Maga Mujer, Porque Ustedes Debe Somete?

“El marido amo el cabeza del disuyo mujer.”​—1 COR. 11:3.

1, 2. (a) Cosa ya escribi si apostol Pablo acerca na arreglamiento de Jehova del pagka-cabeza y porque necesita somete el maga mujer? (b) Cosa maga pregunta hay considera na este articulo?

 ESTE el arreglamiento de Jehova que si apostol Pablo ya menciona cuando ya escribi ele que “Si Cristo amo el cabeza de todo maga hombre” y “el Dios amo el cabeza de Cristo.” (1 Cor. 11:3) Del ya pasa articulo, ya puede kita aprende que alegre si Jesus somete con el de suyu cabeza, si Dios Jehova, y ya aprende kita que el cabeza del maga Cristiano hombre amo el Cristo. El Cristo bueno, tiene compasion y ta trata enbuenamente con el maga gente. El maga hombre na congregacion debe ansina trata con otro, especialmente con el diila mujer.

² Quetal el maga mujer? Quien el diila cabeza? “El marido amo el cabeza del disuyo mujer,” ya escribi si Pablo. Cosa debe el mirada del maga mujer acerca con este mandamiento? Aplicable ba siempre este principio si el diila marido gendeh un Testigo de Jehova? Quierre decir ba este que el mujer gendeh ya puede habla si cosa le ta sinti y si cosa le ta pensa si ta hace sila maga decision? Paquemodo el mujer puede ganá el respeto del de suyu marido?

“Hace Yo Quien Ayuda con ele Como De Suyu Uban”

3, 4. Porque tiene beneficio si sigui con el arreglamiento na familia?

³ El Dios amo el quien ya decidi si quien debe guia con el familia. Despues crea con Adan, si Dios Jehova ya habla: “Gendeh bueno que continua solo-solo el hombre. Hay hace yo quien ayuda con ele como de suyu uban.” Despues crea con Eva, si Adan ya queda bien alegre cay tiene ya le uban quien hay ayuda con ele poreso ya habla le: “Este ya el bukuk del de mio bukuk y laman del de mio laman.” (Gen. 2:18-24) Si Adan y Eva tiene el oportunidad para queda el mayores del maga perfecto anak quien hay vivi hasta para cuando con alegria na paraiso tierra.

⁴ Por causa na rebellon del diaton primer mayores, ya perde el diila oportunidad para vivi hasta para cuando. (Le con el Roma 5:12.) Pero el Dios ta mira siempre con el marido como el cabeza del mujer. Si sigui enbuenamente con este arreglamiento, hay lleva este grande beneficio y alegria na matrimonio. El man maridable puede queda alegre igual con Jesus cuando ya somete le con el de suyu cabeza, si Jehova. Cuando talla pa le na cielo, si Jesus ‘alegre adelante con [Jehova] todo el tiempo.’ (Prov. 8:30) Por causa na imperfeccion, el maga cabeza del familia gendeh mas puede demonstra con el diila autoridad na perfecto manera y el maga mujer gendeh mas puede somete na perfecto manera. Pero si el marido y el mujer continua hace el diila de con todo bueno, hay queda siempre alegre el diila matrimonio.

5. Porque debe sigui el man maridable con el consejo na Roma 12:10?

⁵ Para queda alegre el man maridable, necesita sila sigui el consejo na Biblia: “Ama con uno y otro igual como el maga hermano ta ama. Respeta gayot con uno y otro.” (Roma 12:10) Necesita tambien sila hace esfuerzo para “man amigo con uno y otro con cariño, y perdona con uno y otro.”​—Ef. 4:32.

Si el Marido o el Mujer Gendeh Ta Sirvi con Jehova

6, 7. Cosa posible el resulta si el un Cristiano mujer ta somete con el de suyu marido que gendeh siervo?

⁶ Paquemodo si el de tuyu marido o mujer gendeh siervo de Jehova? Mas mucho, el marido amo el gendeh siervo. Si ansina, paquemodo debe trata el mujer con el de suyu marido. El Biblia ta contesta: “Ustedes tamen, maga mujer, necesita somete con el de ustedes maga marido. Ansina, si tiene diila quien gendeh ta cree na Palabra, el de ustedes custumbre ay comvinci canila para cree. Gendeh mas ustedes ay necesita conversa pa ni un palabra, cay sila ay mira si paquemodo de limpio y respetoso el de ustedes custumbre.”​—1 Ped. 3:1, 2.

