1, 2. (a) Cosa paz kita tiene ahora? (b) Cosa puede sangga kanaton para tene completo paz na este tiempo? (Mira con el letrato na principio del articulo.)

 TODO kita quierre tene paz y nuay cosa tan lingasa. Alegre kita cay ta dale kanaton si Jehova “el paz del Dios” poreso ta queda kita calmao y ta protege este con el diaton pensamiento para gendeh kita queda bien malingasa. (Fil. 4:6, 7) Cay ya dedica kita el diaton vida con Jehova, tiene tambien kita “paz con Dios,” un buen relacion con ele.​—Roma 5:1.

² Pero, nuay pa llega el tiempo que lleva el Dios completo paz. Ta vivi kita na ultimo maga dia y manada gente el bien agresivo. (2 Tim. 3:1-4) Como maga Cristiano, debe tambien kita resisti con Satanas y con el de suyu maga falso enseñanza. (2 Cor. 10:4, 5) Pero, el cosa puede causa kanaton bien grande lingasa amo el oposicion estaba na diaton maga pariente quien gendeh ta sirvi con Jehova. El cuanto posible gangguia con el diaton creencia, acusa kanaton que ta causa kita division na familia o habla kanaton que gendeh mas kita puede queda parte del familia puera si deja kita con el diaton creencia. Cosa debe el diaton mirada na oposicion estaba na familia? Paquemodo kita con este puede enfrenta?

3, 4. (a) Cosa posible el efecto del maga enseñanza de Jesus? (b) Cuando posible bien dificil que sigui con Jesus?

³ Sabe si Jesus que el cuanto gendeh hay acepta con el de suyu maga enseñanza y amo se el razon si porque necesita coraje el de suyu maga siguidores. Este oposicion posible estaba tambien na diaton maga pariente. Si Jesus ya habla: “No ustedes pensa cay ya vene yo para lleva paz na mundo. Noay yo vene para lleva paz, sino espada. Ya vene yo para manda con el anak hombre man contra con su tata, y con el anak mujer man contra con su nana, y con el yerna man contra con su suegra. El mismo maga pariente de un gente amo ay queda disuyo maga contrario.”​—Mat. 10:34-36.

⁴ Cuando ya habla si Jesus “No ustedes pensa cay ya vene yo para lleva paz,” quierre le que sabe aquellos quien ta oi con ele si cosa posible sucede si queda sila de suyu maga dicipulo. El de suyu mensaje puede causa division na maga gente. Siempre, gendeh se el cosa quierre si Jesus. Quierre lang le enseña con el maga gente el verdad acerca con Dios. (Juan 18:37) Pero, posible man dificil el de suyu maga siguidores que continua sigui con el de suyu maga enseñanza si el diila maga pariente o maga cerca amigo tan contra kanila.

5. Cosa ya experiencia el maga siguidores de Jesus?

⁵ Si Jesus ya habla que el de suyu maga siguidores debe preparao enfrenta maga oposicion estaba na diila familia. (Mat. 10:38) Para hace alegre con ele, el maga dicipulo de Jesus ya aguanta cuando ya gangguia kanila el diila maga familia o ya desconoce pa gane kanila. Pero como cosa ya promete si Jesus, mas grande el cosa sila ya ricibi contra na cosa ya perde kanila.​—Le con el Marcos 10:29, 30.

6. Cosa kita debe acorda si tan contra el diaton familia na diaton adoranza con Jehova?

⁶ Maskin tan contra el diaton familia con el diaton adoranza con Jehova, ta ama siempre kita kanila. Pero debe kita acorda que debe mas grande el diaton amor para con Dios y con el Cristo. (Mat. 10:37) Debe tambien kita acorda que hay pricura usa si Satanas con el diaton amor na diaton familia para causa kanaton que descanza sirvi con Jehova. Hay considera kita ahora cuanto maga problema que posible sucede por causa na oposicion na familia y si cosa kita puede hace.

7. Cosa debe el de tuyu mirada na situacion si el de tuyu marido o mujer gendeh ta sirvi con Jehova?

⁷ El Biblia ta dale aviso que aquellos quien casa “ay tene . . . maga problema.” (1 Cor. 7:28) Si gendeh Testigo de Jehova el de tuyu marido o mujer, posible hay tene tu mas manada lingasa. Maskin pa ansina, importante que el de tuyu mirada na situacion igual na mirada de Jehova. Si el de tuyu marido o mujer gendeh un siervo de Jehova, gendeh este valido razon para man separtajan ustedes o man divurcio. (1 Cor. 7:12-16) Maskin el de tuyu marido gendeh ta sirvi con Jehova, debe siempre tu respeta con ele como el cabeza del familia. Na igual manera, si el de tuyu mujer gendeh ta sirvi con Jehova, necesita siempre tu ama y cuida con ele.​—Ef. 5:22, 23, 28, 29.

