1, 2. Porque el maga Testigo de Jehova ta sigui con el alto principio de mudada? (Mira con el letrato na principio del articulo.)

 “MANADA casual lang ta muda especialmente si caliente,” ya habla el un diario de Dutch acerca na un miting del maga religioso lider. “Gendeh igual ansina el cosa tu puede mira na convencion del maga Testigo de Jehova. . . . El maga hombre ta usa americana y corbata y el largor del palda del maga mujer. . . gendeh corto pero gendeh tambien de antes el estilo.” Poreso, ta comenda con el maga Testigo de Jehova cay ta sigui sila con el cosa ta habla el Biblia que “usa camisa decente y bisti na un manera humilde y modesto, . . . que amo conviene para con el mujer religioso.” (1 Tim. 2:9, 10) Ta converza si apostol Pablo acerca na maga mujer pero ese principio puede tambien aplica na maga hombre.

² El propio mudada importante para kanaton como maga siervo de Jehova y importante tambien se con Dios con quien kita ta adora. (Gen. 3:21) El cosa ta habla el Escritura acerca na camisa y mudada ta dale mira que el Soberano del universo tiene alto principio acerca si cosa usa el de suyu maga siervo. Entonces, el diaton camisa y mudada debe gendeh ta depende na cosa lang kita quierre. Debe tambien kita considera si cosa el aceptable con el Soberano Señor Jehova.

3. Cosa kita puede aprende acerca na mudada na Ley del Dios para na maga Israelita?

³ Por ejemplo, na Ley del Dios para na maga Israelita tiene maga mandamiento que ta protege kanila desde na imoral manera de vida del maga nacion que alrededor kanila. Este Ley ta dale mira que gendeh aceptable con Jehova el clase de mudada que ta hace dificil para identifica si hombre ba o mujer el un persona. (Le con el Deuteronomio 22:5.) Base na direccion del Dios acerca na mudada, claro kita puede mira que gendeh aceptable con Dios el estilo de mudada que ta hace ichuray mujer con el hombre, ta hace ichuray hombre con el mujer o ta hace dificil para identifica con el diferencia del hombre y mujer.

4. Cosa puede ayuda con el maga Cristiano hace justo decision acerca na mudada?

⁴ El Palabra del Dios ta contene maga principio que puede ayuda na maga Cristiano hace justo decision acerca na mudada. Puede se sila aplica maskin onde man sila ta queda, maskin cosa el diila cultura o clima. Gendeh kita necesita detallado lista acerca si cosa manera de mudada el aceptable y gendeh. Sino, ta sigui kita con el maga principio del Biblia que donde puede siempre kita iscuji si cosa kita quierre usa. Considera kita cuanto maga principio na Biblia que puede ayuda kanaton determina el “voluntad del Dios y sabe si cosa el bueno” si ta decidi si cosa visti.​—Roma 12:1, 2.

5, 6. Cosa debe el reaccion del maga gente na diaton mudada?

⁵ Ya guia con apostol Pablo para hace claro con el importante principio na 2 Corinto 6:4, El Nuevo Testamento. (Le.) El diaton ichura ta revela si quien kita. Manada maga gente ta tene maga impresion y opinion acerca kanaton ‘base lang na cosa ta mira diila ojos.’ (1 Sam. 16:7) Entonces, como maga ministro del Dios, el diaton mudada gendeh lang base na cosa kita quierre usa que comfortable kita. El maga principio que puede kita saca na Palabra del Dios debe manda kanaton move para evita usa maga camisa que bien apretao, claro puede mira el parte del cuerpo o ta causa con otro para tiene sexual deseo kanaton. No permiti que el otro queda gendeh comfortable o evita kanaton mira por causa na diaton mudada.

⁶ Si limpio y arreglao el diaton mudada, mas grande el posibilidad que el maga gente respeta kanaton como maga ministro del Soberano Señor Jehova. Y posible, tene sila interes conoce con el Dios con quien kita ta adora. Mas pa, el diaton propio mudada ta dale buen impresion con el organizacion que ta representa kita. Como resulta, posible el otro mas pone atencion con el mensaje que ta lleva kita.

7, 8. Na cosa maga ocasion debe kita usa propio camisa?

⁷ Cay ta respeta kita con el diaton Dios, con el diaton maga hermano y hermana y con el maga gente con quien kita ta predica, debe kita muda na manera que queda aceptable el diaton mensaje con otro y ta dale gloria con Jehova. (Roma 13:8-10) Importante este especialmente si ta participa kita na maga Cristiano actividad, igual si ta atende kita maga miting o ta sale na predicacion. Debe el diaton mudada “como sedebe hace el maga [gente] quien ta habla que sila devoto con Dios.” (1 Tim. 2:10, El Nuevo Testamento) Siempre, el cuanto camisa que aceptable na un lugar gendeh aceptable na otro. Poreso, el maga siervo de Jehova na entero mundo ta considera con el maga cultura del un lugar para gendeh ofende con el maga gente.

