Cosa ta habla el Biblia acerca na usada de vino para adora con el falso maga dios? Por ejemplo, el maga hombre de Siquem que ta adora con Baal “ya entra . . . na casa del diila dios y ya come y ya toma y ya maldici con Abimelec,” el anak de Gideon. (Juez 9:22-28) El un leal siervo ba de Jehova hay toma vino y despues pidi con Baal que castiga con Abimelec? Na tiempo cuando manada del maga Israelita yan rebelde contra con Jehova, si Amos ya habla: “Ya tindi sila na costao del cada altar con el maga ropa que ya saca sila como garantia na debe; y el vino que ya toma sila na casa del diila maga dios amo estaba con aquellos con quien sila ya multa.” (Amos 2:8) El maga deverasan siervo ba del Dios hay hace con ese, vacia man con el vino como sacrificio o toma con ese para dale honor con el maga dios? (Jeremias 7:18) O el un deverasan siervo ba del Dios hay alza con el de suyu baso de vino pa-arriba y pidi con Dios que bendici con el futuro del un persona?

Tiene vez, el maga siervo de Jehova ta alza con el diila mano y ta pidi buen exito. Ta alza sila con el diila maga mano para con el verdadero Dios. Puede kita le: “Si Solomon ya para adelante na altar de Jehova . . . y ya alza con el de suyu maga mano para na cielo; y ele ya habla: ‘O Jehova el Dios de Israel, nuay Dios que igual con uste . . . y ojala oi uste estaba na lugar onde uste ta esta na cielo; y ojala oi uste y perdona.’ ” (1 Rey 8:22, 23, 30) Na igual manera, “si Esdras ya alaba con Jehova . . . Y el todo maga gente ya contesta, ‘Amen! Amen!’ y ya alza sila con el diila maga mano. Y ya hinca y yan hapa sila adelante de Jehova.” (Nehemias 8:6; 1 Timoteo 2:8) Claro que este maga leal siervo nuay alza con el diila mano para na cielo para pidi bendicion na dios de suerte.​—Isaias 65:11.

Manada gente ahora quien ta participa na toasting posible gendeh ta pensa que ta pidi sila contestacion o bendicion na cuanto maga dios. Pero, nuay otro razon si porque alza sila con el diila baso para arriba na cielo si tan toast. Omento pa, nuay sila con ese considera enbuenamente poreso nuay razon para imita kanila el maga verdadero Cristiano.

Manada sabe que tiene maga otro cosas que ta hace el manada gente que ta evita hace el maga Testigo de Jehova. Por ejemplo, manada gente ta saluda na bandera pero nuay se sila pensa que ese un acto de adoranza. El maga verdadero Cristiano gendeh ta sangga con el maga gente que hace ese pero gendeh tambien sila ta participa con ese. Cay sabe sila si cuando ta hace con ese maga ceremonia, manada maga Testigo el ta pricura gendeh anda na ese tiempo para gendeh puede ofende con otro. Pero maskin pa na cosa situacion, determinao sila gendeh saluda o hace maga accion que gendeh harmonia na Biblia. (Exodo 20:4, 5; 1 San Juan 5:21) Manada el quien ta pensa ahora que el toasting gendeh un religioso ritual. Pero maskin pa ansina, tiene buen razon si porque el maga Cristiano gendeh ta participa con ese ciendo estaba este na un religioso practica. Gane maskin ahora, manada ta mira con ese como ta pidi un bendicion na ‘cielo’ que dol ta pidi ayuda na un poderoso persona.​—Exodo 23:2.