⁷ El Biblia ta habla con el maga mujer que debe sila continua somete con el diila marido que gendeh siervo. El de suyu buen conducta puede influencia con ele para considera si porque ansina de bueno el de suyu mujer. Como resulta, el marido posible hay tene interes con el cosa ta creé el de suyu Cristiano mujer y acepta con el verdad.

8, 9. Cosa puede hace el un Cristiano mujer si el de suyu marido quien gendeh siervo gendeh ta cambia maskin pa na de suyu buen conducta?

⁸ Pero quetal si nuay cambia el marido que gendeh siervo? El Biblia ta anima con el maga Cristiano mujer que continua dale mira buen calidad maskin pa dificil se hace. Por ejemplo, puede kita le na 1 Corinto 13:4: “El amor paciencioso.” Entonces, bueno si el Cristiano mujer hay continua “aguanta con uno y otro con humildad, respeto y paciencia” y dale mira amor con el de suyu marido. (Ef. 4:2) Na ayuda del activo fuerza del Dios, el de suyu sagrao espiritu, puede mentena con el maga Cristiano calidad maskin pa na maga dificil circumstancia.

⁹ “Tiene yo fuerza para enfrenta todo cosas por causa con ele quien ta dale conmigo poder,” ya escribi si Pablo. (Fil. 4:13, NWT) Por medio na espiritu del Dios, el un Cristiano marido o mujer puede hace con el maga cosas que imposible. Por ejemplo, el maltratamiento del un marido o mujer posible causa kanaton para man balus. Pero, el Biblia ta habla con el todo Cristiano: “No devolve mal con mal . . . cay escribido na Escritura: El Señor ta habla: Dimio el venganza. Yo amo quien ay dale el pago que conviene canila.” (Roma 12:17-19) Na igual manera, el 1 Tesalonica 5:15 ta conseja kanaton: “Bicia para noay quien ay hace venganza, y precura firmi hace el maga cosa-cosa bueno para con uno y otro y para con todo el maga gente.” Na ayuda del sagrao espiritu de Jehova, el cosa que imposible para na diaton mismo cuerpo ta queda posible. Poreso, necesita kita el sagrao espiritu del Dios para ayuda kanaton!

10. Cosa ya hace si Jesus con el gendeh buen palabra y accion del otro?

¹⁰ Ya dale buen ejemplo kanaton si Jesus si paquemodo trata con aquellos quien ya habla o ya hace maga gendeh bueno cosas con ele. “Cuando ya insulta con Ele,” ya habla na 1 Pedro 2:23, “noay Ele contesta de insulto. Cuando ya sufri Le, noay Le dale amenazo, sino ya pone Le su esperanza con el Juez justo.” Ta anima kanaton que sigui con el de suyu buen ejemplo. No rabia na mal conducta del otro. Ta anima con el todo Cristiano que ‘queda unido na un pensamiento; tene lastima y ama con uno y otro como hermano y hermana; queda amable y humilde; no debolbe malo con quien ta hace malo, ni debolbe insulto con quien ta insulta.’​—1 Ped. 3:8, 9.

Puede Ba el Mujer Dale el De Suyu Opinion?

11. Cosa grande privilegio el cuanto maga Cristiano mujer hay tene?

¹¹ Gendeh ba puede habla el un mujer con el de suyu marido si cosa le ta pensa acerca na maga cosas que tiene que hace na familia o na otro cosa cay ta somete le con el de suyu marido? Gendeh. Igual ya dale manada privilegio si Jehova con el maga mujer y con el maga hombre. Pensa con el grande privilegio que tiene el 144,000 individual para rula como maga rey y sacerdote na cielo bajo con el Cristo si hay rula ya le con el tierra! Incluido alli el maga mujer. (Gal. 3:26-29) Ya dale honor si Jehova con el maga mujer cuando ya dale le kanila importante trabajo para hace.

12, 13. Dale un ejemplo si paquemodo el maga mujer ya habla maga profecia.

¹² Por ejemplo, na tiempo del Biblia, el maga mujer ta habla maga profecia. El Joel 2:28, 29 ya habla: “Hay vacia yo con el de mio espiritu na todo clase de gente, y el de ustedes maga anak hombre y anak mujer hay predicta . . . maskin na de mio maga hombre y mujer esclavo hay vacia yo con el de mio espiritu na ese maga dia.”

