1, 2. Cosa maga conflicto el ya menciona na Genesis y porque kita interesao con ese?

 YA PUEDE ya ba tu pensa acerca na maga conflicto que ya menciona na Biblia? Considera con el cuanto de ese na maga primer capitulo de Genesis. Si Cain ya mata con Abel (Gen. 4:3-8); si Lamek ya mata un joven hombre quien ya hace sinti duele con ele (Gen. 4:23); aquellos quien ta cuida con el maga carnero de Abraham (Abram) y de Lot yan peleajan (Gen. 13:5-7); nuay respeta si Agar con Sara (Sarai), quien rabiao tambien con Abraham (Gen. 16:3-6); yan contra si Ismael con el todo maga gente y el todo yan contra con ele.​—Gen. 16:12.

² Porque el Biblia ta menciona con ese maga conflicto? Bueno, el un razon amo que ta ayuda se con el maga imperfecto gente para aprende si porque sila necesita mentena paz. Ta dale tambien este mira kanaton si paquemodo se kita hace. Ta beneficia kita si ta le kita maga istoria na Biblia acerca na maga gente igual kanaton quien ta enfrenta tambien maga problema. Ta sabe kita si cosa sila ya hace para solva con el diila problema y puede se ayuda kanaton para solva tambien con el diaton maga problema. El deverasan, todo este ta ayuda kanaton para mira si cosa kita debe o gendeh debe hace si ta enfrenta maga semejante situacion.​—Roma 15:4.

3. Cosa hay discuti este articulo?

³ Este articulo hay considera si porque el maga siervo de Jehova necesita solva con el diila maga problema con otro y si paquemodo se sila puede hace. Mas pa, ya menciona este maga principio na Biblia que puede ayuda kanila para hace se y mentena buen relacion na diila maga projimo y con Dios Jehova.

4. Cosa el custumbre del manada gente na mundo ahora y cosa el resulta?

⁴ Si Satanas el primer razon si porque tiene maga peleajan y conflicto el maga gente. Na Eden, ya hace le sale que el cada individual puede y debe decidi si cosa el justo y si cosa el malo, maskin nuay el guia del Dios. (Gen. 3:1-5) Claro kita puede mira si cosa el resulta de ese idea. El mundo lleno de maga gente quien quierre queda independiente y por causa con ese, orgulloso sila, canalla y tan competencia con otro. Aquellos quien ta sigui con ese custumbre ta dale mira que ta acepta sila que mas bueno el idea de Satanas que hace una con el diila mismo interes maskin cosa pa el efecto de ese con otro. Y ese ta resulta na conflicto. Acorda kita que “el gente quien pronto rabia ta causa peleajan; el gente rabion ta puede hace manada kamali.”​—Prov. 29:22.

5. Cosa ya enseña si Jesus na maga gente acerca si cosa hace si tiene conflicto?

⁵ Pero, ya enseña si Jesus con el maga gente que pricura mentena paz, maskin pa dol gendeh sila beneficia si hace sila se. Na de suyu Sermon na Monte, ya dale si Jesus buen consejo acerca si paquemodo solva o evita maga conflicto. Por ejemplo, ya anima le con el de suyu maga dicipulo que queda calmao, pricura mentena paz con otro, quita con el rabia, solva dayun con el maga conflicto y ama con el diila maga enemigo.​—Mat. 5:5, 9, 22, 25, 44.

6, 7. (a) Porque importante que solva dayun con el maga conflicto? (b) Cosa maga pregunta el debe considera el todo maga siervo de Jehova?

⁶ No vale nada lang el diaton esfuerzo que sirvi con Dios​—por medio na rezo, atendida na miting, ministerio y otro pa aspeto del diaton adoranza—​si gendeh kita pricura mentena paz con otro. (Mar. 11:25) Gendeh kita puede queda maga amigo del Dios si gendeh kita conforme perdona con el maga kamali del otro.​—Le con el Lucas 11:4; Efeso 4:32.

⁷ El cada Cristiano necesita acorda que importante perdona y tene paz con otro. Ta perdona ba tu con el de tuyu maga hermano y hermana? Alegre ba tu man junto kanila? Ta expecta si Jehova que el de suyu maga siervo sabe perdona. Si ta sinti tu que tiene pa tu maga cambio que necesita hace, reza y pidi el ayuda de Jehova para puede tu hace con ese! El diaton Tata na cielo hay oi con el de tuyu rezo y contesta con ese.​—1 Juan 5:14, 15.

8, 9. Cosa kita debe hace si tiene quien ya puede hace sinti duele kanaton?

