Pricura Queda Mature​—‘Cerca Ya el Grande Dia de Jehova’

“Debe kita continua aprende el mas hondo enseñanza.”​—HEB. 6:1, El Nuevo Testamento.

1, 2. Na cosa manera ya tiene oportunidad el maga Cristiano na Jerusalem y Judea del primer siglo para escapa na monte?

 CUANDO na tierra si Jesus, el de suyu maga dicipulo ya atraca y ya habla: “Habla canamon si cuando ay sucede este y cosa ba el señal del de Uste llegada y del fin del mundo.” El primer cumplimiento del profecia que ya dale kanila si Jesus ya cumpli del primer siglo. Ya menciona si Jesus con el un suceso que hay sirvi como señal que bien cerca ya gayot el fin. Si puede sila mira con ese suceso, “si quien talla na Judea, [necesita] escapa para na monte.” (Mat. 24:1-3, 15-22, El Nuevo Testamento na Chavacano) Hay puede ba conoce el maga dicipulo de Jesus con ese señal y obedece con el de suyu instruccion?

² Despues del cerca tres decada, del 61 C.E., si apostol Pablo ya dale un serioso consejo con el maga Hebreo Cristiano quien ta queda na Jerusalem y na maga lugar alrededor de este. No sabe kanda Pablo y el de suyu maga hermano y hermana que maga cinco año ya lang, hay principia ya el primer parte del “grande calamidad” o tribulacion. (Mat. 24:21) Del 66 C.E., el maga Romano soldao, donde si Cestius Gallus el lider, ya anda para ataca con el Jerusalem. Ganá ya era sila pero bigla sila yan atras y ya dale este oportunidad con el maga Cristiano para puede escapa.

3. Cosa consejo ya dale si Pablo con el maga Hebreo Cristiano y porque?

³ Necesita entende aquellos maga Cristiano que aquel maga suceso amo el cumplimiento del cosa ya habla si Jesus y debe ya sila escapa. Pero, el cuanto kanila “ya queda . . . mahinay para entende.” Dol maga bata sila na espiritual que necesita “leche.” (Le con el Maga Hebreo 5:11-13.) Maskin aquellos quien por cuanto decada ya na verdad ya dale mira que ya “queda [sila] lejos con el Dios vivo.” (Heb. 3:12) El otro yan anad que falta na maga miting maskin pa “cerca ya el Dia” de calamidad. (Heb. 10:24, 25) Ya dale kanila consejo si Pablo que justo na tiempo que ta habla: “No debe kita continua aprende que aprende lang el maga primer leccion acerca di Cristo, pero debe kita continua aprende el mas hondo enseñanza acerca di suyo” o pricura queda mature.​—Heb. 6:1, El Nuevo Testamento.

4. Porque importante que esta kita alerto na espiritual y cosa puede ayuda kanaton para hace se?

⁴ Ta vivi kita ahora durante el tiempo del ultimo cumplimiento del profecia de Jesus. “Cerca ya el grande dia de Jehova”​—el dia cuando hay destroza con el sistema de Satanas. (Sof. 1:14) Mas bien necesita kita ahora que esta alerto y dispierto na espiritual. (1 Ped. 5:8) Ta hace ba gayot kita con ese? Si mature kita na espiritual, hay puede este ayuda kanaton para acorda que ta vivi ya kita na ultimo maga dia.

Si Paquemodo Queda Mature na Espiritual

5, 6. (a) Paquemodo kita puede habla que mature el un persona na espiritual? (b) Para queda mature, cosa el dos cosas que necesita kita hace?

⁵ Nuay lang anima si Pablo con el maga Hebreo Cristiano del primer siglo que pricura queda mature sino ya habla tambien le kanila si paquemodo hace con ese. (Le con el Maga Hebreo 5:14.) El maga “gente grande” o mature gendeh lang contento na “leche.” Ta come tambien sila “comida duro.” Poreso, sabe sila “el primero maga leccion” y “el mas hondo” maga verdad. (1 Cor. 2:10, El Nuevo Testamento) Mas pa, ta hace tambien sila esfuerzo para aplica con el cosa sila ta aprende y ta puede este ayuda kanila para sabe si cosa el justo y el malo. Poreso si necesita sila hace decision, ta puede sila usa con el cosa sila ya aprende na Biblia.

