Hace Maga Decision que Ta Honra con Dios

“El sabio ta pensa antes hace paso.”​—PROV. 14:15.

1, 2. (a) Cosa debe el de con todo importante si ta hace kita maga decision? (b) Cosa maga pregunta kita considera?

POSIBLE ta hace kita manada de este cada dia. El manada de este gendeh tanto importante. Pero el cuanto, puede cambia con el diaton vida. Cosa este? Maga decision. Na todo maga decision que ta hace kita, grande man o diutay, el de con todo importante kanaton amo que puede honra con Dios.​—Le con el 1 Corinto 10:31.

² Facil lang ba contigo hace decision o dificil este para contigo? Para progresa na espiritual, debe kita sabe si paquemodo determina si cosa el justo y si cosa el mali para puede kita hace maga decision base na cosa kita ta creé y gendeh na cosa ta habla el otro. (Roma 12:1, 2; Heb. 5:14) Cosa pa el otro importante razon si porque kita necesita aprende hace maga buen decision? Porque tiene vez bien dificil con este hace? Y cosa kita puede hace para asigura que el diaton maga decision ta honra con Dios?

Porque Kita Necesita Hace Maga Decision?

3. Cosa kita debe gendeh permiti que influencia kanaton si ta hace kita maga decision?

³ Si gendeh kita asigurao acerca na maga principio na Biblia, el diaton maga uban na escuela o na trabajo posible pensa que gendeh kita deverasan convincido na cosa kita ta creé y facil lang kanaton puede influencia. Posible sila man imbusterias, copia o ruba y despues, convinci kanaton que “man afavor con el mayoria” por medio de sigui kanila o esconde con el cosa sila ya hace. (Ex. 23:2) Pero, el un persona quien sabe hace maga decision que ta honra con Dios gendeh hay permiti con el miedo o con el deseo que acepta con ele el otro para causa con ele que actua na manera que tan contra con el de suyu conciencia.​—Roma 13:5.

4. Porque posible el otro quierre hace decision para kanaton?

⁴ Gendeh todo quien quierre hace decision para kanaton quierre kanaton causa peligro. El diaton maga amigo y amiga quien tiene buen intencion posible insisti que sigui kita con el diila consejo. Si ta queda kita lejos na diaton familia, posible el diaton maga pariente quierre hace maga decision para kanaton cay bien interesao sila na diaton bien. Por ejemplo, considera con el clase de curada que hay iscuji kita. El Biblia claro ta condena con el gendeh justo usada de sangre. (Act. 15:28, 29) Pero, el Biblia gendeh ta dale especifico direccion acerca na maga otro clase de curada. Poreso, necesita kita pensa acerca con este maga cosas y hace el diaton mismo decision. * Posible, el diaton maga familia y amigo quierre insisti acerca na este maga cosas. Pero si ta decidi acerca na este maga cosas, el cada uno bautizao Cristiano necesita carga con el “disuyo problema personal” o responsibilidad. (Gal. 6:4, 5, El Nuevo Testamento na Chavacano) El de con todo importante kanaton amo que mentena un buen conciencia adelante con Dios y gendeh na maga gente.​—1 Tim. 1:5.

5. Cosa kita hace para evita perde el diaton fe?

⁵ Bien peligroso si no sabe kita hace decision. Si dicipulo Santiago ya escribi que el un persona igual ansina “firmi ta duda si cosa le ta hace.” (Sant. 1:8) Igual na un gente na un barco que nuay timon durante el tifun, facil lang con ele puede controla el otro maga gente. Facil lang para con ese persona que perde el fe y despues disculpa con otro con el cosa ya sucede con ele! (1 Tim. 1:19) Paquemodo kita puede evita con ese? Debe kita “esta fuerte na fe.” (Le con el Colosa 2:6, 7.) Para puede hace con este, necesita kita aprende hace maga decision que ta dale mira el diaton fe na inspirao Palabra del Dios. (2 Tim. 3:14-17) Pero, cosa puede sangga kanaton para hace maga buen decision?

