Porque Dedica De Tuyu Mismo Cuerpo con Jehova?

“Anoche ya aparece conmigo un Angel del Dios con quien yo . . . ta adora.”​—ACT. 27:23, El Nuevo Testamento na Chavacano.

1. Cosa ya el ya puede hace el maga candidato de bautismo y por causa con ese, cosa maga pregunta kita tiene?

 “YA ARRIPINTI ya ba tu na de tuyu maga culpa, ya dedica de tuyu vida con Jehova y ya acepta con el de suyu manera de salvacion por medio de Jesucristo?” Este el uno na dos pregunta para na maga candidato de bautismo na ultimo parte del discurso de bautismo. Porque el maga Cristiano necesita dedica el diila mismo cuerpo con Jehova? Na cosa manera kita ta beneficia si dedicao kita con Dios? Porque necesita que dedicao kita con Dios si quierre kita queda aceptable con ele? Para entende el maga contestacion de ese, necesita kita una considera si cosa el dedicacion.

2. Cosa quierre decir si el un persona ya dedica el de suyu mismo cuerpo con Jehova?

² Cosa quierre decir si el un persona ya dedica el de suyu mismo cuerpo con Dios? Nota si cosa ya habla si apostol Pablo acerca na de suyu relacion con Dios. Adelante del manada maga gente quien talla na un barco que cerca ya sumi, ya llama le con Jehova como el Dios “con quien [le] . . . ta adora.” (Le con el Maga Actividad 27:22-24.) Todo verdadero Cristiano ta adora con Jehova pero el mundo “talli na poder del demonio.” (1 Juan 5:19) Si ta reza el maga Cristiano con Jehova y ta dedica el diila mismo cuerpo con ele, ta queda si Jehova el diila Dios. Un personal promesa ese dedicacion. Despues con ese, ta bautiza con el persona na agua.

3. Cosa ta dale mira el bautismo de Jesus y paquemodo ta imita el de suyu maga siguidores con el de suyu ejemplo?

³ Si Jesus ya dale kanaton un ejemplo cuando ya hace le un personal decision que hace el voluntad del Dios. Ciendo ya nace le como parte del dedicao nacion de Israel, dedicao ya le con Dios. Pero, porque le ya bautiza? El Palabra del Dios ta indica que ele ya habla: “Taqui yo, Dios, ta vene yo para hace el de Uste querer.” (Heb. 10:7; Luc. 3:21) Entonces, el bautismo de Jesus ta dale mira que ya presenta le el de suyu mismo cuerpo con Dios para hace el De Suyu voluntad. El de suyu maga siguidores ta imita con el de suyu ejemplo si ta bautiza sila. Pero na diila situacion, el bautismo ta dale mira que ya hace ya sila un personal dedicacion con Dios na rezo.

Si Cosa el Maga Beneficio del Dedicacion

4. Cosa ta enseña kanaton el ejemplo de David y Jonatan si ta hace kita promesa con otro?

⁴ El diaton dedicacion con Dios amo un serioso cosa. Mas importante este contra na maskin cosa promesa que ta hace kita con otro. Pero, cosa el beneficio si dedicao kita con Dios? Compara kita con este na diaton amistad na un persona. Para tene amigo, necesita tu queda un amigo. Quierre decir de este que necesita tu ama con el de tuyu amigo. Uno na maga de con todo buen man amigo na Biblia amo si David y Jonatan. Gane, ya promete sila con uno y otro que esta sila man amigo. (Le con el 1 Samuel 17:57; 18:1, 3.) Igual kanila, puede queda mas fuerte el relacion del man amigo si leal sila con uno y otro.​—Prov. 17:17; 18:24.

5. Cosa puede hace el un esclavo para permanente puede beneficia bajo na poder del de suyu amo?

⁵ El Ley que ya dale el Dios con el Israel ta dale otro ejemplo del maga beneficio que puede tene el un persona si ta hace le promesa con otro. Por ejemplo, si quierre el un esclavo que permanente esta na poder del de suyu amo, puede le hace un promesa con este. El Ley ta habla: “Si insisti el esclavo y habla, ‘Ta ama yo con el de mio amo, de mio mujer y de mio maga anak; no quierre yo que libra conmigo,’ lleva con ele el de suyu amo enfrente del verdadero Dios. Despues, lleva con ele el de suyu amo na puerta o na poste del puerta para agujera con el de suyu orejas y queda le esclavo de este na entero vida de suyu.”​—Ex. 21:5, 6.

