1. Paquemodo kita debe mira con el deverasan fe?

 BIEN importante el deverasan fe con Dios. Pero, gendeh todo gente el tiene ese. (2 Tes. 3:2) Pero, ta dale fe si Jehova con el cada uno del de suyu maga siervo. (Roma 12:3; Gal. 5:22) El todo quien tiene ese fe, debe gayot rindi gracias.

2, 3. (a) Cosa maga bendicion posible hay ricibi el un persona quien tiene fe? (b) Cosa maga pregunta kita hay considera ahora?

² Si Jesucristo ya habla que el de suyu Tata na cielo ta guia con el maga gente para con ele por medio del De Suyu Anak. (Juan 6:44, 65) Como resulta, si el un persona tene fe con Jesus, puede perdona con el de suyu maga pecado. Por causa de ese, puede le queda amigo de Jehova hasta para cuando. (Roma 6:23) Cosa kita hay hace para tene ese bonito bendicion? Como maga pecador, conviene lang kita muri. (Sal. 103:10) Pero, ya mira si Jehova diaton potencial. Por causa del de suyu incomparable pagka-bueno, ya abri le el diaton corazon para acepta el buen noticia. Poreso, ya principia kita demonstra fe con Jesus y ya dale se kanaton esperanza para vivi hasta para cuando.​—Le con el 1 San Juan 4:9, 10.

³ Pero cosa ba gayot el fe? Entendimiento lang ba este que hay dale kanaton el Dios manada buen cosas na futuro? Y el mas importante, na cosa maga manera debe kita demonstra con el diaton fe?

4. Explica si cosa quierre decir que demonstra el de tuyu fe.

⁴ Para tene fe, gendeh bastante que entende lang tu con el proposito del Dios. El fe ta motiva kanaton para obedece con Dios. El fe con Jesus y con Jehova hay manda tambien move kanaton para habla con otro acerca el buen noticia. Si apostol Pablo ya explica: “Tu ay salva si dituyo boca ta proclama que si Jesus amo el Señor y dituyo corazon ta cree [“ta demonstra tu fe na de tuyu corazon,” NWT] que el Dios ya hace con Ele levanta entre na maga muerto. Cay el corazon ta cree para puede kita queda noay culpa, y el boca ta proclama ese fe para puede kita salva.”​—Roma 10:9, 10; 2 Cor. 4:13.

5. Porque bien importante el fe y paquemodo kita con este continua hace fuerte? Ilustra.

⁵ Claro que para vivi kita hasta para cuando na nuevo mundo del Dios, necesita kita tene fe y continua hace fuerte con ese. Puede kita compara con el diaton fe na un siembra. Si gendeh rega agua con el siembra, hay muri este. Na igual manera, si gendeh kita continua hace fuerte con el diaton fe, hay man luya este y muri. (Luc. 22:32; Heb. 3:12) Pero si cuida kita con este enbuenamente, el diaton fe hay esta vivo y “sigui crici” y hay queda kita “fuerte na deverasan fe.”​—2 Tes. 1:3; Tito 2:2.

6. Cosa el dos cosas que ya menciona na Maga Hebreo 11:1 acerca na fe?

⁶ El Biblia ta explica si cosa quierre decir del fe na Maga Hebreo 11:1. (Le.) El fe tan focus na dos cosas que gendeh kita ta puede mira: (1) “Maga cosa-cosa que ta esperanza kita”​—posible incluido aqui el cosa sucede na futuro que ya promete kanaton pero nuay pa sucede, igual na fin del todo maldad y el llegada del nuevo mundo. (2) “Maga cosa-cosa que gendeh ta puede mira.” Na este contexto, el Griego palabra que yan translate “el conviccion” ta refiri na maga evidencia que ta convinci acerca na maga cosas que gendeh ta puede mira, igual el existencia de Dios Jehova, de Jesucristo, del maga angel y el maga actividad na Reino na cielo. (Heb. 11:3) Paquemodo kita dale prueba que vivo el diaton esperanza y ta creé kita con el maga cosas escribido na Palabra del Dios que gendeh kita ta puede mira? Por medio na diaton maga palabra y accion cay si nuay se, gendeh completo el diaton fe.

7. Paquemodo kanaton puede ayuda el ejemplo de Noe para entende si cosa quierre decir que tiene fe? (Mira con el letrato na principio del articulo.)