Si Porque Posible Dificil Hace Maga Decision

6. Cosa posible el efecto kanaton del miedo?

⁶ Posible, gendeh kita puede hace decision por causa na miedo​—miedo que hace gendeh justo decision, miedo que falla na uliji o miedo que man huya enfrente del otro. Gendeh malo que tene ese maga lingasa. Nuay ni uno el quien quierre hace gendeh justo decision que posible causa problema y huya. Maskin pa ansina, el amor con Dios y con el de suyu Palabra puede ayuda kanaton para enfrenta con ese miedo. Na cosa maga manera? El amor con Dios hay motiva kanaton para pirmi consulta con el de suyu Palabra y maga publicacion que base na Biblia antes kita hace maga importante decision. Mas poco el diaton kamali si hace kita con ese. Porque? Cay el Biblia puede “dale saber na maga gendeh experienciao, para dale con el un joven saber y abilidad para pensa.”​—Prov. 1:4.

7. Cosa kanaton puede enseña el ejemplo de Rey David?

⁷ Pirmi ba justo el maga decision que hay hace kita? Gendeh. Todo kita tan kamali. (Roma 3:23) Por ejemplo, si Rey David un sabio y fiel gente. Pero, tiene tiempo que ya hace le maga gendeh justo decision que ya causa sufrimiento con ele y con otro. (2 Sam. 12:9-12) Pero, nuay pensa si David que ciendo yan kamali le, gendeh mas le puede hace maga decision que ta hace alegre con Jehova. (1 Rey 15:4, 5) Puede siempre kita hace maga decision maskin pa yan kamali kita de antes si igual con David, acorda kita que si Jehova hay perdona con el diaton maga pecado. Hay continua le suporta con aquellos quien ta ama y ta obedece con ele.​—Sal. 51:1-4, 7-10.

8. Cosa kita puede aprende na cosa ya habla si apostol Pablo acerca na matrimonio?

⁸ Puede kita menora con el lingasa que ta sinti kita si ta hace maga decision. Paquemodo? Si realiza kita que tiene vez, gendeh lang uno el justo decision. Considera si cosa ya habla si apostol Pablo acerca na matrimonio. Ya guia con ele el Dios para escribi: “Si tiene quien ta pensa que gendeh le ta actua na justo manera como un soltero o dalaga y si ya pasa ya le na tiempo de pagka-joven, este el cosa le debe hace: Casa le si ese el cosa le quierre; nuay le culpa. Deja con ele que casa. Pero si ya decidi el un persona na de suyu corazon que gendeh casa y determinao le con ese hace y gendeh le ta sinti que necesita le casa y ta puede le controla con el de suyu maga deseo, hay beneficia le. Hay beneficia tambien el quien casa pero mas beneficia el quien gendeh casa.” (1 Cor. 7:36-38, NWT) Maskin pa ya habla si Pablo que mas bueno si esta single, bueno tambien si casa el un persona.

9. Debe ba kita man lingasa si cosa ta pensa el otro acerca na diaton maga decision? Explica.

⁹ Debe ba kita man lingasa si cosa pensa el otro acerca na maga decision que hay hace kita? Si. Yan cuento si Pablo acerca con este cuando ya discuti le si come ba o gendeh con el maga comida que ya sacrificia na maga idolo. Ya menciona le que posible gendeh malo el decision pero puede siempre este causa peligro con el un persona quien gendeh fuerte el conciencia. Cosa el decision de Pablo? “Si el comida ta dale mal ejemplo [“hace tisut,” NWT] con mi hermano,” ya escribi le, “gendeh mas yo ay come carne otra vez para gendeh yo ay dale mal ejemplo con mi hermano.” (1 Cor. 8:4-13) Necesita tambien kita considera si paquemodo el diaton maga decision hay afecta con el conciencia del otro. Siempre, el de con todo importante amo si cosa el efecto del diaton maga decision na diaton amistad con Jehova. (Le con el Roma 14:1-4.) Cosa maga principio na Biblia el puede ayuda kanaton para hace maga decision que ta honra con Dios?

Seis Cosas que Puede Ayuda Kanaton Para Hace Maga Justo Decision

10, 11. (a) Paquemodo kita puede evita queda atribido na diaton familia? (b) Cosa debe acorda el maga anciano si ta hace maga decision que ta afecta na congregacion?

¹⁰No hace decision si nuay tu derecho para hace con ese. Antes decidi con el un cosa, necesita kita pregunta na diaton mismo cuerpo, ‘Iyo ba el debe decidi con este?’ Si Rey Solomon ya escribi: “El pagka-atribido ta resulta na verguenza, pero el sabeduria talli con el maga modesto.”​—Prov. 11:2.