6, 7. (a) Na cosa manera ta beneficia el maga gente si ta hace sila un promesa? (b) Cosa se ta indica acerca na resulta del dedicacion na diaton relacion con Jehova?

⁶ El otro ejemplo amo el matrimonio. Un serioso promesa este entre na un hombre y un mujer. Si el dos persona ta queda junto pero gendeh casao, gendeh sila puede tene deverasan seguridad ni el diila maga anak. Pero si casao el un hombre y un mujer y ta respeta con el Biblia, hay pricura sila solva con el diila maga problema en vez de man separtajan.​—Mat. 19:5, 6; 1 Cor. 13:7, 8; Heb. 13:4.

⁷ Na tiempo del Biblia, ta beneficia el maga gente si tiene sila promesa o contrata na negocio y trabajo. (Mat. 20:1, 2, 8) Deverasan tambien se ahora. Por ejemplo, ta beneficia kita si tiene kita un escribido contrata antes principia un negocio o antes trabaja como empleado del un compania. Entonces, si ta hace kita promesa, ta beneficia kita na diaton amistad, matrimonio y trabajo. Na igual manera, si ta dedica kita el diaton mismo cuerpo con Jehova, ta queda mas fuerte el diaton relacion con ele. Ahora, hay considera kita si paquemodo el maga gente de antes ya beneficia cay dedicao sila con Dios Jehova y si porque el dedicacion mas pa contra na un promesa.

Si Paquemodo el Israel Ya Beneficia na Diila Dedicacion con Dios

8. Para na nacion de Israel, cosa quierre decir del diila dedicacion con Dios?

⁸ Ya queda dedicao con Jehova el nacion de Israel cuando ya hace sila un promesa con Dios. Ya manda kanila si Jehova que anda cerca na Monte de Sinai y ya habla le kanila: “Si obedece ustedes enbuenamente con el de mio voz y sigui con el de mio contrata, hay queda ustedes de mio especial propiedad estaba na todo maga gente.” Yan uyun el maga gente y ya habla: “Preparao kame para hace el todo cosa ya manda si Jehova.” (Ex. 19:4-8) Para na nacion de Israel, el diila dedicacion mas pa contra na hacida de promesa. Quierre decir tambien de este que si Jehova el dueño diila y ta trata le kanila como de suyu “especial propiedad.”

9. Paquemodo el Israel ya beneficia cay dedicao sila con Dios?

⁹ Ya beneficia el maga Israelita cay de Jehova sila. Leal ele y ta cuida le kanila igual si paquemodo el un amable mayores ta cuida con el de suyu anak. Ya habla el Dios con el Israel: “Puede ba ulvida el un nana con el de suyu anak que ta mama? O gendeh ba le tiene lastima con el anak que ya pari le? Maskin pa ulvida este nana, nunca yo ulvida contigo.” (Isa. 49:15) Ya guia kanila si Jehova por medio de Ley, ya anima le kanila por medio de maga profeta y ya protege le kanila por medio de maga angel. El un salmista ya escribi: “Ta declara le el de suyu palabra con Jacob, el de suyu maga regulacion y juzgamiento na Israel. Nuay se ele hace na otro nacion.” (Sal. 147:19, 20; le con el Salmo 34:7, 19; 48:14.) Igual si paquemodo ya cuida si Jehova con el de suyu dedicao nacion de antes, hay cuida le ahora con aquellos quien ya dedica el diila mismo cuerpo con ele.

Si Porque Kita Debe Dedica el Diaton Mismo Cuerpo con Dios

10, 11. Cuando ya nace kita, parte ya ba kita daan del familia del Dios? Explica.

