“VOLVE ya lang tu na casa, alli con el dituyo maga pariente y avisa canila todo el cosa el Señor ya hace contigo y paquemodo ya tene Le lastima contigo,” ya habla si Jesucristo. Na aquel tiempo, posible talli ele na Gadara, na southeast parte del Mar de Galilea y tan cuento con el un gente quien quierre queda de suyu siguidores. Sabe si Jesus que si aprende kita un cosa que importante y nuevo para kanaton, quierre kita habla con este na diaton maga pariente.—Mar. 5:19, El Nuevo Testamento na Chavacano.

Manada gente el ansina ahora pero mas comon este na cuanto cultura. Poreso, si el un persona ya queda un siervo del verdadero Dios, si Jehova, mas mucho quierre le habla con el de suyu maga pariente acerca con el cosa le ya aprende. Pero, paquemodo le debe hace con ese? Paquemodo le puede alcanza con el corazon del de suyu maga pariente quien tiene diferente religion—o quien gendeh ta creé con Dios? El Biblia ta dale bonito y realistico consejo.

Del primer siglo, uno si Andres del maga gente quien ya identifica con Jesus como el Mesias. Y con quien le dayun ya habla acerca con ese? “El primero gente con quien ya man encuentro si Andres amo si Simon, disuyo hermano. Si Andres ya habla con ele: ‘Ya encontra came con el Mesias’—quiere decir el Cristo.” Si Andres ya lleva con Pedro con Jesus y ya dale oportunidad con Pedro para queda uno del maga dicipulo de Jesus.—Juan 1:35-42.

Despues del maga seis año cuando ta esta si Pedro na Joppe, ya invita con ele que viaja pa-norte na Cesarea para visita con el casa de Cornelio, un soldao oficial. Quien-quien talla na casa cuando ya llega si Pedro? “Ta espera [con Pedro y con aquellos ta viaja junto con ele] si Cornelio quien ya imvita tamen na casa con el disuyo maga pariente y con aquellos disuyo maga amigo.” Entonces, ya dale oportunidad si Cornelio con el de suyu maga pariente para oi con el cosa habla si Pedro y hace decision base na cosa sila oi.—Act. 10:22-33.

Cosa kita puede aprende na manera si paquemodo si Andres y Cornelio ya ayuda con el diila maga pariente?

Ya hace si Andres y Cornelio con el cosa sila puede hace para ayuda con el diila familia. Si Andres personal ya introduci con Pedro con Jesus y ya hace manera si Cornelio para puede oi el de suyu maga pariente con el cosa habla si Pedro. Pero, nuay man pressure si Andres y Cornelio con el diila maga familia o engaña kanila para queda maga siguidores del Cristo. Ta puede ba tu mira si cosa el leccion aqui? Necesita tambien kita hace igual ansina. Puede kita habla con el diaton maga pariente acerca na maga cosas que ya aprende kita na Biblia y introduci kanila na diaton maga hermano y hermana. Maskin pa ansina, ta respeta kita con el diila libertad para iscuji y ta evita forza kanila. Para ilustra si paquemodo kita puede ayuda con el diaton maga pariente, considera con el ejemplo de Jürgen y Petra, un maridable na Germany.

Ya estudia si Petra con el Biblia junto con el maga Testigo de Jehova y ya bautiza na uliji. El de suyu marido, si Jürgen, un soldao oficial. Del primero, gendeh alegre si Jürgen na decision del de suyu mujer. Pero despues del cuanto tiempo, ya realiza le que el maga Testigo de Jehova ta predica con el verdad estaba na Biblia. Ya dedica tambien le con el de suyu vida con Jehova y ta sirvi ahora como un anciano na diila congregacion. Cosa consejo le ya dale con aquellos quien tiene pariente que gendeh maga Testigo de Jehova?

Si Jürgen ya habla: “Gendeh kita debe pricura forza con el diaton maga pariente y sobra man cuento acerca na maga espiritual cosas cay posible mas man dificil lang sila acepta con el verdad. Posible, mas bueno pa si tiene vez lang kita man cuento kanila acerca na cuanto cosas na Biblia. Puede tambien ayuda si manda kita conoce con el diaton maga pariente na maga hermano quien igual kanila el edad y tiene semejante interes. Mas facil kita puede ayuda kanila si hace kita con ese.”

Si apostol Pedro y el maga pariente de Cornelio ya acepta dayun con el mensaje na Biblia. Pero, necesita pa grande tiempo para hace decision el cuanto del primer siglo quien ya puede sabe el verdad.