¹³ Maga 120 dicipulo de Jesus el quien yan junto-junto na casa na Jerusalem na dia de Pentecostes 33 C.E. Incluido alli el maga mujer y maga hombre. El espiritu del Dios ya vacia na ese grupo. Despues, ya menciona si Pedro acerca na cosa ya predicta si profeta Joel y ya aplica con este na maga hombre y mujer. Si Pedro ya habla: “El ta sucede ahora amo el cosa ya habla el profeta Joel: ‘El Señor amo el ta comversa: na ultimo maga dias ay vacia yo mi Espiritu con todo el maga gente: El de ustedes maga anak hombre y mujer ay man profeta; el de ustedes maga jovenes ay mira maga vision y el de ustedes maga Anciano ay suña maga sueño. . . . y ay man profeta sila.’”​—Act. 2:16-18.

14. Cosa el papel del maga mujer na predicacion del buen noticia?

¹⁴ Na tiempo del maga apostoles, el maga mujer ya trabaja enbuenamente para predica con el buen noticia y ya ayuda tambien sila na otro practical maga manera. (Luc. 8:1-3) Por ejemplo, si apostol Pablo ya habla que si Febe “ta ayuda tamen con el maga creyente na Cencrea.” Y cuando ya man quetal si Pablo con el maga hermano y hermana, ya menciona le maga cuanto fiel mujer, incluido si “Trifena y con Trifosa, quien ta trabaja na servicio del Señor.” Ya menciona tambien le con “Persida quien hasta ahora ta trabaja gayot mucho na servicio del Señor.”​—Roma 16:1, 12, El Nuevo Testamento.

15. Cosa el papel del maga mujer na predicacion del buen noticia na diaton tiempo?

¹⁵ Na diaton tiempo, manada de aquellos quien ta predica acerca na Reino del Dios amo maga mujer. (Mat. 24:14) Manada kanila el maga pioneer, misionario y maga Bethelite. El salmista que si David ya canta: “Si Jehova ya dale el mandato; el maga mujer quien ta proclama el buen noticia igual como un grande grupo de soldao.” (Sal. 68:11) Deverasan gayot este maga palabra! Ta aprecia si Jehova con el cosa ya hace el maga mujer na predicacion del buen noticia y na acomplisimiento del de suyu proposito. El de suyu mandato que somete el maga mujer gendeh quierre decir que esta ya lang sila silencio.

Dos Mujer que Nuay Esta Silencio

16, 17. Paquemodo si Sara ya dale mira que el maga mujer puede dale con el diila opinion?

¹⁶ Si ya dale si Jehova con el maga mujer manada privilegio, gendeh ba debe consulta anay el maga marido con el diila mujer antes hace maga serioso decision? Sabio sila si hace se sila. El Biblia ya menciona cuanto suceso donde el maga mujer ya converza o ya actua maskin el diila maga marido nuay pidi el diila opinion. Considera con el dos ejemplo.

¹⁷ Si Sara, el mujer del patriarca que si Abraham, pirmi ta habla con ele que manda sale con el de suyu ika-dos mujer cay nuay este respeto. “Gendeh alegre si Abraham na cosa ya habla si Sara” pero uyun con ese el Dios. Si Jehova ya habla con Abraham: “No tu queda triste por causa na cosa ya habla si Sara acerca na de tuyu anak y na de tuyu mujer esclavo. Oi con ele.” (Gen. 21:8-12) Si Abraham ya obedece con Jehova, ya oi con Sara y ya hace con el cosa le ya pidi.

18. Cosa iniciativo ya hace si Abigail?

¹⁸ Considera tambien con Abigail, el mujer de Nabal. Cuando ta escapa si David con Rey Saul, yan campo le cerca na maga carnero de Nabal. En vez saca con el maga animal de ese rico gente, si David y el de suyu maga soldao ya protege con este. Pero, si Nabal “violente y mal custumbre” y “ya insulta” le con el maga soldao de David. Ele “nuay sirvi” y “nuay le juicio.” Nuay dale si Nabal cuando el maga soldao de David ya pidi comida. Cosa ya hace si Abigail cuando ya sabe le se? Si Abigail “ya saca dayun 200 pan, dos bangga de vino, cinco carnero, cinco seah de tostao grano, 100 cake de pasas y 200 cake de higo” y ya dale este con David y el de suyu maga soldao. Ya hace ba si Abigail si cosa el justo? “Ya castiga si Jehova con Nabal,” ya habla el Biblia, poreso “ya muri le.” Na uliji, si David ya casa con Abigail.​—1 Sam. 25:3, 14-19, 23-25, 38-42.

‘El Mujer Quien Hay Ricibi Alabanza’

19, 20. Cosa el razon si porque el un buen mujer conviene ricibi alabanza?