⁷ Na Maga Hebreo 11:7, ta dale mira con el fe de Noe quien “cuando ya avisa con ele acerca del maga cosa-cosa que noay maskin quien ya puede mira . . . , ya hace le un grande barco para salva con el disuyo familia.” Ya demonstra si Noe con el de suyu fe cuando ya planta le con el un grande arca. Asigurao, ya pregunta con ele el de suyu maga vecinos si porque le ta planta con el un grande arca. Ya esta lang ba silencio si Noe o ya habla kanila que no entramete con ele? Nuay! El de suyu fe ya manda move con ele para con coraje predica y dale aviso con el maga gente acerca na venedero juzgamiento del Dios. Posible, bira-bira ya habla si Noe con el maga gente el exacto palabra que ya habla con ele si Jehova: “Ya decidi yo que destroza con todo gente cay lleno de violencia el tierra por causa kanila . . . Hay lleva yo avenida na tierra para destroza con el todo creatura abajo na cielo que tiene resuello de vida. Todo cosas na tierra hay muri.” Y posible, ya habla tambien si Noe si cosa el solamente manera para salva sila cuando ya habla le el mandamiento del Dios: “Debe [ustedes] entra na arca.” Poreso, ya demonstra tambien si Noe con el de suyu fe cuando “ya conversa [le] por causa del justicia.”​—Gen. 6:13, 17, 18; 2 Ped. 2:5.

8. Cosa ya habla si Santiago acerca na deverasan fe?

⁸ Posible, ya escribi si Santiago con el de suyu carta corto tiempo despues escribi si apostol Pablo con el Maga Hebreo. Igual con Pablo, ya explica si Santiago que el fe del deverasan maga Cristiano gendeh lang basta ta creé sino envuelto el accion. “Dale tu conmigo prueba cay tiene tu fe, maskin gendeh tu ta hace maga buen trabajo,” ya escribi si Santiago, “y yo por medio del dimio maga buen trabajo ay dale prueba contigo cay tiene yo fe.” (Sant. 2:18) Despues, ya dale mira si Santiago el diferencia entre del ta creé lang y ta demonstra fe el un persona. El maga demonio ta creé que ta existi el Dios pero nuay sila deverasan fe. Sino, tan contra sila con el cumplimiento del proposito del Dios. (Sant. 2:19, 20) Despues, ya usa si Santiago diferente ejemplo y ya pregunta: “Gendeh ba el diaton tata si Abraham ya queda noay culpa, por medio del disuyo maga buen trabajo, cuando ya ofrece le con el disuyo anak si Isaac na altar? Gendeh ba claro que el disuyo fe ya coopera con el disuyo maga trabajo, y que por medio de esos ya queda perfecto el disuyo fe?” Y para claro dale mira que el fe debe puede mira por medio na trabajo, si Santiago ya omenta: “El cuerpo ta muri si noay mas ya el espiritu. Ansina tamen el fe ta muri si noay maga trabajo bueno.”​—Sant. 2:21-23, 26.

9, 10. Paquemodo si apostol Juan ya ayuda kanaton entende el importancia que demonstra con el diaton fe?

⁹ Despues de mas de tres decada, si apostol Juan ya escribi con el de suyu Evangelio y tres carta. Ya entende ba le si paquemodo de importante el deverasan fe? Si. Gane, si compara na otro maga escritor del Biblia, si Juan manada beses ya habla que necesita demonstra con el fe.

¹⁰ Por ejemplo, si Juan ya explica: “Si quien ta cree con el Anak tiene vida hasta cuando. Si quien no quiere cree con el Anak gendeh gayot ay mira el Vida. Emvez, el rabia de Dios talli con ele.” (Juan 3:36) Ta dale tu mira deverasan fe si ta obedece tu con Jesus. Si Juan pirmi ta usa con el maga palabra de Jesus que ta dale mira que debe kita continua demonstra con el diaton fe.​—Juan 3:16; 6:29, 40; 11:25, 26; 14:1, 12.

11. Paquemodo kita puede dale mira que ta aprecia kita que ya sabe kita el verdad?

¹¹ Ta rindi kita gracias cay ya usa si Jehova con el de suyu sagrao espiritu para revela con el verdad y para ayuda kanaton que demonstra con el diaton fe na buen noticia! (Le con el Lucas 10:21.) Gendeh kita debe descanza rindi gracias con Jehova cay ya hace le kanaton cerca con ele por medio na de suyu Anak, “el ta guia canaton na fe y ta hace con ese perfecto.” (Heb. 12:2) Para dale mira que ta aprecia kita con el de suyu incomparable pagka-bueno, debe kita continua hace fuerte con el diaton fe por medio na rezo y estudiada na Palabra del Dios.​—Ef. 6:18; 1 Ped. 2:2.

12. Na cosa maga manera debe kita demonstra el diaton fe?

¹² Debe kita continua demonstra el diaton fe na maga promesa de Jehova. Debe kita hace con este na manera que claro ta puede mira el otro. Por ejemplo, ta continua kita participa na predicacion acerca na Reino del Dios y na trabajo de hacida de dicipulo. Ta continua tambien kita ‘hace bueno con todo gente y especialmente con el diaton maga hermano y hermana na fe.’ (Gal. 6:10) Y ta hace tambien kita esfuerzo para “quita el camisa del [diaton] daan naturaleza [“personalidad,” NWT], junto con el disuyo maga custumbre” y ta evita con el maskin cosa que puede hace luya con el diaton espiritualidad.​—Col. 3:5, 8-10.

