TA NERVIA si Fernando. * El dos anciano ya pidi con ele que man cuento na privado. Despues del cuanto visitada del circuit overseer, ya explica con ele el maga anciano si cosa le necesita hace para queda cualificao na maga omento privilegio na congregacion. Mientras ta pasa el tiempo, ta pensa si Fernando si iscuji ba con ele para queda un anciano. Ahora, nuevo lang ya acaba visita el circuit overseer na diila congregacion. Cosa gaha habla con ele el maga anciano este tiempo?

Ta oi si Fernando mientras el uno del maga anciano tan cuento con ele. Ya menciona el anciano acerca el 1 Timoteo 3:1 y ya habla que el maga anciano na congregacion ya ricibi carta que ta habla que ya iscuji con ele como un anciano. Espantao si Fernando y ya pregunta, “Cosa tu ya habla?” Ya repiti el hermano con el cosa le ya habla y puede mira na cara de Fernando que alegre le. Despues, cuando ya anuncia ya na congregacion acerca con este, alegre el todo.

Malo ba desea maga privilegio na congregacion? Gendeh. Asegun na 1 Timoteo 3:1, “si quien quiere queda un Presidente del comunidad [o anciano] ta desea le un buen trabajo.” Manada hermano el ta aplica con ese y ta hace maga espiritual progreso para queda cualificao na maga privilegio na congregacion. Por causa con este, el maga siervo del Dios ta beneficia na miles de maga anciano y siervo ministerial quien ta sirvi junto kanila. Pero cay ta queda mas manada el congregacion, mas necesita maga hermano quien puede sirvi como maga anciano y siervo ministerial. Paquemodo sila puede hace con ese? Y debe ba man lingasa aquellos quien quierre queda anciano si cuando se sucede, igual con Fernando?

El frase “quiere queda” yan translate este na un Griego verbo que ta dale el idea del un persona quien ta desea gayot o ta pricura alcanza. Posible puede tu pensa con el un persona quien ta estira gayot con el un mano para alcanza con el un fruta que bitay na pono. Pero, gendeh este quierre decir que quierre kita queda anciano para queda importante. Porque? Cay aquellos quien quierre sirvi como anciano debe hace con este cay quierre sila hace un buen trabajo, gendeh cay quierre sila un posicion.

Manada de este maga requirement que tiene que hace na buen trabajo puede mira na 1 Timoteo 3:2-7 y Tito 1:5-9. Acerca con este maga alto principio, si Raymond que ya dura ya ta sirvi como un anciano, ya habla: “Para conmigo, el de con todo importante amo si quien gayot kita. Importante que sabe kita converza y enseña enbuenamente pero mas importante que tiene kita buen reputacion, sabe controla con el diaton cuerpo, sabio, organizao, hospitable y razonable.”

El un hermano quien ta pricura alcanza privilegio ta dale mira que tiene le buen reputacion amo si evita le con el todo clase de pagka-deshonesto y cuchinadas. Sabe le controla con el de suyu mismo cuerpo, sabio, organizao y razonable; poreso, ta confia con ele el maga hermano y hermana para guia y ayuda kanila na diila maga problema. Cay hospitable le, ta puede le anima con el maga jovenes y con aquellos nuevo na verdad. Ta dale le comforta y asistencia con el maga enfermo y de edad. Ta hace le este cay quierre le hace cosas bueno con otro, gendeh cay ta pricura lang le queda un anciano. *

Maskin pa el maga anciano na congregacion ta anima y ta dale contigo consejo, responsibilidad de tuyu para hace si cosa el Biblia ta habla que necesita tu hace para queda un anciano. Si Henry que un experienciao anciano, ya habla: “Si ta pricura tu alcanza privilegio, hace esfuerzo para dale mira que cualificao tu.” Mientras ta refiri na Eclesiastes 9:10, ele ya explica: “‘El cosa que puede tu hace, hace con todo fuerza.’ Maskin cosa assignment que dale contigo el maga anciano, hace el de tuyu de con todo bueno. Aprecia con el todo trabajo que ya dale contigo na congregacion, incluido el trabajo que barre con el piso. Llega el tiempo, el de tuyu trabajo y maga esfuerzo hay nota el otro.” Si ta desea tu que queda un anciano llega el tiempo, queda trabajador y dale mira que puede confia contigo na todo cosa tu ta hace para con Dios. Debe tu queda humilde, gendeh ambicioso y orgulloso.​—Mat. 23:8-12.

El cuanto quien quierre tene maga privilegio na congregacion posible habla o hace maga cosas para convinci con el maga anciano que iscuji kanila para queda maga anciano. Ta rabia el otro si ta conseja kanila el maga anciano. Aquellos quien ta pensa ansina debe pregunta con el diila mismo cuerpo, ‘Quierre ba yo queda anciano cay quierre yo queda importante o quierre lang yo cuida con el maga carnero de Jehova?’

Aquellos quien ta pricura alcanza privilegio debe acorda con el otro pa cosa que necesita hace el maga anciano, amo que queda “un ejemplo.” (1 Ped. 5:1-3) El un hermano que buen ejemplo na congregacion gendeh hay engaña con otro. Hay queda le paciencioso y hace le el cosa justo, anciano man le o gendeh. Y queda man anciano el un hermano, imperfecto le siempre. (Num. 12:3; Sal. 106:32, 33) Mas pa, el un hermano posible tiene limpio conciencia pero el otro posible negativo el mirada acerca con ele. (1 Cor. 4:4) Poreso si el maga anciano ya dale contigo sincero consejo que base na Biblia, oi kanila y no rabia. Despues, pricura aplica con el diila consejo.