¹⁹ Ta comenda el Biblia con el maga mujer quien ta actua uyun na voluntad de Jehova. El libro del Proverbio ta alaba con el “un buen mujer” hablando: “El de suyu valor mas pa na maga corales. Con todo corazon con ele ta confia el de suyu marido y nuay cosa falta na cosa necesita el marido. Na entero vida de suyu, ta hace le cosas bueno na de suyu marido y gendeh cosas malo.” Mas pa, “ta converza le con sabeduria; el ley del pagka-bueno talli na de suyu lenggua. Ta mira le con el trabajo del de suyu familia, y gendeh le ta come con el pan de plojonadas. El de suyu maga anak hay levanta y habla que alegre le; el de suyu marido ta levanta y ta alaba con ele.”​—Prov. 31:10-12, 26-28.

²⁰ Cosa el razon si porque el un buen mujer conviene ricibi alabanza? “El ichura maka-engaña y posible que el pagka-bonita pasada lang,” ya habla el Proverbio 31:30, “pero el mujer quien tiene miedo con Jehova hay ricibi alabanza.” El mujer quien tiene miedo con Jehova ta entende que importante para con ele que somete con aquellos con quien ya dale si Jehova el responsibilidad que guia na familia y na congregacion. “El marido amo el cabeza del disuyo mujer,” como “si Cristo amo el cabeza de todo maga hombre” y “el Dios amo el cabeza de Cristo.”​—1 Cor. 11:3.

Rindi Gracias na Regalo del Dios

21, 22. (a) Cosa el maga razon si porque el maga casao Cristiano debe rindi gracias con Dios na regalo del matrimonio? (b) Porque kita debe dale mira respeto na arreglamiento de Jehova na autoridad y pagka-cabeza? (Mira con el cajon na pagina 17.)

²¹ El maga casao Cristiano tiene manada razon para rindi gracias con Dios! Puede sila man junto como un alegre maridable. Mas pa, puede sila rindi gracias con Dios na regalo del matrimonio por causa cay ya dale se kanila el oportunidad para usa con el diila vida para sirvi con Jehova. (Rut 1:9; Miq. 6:8) Ele​—el quien ya origina con el matrimonio—​sabe gayot si paquemodo queda alegre el man maridable. Pirmi hace el voluntad del Dios y “el alegria que ta sale con Jehova amo [hay queda] el de ustedes fuerza” maskin pa na este trambulicao mundo.​—Neh. 8:10.

²² El un Cristiano marido quien ta ama con el de suyu mujer igual si paquemodo le ta ama con el de suyu mismo cuerpo hay usa con el de suyu autoridad para guia na buen y amable manera. Facil para con el marido que ama con el de suyu mujer cay el de suyu mujer ta ama con Jehova y ta suporta y ta respeta con ele. Mas pa con todo, el diila buen ejemplo como man maridable hay dale honor con Dios Jehova.

Ta Acorda Pa Ba Tu?

• Cosa el arreglamiento de Jehova acerca na pagka-cabeza y porque debe somete el maga mujer?

• Porque el man maridable debe dale honor con uno y otro?

• Paquemodo debe trata el un Cristiano mujer con el de suyu marido que gendeh Testigo?

• Porque debe consulta el maga marido con el diila maga mujer antes hace maga serioso decision?

[Pregunta de Estudio]

[Cajon]

Porque Dale Mira Respeto na Autoridad?

Ya decidi si Jehova si quien debe tene autoridad y si paquemodo sila con ese usa. Ya hace con este para na beneficio del maga espiritu creatura y para na maga gente. Ya dale este kanila el oportunidad que usa con el diila libertad para iscuji y hace alegre con Dios por medio na diila servicio con paz y unidad.​—Sal. 133:1.

El maga iscujido Cristiano ta respeta con el autoridad de Jesucristo. (Ef. 1:22, 23) Como respeto na autoridad de Jehova, “el Anak ay somete tamen con el Tata, quien ya manda con todo maga cosa-cosa somete con Cristo. Ansina el Dios ay reina gayot con todo.” (1 Cor. 15:27, 28) Poreso, aquellos quien ta sirvi con Jehova debe tambien respeta con el autoridad del cuanto que ya dale el Dios na familia y na congregacion! (1 Cor. 11:3; Heb. 13:17) Si hace kita con este, si Jehova hay bendici kanaton.​—Isa. 48:17.

[Letrato]

El rezo puede ayuda con el Cristiano mujer para dale mira maga calidad del Dios

[Letrato]

Ta aprecia si Jehova con el maga cosa ya hace el maga mujer para cumpli con el de suyu proposito