⁸ Cay imperfecto el todo gente, llega gayot el tiempo que tiene el otro cosa puede habla o hace que puede hace sinti duele contigo. Gendeh tu se puede evita. (Ecl. 7:20; Mat. 18:7) Cosa tu hace si sucede se? Considera con el siguiente ejemplo: Na un gathering, yan cuento el un hermana con el dos hermano. Ya sinti duele el un hermano na cosa le ya habla. Cuando nuay mas ya el hermana, ya habla el hermano maga negativo cosas acerca con el hermana por causa na cosa este ya habla. Pero, el otro hermano ya hace acorda con ele que leal ta sirvi este hermana con Jehova por 40 año maskin tiene maga dificultad y asigurao le que gendeh intencion del hermana que hace sinti duele con ele. Despues le pensa con este unrato, el hermano ya habla, “Justo tu.” Como resulta, ya solva el problema.

⁹ Cosa este ejemplo ta dale mira? Puede tu decidi si cosa tu hace si ya puede hace sinti duele contigo el otro. El un amable persona ta perdona con el maga diutay kamali. (Le con el Proverbio 10:12; 1 Pedro 4:8.) Para con Jehova, bueno si el un persona “ignora . . . con el kamali” del otro. (Prov. 19:11; Ecl. 7:9) Poreso, si ya sinti tu que tiene contigo quien ya trata na gendeh buen manera o nuay contigo dale mira respeto, pregunta anay con el de tuyu mismo cuerpo: ‘Puede ba yo ulvida ya lang con este? Necesita ba gayot kame tene conflicto por causa con este?’

10. (a) Cosa ya sinti el un hermana na primero acerca na maga negativo comento con ele? (b) Cosa texto na Biblia el ya puede ayuda con este hermana para mentena con el de suyu paz?

¹⁰ Posible, dificil ignora con el maga palabra que ya puede hace sinti duele kanaton. Considera con el experiencia del un pioneer con quien hay llama kita Lucy. Tiene quien ya habla negativo cosas acerca na de suyu servicio como pioneer y si paquemodo ele ta usa con el de suyu tiempo. Ya sinti gayot duele si Lucy y ya pidi le consejo con el maga mature hermano. Ele ya habla: “El diila consejo que estaba na Biblia ya ayuda conmigo para mentena el justo mirada acerca na opinion del otro y para man focus na cosa el mas importante​—el opinion de Jehova.” Ya puede anima con Lucy el Mateo 6:1-4. (Le.) Ya hace quel acorda con ele que debe el de suyu goal amo que hace alegre con Jehova. “Maskin ta habla el otro negativo cosas acerca na de mio servicio,” ele ya habla, “ta esta yo alegre cay sabe yo que ta hace yo el todo para hace alegre con Jehova.” Despues de aquel, ya decidi si Lucy que ulvida ya con el maga negativo comento.

11, 12. (a) Cosa debe hace el un Cristiano si ya sabe le que el de suyu hermano “tiene reclamo” con ele? (b) Cosa kita puede aprende na manera si paquemodo si Abraham ya solva con el un problema? (Mira con el letrato na principio del articulo.)

¹¹ “Todo kita ta comete culpa muchas veces.” (Sant. 3:2) Pone kita que ya sabe tu que ya sinti duele el un hermano na cosa tu ya habla o ya hace. Cosa tu debe hace? Si Jesus ya habla: “Si ta lleva tu el dituyo ofrecimiento para na altar, y ya puede tu acorda cay el dituyo hermano tiene reclamo contigo, deja lang anay el dituyo ofrecimiento alla adelante del altar, y anda una hace paz con tu hermano. Acabar, bira oleh y ofrece el dituyo ofrecimiento.” (Mat. 5:23, 24) Harmonia na consejo de Jesus, man cuento con el de tuyu hermano. Acorda si porque tu man cuento con ele. Gendeh este para disculpa tu con el de tuyu hermano sino para admiti con el de tuyu culpa y hace paz. El de con todo importante amo que tene kita paz na diaton maga hermano y hermana.

¹² Puede kita mira un ejemplo de este si le kita acerca con Abraham y con el de suyu subrino que si Lot. Igual sila tiene maga animal y aquellos quien ta cuida con esos yan peleajan por causa na lugar donde ta persoga con el maga animal. Para solva con el maga problema, ya ofrece una si Abraham con Lot que iscuji si onde le quierre que esta el de suyu familia. (Gen. 13:1, 2, 5-9) Un buen ejemplo gayot le! Ya hace una si Abraham con el paz y gendeh el de suyu mismo interes. Yan lugi ba le? Nuay gayot. Nuay dura despues de este suceso, ya promete si Jehova con Abraham manada bendicion. (Gen. 13:14-17) Si sigui kita con el maga consejo del Dios y solva con el maga problema por medio de amor, si Jehova pirmi hay ayuda y cuida kanaton. ^[1]

13. Cosa ya hace el un overseer cuando ya habla con ele maga gendeh buen cosas y cosa kita puede aprende na de suyu ejemplo?