¹¹ Posible, dale oportunidad el maga mayores con el diila maga anak para hace decision pero gendeh debe hace decision el maga anak que nuay consulta con el diila mayores. (Col. 3:20) El maga mujer y nana tiene autoridad na familia pero debe sila realiza que el diila marido amo el cabeza del familia. (Prov. 1:8; 31:10-18; Ef. 5:23) Necesita tambien realiza el maga marido que limitao el diila autoridad y debe sila respeta con Jesus como el diila cabeza. (1 Cor. 11:3) Ta hace decision el maga anciano que ta afecta na congregacion. Pero, ta asigura sila que gendeh “man lampas na cosas que escribido” na Palabra del Dios. (1 Cor. 4:6, NWT) Ta sigui tambien sila con el maga direccion estaba na fiel esclavo. (Mat. 24:45-47) Hay evita kita manada problema si hace lang kita maga decision que tiene kita derecho para hace.

12. (a) Porque kita debe man research? (b) Explica si paquemodo puede man research el un persona.

¹²Man research. “El maga plano del buen trabajador, asigurao hay tene buen exito,” ya escribi si Solomon, “pero todo aquellos quien ta apura asigurao hay experiencia pobreza.” (Prov. 21:5) Por ejemplo, ta considera ba tu que entra na un negocio o acepta con el un trabajo? No permiti que el de tuyu emocion hay controla con el de tuyu decision. Sabe con el todo informacion acerca con ese, pidi consejo con aquellos familiar con ese maga cosas y determina si cosa maga principio na Biblia el ta discuti acerca con ese. (Prov. 20:18) Para organiza con el de tuyu research, prepara dos lista​—el uno ta discuti acerca el maga beneficio mientras el otro, el maga mal cosas que posible sucede. Antes tu decidi, “carcula el maga gastos.” (Luc. 14:28) No lang pensa si paquemodo tu de manada sen tene sino si cosa el efecto de este na de tuyu espiritualidad. Necesita tiempo y esfuerzo para man research. Pero si hace tu se, puede tu evita hace maga dayun-dayun decision que posible causa lingasa na uliji.

13. (a) Cosa kanaton ta asigura el Santiago 1:5? (b) Paquemodo kanaton puede ayuda si pidi kita sabeduria na rezo?

¹³Reza que dale kanaton sabeduria. El diaton maga decision hay honra lang con Dios si pidi kita con ele ayuda si ta hace con ese. Si dicipulo Santiago ya escribi: “Si tiene de ustedes quien falta el saber, pidi se con el Dios y ay dale se con ustedes, cay Ele ta dale con todo el maga gente con bondad y gendeh alang-alang.” (Sant. 1:5) Gendeh kita debe tene huya admiti que necesita kita con el sabeduria del Dios para hace maga decision. (Prov. 3:5, 6) Si confia kita na diaton lang mismo entendimiento, facil lang kita man kamali. Si ta reza kita para na sabeduria y ta busca maga principio na Palabra del Dios, ta permiti kita con el sagrao espiritu que ayuda kanaton determina con el diaton deverasan motivo si porque kita quierre hace con ese un cosa.​—Heb. 4:12; le con el Santiago 1:22-25.

14. Porque kita debe evita man dulug si ta hace decision?

¹⁴Hace con el decision. No kita dayun hace con este si nuay pa kita man research y reza para na sabeduria. El un sabio persona “ta pensa antes hace paso.” (Prov. 14:15) Pero, no tambien man dulug. Tiene vez, el un persona posible tan dulug maskin nuay buen razon. (Prov. 22:13) Pero, ta hace le siempre decision​—ta permiti le con el otro maga gente o el de suyu circumstancia que controla con el de suyu vida.

15, 16. Cosa el necesita para hace con el cosa ya decidi?

¹⁵Hace esfuerzo para tene buen exito el decision. Sayang lang el esfuerzo que ya hace kita para hace justo decision si gendeh kita hace con el cosa kita ya decidi. “El cosa que puede tu hace, hace con todo fuerza,” ya escribi si Solomon. (Ecl. 9:10) Para tene buen exito, debe kita usa con el maga cosas que tiene kita para hace con el diaton maga decision. Por ejemplo, el un publisher na congregacion posible ya decidi que man pioneer. Hay tene ba le buen exito? Puede le se hace si gendeh le permiti con el de suyu trabajo y recreacion que saca con el de suyu grande tiempo y fuerza que necesita le para hace con el de suyu ministerio.