⁸ Le con el 1 Corinto 10:31. Si ta atende kita maga asemblea y convencion, debe el diaton mudada propio y modesto, y gendeh ta dale mira el estilo del mundo. Maskin si ta man check in y check out kita na hotel y ta pasea antes y despues del convencion, ta evita kita muda que sobra de casual o gendeh arreglao el mudada. Como resulta, gendeh kita tiene huya manda conoce que uno kita del maga Testigo de Jehova y predica si tiene kita el oportunidad.

9, 10. Porque kita debe considera con el principio na Filipo 2:4 si ta iscuji cosa usa?

⁹ Le con el Filipo 2:4. Porque necesita el maga Cristiano considera si paquemodo el diila mudada puede afecta na maga hermano y hermana? El un razon amo cay el maga siervo del Dios ta pricura aplica con el consejo del Biblia: “Mata na de ustedes cuerpo el maga cosa-cosa de este mundo, como el maga immoralidad, maga cuchinadas, maga deseo . . . malo.” (Col. 3:2, 5) No quierre kita que man dificil el maga hermano y hermana aplica con este consejo. Aquellos quien ya deja ya con el diila imoral manera de vida de antes posible siempre ta pricura resisti con el diila mal deseo. (1 Cor. 6:9, 10) Asigurao, no quierre kita que man dificil se sila hace.

¹⁰ Si junto kita con el diaton maga espiritual hermano y hermana, na miting man o na otro ocasion, el diaton manera de mudada debe puede ayuda con otro na congregacion para esta limpio na moral. Tiene kita libertad para iscuji si cosa kita usa pero todo kita tiene el responsibilidad para usa camisa que hace facil con otro para esta limpio na moral y continua sigui con el principio del Dios acerca na pagka-sagrao na pensamiento, palabra y accion. (1 Ped. 1:15, 16) El deverasan amor “gendeh ta actua na gendeh decente manera, gendeh ta hace una el diila mismo bien.”​—1 Cor. 13:4, 5, NWT.

11, 12. Cosa kita debe considera si ta decidi si cosa kita usa?

¹¹ Si ta decidi si cosa usa, el maga siervo del Dios ta considera con el “tiempo para na cada actividad y na cada accion.” (Ecl. 3:1, 17) Pero siempre, el diferente clima y tiempo puede afecta si cosa kita usa. Incluido alli el diferente circumstancia. Pero, el principio de Jehova gendeh ta cambia por causa na tiempo.​—Mal. 3:6.

¹² Si caliente el tiempo, mas dificil iscuji camisa que decente y aceptable con otro. Poreso, el diaton maga hermano y hermana ta aprecia si ta evita kita usa maga camisa que bien apretao o claro ya el privado parte del cuerpo. (Job 31:1) Si ta anda baña na aplaya o na swimming pool, el manera del cosa kita ta visti debe modesto. (Prov. 11:2, 20) Maskin pa gendeh modesto el cosa ta usa el manada na mundo, kita maga siervo de Jehova debe asigura que el cosa kita ta usa puede dale honor con el diaton sagrao Dios con quien kita ta ama.

13. Porque kita debe considera con el consejo na 1 Corinto 10:32, 33 si ta iscuji propio camisa?

¹³ Tiene pa otro importante principio que ayuda kanaton para iscuji propio camisa. El consideracion na conciencia del otro, maga hermano y hermana man sila diaton o gendeh. (Le con el 1 Corinto 10:32, 33.) Responsibilidad diaton que evita maga camisa que posible ofende el otro. “Pensa cada uno diaton hace alegre con su maga vicinos y ayuda canila para ay queda sila mas fuerte na diila fe,” si Pablo ya escribi. Despues, ya habla le el razon si porque kita se debe hace: “Si Cristo noay pensa del disuyo mismo cuerpo lang.” (Roma 15:2, 3) Para puede hace el voluntad del Dios, si Jesus ya hace una el bien del otro contra na cosa le quierre. Poreso, hay evita kita maga estilo de camisa que quierre kita pero puede causa para perde el interes del maga gente oi el mensaje que ta lleva kita.

14. Paquemodo el maga mayores puede enseña con el diila maga anak para dale gloria con Dios por medio na diila manera de mudada?

