Ta Puede Ba Tu Beneficia na De Tuyu Recreacion?

“Precura ustedes descubri si cosa ta hace alegre con el Señor.”​—EF. 5:10.

1, 2. (a) Paquemodo ya dale mira na Palabra del Dios que quierre si Jehova queda kita alegre? (b) Si mira kita con el recreacion como ‘regalo del Dios,’ cosa se hay manda move kanaton?

 EL Biblia ta dale mira que quierre si Jehova gendeh lang que vivi kita sino queda tambien kita alegre. Por ejemplo, el Salmo 104:14, 15 ta habla que si Jehova el ta causa “para dale comida el tierra y vino que ta hace alegre con el corazon del gente, aceite que ta hace brilla con el cara, y pan que ta hace fuerte con el corazon del gente.” Si Jehova ta hace crici con el maga siembra que ta dale kanaton comida que necesita kita para vivi. Y maskin pa puede kita vivi que nuay vino, ya dale se kanaton si Jehova cay ta ‘hace se alegre con el diaton corazon.’ (Ecl. 9:7; 10:19) Si, quierre si Jehova que dale “alegria na di aton maga corazon.”​—Act. 14:16, 17, El Nuevo Testamento.

² Poreso, gendeh malo si tiene vez tan schedule kita para “mira con el maga pajaro na cielo” y con el “maga flores na tierra” o hace otro maga actividad que ta hace kanaton alegre. (Mat. 6:26, 28; Sal. 8:3, 4) ‘Regalo del Dios’ el un alegre vida. (Ecl. 3:12, 13) Si mira kita con el recreacion como parte del regalo del Dios, hay manda se move kanaton que usa con ese na manera que ta hace alegre con ele. *

Iscuji Enbuenamente con el De Tuyu Recreacion

3. Porque razonable que el maga gente puede iscuji diferente recreacion?

³ Aquellos quien tiene balance mirada na recreacion ta entende que el maga Cristiano tiene el derecho para iscuji diila mismo recreacion pero sabe tambien sila que gendeh todo recreacion bueno para kanila. Porque? Para contesta con ese, compara kita con el entretenimiento na comida. Na diferente nacion, otro-otro el cosa quierre come el maga gente. Gane, el favorito comida del maga gente na un nacion posible gendeh gusta el maga gente na otro lugar. Na igual manera, el recreacion que quierre el maga Cristiano na un lugar posible gendeh gusta el maga Cristiano na otro lugar. Maskin el maga Cristiano quien ta esta na un nacion quierre hace el diferente cosas. El cuanto quierre le libro pero el otro ta pensa que boring se o el cuanto quierre man bike mientras el otro ta pensa que cansao se hace. Ya entende kita que el maga gente puede iscuji hace diferente cosas y aceptable lang se.​—Roma 14:2-4.

4. Porque kita necesita pensa enbuenamente si cosa recreacion kita iscuji? Ilustra.

⁴ Pero ya entende tambien kita que maskin tiene kita el derecho para iscuji hace maga cosas para man relax, gendeh se quierre decir que puede kita hace maskin cosa kita quierre. Para ilustra, considera kita otravez con el comida. Maskin pa quierre kita come diferente clase de comida, gendeh gayot kita come comida que buluk. Gendeh gayot justo que come kita con ese clase de comida y puede se pone na peligro el diaton salud. Na igual manera, maskin pa puede kita iscuji diferente clase de entretenimiento, gendeh kita quierre iscuji entretenimiento que peligroso, violente o imoral. Ese clase de maga entretenimiento contra na maga principio del Biblia y puede se pone na peligro el diaton fisical o espiritual salud. Poreso antes kita iscuji entretenimiento, necesita kita pensa enbuenamente si ta hace ba se alegre con Dios o gendeh. (Ef. 5:10) Paquemodo kita con ese hace?

5. Paquemodo kita puede asigura que el diaton recreacion uyun na maga principio del Dios?

⁵ Para beneficia kita na recreacion y hace alegre con Jehova, debe uyun se na cosa ta habla el Biblia. (Sal. 86:11) Para asigura si ansina el de tuyu recreacion, puede tu hace un checklist. Incluido na ese lista amo el tres pregunta: cosa, cuando y quien. Considera kita con ese uno-uno.

Cosa el Incluido Alli?

6. Cosa maga entretenimiento el necesita kita evita y porque?

⁶ Antes kita iscuji clase de recreacion, necesita kita pregunta con el diaton mismo cuerpo, ‘Cosa clase este de recreacion?’ Para contesta con ese pregunta, acorda que tiene dos clase de entretenimiento. El una amo el entretenimiento que gendeh kita debe hace; el ika-dos amo el entretenimiento que posible puede kita hace. Cosa el incluido na primer clase de entretenimiento? Na este mal mundo, manada del maga entretenimiento el ta viola con el maga principio del Biblia o contra na Ley del Dios. (1 Juan 5:19) El maga deverasan Cristiano gendeh ta acepta con este clase de maga entretenimiento. Incluido aqui el mal tratamiento, demonismo, homosexualidad, pornografia o violencia, o otro pa malo y imoral cosas. (1 Cor. 6:9, 10; le con el Revelacion 21:8.) Maskin onde man kita, si ta evita kita con este clase de maga entretenimiento, ta dale kita mira con Jehova que ta “odia [kita] el maga cosa-cosa malo.”​—Roma 12:9; 1 Juan 1:5, 6.

