TA PRINCIPIA pa lang quel el soles del 1970. Yan hospital yo na Valley Forge General Hospital, Phoenixville, Pennsylvania, na United States. Cada 30 minuto, tiene un hombre nurse quien ta chequia con el de mio blood pressure. Un soldao yo que 20 año el edad quien ya tiene un serioso enfermedad. El nurse que cuanto año lang mayor conmigo tan lingasa gayot con el de mio condicion. Mientras ta continua abaja el de mio blood pressure, ya habla yo, “Nuay pa tu mira paciente ya muri no?” Yan pucla de suyu cara y ya contesta, “Nuay pa.”

Aquel tiempo, dol nuay mas yo esperanza. Pero, porque ba yo ya guinda na hospital? Bueno, cunta yo con ustedes el de mio istoria de vida.

Ya enferma yo cuando ta trabaja yo como un technician na un operating room durante el guerra na Vietnam. Quierre-quierre yo ayuda con el maga enfermo y con el maga irido. Plano de mio que queda un surgeon. Ya guinda yo na Vietnam del Julio 1969. Igual con el todo maga nuevo ya llega alla, ya dale conmigo un semana para puede yo man adjust na diferente time zone y na grabe calor.

Nuay dura despues yo principia trabaja na un hospital na Mekong Delta, na Dong Tam, ya llega el manada helicopter que cargao de maga irido soldao. Ta ama gayot yo con el de mio nacion y quierre-quierre yo trabaja, poreso quierre dayun yo ayuda. Ya atende dayun con el maga irido y ya lleva kanila na maga diutay container van que tiene aircon que ya sirvi como maga operating room. Na ese diutay lugar, tiene un surgeon, un especialista quien ta clava anesthesia y dos bilug nurse, quien ta pricura ayuda salva con el vida del maga irido soldao. Ya nota yo que tiene maga grande negro bag que nuay hace abaja na maga helicopter. Ya sabe yo que el laman de aquel maga bag amo maga parte del cuerpo del maga soldao que ya separta por causa na rebentada de bomba. Y ese el de mio primer experiencia na guerra.

Tiene yo poco saber acerca na verdad que ta enseña el maga Testigo de Jehova cuando joven yo. El de mio nana ya estudia con el Biblia junto con el maga Testigo pero nuay ele progresa para na bautismo. Alegre yo man junto con el de mio nana mientras tan Bible study ele. Un dia, ya pasa kame pati de mio padrasto na un Kingdom Hall. Ya pregunta yo con ele, “Cosa se alli?” Ya contesta le, “No gayot tu atraca con ese maga gente!” Ciendo ta ama yo y ta confia con el de mio padrasto, ya sigui yo con el cosa le ya habla.

Despues yo bira estaba na Vietnam, ya sinti yo que necesita yo con Dios na de mio vida. Duele para conmigo el cosa ya sucede alla. Y dol nuay quien sabe si cosa el deverasan ta sucede na Vietnam. Ya acorda yo con el maga protesta que donde el maga gente ya llama con el maga soldao de U.S. que maga criminal por causa na maga report que ta mata daw sila na guerra maskin con el maga bata.

Ya pruba yo entra na diferente religion para queda yo cerca con Dios. Ta ama yo con ele pero nuay yo gusta el cosa yo ya puede nota na maga religion. Na uliji, ya puede yo atende na un Kingdom Hall del maga Testigo de Jehova na Delray Beach, Florida. Domingo quel del Febrero 1971.

Aquel tiempo, pa-acabada ya el public talk poreso ya esta ya lang yo para na estudiada del El Torre de Guardia. Nuay mas yo acorda si cosa quel tema ya discuti pero ta acorda yo con el maga diutay bata que ta abri con el diila Biblia para busca con el maga texto. Bilib gayot yo kanila! Ya oi yo y ya observa. Cuando pasalida ya yo na Kingdom Hall, ya atraca conmigo el un hermano que maga 80 año ya. El de suyu nombre amo si Jim Gardner. Ya dale le conmigo un libro que tiene titulo, The Truth That Leads to Eternal Life y ya pregunta, “Puede ba yo este dale contigo?” Yan schedule kame Jueves aga para estudia con el Biblia por primer vez.

Pagka-denoche de aquel mismo Domingo, necesita yo trabaja. Ta trabaja yo na emergency room na un private hospital na Boca Raton, Florida, principia alas 11 del noche hasta alas siete del aga. Ciendo silencio aquel noche, ya puede yo le con el libro Truth. Ya atraca conmigo el un senior nurse mujer. Ya saca le con el libro, ya mira con el cover de este y ya habla, “No tu habla quierre tu queda uno kanila!” Ya saca yo oleh con el libro y ya contesta, “Media pa lang del libro el ya le yo pero ta mira yo, dol ansina gayot!” Ya sale le y ya continua yo hace acaba le con el libro aquel noche.