8. Cosa tu puede pregunta con el de tuyu mismo cuerpo si el de tuyu marido o mujer ta pricura pone limitacion con el de tuyu adoranza?

⁸ Paquemodo si el de tuyu marido o mujer ta pricura pone limitacion na de tuyu adoranza? Por ejemplo, el marido del un hermana ya habla con ele que puede lang le sale na predicacion por cuanto especifico dia na semana. Si ta enfrenta tu semejante situacion, pregunta con el de tuyu mismo cuerpo: ‘Ta pidi ba ele que gendeh mas yo sirvi con Jehova? Si gendeh, puede ba yo hace con el cosa le ta pidi?’ Si razonable tu, puede tu evita cuanto maga problema na de ustedes matrimonio.​—Fil. 4:5.

9. Paquemodo el maga Cristiano puede enseña con el diila maga anak que honra con el diila mayores quien gendeh siervo de Jehova?

⁹ Posible mas dificil man train con el maga anak si el de tuyu marido o mujer gendeh ta sirvi con Jehova. Por ejemplo, necesita tu enseña con el de tuyu maga anak que obedece con el mandamiento na Biblia: “Honra con el dituyo tata y nana.” (Ef. 6:1-3) Pero, paquemodo si el de tuyu marido o mujer gendeh ta sigui con el maga principio na Biblia? Queda un buen ejemplo y honra con el de tuyu marido o mujer. Man focus na de suyu maga bonito calidad y habla que ta aprecia tu con ele. Evita habla maga negativo cosas acerca na de tuyu marido o mujer na de ustedes maga anak. Sino, explica kanila que decision del cada uno si sirvi ba le con Jehova o gendeh. El buen conducta del de tuyu maga anak posible puede ayuda para queda interesao na verdad el de tuyu marido o mujer.

10. Paquemodo el maga Cristiano mayores puede enseña con el diila maga anak acerca na verdad na Biblia si gendeh Testigo el diila marido o mujer?

¹⁰ Posible el cuanto maga marido o mujer quien gendeh Testigo de Jehova hay manda con el diila maga anak que participa na maga pagano celebracion o aprende acerca na maga enseñanza del falso religion. El cuanto maga marido posible prohibi con el diila Cristiano mujer que enseña con el diila maga anak acerca na Biblia. Maskin pa ansina, el un Cristiano mujer hay hace el todo cosa le puede hace para enseña con el diila maga anak el maga verdad na Biblia. (Act. 16:1; 2 Tim. 3:14, 15) Por ejemplo, posible gendeh permiti con ele el de suyu marido que man Bible study con el diila maga menor de edad anak o lleva kanila na maga miting. Hay respeta le con el decision del de suyu marido pero puede siempre le man cuento con el diila maga anak acerca na de suyu creencia si tiene oportunidad. Na ese manera, hay puede sila aprende acerca con Jehova y el de suyu maga principio. (Act. 4:19, 20) Na uliji, el maga anak el debe decidi si sirvi ba sila con Jehova o gendeh.​—Deut. 30:19, 20. *

11. Cosa puede causa problema entre contigo y na de tuyu familia quien gendeh Testigo?

¹¹ Na primero, posible nuay kita habla con el diaton familia que ta estudia kita el Biblia junto na maga Testigo de Jehova. Pero mientras ta queda fuerte el diaton fe, ta realiza kita que necesita kita habla kanila acerca el diaton creencia. (Mar. 8:38) Si ya causa se problema entre contigo y na de tuyu familia, considera con el cuanto maga cosas que puede tu hace para puede mentena con el paz y esta siempre fiel con Jehova.

12. Porque posible man contra kanaton el diaton familia pero paquemodo kita dale mira empatia kanila?

¹² Tene empatia na de tuyu familia. Bien alegre kita na verdad que ya aprende kita na Biblia pero el diaton familia posible ta pensa que ya engaña kanaton o ya queda kita miembro del un culto. Cay gendeh kita ta celebra maga holiday junto kanila, posible ta pensa sila que gendeh mas kita ta ama kanila. Baka tan lingasa pa gane sila acerca na diaton futuro. Debe kita dale mira empatia y pricura entende si porque sila tan lingasa acerca kanaton. (Prov. 20:5) Si apostol Pablo ya pricura entende con “todo el maga gente” para puede hace alcanza kanila el buen noticia y puede tambien kita se pricura hace.​—1 Cor. 9:19-23.