7, 8. Paquemodo kita puede asigura que bueno el un clase de entretenimiento? Ilustra.

⁷ El ika-dos clase de recreacion amo el entretenimiento que gendeh directa ta condena el Palabra del Dios. Na ese maga situacion, antes iscuji entretenimiento, debe kita pensa si aceptable ba ese actividad con Jehova como cosa puede mira na principio del Biblia. (Prov. 4:10, 11) Despues, necesita kita hace personal decision que gendeh afecta con el diaton conciencia. (Gal. 6:5; 1 Tim. 1:19) Paquemodo kita hace con ese? Pensa este: Antes kita come con el un nuevo potaje, quierre kita una sabe si cosa el maga ingrediente de este. Na igual manera, antes decidi que participa na un recreacion, necesita kita investiga si cosa el envuelto aqui.​—Ef. 5:17.

⁸ Por ejemplo, igual na manada gente, posible quierre-quierre tu sport y bonito con este juga. Pero, paquemodo si el sport que quierre tu amo violente o peligroso o ta gusta tu con este cay el maga gente ta celebra gayot si ta ganá el team del diila nacion? Despues examina enbuenamente si cosa el envuelto con este, posible hay realiza tu que gendeh este uyun na pensamiento de Jehova y na mensaje de paz y amor que ta predica kita con otro. (Isa. 61:1; Gal. 5:19-21) Pero si asigurao tu que ta aproba si Jehova con ese clase de recreacion, entonces hay beneficia tu con ese.​—Gal. 5:22, 23; le con el Filipo 4:8.

Cuando Yo Debe Hace con el Recreacion?

9. Cosa ta revela na diaton contestacion na pregunta, ‘Cuando yo hay participa na recreacion?’

⁹ El ika-dos que debe kita pregunta na diaton mismo cuerpo amo, ‘Cuando yo hay participa na recreacion? Paquemodo de manada tiempo yo usa alli?’ El diaton contestacion na pregunta cosa? hay revela acerca el diaton inclinacion​—si cosa el aceptable kanaton y si cosa el gendeh. Pero, el contestacion na pregunta cuando? hay dale mira el diaton maga prioridad​—si cosa el importante kanaton y si cosa el gendeh. Entonces, paquemodo kita determina si justo ba el prioridad que ta dale kita na diaton recreacion?

10, 11. Paquemodo el maga palabra de Jesus na Mateo 6:33 puede kanaton ayuda para decidi si paquemodo de grande tiempo kita usa na recreacion?

¹⁰ Si Jesucristo ya manda con el de suyu maga siguidores: “Ama con el Señor, el dituyo Dios con todo el dituyo corazon, con todo el dituyo alma, con todo el dituyo pensamiento y con todo el dituyo fuerza.” (Mar. 12:30) Entonces, el amor para con Jehova debe una na diaton vida. Puede kita con este dale mira si sigui kita con el consejo de Jesus: “Busca ustedes una el disuyo Reino y hace el disuyo voluntad, y ay dale Le con ustedes todo esos maga cosa-cosa.” (Mat. 6:33) Paquemodo este maga palabra puede ayuda kanaton para sabe si paquemodo de importante el recreacion kanaton y si paquemodo de grande tiempo kita debe usa con ese?

¹¹ Nota con este detalle: Si Jesus ya anima kanaton que ‘busca una con el disuyo Reino.’ Nuay le habla kanaton que ‘busca solamente con el Reino.’ Sabe si Jesus que manada kita cosas necesita. Por ejemplo, necesita kita lugar onde queda, comida, ropa, educacion, trabajo y recreacion. Pero, el diaton servicio con Jehova debe mas importante que con este maga cosas. (1 Cor. 7:29-31) Necesita kita usa con el diaton tiempo na ese maga cosas na manera que puede kita hace con el cosa que mas importante, amo el servicio con Jehova. Si hace kita se, hay beneficia kita na diaton recreacion.

12. Paquemodo el principio na Lucas 14:28 puede aplica na recreacion?

¹² Poreso, antes iscuji clase de recreacion, necesita kita pensa si paquemodo de largo tiempo kita necesita para con ese. (Luc. 14:28) Despues, necesita kita carcula con el tiempo que tiene kita para usa na recreacion mientras ta asigura que gendeh kita ta usa con el tiempo que debe para na estudiada del Biblia, de familia adoranza, na maga miting o na ministerio. (Mar. 8:36) Pero si el recreacion que ya iscuji tu ta ayuda contigo para continua sirvi con Jehova con alegria, un buen manera se para usa con el de tuyu tiempo.

Quien el De Mio Uban?