Cuando para man Bible study ya yo junto con Hermano Gardner, ya pregunta yo con ele, “Cosa kita hay estudia?” Ya contesta le, “Aquel libro que ya dale yo contigo.” Ya habla yo, “Ya acaba ya yo le con aquel.” Si Hermano Gardner ya contesta conmigo na buen manera, “Sigui, discuti lang kita con el primer capitulo.” Espantao gayot yo cay manada gale yo cosa nuay puede entende. Ya manda le conmigo le manada texto na de mio Biblia que King James Version. Na ese tiempo, ya principia yo aprende acerca con el verdadero Dios, si Jehova. Aquel aga, tres capitulo del libro Truth el ya discuti kame de Hermano Gardner, con quien yo ta llama Jim. Principia quel, cada Jueves aga, ta estudia kame tres capitulo. Bien alegre gayot yo na de mio estudiada. Un privilegio para conmigo que un iscujido Cristiano, quien conoce mismo con Charles T. Russell, el quien yan Bible study conmigo!

Despues del cuanto semana, ya aproba conmigo para participa na predicacion. Gendeh facil para conmigo predica casa en casa pero ya ayuda conmigo si Jim. (Act. 20:20) Por medio na de suyu ayuda, hinay-hinay ya gusta yo participa na ministerio. Hasta ahora, ta sinti yo que ese amo el de con todo grande privilegio que tiene yo. Bien alegre yo cay ta puede yo trabaja junto con Dios!—1 Cor. 3:9.

Tiene yo cosa habla con ustedes un bien personal cosa—el de mio primer amor con Jehova. (Rev. 2:4) Ese amor ya ayuda conmigo para enfrenta con el maga mal experiencia durante el guerra y con el otro pa maga probanza.—Isa. 65:17.

Ya acorda yo con el un especial dia del 1971. Nuevo lang conmigo ya manda sale el de mio mayores na condominium donde sila conmigo ya manda queda. No quierre de mio padrasto que tiene un Testigo de Jehova ta queda na de suyu propiedad! Poco lang el de mio sen aquel tiempo. El hospital donde yo ta trabaja ta dale conmigo sueldo cada dos semana. Y mas mucho del de mio sen, ya usa yo para cumpra maga decente camisa que puede yo usa na ministerio. Ya puede yo ajunta poco sen pero talla quel na banco na Michigan, donde yo ya engranda. Por causa con ese, ya queda yo na de mio coche por cuanto dia. Ta afeita yo y ta limpia de mio cuerpo na CR del maga gas station.

Un dia aquel tiempo, ya llega yo temprano na Kingdom Hall, cuanto hora antes man miting el maga hermano para na predicacion. Estaba yo quel na de mio trabajo na hospital. Mientras ta sinta yo atras del Kingdom Hall donde nuay conmigo quien ta puede mira, ya acorda yo con el cosa yo ya experiencia na Vietnam—el olor del laman del gente que ta quema y el sangre que ta sale. Na de mio pensamiento, dol ta puede yo oi y mira con el maga hombre que ta pregunta conmigo, “Vivi pa ba yo? Vivi pa ba yo?” Sabe yo que muri sila pero ta pricura yo dale comforta kanila y no dale mira que nuay mas sila esperanza. Mientras ta sinta yo alla, nuay mas yo puede aguanta con el cosa yo ta sinti.

Ya reza yo con Jehova mientras ta llura. (Sal. 56:8) Ya puede yo pensa acerca el esperanza de resureccion. Despues, ya puede yo realiza: Por medio na resureccion, si Dios Jehova hay quita con el mal resulta del matanza que ya puede yo mira y con el dolor na emocion que ya puede yo experiencia y el otro. El Dios hay hace vivi otravez con aquel maga hombre y hay tene sila el oportunidad para aprende el verdad acerca con ele. (Act. 24:15) Na ese tiempo, ya queda bien grande el de mio amor para con Jehova. Hasta ahora, especial siempre ese dia para conmigo. Desde aquel, ta hace yo el todo para gendeh perde el de mio primer amor para con Jehova, especialmente si ta experiencia maga probanza y dificultad.

Si durante el guerra, el maga gente ta puede hace maga gendeh buen cosas y uno yo kanila. Pero, ta puede conmigo ayuda si ta medita yo con el dos del de mio maga favorito texto. El primero amo el Revelacion 12:10, 11 que donde ta habla que puede kita ganá contra con el Diablo, gendeh lang por medio na diaton predicacion sino por medio na sangre del Cordero. El segundo amo el Galacia 2:20. Na ese texto, ya puede yo aprende que si Jesucristo ya muri para conmigo. Ta mira si Jehova conmigo asegun na sangre de Jesus y ya perdona ya le conmigo na cosa yo ya puede hace. Ese verdad ya ayuda conmigo para tiene limpio conciencia y ya manda se move conmigo que hace el todo que puede yo hace para ayuda con otro sabe el verdad acerca con el diaton lastimoso Dios, si Jehova!—Heb. 9:14.

Si ta acorda yo con el pasada del de mio vida, ta rindi gayot yo gracias cay pirmi conmigo si Jehova ta ayuda. Por ejemplo, na mismo dia cuando ya sabe si Jim que na de mio coche lang yo ta queda, ya manda le conmigo conoce na un hermana quien tiene boarding house. Ta creé gayot yo que ya usa si Jehova con Jim y con aquel hermana para tiene yo buen lugar onde para queda. Bien bueno gayot si Jehova! Ta cuida le con el de suyu maga fiel siervo.