⁶ Si Pablo ya escribi: “Necesita kita pone mas atencion na maga insiñanza que ya oi kita, basih ay desaleja kita con esos.” (Heb. 2:1) Posible kita desaleja na verdad que gendeh kita ta realiza con ese. Puede kita evita con este si pone kita “mas atencion” si ta estudia kita con el Biblia. Poreso, el cada uno kanaton necesita pregunta con el diaton mismo cuerpo: ‘Con el maga primer leccion lang ba yo ta estudia? Quierre-quierre ba gayot yo estudia con el Palabra de Jehova o ta hace lang yo con este cay rutina ya este? Cosa yo hace para queda mas fuerte el de mio fe?’ Debe kita hace con este dos cosas. Una, debe kita queda bien familiar na Palabra del Dios. Y el ika-dos, necesita kita aprende obedece.

Queda Bien Familiar na Biblia

7. Paquemodo kita puede beneficia si bien familiar kita na Palabra del Dios?

⁷ Si Pablo ya escribi: “Si quien ta toma leche, no puede pa saboria [“no sabe,” NWT] el doctrina por causa del salvacion, cay bata pa le.” (Heb. 5:13) Para queda mature, debe kita sabe o queda bien familiar na mensaje del Dios para kanaton. Ciendo este mensaje puede le na Biblia, debe kita estudia enbuenamente con el Escritura y con el maga publicacion del “fiel y sabio esclavo.” (Mat. 24:45-47, NWT) Este clase de estudiada puede ayuda kanaton para aprende si paquemodo ta pensa el Dios y puede este ayuda para man train con el diaton abilidad para pensa. Considera con el ejemplo del un hermana que si Orchid. * Ele ya habla: “Cuando ya principia yo le con el Biblia, ya cambia gayot este con el de mio vida. Ya alcanza conmigo maga dos año para hace acaba con el entero Biblia pero ya sinti yo que dol ta conoce yo con el de mio Creador por primer vez. Ya aprende yo manada cosas acerca con ele, igual con el cosa le quierre y no quierre, y si paquemodo le de poderoso y sabio. Cay todo el dia yo ta le con el Biblia, ya puede este ayuda conmigo para enfrenta con el cuanto del maga bien dificil tiempo na de mio vida.”

8. Paquemodo puede ayuda kanaton el lehida del Biblia?

⁸ Si regular kita ta le con el Biblia, ta permiti kita que queda este “efectivo” kanaton. (Le con el Maga Hebreo 4:12.) Puede este ayuda kanaton para cambia con el diaton personalidad y para mas puede kita hace alegre con Jehova. Ta sinti ba tu que necesita tu hace esfuerzo para mas dale tiempo le con el Biblia y medita con ese?

9, 10. Cosa quierre decir que queda bien familiar na Palabra del Dios? Ilustra.

⁹ Para queda kita bien familiar na Biblia, gendeh bastante que sabe lang kita si cosa este ta habla. Na tiempo de Pablo, el maga Cristiano na Jerusalem posible sabe ya si cosa ta habla el Palabra del Dios. Pero, nuay sila aplica con ese. Nuay sila considera con este cuando ya hace sila maga decision.

¹⁰ Para queda kita bien familiar na Palabra del Dios, necesita kita sabe si cosa este ta habla y despues, aplica con ese. El ejemplo del un hermana que si Kyle ta dale mira si paquemodo con ese puede hace. Ya tiene problema si Kyle na uno del de suyu maga uban na trabajo. Cosa le ya hace para solva con ese? Ele ya explica: “Ya puede dayun yo acorda con el cosa ta habla el Biblia na Roma 12:18 que ta habla: ‘Hace todo el que puede para vivi con paz con uno y otro.’ Poreso, ya pregunta yo con ele si puede ba kame man cuento despues del trabajo.” Ya puede sila man cuento enbuenamente y alegre el de suyu uban cay ya hace manera si Kyle para solva el problema. “Ya aprende yo que pirmi gayot tiene buen resulta si ta aplica kita con el maga principio na Biblia,” ya habla si Kyle.