¹⁰ Si ta pensa el cuanto acerca na dedicacion y bautismo, posible pregunta sila, ‘Porque gendeh yo puede adora con Dios si gendeh yo dedicao con ele?’ Hay queda claro el contestacion si considera kita si cosa el diaton deverasan situacion adelante con Dios. Acorda que por causa na culpa de Adan, todo kita ya nace pecador y gendeh parte del familia del Dios. (Roma 3:23; 5:12) Necesita kita dedica el diaton mismo cuerpo con ele para puede queda parte del de suyu familia. Mira kita si porque.

¹¹ Ciendo pecador tambien el diaton mayores, nuay sila puede dale kanaton perfecto vida. (1 Tim. 6:19) Por causa na culpa de Adan y Eva, todo kita ya queda lejos na diaton amable Tata y Creador. (Compara na Deuteronomio 32:5.) Desde de aquel tiempo, nuay ni uno el ya nace que parte ya daan del familia de Jehova.

12. (a) Paquemodo el maga imperfecto gente puede queda parte del familia del Dios? (b) Cosa kita debe hace antes bautiza?

¹² Pero, el cada uno kanaton puede pidi con Dios que acepta kanaton como parte del de suyu familia de maga siervo. * Paquemodo se ya queda posible para na maga pecador igual kanaton? Si apostol Pablo ya escribi: “Cuando estaba pa kita maga contrario del Dios, ya queda kita el disuyo maga amigo por medio del muerte del disuyo Anak.” (Roma 5:10) Durante el bautismo, ta pidi kita con Dios limpio conciencia para queda kita aceptable con ele. (1 Ped. 3:21) Pero antes el bautismo, tiene maga cosas que debe kita hace. Debe kita conoce con Dios, aprende que confia con ele, arripinti y cambia con el diaton vida. (Juan 17:3; Act. 3:19; Heb. 11:6) Pero, tiene pa kita otro cosa debe hace para acepta kanaton como parte del familia del Dios. Cosa este?

13. Porque justo lang que hace un promesa de dedicacion con Dios el un persona antes le queda parte del familia del maga siervo del Dios?

¹³ Antes el un persona puede queda parte del familia del maga siervo del Dios, necesita le hace un sincero promesa con Jehova. Para entende si porque, imagina con el un buen hombre quien quierre adapta un bata. Siempre, antes acepta con este como de suyu anak, quierre le que hace este bata un promesa. Poreso, ya habla le, “Antes yo acepta contigo como de mio anak, necesita yo sabe que hay ama tu y respeta conmigo como de tuyu tata.” Hay acepta lang el hombre con el bata na de suyu familia si conforme este hace con el promesa. Justo lang se, gendeh ba? Na igual manera, ta acepta si Jehova na de suyu familia con aquellos lang quien conforme hace un promesa de dedicacion con ele. El Biblia ta habla: “Ofrece el di ustedes mismo cuerpo con Dios como un sacrificio vivo pa, y dedica gayot el di ustedes mismo cuerpo para sirvi con ele y hace el cosa le quiere.”​—Roma 12:1, El Nuevo Testamento.

Un Expresion de Amor y Fe

14. Na cosa manera el dedicacion un expresion de amor?

¹⁴ Si ta dedica kita el diaton vida con Jehova, ta dale kita mira que ta ama kita con ele. Na cuanto manera, semejante este na casamiento. El un Cristiano novio ta dale mira el de suyu amor si ta promete le que hay esta le leal con el de suyu novia, maskin cosa pa pasa. Gendeh lang este basta un promesa para hace un cosa sino ta hace le con aquel promesa cay ta ama le con el de suyu novia. Ta entende le que gendeh le puede experiencia el maga beneficio del matrimonio si gendeh le hace con aquel promesa. Na igual manera, gendeh kita puede experiencia con el maga beneficio que queda miembro del familia de Jehova si gendeh kita hace el promesa de dedicacion. Poreso, ta dedica kita con el diaton mismo cuerpo con Dios cay maskin imperfecto kita, quierre kita queda de suyu y determinao kita que esta leal con ele, maskin cosa pa pasa.​—Mat. 22:37.