Del Mayo 1971, ya anda yo na Michigan cay tiene yo cuanto cosas que necesita hace. Antes sale na Delray Beach Congregation na Florida, ya llena yo de literatura con el atras del de mio coche y despues, yan viaje yo para norte na Interstate 75. Pero nuay pa yo llega media na de mio viaje, ya acaba ya el maga literatura. Con gana yo ya predica con el buen noticia del Reino na todo lugar. Ya predica yo na maga preso y ya dale yo maga tract maskin na maga hombre na CR del maga lugar onde yo ta descanza. Hasta ahora, ta pensa siempre yo si tiene ba gaha ya crici na maga similla de verdad que ya siembra yo.—1 Cor. 3:6, 7.

Pero ta admiti yo que cuando nuevo pa lang yo ya aprende el verdad, no sabe yo predica na buen manera, especialmente con el de mio familia. Por causa na de mio grande amor con Jehova, con animo pero sobra de franca yo ya predica kanila. Ta ama gayot yo con el de mio maga hermano, si John y Ron, y ya forza yo kanila que oi con el cosa yo ta predica. Na uliji, ya pidi yo despensa kanila cay nuay yo considera si cosa sila ta sinti. Pero, nuay yo descanza reza que ojala hay acepta sila el verdad. Desde aquel tiempo, ya enseña conmigo si Jehova y mas ya aprende yo si paquemodo predica y enseña na buen manera.—Col. 4:6.

Deverasan, ta ama gayot yo con Jehova pero gendeh yo ta ulvida con el otro maga persona con quien yo ta ama. El segundo persona con quien gayot yo ta ama amo el de mio mujer, si Susan. Quierre yo tene un mujer quien hay asisti conmigo na maga trabajo del Reino. Mature na espiritual si Susan. Ta acorda yo con el un dia cuando ya anda yo pasea kanila cuando man novio y novia pa lang kame. Ta sinta le na balcon adelante del casa del de suyu mayores na Cranston, Rhode Island. Ta le ele con el El Torre de Guardia. Ya aprecia gayot yo que ta le ele con el maga omento articulo y ta mira con el maga texto. Ya pensa yo, ‘Este mujer mature na espiritual!’ Ya casa kame del Deciembre 1971. Ta rindi yo gracias cay desde aquel tiempo, ya esta le junto conmigo y ya suporta conmigo. Pero el cosa gayot yo ya gusta con ele amo que mas ta ama le con Jehova que conmigo.

Ya tiene kame dos anak hombre de Susan, si Jesse y si Paul. Nuay kanila deja si Jehova mientras ta engranda sila. (1 Sam. 3:19) Cay ya decidi sila sirvi con Jehova, ya puede sila dale honor kanamon de Susan. Ya continua sila na diila servicio con Jehova cay nuay sila ulvida el diila primer amor con ele. Igual sila dos ta sirvi full-time por mas de 20 año ya. Proud tambien yo con el de mio dos bonita yerna, si Stephanie y Racquel. Ta considera yo kanila como de mio mismo maga anak. Igual sila mature na espiritual y ta ama con Jehova con todo corazon y alma.—Ef. 6:6.

Despues del de mio bautismo, ya sirvi yo por 16 año na Rhode Island y alla ya tiene yo maga buen amigo. Tiene yo maga bonito experiencia junto con el maga anciano con quien yo junto ya sirvi. Mas pa, ta rindi tambien yo gracias con el todo maga traveling overseer quien ya tiene buen influencia na de mio vida. Un grande privilegio gayot que puede trabaja junto con el maga hermano quien ya mentena con el diila amor para con Jehova! Del 1987, ya anda kame na North Carolina para sirvi onde tiene mas grande necesidad. Ya puede tambien kame tiene maga buen amigo alla. *

Del Agosto 2002, ya acepta kame de Susan con el invitacion que queda parte del familia Bethel na Patterson, United States. Ya trabaja yo na Service Department y si Susan na laundry. Quierre-quierre gayot le trabaja alla! Despues, del Agosto 2005, ya tiene yo el privilegio que sirvi como miembro del Cuerpo Gobernante. Ya sinti yo que gendeh yo cualificao para na ese assignment. Yan lingasa tambien el de mio mujer acerca na maga responsibilidad, trabajo y maga viaje que envuelto na ese assignment. De antes, no quierre si Susan man viaje por medio de eroplano pero ahora, manada beses ya kame se ta hace! Ya habla si Susan que el maga consejo que ya dale con ele na amable manera el otro maga mujer del maga miembro del Cuerpo Gobernante ya puede ayuda con ele para continua suporta conmigo. Y deverasan, ya suporta gayot le conmigo. Por causa con ese, ta ama gayot yo con ele.

Na de mio oficina, manada yo maga letrato que bien importante gayot conmigo! Ta hace se conmigo acorda si paquemodo de bonito el vida que ya tiene yo. Ya ricibi yo manada maga bonito bendicion cay ya hace yo el todo para mentena con el de mio primer amor con Jehova!