13. Paquemodo de importante “el fe con Dios” y na cosa este ya compara y porque?

¹³ “Si noay fe,” el Biblia ta habla, “noay quien ya puede hace el cosa quiere el Dios, cay quien ta atraca con el Dios necesita cree cay tiene Dios, y que Ele ta premia con aquellos quien ta busca con Ele.” (Heb. 11:6) El Palabra del Dios ta explica que “el fe con Dios” amo parte del fundacion que necesita el un persona para queda y esta un deverasan Cristiano. (Heb. 6:1) Na ese fundacion, el maga Cristiano debe “omenta na [diila] fe” el otro maga importante calidad para “esta [sila] na amor de Dios.”​—Le con el 2 Pedro 1:5-7; Jud. 20, 21.

14, 15. Si compara na amor, paquemodo de importante el fe?

¹⁴ El maga Cristiano escritor del Biblia ya hace claro el importancia del fe cuando ya menciona sila con este manada beses. Nuay otro Cristiano calidad el manada beses ya menciona igual con este. Quierre decir ba de este que el fe amo el de con todo importante calidad?

¹⁵ Si compara con el fe na amor, si Pablo ya escribi: “Maskin pa el dimio fe bien grande gayot que ta puede manda move con el maga monte para na otro lugar, pero si noay yo amor, entonces no vale nada yo.” (1 Cor. 13:2) Ya dale tambien mira si Jesus si paquemodo de importante el amor con Dios cuando ya contesta le con el pregunta: “Cosa ba el mandamiento mas importante del Ley?” (Mat. 22:35-40) Manada maga importante calidad el conectao na amor, incluido ya el fe. “El amor,” asegun na Biblia, “ta cree todo.” Quierre decir si ta ama kita con Dios, ta creé kita con el cosa le ta habla na Biblia.​—1 Cor. 13:4, 7.

16, 17. Porque el fe y amor pirmi junto ta menciona na Escritura, pero cosa calidad el mas importante y porque?

¹⁶ Por causa na importancia del fe y amor, el maga escritor del Biblia pirmi ta menciona con este calidad na igual versiculo na Biblia. Si Pablo ya anima con el de suyu maga hermano que ‘visti el camisa de hierro, que amo el fe y el amor.’ (1 Tes. 5:8) Si Pedro ya escribi: “Maskin noay pa ustedes mira con [Jesus], ta ama ya ustedes con Ele. Y maskin gendeh pa ustedes ta puede mira con Ele, ta cree ya ustedes [“ta demonstra fe,” NWT] con ele.” (1 Ped. 1:8) Si Santiago ya pregunta con el de suyu maga iscujido hermano: “Gendeh ba con el maga pobre asegun con el mundo amo ya escuji el Dios para queda sila rico na fe y maga heredero del Reino que ya promete Le con aquellos quien ta ama con Ele?” (Sant. 2:5) Si Juan ya escribi: “Este amo el disuyo [del Dios] mandamiento: Que ay cree kita na Nombre del disuyo Anak si Jesucristo, y que ay ama kita con uno y otro.”​—1 San Juan 3:23.

¹⁷ Maskin pa bien importante el fe na maga promesa del Dios, si cumpli ya el maga promesa del Dios, gendeh mas kita necesita tiene fe con ese. Pero pirmi kita necesita ama con Dios y con el diaton projimo. Poreso, si Pablo ya escribi: “Ahora tiene tres cosa que ta dura: El fe, el esperanza y el amor. Pero el mas importante con todo amo el amor.”​—1 Cor. 13:13.

18, 19. Paquemodo el maga siervo del Dios ta dale mira con el diila fe ahora y quien debe ricibi el alabanza?

¹⁸ Ahora, el maga siervo del Dios ta demonstra con el diila fe na establiciao Reino del Dios. Como resulta, tiene mas de ocho millon maga siervo del Dios quien ta sirvi con ele con paz y unidad. Ta dale sila mira maga calidad que fruta del espiritu del Dios. (Gal. 5:22, 23) Bien bonito mira el fe y amor que ta dale sila mira!

¹⁹ Nuay maskin quien gente el puede hace con este. El diaton Dios el quien ya puede cumpli con este. Y ta lleva este “honor con Jehova, un señal hasta para cuando que nunca perde.” (Isa. 55:13) Deverasan gayot que “un regalo se del Dios” que salva kita “por medio del fe.” (Ef. 2:8) El espiritual paraiso hay continua progresa hasta el entero mundo hay llena de perfecto, recto y alegre gente. Hay lleva este alabanza con Jehova hasta para cuando. Ojala hay continua kita demonstra con el diaton fe na maga promesa de Jehova!