¹⁴ El maga Cristiano mayores tiene el responsibilidad para enseña con el diila familia aplica con el maga principio na Biblia. Necesita tambien sila asigura que el diila camisa y manera de mudada y del diila maga anak ta hace alegre con Dios. (Prov. 22:6; 27:11) El maga mayores puede enseña con el diila maga anak que respeta con el sagrao Dios con quien sila ta adora por medio na diila ejemplo y practical instruccion. Bueno gayot si el maga mayores ta enseña con el diila maga anak si onde y si paquemodo busca propio camisa. Este quierre decir que iscuji sila gendeh lang el cosa sila quierre sino el cosa tambien puede ayuda kanila para cumpli el diila privilegio representa con Dios Jehova.

15. Cosa debe guia kanaton si ta iscuji camisa?

¹⁵ El Palabra del Dios ta dale practical guia que puede ayuda kanaton para hace maga justo decision que puede dale gloria con Dios. Maskin pa ansina, puede siempre kita iscuji el cosa kita quierre usa. Gendeh igual-igual el cosa kita quierre y el cosa kita puede cumpra. Pero, el diaton camisa debe pirmi arreglao, limpio, modesto, propio na ocasion y aceptable na diaton lugar.

16. Porque gendeh sayang el diaton esfuerzo usa propio camisa?

¹⁶ Deverasan, gendeh pirmi facil para busca modesto y propio camisa. Manada maga tienda ta vende maga popular estilo de camisa. Poreso, posible necesita mas tiempo y esfuerzo para busca maga decente maga palda, camisa y blouse, o americana y pantalon que gendeh bien apretao. Pero si hace kita esfuerzo para busca bonito y propio camisa, el maga hermano y hermana hay nota y aprecia con ese. Y ciendo quierre kita dale gloria con el diaton amable Tata na cielo, gendeh sayang el diaton maga sacrificio para busca camisa que aceptable con ele.

17. Cosa el cuanto maga cosas que debe considera el un hermano antes decidi si debe ba le tene barbas?

¹⁷ Quetal acerca na barbas del maga hombre? Na Ley de Moises, ya manda con el maga hombre tene barbas. Pero, el maga Cristiano gendeh mas bajo na Ley de Moises ni obligao sila sigui con ese. (Lev. 19:27; 21:5; Gal. 3:24, 25) Na cuanto cultura, posible aceptable y respetable si el un persona tiene arreglao barbas y gendeh se ta sangga con otro que oi con el mensaje del Reino. Gane, el cuanto hermano quien tiene privilegio tiene barbas. Maskin pa ansina, el cuanto maga hermano posible decidi que gendeh tene barbas. (1 Cor. 8:9, 13; 10:32) Na otro cultura o lugar, nuay barbas el maga hombre y para kanila, gendeh se aceptable para na un Cristiano ministro. Gane, el un hermano quien tiene barbas posible gendeh puede dale gloria con Dios cay ta afecta se na de suyu reputacion.​—Roma 15:1-3; 1 Tim. 3:2, 7.

18, 19. Paquemodo el Miqueas 6:8 ayuda kanaton mientras ta pricura kita hace alegre con Dios por medio na diaton manera de mudada?

¹⁸ Ta rindi kita gracias cay si Jehova nuay dale kanaton detallado lista de maga ley acerca na diaton camisa y mudada. Gane, ya permiti le kanaton que usa con el diaton libertad para decidi y hace maga razonable decision que base na maga principio na Escritura. Maskin na diaton camisa y mudada, puede kita dale mira que quierre kita ‘humilde camina junto con el diaton Dios.’​—Miq. 6:8.

¹⁹ Ta dale kita mira que humilde kita si ta examina kita con el diaton mismo cuerpo base na pagka-sagrao de Jehova cay ele lang el puede dale kanaton el de con todo buen guia. Mas pa, ta respeta tambien kita con el sentido y opinion del otro. Entonces, kita ‘humilde ta camina junto con el diaton Dios’ si ta vivi kita harmonia na de suyu alto principio y ta dale mira que ta respeta kita con el conciencia del otro.

20. Cosa debe el efecto del diaton camisa y mudada con otro?

²⁰ El diaton mudada debe ta dale mira que maga siervo kita de Jehova. El diaton maga hermano y hermana y el otro gente debe puede mira que ta representa kita con el diaton Dios. Tiene le maga alto principio y alegre kita vivi harmonia con ese. Conviene ricibi comendacion el maga hermano y hermana por causa na diila arreglao mudada y buen conducta. Gane, por causa con ese, ta queda interesao el maga gente na mensaje del Biblia y ta dale se gloria y alegria con Jehova. Si ta hace kita maga justo decision acerca na mudada, asigurao ta continua kita hace alegre con el Dios quien ta visti “honor y gloria.”​—Sal. 104:1, 2.