El cuanto del maga pariente de Jesus ya demonstra fe con ele durante el de suyu ministerio na tierra. Por ejemplo, posible que primo de Jesus kanda apostol Santiago y Juan y tia de suyu el diila nana, si Salome. Posible, incluido si Salome na “mucho pa otros quien ta sirvi con Jesus por medio del diila maga bienes.”—Luc. 8:1-3.

Pero, nuay dayun demonstra fe con Jesus el otro miembro del de suyu familia. Por ejemplo, na un ocasion despues de mas de un año del de suyu bautismo, yan junto-junto el manada gente na un casa para oi con ele. “Cuando ya puede este sabe el disuyo maga pariente, ya anda sila saca con Jesus cay convincido sila cay Ele loco.” Despues del cuanto tiempo, cuando el maga hermano de Jesus ya pregunta con ele acerca si onde le anda, nuay le kanila directa contesta. Porque? Cay “su maga hermano gendeh ta cree con Ele.”—Mar. 3:21; Juan 7:5.

Cosa kita puede aprende si paquemodo si Jesus ya trata con el de suyu maga pariente? Nuay le rabia cuando ya habla el otro que loco ya le. Maskin despues le muri y ya resucita, ya pricura ayuda si Jesus con el de suyu maga pariente cuando ya aparece le con el de suyu hermano na nana que si Santiago. Ta sale que por causa con este, ya queda convincido gendeh lang si Santiago sino el otro maga hermano na nana de Jesus que Ele gayot el Mesias. Entonces, junto sila con el maga apostoles y con otro na un casa na Jerusalem quien ya ricibi con el sagrao espiritu. Despues del cuanto tiempo, si Santiago y Judas, el otro maga hermano na nana de Jesus, ya tene maga bonito privilegio.—Act. 1:12-14; 2:1-4; 1 Cor. 15:7.

Igual na primer siglo, el cuanto del diaton maga pariente ahora necesita cuanto tiempo para acepta con el mensaje na Biblia. El un ejemplo de ese amo si Roswitha que un devoto Romano Catolico cuando ya bautiza el de suyu marido como un Testigo de Jehova del 1978. Cay convincido si Roswitha na cosa le ta creé, yan contra le con el de suyu marido del primero. Pero despues del cuanto tiempo, nuay mas le man contra y ya puede le mira que el maga Testigo ta enseña el verdad. Del 2003, ya bautiza le. Cosa ya puede ayuda con ele para cambia? En vez de rabia con Roswitha cay tan contra le del primero, paciencioso el de suyu marido y ya puede se ayuda para cambia si Roswitha con el de suyu mirada. Cosa consejo ya dale si Roswitha? “Grande el cosa puede hace si man paciencia kita, paciencia y mas pa paciencia.”

Ya bautiza si Monika del 1974 y ya queda maga Testigo el de suyu dos anak hombre despues del maga diez año. Maskin pa el de suyu marido, si Hans, nuay man contra con el diila creencia, del 2006 lang ele ya bautiza. Cosa consejo ya dale este familia? “Esta leal con Jehova y no gayot man compromiso.” Siempre, importante que asigura sila con Hans que ta ama sila con ele. Y nuay perde el diila esperanza que na uliji hay acepta le con el verdad.

Ya habla si Jesus que el mensaje del verdad igual como agua que ta dale vida hasta para cuando. (Juan 4:13, 14) Quierre kita que el diaton maga pariente hay queda refrescao por causa na limpio agua de verdad. Si habla kita kanila bien manada informacion acerca na verdad na un sintada lang, dol ta expecta kita kanila que paspas toma con el bien manada agua. Hay queda sila refrescao o man dungglan depende si paquemodo kita explica con el verdad kanila. El Biblia ta habla que “el corazon del recto ta medita una antes contesta” y “el corazon del sabio ta dale hondo entendimiento con el de suyu boca y ta hace maka-convinci con el de suyu maga palabra.” Paquemodo kita puede aplica con este consejo?—Prov. 15:28; 16:23.

Posible, quierre man cuento el mujer acerca con el de suyu creencia na de suyu marido. Si ‘medita le una antes contesta,’ hay iscuji le enbuenamente con el de suyu maga palabra y gendeh basta-basta converza. Gendeh le debe dale impresion que bien bueno le o mas alto que con el de suyu marido. Si pensa le enbuenamente antes converza, hay tene paz na diila familia. Cuando ba relax y mas facil atraca con el de suyu marido? Cosa clase de topico el quierre-quierre man cuento o le el de suyu marido? Interesao ba le na ciencia, politica o sports? Cosa hace el mujer para queda interesao el de suyu marido na Biblia mientras ta dale mira respeto na sentido y opinion de este? Si pensa el mujer con este maga cosas, hay ayuda este con ele para converza y actua con hondo entendimiento.