¹⁶ Mas mucho del maga buen decision dificil hace. Porque? Cay “el entero mundo talli na poder del demonio.” (1 Juan 5:19) Debe kita hace esfuerzo para man contra con “el ta goberna na este mundo de escuridad; el maga espiritu malo quien ta esta na maga cielo.” (Ef. 6:12) Si apostol Pablo y si dicipulo Judas ya indica que gendeh facil el vida de aquellos quien quierre honra con Dios.​—1 Tim. 6:12; Jud. 3.

17. Si acerca na maga decision que ta hace kita, cosa kanaton ta expecta si Jehova?

¹⁷Pensa con el maga decision que ya hace y mira si necesita ba con este hace cambio. Gendeh todo decision que ya hace kita hay tene buen exito. Todo kita afectao na “tiempo y maga suceso que gendeh ta expecta.” (Ecl. 9:11) Maskin pa ansina, ta expecta si Jehova que hay continua kita na cuanto del diaton maga decision maskin pa ya enfrenta kita probanza. Gendeh kita puede cambia con el diaton decision cuando ya dedica kita con el diaton vida con Jehova o cuando ya casa kita. Ta expecta el Dios que hay cumpli kita con este maga promesa. (Le con el Salmo 15:1, 2, 4.) Pero, el mayoria del diaton maga decision gendeh ansina de importante. El un sabio persona necesita pensa con el maga decision que ya hace le de antes. Si ya realiza le que debe le cambia con el un decision que ya hace le, gendeh le debe permiti con el de suyu orgullo para sangga con ele que hace se. (Prov. 16:18) El de con todo importante cosa amo que continua le honra con Dios.

Man Train con Otro que Hace Maga Decision que Ta Honra con Dios

18. Paquemodo puede man train el mayores con el diila maga anak para hace maga buen decision?

¹⁸ Grande el cosa puede hace el maga mayores para ayuda con el diila maga anak si paquemodo hace maga decision que ta honra con Dios. El de con todo buen manera para enseña amo por medio na ejemplo. (Luc. 6:40) El maga mayores puede explica con el diila maga anak si cosa sila ya hace para puede hace con el un particular decision. Puede tambien sila permiti con el diila maga anak que hace maga decision y despues comenda kanila si ya tene buen exito ese decision. Pero, paquemodo si ya puede man kamali el anak con el decision que ya hace le? Posible, quierre arregla el mayores con el problema para con el de suyu anak pero gendeh se pirmi para na bien del de suyu anak. Por ejemplo, posible ya permiti el mayores con el de suyu anak que saca licencia para maneja. Pero, pone kita que este anak ya viola con el ley de trafico y ya multa con ele. El mayores puede paga con el multa. Pero si necesita trabaja el anak para paga con ese multa, posible mas aprende le queda responsable na cosa le ta hace.​—Roma 13:4.

19. Cosa kita debe enseña con el diaton maga Bible study y paquemodo kita hace con ese?

¹⁹ Ya habla si Jesus con el de suyu maga siguidores que enseña con otro. (Mat. 28:20) El uno del maga de con todo importante leccion que puede kita enseña con el diaton maga Bible study amo si paquemodo hace maga buen decision. Para puede se hace na efectivo manera, debe kita evita con el tendencia que habla kanila si cosa sila debe hace. Mas bueno pa si enseña kita kanila que pensa asegun na maga principio na Biblia para puede sila mismo decidi si cosa hace. Cay siempre, “cada uno diaton ay dale cuenta con el Dios.” (Roma 14:12) Entonces, todo kita necesita aprende si paquemodo hace maga decision que ta honra con Dios.

[Footnote]

Cosa De Tuyu Contestacion?

• Porque kita necesita aprende si paquemodo hace decision?

• Na cosa manera puede afecta kanaton el miedo y paquemodo kita puede enfrenta con ese?

• Cosa el seis cosas que puede kita hace para asigura que el diaton maga decision ta honra con Dios?

[Pregunta de Estudio]

[Cajon/​Letrato]

Si Cosa Hace Para Hace Maga Buen Decision

1 No Hace Decision si Nuay Tu Derecho Para Hace con Ese

2 Man Research

3 Reza que Dale Kanaton Sabeduria

4 Hace con el Decision

5 Hace Esfuerzo Para Tene Buen Exito el Decision

6 Pensa y Cambia si Necesita

[Letrato]

El un persona que no sabe hace decision amo igual na un gente na un barco que nuay timon durante el tifun