Aprende Obedece

11. Cosa ta dale mira que tiene vez gendeh facil obedece si dificil el circumstancia?

¹¹ Tiene vez, gendeh facil aplica con el cosa ta habla el Biblia especialmente si dificil el circumstancia. Por ejemplo, corto tiempo despues libra si Jehova con el maga Israelita na Egipto, “ya principia [sila] pelea con Moises” y manada beses sila ya “pone na probanza con Jehova.” Porque? Cay nuay sila agua para toma. (Ex. 17:1-4) Nuay pa llega dos meses despues sila promete que obedece con el “todo cosa ya habla si Jehova,” ya desobedece sila con ele y ya comete idolatria. (Ex. 24:3, 12-18; 32:1, 2, 7-9) Por causa ba quel cay tiene sila miedo cay nuay pa si Moises y talla ele na Monte de Horeb? Ya pensa ba sila que baka ataca kanila otravez el maga Amalequita y ciendo nuay si Moises, nuay quien protege kanila igual de antes? (Ex. 17:8-16) Maskin cosa pa el razon, el maga Israelita “noay cree” o nuay obedece. (Act. 7:39-41) Ya anima si Pablo con el maga Cristiano que ‘trabaja enbuenamente’ para evita “sigui na . . . ejemplo de desobediencia” del maga Israelita cuando tiene sila miedo entra na Tierra Prometido.​—Heb. 4:3, 11.

12. Paquemodo si Jesus ya aprende queda obediente y cosa el beneficio?

¹² Si quierre kita queda mature, debe kita hace esfuerzo para obedece con Jehova. Como cosa ya dale mira na ejemplo de Jesucristo, puede kita aprende queda obediente si ta sufri kita. (Le con el Maga Hebreo 5:8, 9.) Antes le ya vene na tierra, obediente ya si Jesus con el de suyu Tata. Pero, mas dificil para con ele que queda obediente cuando taqui le na tierra cay ya experiencia le grabe stress y dolor. Cay ya esta le obediente maskin pa bien dificil el situacion, si Jesus ya queda “perfecto” o cualificao para queda Rey y Alto Sacerdote.

13. Cosa ta dale mira que ya aprende kita queda obediente?

¹³ Quetal kita? Determinao ba kita que obedece con Jehova maskin pa bien dificil el situacion? (Le con el 1 Pedro 1:6, 7.) Claro el consejo del Dios acerca na moralidad, pagka-honesto, diaton converzada, lehida y estudiada del Biblia, atendida na maga miting y participacion na predicacion. (Jos. 1:8; Mat. 28:19, 20; Ef. 4:25, 28, 29; 5:3-5; Heb. 10:24, 25) Ta obedece ba kita con Jehova na este maga cosas maskin pa dificil? Si ta obedece kita, ta dale kita mira que mature kita.

Porque Importante que Queda Mature?

14. Na cosa manera un proteccion si mature el un Cristiano? Ilustra.

¹⁴ Si el un Cristiano yan train con el de suyu abilidad para pensa, puede se protege con ele na maga gente na mundo que “no sabe mas . . . si cosa el bueno o el malo.” (Ef. 4:19) Por ejemplo, el un hermano que si James regular ta le y tiene hondo apresacion na maga publicacion del organizacion. Ya acepta le un trabajo donde mujer el todo de suyu maga uban. “Manada kanila el tiene bien bajo moralidad,” ya habla si James, “pero el uno kanila dol bueno el custumbre y interesao na Biblia. Pero un dia cuando kame lang dos, ya convida le conmigo que man sex. Pensaba yo tan broma lang le pero nuay siempre le descanza convida. Na aquel tiempo, ya puede yo acorda un experiencia na The Watchtower acerca con el un hermano quien ya enfrenta semejante tentacion na de suyu trabajo. El articulo ya usa con el ejemplo de Jose y del mujer de Potifar. * Ya rimpuja dayun yo con el mujer y ya sale le.” (Gen. 39:7-12) Aliviao gayot si James cay nuay otro cosa ya sucede y ya puede le mentena limpio conciencia.​—1 Tim. 1:5.