13. Porque debe considera enbuenamente si con quien kita man junto na recreacion?

¹³ El ika-tres que debe tu pregunta na de tuyu mismo cuerpo amo, ‘Quien el de mio maga uban na ese recreacion?’ Importante que considera con este. Porque? Cay tiene grande efecto na diaton recreacion el diaton maga uban. Igual si paquemodo bonito come junto na diaton maga buen amigo, mas man enjoy kita na recreacion si hace kita con ese junto na maga buen uban. Poreso, gendeh maka-estraña que manada kanaton, especialmente el maga joven, tan enjoy con el recreacion si ta hace se junto con otro. Pero para asigura que puede kita beneficia na ese actividad, importante que iscuji adelantao si con quien kita man uban y si cosa el debe evita.​—2 Cron. 19:2; le con el Proverbio 13:20; Sant. 4:4.

14, 15. (a) Cosa ejemplo ya dale mira si Jesus na iscujida del maga buen uban? (b) Cosa kita debe pregunta na diaton mismo cuerpo acerca na diaton maga uban?

¹⁴ Grande gayot ayuda si sigui tu con el ejemplo de Jesus na iscujida del maga uban. Desde el principio, ta ama ya si Jesus con el maga gente. (Prov. 8:31) Cuando taqui na tierra, ya dale le mira amable consideracion na todo clase de gente. (Mat. 15:29-37) Maskin pa bueno le na todo, ya iscuji le enbuenamente con quien le queda cerca amigo. Acerca con el de suyu 11 fiel apostoles, si Jesus ya habla: “Si ta hace ustedes el cosa yo ta manda con ustedes, ustedes dimio maga amigo.” (Juan 15:14; mira tambien con el Juan 13:27, 30.) El ya iscuji lang si Jesus para queda de suyu maga cerca amigo amo aquellos quien ya sigui con ele y ta sirvi con Jehova.

¹⁵ Poreso, si ta considera tu si con quien man amigo, importante que pone na pensamiento el cosa ya habla si Jesus. Pregunta na de tuyu mismo cuerpo igual: ‘Este ba individual ta demonstra na de suyu palabra y accion que ta obedece le con el maga mandamiento de Jehova y de Jesus? Ta sigui ba le con el maga enseñanza na Biblia acerca si cosa el justo y malo igual conmigo? Hay anima ba le conmigo que hace una con el Reino na de mio vida y queda leal con Jehova?’ Si positivo el de tuyu contestacion na ese maga pregunta, ya puede tu incuntra un buen uban con quien tu man enjoy man junto na recreacion.​—Le con el Salmo 119:63; 2 Cor. 6:14; 2 Tim. 2:22.

El De Tuyu Recreacion Ba Bueno Para Contigo?

16. Cosa kita necesita determina acerca na diaton entretenimiento?

¹⁶ Considera kita unrato el tres aspeto del entretenimiento​—calidad, tiempo y uban. Para beneficia na diaton entretenimiento, debe el cada aspeto de este uyun na maga principio del Biblia. Poreso, antes participa na un clase de recreacion, necesita kita examina con este. Debe kita pregunta na diaton mismo cuerpo, ‘Cosa clase de recreacion este y bueno ba este o malo para conmigo?’ (Prov. 4:20-27) ‘Paquemodo de grande tiempo el usa yo aqui? Por causa con este, nuay mas ya ba yo tiempo para na servicio con Jehova?’ (1 Tim. 4:8) ‘Y quien el de mio uban si hace yo con este? Bueno ba sila o mal uban?’​—Ecl. 9:18; 1 Cor. 15:33.

17, 18. (a) Paquemodo kita puede asigura si el diaton entretenimiento uyun na cosa ta habla el Biblia? (b) Cosa tu determinao hace si ta iscuji entretenimiento?

¹⁷ Si el diaton entretenimiento gendeh uyun na cosa ta habla el Biblia na maskin onde na este tres aspeto, entonces gendeh kita debe hace con ese. Pero si el diaton recreacion uyun na cosa ta habla el Biblia na todo tres aspeto, ta lleva se honor con Jehova y hay beneficia kita.​—Sal. 119:33-35.

¹⁸ Poreso si acerca na recreacion, pricura kita hace el justo cosas na justo tiempo y junto na justo uban. Si, ojala todo kita hay sigui con el cosa ta habla el Biblia: “Maskin cosa ustedes ta come, maskin cosa ustedes toma, maskin cosa gayot ustedes ta hace, hace ese para el gloria del Dios.”​—1 Cor. 10:31.

[Footnote]

Puede Ba Tu Explica?

Acerca na recreacion, paquemodo tu puede aplica con el principio na . . .

• Filipo 4:8?

• Mateo 6:33?

• Proverbio 13:20?

[Pregunta de Estudio]

[Diagram]

(Para na actual format, mira con el publicacion)

✔Cosa

[Diagram]

(Para na actual format, mira con el publicacion)

✔Cuando

[Diagram]

(Para na actual format, mira con el publicacion)

✔Quien

[Letrato]

Paquemodo kita puede sigui con el ejemplo de Jesus na iscujida de maga amigo y recreacion?