Para alcanza el corazon del maga miembro del familia que gendeh pa maga Testigo, gendeh bastante que explica lang kita kanila hinay-hinay acerca con el diaton creencia. El diaton conducta debe suporta con el cosa kita ta habla.

“Pirmi aplica con el maga principio na Biblia na de tuyu vida. Un bien efectivo manera se para puede contigo nota el de tuyu pariente maskin pa posible gendeh le admiti con ese,” ya habla si Jürgen que ya menciona enante. Si Hans, quien ya bautiza cerca 30 año despues el de suyu mujer, yan uyun con ese. “Importante que dale kita mira buen conducta para puede mira el diaton pariente con el positivo efecto del verdad na diaton vida.” Debe puede mira el diaton maga pariente que por causa na diaton fe, diferente kita con otro pero na positivo manera y gendeh na negativo manera.

Ya dale bonito consejo si apostol Pedro con el maga mujer que el marido gendeh ta sirvi con Jehova: “Ustedes tamen, maga mujer, necesita somete con el de ustedes maga marido. Ansina, si tiene diila quien gendeh ta cree na Palabra, el de ustedes custumbre ay comvinci canila para cree. Gendeh mas ustedes ay necesita conversa pa ni un palabra, cay sila ay mira si paquemodo de limpio y respetoso el de ustedes custumbre. No ustedes usa maga adorno na cuerpo, como arregla el de ustedes pelo, o el maga alajas ta pone ustedes o el maga camisa ta visti. El de ustedes maga adorno necesita talli adentro na de ustedes maga corazon, cay amo este el guapura gendeh ta perde de un alma dulce y tranquilo, y amo este el precioso adelante del Dios.”—1 Ped. 3:1-4.

Ya escribi si Pedro que posible convinci con el marido por medio na buen ejemplo del de suyu mujer. El un hermana que si Christa ta pricura sigui con ese consejo para puede alcanza con el corazon del de suyu marido desde ya bautiza le del 1972. Maskin pa yan Bible study el de suyu marido junto con el maga Testigo, nuay pa le decidi sirvi con Jehova. Ya atende le con el cuanto miting y ta ledia enbuenamente con aquellos na congregacion. Y ta respeta sila con el de suyu decision. Cosa ya hace si Christa para pricura alcanza el corazon del de suyu marido?

“Determinao yo que pirmi hace si cosa quierre si Jehova. Mientras ta hace se, ta pricura yo dale mira buen ejemplo para puede yo ayuda con el de mio marido que acepta el verdad. Si ta pidi le conmigo que hace un cosa que gendeh contra na Biblia, pirmi yo ta pricura hace con ese. Y siempre, ta respeta yo con el de suyu decision y ta deja ya lang se con Jehova.”

El ejemplo de Christa ta dale mira si porque importante que sabe kita man adjust. Ta mentena le con el de suyu buen espiritual rutina, incluido ya el regular atendida na maga miting y participacion na ministerio. Pero, ta entende tambien ele que debe le dale tiempo, atencion y amor con el de suyu marido. Todo kita necesita man adjust y entende con el diaton maga pariente que gendeh ta sirvi con Jehova. “Tiene justo tiempo para na todo cosas,” ya habla el Biblia. Incluido aqui el tiempo para man junto na maga miembro na familia, especialmente con el marido o mujer que gendeh maga Testigo de Jehova. Importante este para tene buen comunicacion. Si dale kita tiempo para man junto y man cuento con el diaton marido o mujer, puede este ayuda con ele para gendeh sinti triste, abandonao o man celos.—Ecl. 3:1.

“Importante que dale kita mira que ta ama kita con el diaton miembro de familia y que ta reza kita para con ele,” ya habla si Holger que el tata ya bautiza 20 año despues bautiza el otro maga miembro de familia. Ya omenta si Christa que ‘gendeh le perde esperanza que el de suyu marido hay principia sirvi con Jehova y acepta el verdad.’ Debe pirmi bueno el diaton tratamiento con el diaton maga pariente y gendeh perde esperanza que hay sirvi tambien sila con Jehova.

Quierre kita que tene buen relacion con el diaton maga pariente para puede kita ayuda kanila que acepta con el mensaje del Biblia. Y na todo cosas que ta hace kita, debe kita “contesta embuenamente y con respeto.”—1 Ped. 3:15, 16.