15. Na cosa manera el diaton dedicacion ta dale mira que tiene kita fe?

¹⁵ Si ta dedica kita el diaton mismo cuerpo con Dios, ta dale kita mira que tiene kita fe con ele. Porque kita se puede habla? Cay tiene kita fe con Jehova, tiene kita confianza que bueno para kanaton si atraca kita cerca con ele. (Sal. 73:28) Sabe kita que gendeh pirmi facil que obedece con Dios mientras ta vivi junto na “maga gente falso y pecador” pero ta confia kita na promesa del Dios que hay suporta le kanaton na diaton maga esfuerzo. (Fil. 2:15; 4:13, NWT) Sabe kita que imperfecto kita pero tiene kita confianza que hay perdona kanaton si Jehova si puede kita hace maga kamali. (Le con el Salmo 103:13, 14; Roma 7:21-25.) Tiene kita fe que si Jehova hay premia kanaton si mentena kita con el diaton integridad.​—Job 27:5.

El Dedicacion con Dios Ta Resulta na Alegria

16, 17. Porque el dedicacion con Jehova ta resulta na alegria?

¹⁶ El diaton dedicacion con Jehova ta resulta na alegria cay na ese manera, ta dale kita el diaton vida con ele. Ya menciona si Jesus un importante verdad cuando ya habla le: “Mas grande el alegria de aquel quien ta dale contra con el quien ta recivi.” (Act. 20:35) Ya experiencia gayot si Jesus con ese alegria cuando taqui le na tierra cay ya hace le esfuerzo para ayuda con otro. Ya sacrificia le el de suyu descanzo, comida y si na cosa le comfortable para puede le ayuda con otro que incuntra con el camino de vida. (Juan 4:34) Alegre si Jesus que hace alegre con el de suyu Tata. Si Jesus ya habla: “Ta hace yo firmi el cosa Le ta gusta.”​—Juan 8:29; Prov. 27:11.

¹⁷ Ya enseña si Jesus con el de suyu maga siguidores acerca si cosa puede dale alegria na diila vida cuando ya habla le: “Si quien quiere queda dimio maga siguidor, necesita olvida el disuyo mismo cuerpo.” (Mat. 16:24) Si hace kita con ese, hay queda kita mas cerca con Jehova. Tiene pa ba quien puede cuida kanaton mas pa que con Jehova?

18. Porque mas grande el alegria na dedicacion con Jehova y hacida del de suyu voluntad contra na dedicacion na otro cosas?

¹⁸ Si dedica kita el diaton vida con Jehova y continua hace el de suyu voluntad, hay dale este kanaton alegria que mas pa contra na alegria que puede dale kanaton el maskin cosa. Por ejemplo, manada maga gente ta usa con el diila vida para pricura tene maga material riqueza pero gendeh sila deverasan alegre. Pero aquellos quien ta dedica el diila mismo cuerpo con Jehova, ta tene deverasan alegria. (Mat. 6:24) Cay sila ta “trabaja junto con Dios,” alegre sila pero el diila dedicacion gendeh na un trabajo sino na Dios quien ta aprecia kanila. (1 Cor. 3:9, El Nuevo Testamento) Ta aprecia gayot si Jehova con el maga sacrificio que ta hace sila para sirvi con ele. Gane, hay hace le otravez joven con aquellos quien leal con ele para puede sila beneficia na de suyu cuidada hasta para cuando.​—Job 33:25; le con el Maga Hebreo 6:10.

19. Cosa tiene aquellos quien dedicao con Jehova?

¹⁹ Si dedica tu el de tuyu vida con Jehova, hay tene tu cerca relacion con ele. El Biblia ta habla: “Atraca con Dios y Ele ay atraca con ustedes.” (Sant. 4:8; Sal. 25:14) Na siguiente articulo, hay considera kita si porque kita puede asigura que el dedicacion con Jehova amo el de con todo buen decision que puede kita hace.

[Footnote]

Cosa De Tuyu Contestacion?

• Cosa quierre decir si ta dedica el un persona el de suyu mismo cuerpo con Dios?

• Cosa el maga beneficio si dedicao kita con Dios?

• Porque el maga Cristiano debe queda dedicao con Jehova?

[Pregunta de Estudio]

[Letrato]

El dedicacion y hacida del voluntad del Dios ta resulta na deverasan alegria