¹³ Considera un situacion na moderno tiempo. Cuando el un nuevo overseer del un departamento del convencion ya llama con el un hermano para pregunta si puede le man voluntario, el hermano ya habla maga gendeh buen cosas y ya larga con el telefono. Aquel gale, tiene le agrabio na overseer de antes. Nuay rabia el nuevo overseer con el hermano pero ya decidi siempre le que man cuento con este. Despues del un hora, ya llama le otravez con el hermano y ya menciona que nuay pa sila man mirajan. Ya habla le que mas bueno si solva sila con el problema. Despues del un semana, yan mirajan sila na Kingdom Hall. Despues reza, yan cuento sila por un hora y ya explica el hermano si cosa el ya sucede. Ya oi con empatia el overseer y ya menciona maga texto na Biblia. Despues de aquel, ya queda sila man amigo. Na uliji, el hermano yan voluntario na convencion y ya rindi le gracias con el overseer cay ya esta este calmao y ya trata enbuenamente con ele.

14, 15. (a) Cuando kita debe aplica con el consejo na Mateo 18:15-17? (b) Cosa el tres cosas que debe kita hace asegun con Jesus y cosa debe el diaton goal si ta hace con ese?

¹⁴ El mayoria del maga conflicto entre na maga Cristiano puede lang solva na privado. Pero, ya menciona si Jesus cuanto maga situacion donde posible necesita queda envuelto el otro. (Le con el Mateo 18:15-17.) Cosa el resulta si el quien ya culpa nuay oi con el de suyu hermano, con el maga testigo y con el congregacion? Debe “trata con ele como un pagano y un pecador.” Ahora, ese quierre decir que debe con ele man disfellow. Este ta dale mira que el culpa gendeh lang basta un diutay conflicto. Sino, este amo (1) un culpa que puede solva el maga persona quien envuelto pero (2) un serioso culpa tambien este que donde puede man disfellow con el persona si nuay con este arregla. Posible, el persona ya engaña con otro o ya habla imbusterias para hace malo con el reputacion del un persona. Gendeh si Jesus ta refiri con el maga culpa igual na adulterio, homosexualidad, apostasia, idolatria o otro maga serioso culpa que el maga anciano el debe agarra.

¹⁵ El goal del consejo de Jesus amo que ayuda con el un hermano por medio de amor. (Mat. 18:12-14) Una, debe ustedes pricura solva con el problema na privado. Posible, necesita hace con ese mas de una vez. Si nuay se buen resulta, man cuento con el quien ya culpa junto con otro quien sabe acerca el problema o quien puede ayuda con ustedes para incuntra un solucion. Si ya puede tu solva con el problema na diila ayuda, “ya gana tu otra vez con el dituyo hermano.” Habla lang tu el problema na maga anciano si nuay siempre buen resulta maskin pa ya hace ya tu manada esfuerzo para ayuda con el quien ya culpa.

16. Cosa ta dale mira que practical y amable el consejo de Jesus?

¹⁶ Ralo lang que necesita el maga hermano hace con el todo tres cosas que ya menciona na Mateo 18:15-17. Bueno se cay ese quierre decir que mayoria ta incuntra ya con el solucion y gendeh mas necesita quita na congregacion con el persona quien ya culpa. Mas mucho, ta puede realiza el quien ya culpa con el cosa le ya hace y ta corecta con ese. Y el persona con quien le ya culpa posible decidi que perdona con ele y ulvida con el culpa. Maskin cosa man el situacion, el maga palabra de Jesus ta indica que el congregacion gendeh dayun debe queda envuelto na maga conflicto. Puede lang queda envuelto el maga anciano si ya hace ya con el primer dos cosas y si tiene evidencia que claro ta dale mira si cosa ya sucede.

17. Cosa maga bendicion kita hay experiencia si ‘busca kita con el paz’?

¹⁷ Mientras ta continua este sistema de maga cosas, imperfecto siempre el maga gente y hay continua ofende con uno y otro. Justo este cosa ya escribi si Santiago: “Si tiene gente quien gendeh ta comete culpa na disuyo conversada, ele un gente perfecto y ta puede ele controla el disuyo entero cuerpo.” (Sant. 3:2) Para solva con el maga conflicto, debe kita pricura “busca con el paz y sigui con este.” (Sal. 34:14) Si hace kita se, hay tene kita buen relacion na diaton maga hermano y hermana, y puede kita mentena con el unidad na congregacion. (Sal. 133:1-3) Y el mas importante, hay tene kita buen relacion con Jehova, “el Dios de Paz.” (Roma 15:33) Ese el maga bendicion que hay experiencia aquellos quien ta solva con el maga problema por medio na amor.