15. Na cosa manera puede kita esta leal con Jehova si mature kita?

¹⁵ Si mature kita, puede tambien este ayuda kanaton para esta leal con Jehova y para gendeh “desaleja na buen camino por causa de maga insiñanza” del otro. (Le con el Maga Hebreo 13:9.) Si pricura kita progresa na espiritual, hay puede kita continua man focus na “maga cosas que mas importante.” (Fil. 1:9, 10, NWT) Como resulta, hay mas aprecia kita con el todo que ya hace el Dios para kanaton. (Roma 3:24) Si el un Cristiano tiene “pensamiento . . . igual como un gente grande” o si mature el de suyu entendimiento, ta sinti le este apresacion y tiene le buen relacion con Jehova.​—1 Cor. 14:20.

16. Cosa ya ayuda con el un hermana para gendeh queda desganao?

¹⁶ El un hermana que si Louise ya admiti que por cuanto tiempo despues del de suyu bautismo, ya sinti le que ta continua lang le sirvi con Jehova cay quierre le dale buen impresion con otro. “Nuay yo cosa ta hace malo,” ya habla le, “pero nuay yo tanto gana sirvi con Jehova. Ya realiza yo que para sinti yo que ta hace yo el todo para con Jehova, necesita yo hace cuanto cambio. El de con todo grande cambio que ya hace yo amo que ya pricura yo sirvi con Jehova con todo corazon.” Cay ya hace se si Louise, ‘nuay le queda desganao’ y ya puede se ayuda con ele cuando ya tiene le grabe problema na salud. (Sant. 5:8) Si Louise ya habla, “Yan dificil yo hace maga cambio pero ya queda gayot yo cerca con Jehova.”

‘Somete con Todo Corazon’

17. Porque bien importante el obediencia del primer siglo?

¹⁷ El consejo de Pablo que “continua aprende el mas hondo enseñanza” o pricura queda mature ya puede salva con el vida del maga Cristiano quien ta queda na Jerusalem y Judea del primer siglo. Aquellos quien ya sigui con ese ya puede mira con el señal que ya dale kanila si Jesus para “escapa para na monte.” Cuando ya mira sila con “el terrible horror . . . plantao na Lugar Sagrado” que ta refiri con el maga soldao de Roma alrededor del Jerusalem quien preparao ya para ataca con este, sabe sila que tiempo ya para escapa. (Mat. 24:15, 16) El maga Cristiano quien ya oi con el aviso de Jesus ya sale na Jerusalem antes con este destroza y el historian que si Eusebius ya habla que ya anda sila na ciudad de Pela. Poreso, ya puede sila evita con el de con todo grabe tragedia que ya sucede na Jerusalem.

18, 19. Porque bien importante el obediencia na diaton tiempo?

¹⁸ Si mature kita, hay puede este ayuda kanaton para queda obediente y hay salva este con el diaton vida si mira ya kita con el mas grande cumplimiento del profecia de Jesus acerca na “grande calamidad” o tribulacion. (Mat. 24:21) Hay obedece ba kita con el maskin cosa direccion que hay ricibi kita na futuro estaba na “ayudante bien fiel”? (Luc. 12:42, El Nuevo Testamento) Bien importante que aprende kita que ‘somete con todo corazon’!​—Roma 6:17.

¹⁹ Para queda kita mature, necesita kita man train con el diaton abilidad para pensa. Puede kita hace con ese si hace kita esfuerzo para queda bien familiar na Palabra del Dios y aprende queda obediente.

[Maga footnote]

Cosa Tu Ya Aprende?

• Cosa quierre decir que queda mature na espiritual y cosa kita hace para queda mature?

• Na cosa manera puede ayuda kanaton que queda mature si bien familiar kita na Palabra del Dios?

• Paquemodo kita puede aprende que queda obediente?

• Cosa el maga beneficio si mature kita?

[Pregunta de Estudio]

[Letrato]

Si aplica kita con el consejo na Biblia, puede este ayuda kanaton para solva con el maga problema na buen manera

[Letrato]

Ya salva el vida del maga Cristiano del primer siglo cay ya sigui sila con el consejo de Jesus