El cuanto maga hermano quien ta espera posible sinti que tarda kanila iscuji para sirvi como maga anciano. Si por cuanto año ya tu ta pricura alcanza privilegio, tan lingasa ba tu tiene vez? Si ansina, nota con este maga inspirao palabra: “El cosa ta expecta que nuay porsigui ta hace triste con el corazon, pero el deseo que ya cumpli igual na un pono de vida.”​—Prov. 13:12.

El un persona posible sinti triste si ta mira le que dol gendeh sucede el cosa le ta esperanza. Ansina ya sinti si Abraham. Ya promete si Jehova que dale con ele un anak hombre pero cuanto año ya el ya pasa, nuay siempre sila anak de Sara. (Gen. 12:1-3, 7) Cuando de edad ya, si Abraham ya habla: “Soberano Señor Jehova, cosa tu hay dale conmigo, ciendo nuay yo anak . . . Nuay tu conmigo dale descendiente.” Ya asigura si Jehova que hay cumpli le con el De Suyu promesa que dale con ele un anak hombre. Pero, ya pasa pa 14 año antes cumpli el Dios con el de suyu maga palabra.​—Gen. 15:2-4; 16:16; 21:5.

Mientras ta espera le, ya perde ba el alegria de Abraham na de suyu servicio con Jehova? Nuay. Nuay le man duda con el promesa del Dios. Ya continua le esperanza que hay cumpli el de suyu promesa. Si apostol Pablo ya escribi: “Si Abraham ya tene paciencia y por eso ya recivi le el Promesa.” (Heb. 6:15) Na uliji, ya bendici el Todopoderoso Dios con ese fiel hombre mas pa na cosa le ta expecta. Cosa tu puede aprende con Abraham?

Si quierre tu sirvi como un anciano pero nuay pa contigo iscuji maskin pa despues del manada año, continua confia con Jehova. No perde el de tuyu alegria na servicio. Si Warren, quien ya puede ayuda con el manada hermano para hace espiritual progreso, ya explica si porque: “Necesita tiempo para determina si cualificao ba el un hermano para tene privilegio. Mientras ta pasa el tiempo, el maga abilidad del un hermano y el de suyu custumbre hinay-hinay puede mira na manera si paquemodo le ta actua y si paquemodo le ta hace con el de suyu maga assignment. El cuanto ta creé que hay queda lang sila alegre amo si tene sila el privilegio o iscuji kanila para sirvi como anciano. Gendeh justo ese clase de pensamiento y gendeh le queda alegre si ansina le ta pensa. Si fiel tu ta sirvi con Jehova maskin onde man tu o maskin cosa tu ta hace, puede tu queda alegre.”

El un hermano ya espera por un decada antes le iscuji para sirvi como un anciano. Ya menciona le con el cosa le ya aprende na Ezequiel capitulo 1: “Ta controla si Jehova con el de suyu organizacion y ele el ta decidi si cuando debe hace con el maga cosas. Gendeh importante si ta pensa yo que preparao ya yo sirvi como un anciano, sino si cuando si Jehova sabe que preparao ya yo. Gendeh importante el cosa yo quierre sino si cosa sabe si Jehova que necesita yo.”

Si ta esperanza tu hace con el buen trabajo del un Cristiano quien ta encabeza algun dia, pricura ayuda con otro na congregacion. Si dol ya dura ya tu ta espera, no man lingasa o perde el paciencia. Si Raymond que ya menciona enante, ya habla: “El ambicion amo un enemigo del pagka-contento. Aquellos pirmi tan lingasa acerca con ese gendeh alegre na servicio con Jehova.” Continua mas cultiva con el fruta del espiritu del Dios, especialmente el paciencia. Hace esfuerzo que hace fuerte el de tuyu espiritualidad por medio na estudiada del Biblia. Predica con el buen noticia y hace maga Bible study. Guia con el de tuyu familia na maga espiritual actividad y na de familia adoranza. Queda alegre na cada oportunidad que tiene tu para man junto na de tuyu maga hermano y hermana. Mientras ta hace tu esfuerzo para queda un anciano, hay queda tu alegre mientras ta sirvi con Jehova.

Quierre si Jehova que queda cualificao el maga hermano para queda maga anciano. Pero, no quierre le ni el de suyu organizacion que queda tu triste o man luya mientras ta trabaja para alcanza con ese goal. Ta suporta y ta bendici el Dios con el todo quien ta sirvi con ele con limpio motivo. Igual na todo de suyu maga bendicion, “gendeh Le omenta dolor con ese.”​—Prov. 10:22.

Maskin pa ya dura ya tu ta pricura alcanza privilegio, puede tu siempre hace maga espiritual progreso. Mientras ta cultiva tu con el maga necesita calidad y ta trabaja mucho para na congregacion mientras ta cuida con el de tuyu familia, puede tu asigura que gendeh ulvida si Jehova con el todo cosa que ya hace tu para sirvi con ele. Ojala pirmi tu queda alegre mientras ta sirvi con Jehova na maskin cosa assignment que ya dale contigo.