13. Na cosa manera kita debe converza con el diaton familia?

¹³ Converza con respeto. “Hace el de ustedes conversada alegre y interesante,” ya habla el Biblia. (Col. 4:6) Puede kita pidi sagrao espiritu con Jehova para ayuda kanaton que converza con el diaton familia con respeto. Gendeh kita debe man debate acerca na diila maga falso enseñanza. Si ya puede sila hace sinti duele kanaton por medio na diila palabra o accion, puede kita imita con el ejemplo del maga apostoles. Si Pablo ya escribi: “Si tiene ta insulta canamon, came ta dale canila bendicion. Ta aguanta lang came si tiene ta persigui canamon. Y ta contesta lang came con buen palabra, si tiene quien ta ultraja canamon.”​—1 Cor. 4:12, 13.

14. Cosa el maga beneficio si mentena kita buen conducta?

¹⁴ Mentena buen conducta. Puede ayuda si con respeto kita ta converza pero mas grande el efecto si bueno el diaton conducta. (Le con el 1 Pedro 3:1, 2, 16.) Por medio na de tuyu ejemplo, dale mira con el de tuyu familia que el maga Testigo de Jehova tiene alegre matrimonio, ta cuida enbuenamente con el diila maga anak, y tiene limpio y alegre vida. Maskin pa gendeh acepta el diaton familia con el verdad, puede siempre kita queda alegre cay el diaton buen conducta ta puede hace alegre con Jehova.

15. Paquemodo kita puede plaña adelantao para evita maga situacion que puede causa purpiajan?

¹⁵ Plaña adelantao. Pensa maga situacion que posible causa purpiajan y si cosa tu hace si sucede se. (Prov. 12:16, 23) El un hermana de Australia ya relata: “El de mio suegro tan contra gayot con el verdad. Antes llama con ele, ta reza kame del de mio marido con Jehova para ayuda kanamon que contesta con ele na buen manera. Ta prepara kame maga buen topico que puede kame man cuento. Para evita que man cuento por largo tiempo que mas mucho ta resulta na purpiajan acerca na religion, ta decidi kame daan si paquemodo de largo el tiempo del diamon llamada.”

16. Cosa tu puede hace si tan conciencia tu cay ta puede tu hace triste con el de tuyu familia?

¹⁶ Siempre, imposible que gendeh gayot tu tiene problema na de tuyu maga pariente quien gendeh Testigo. Si tiene ustedes conflicto, posible man conciencia tu cay ta ama tu con el de tuyu familia y quierre hace alegre kanila. Pero acorda que debe mas leal tu con Jehova contra na de tuyu familia. Si hace tu se, puede se ayuda con el de tuyu familia para entende si paquemodo de importante que obedece con el Biblia. Acorda que gendeh tu puede forza kanila que acepta con el verdad pero puede tu dale mira kanila que tiene maga beneficio si sigui con el maga principio de Jehova. Igual na cosa le ya dale kanaton, ta dale tambien el diaton amable Dios kanila el oportunidad para decidi si sirvi ba sila con ele o gendeh.​—Isa. 48:17, 18.

17, 18. Cosa puede ayuda contigo si tiene un miembro del familia que ya deja con Jehova?

¹⁷ Si el un miembro del familia yan disfellow o gendeh mas ta asocia na congregacion, posible bien duele se para kanaton. Paquemodo tu puede enfrenta con ese?

¹⁸ Mentena con el de tuyu espiritual rutina. Hace fuerte con el de tuyu fe por medio que regular le con el Biblia, prepara y atende maga miting, participa na ministerio y reza que dale contigo fuerza para aguanta. (Jud. 20, 21) Pero paquemodo si ta sinti tu que dol rutina ya lang ese y gendeh tu alegre que hace con ese? No descanza! El un buen espiritual rutina puede ayuda contigo para puede controla con el de tuyu pensamiento y sentido. Considera con el experiencia del quien ya escribi con el Salmo 73. Ya tiene le gendeh justo mirada acerca na maga cosas y como resulta, ya perde el de suyu alegria. Pero, ya puede le corecta con el de suyu pensamiento cuando ya entra le na lugar de adoranza. (Sal. 73:16, 17) Si fiel tu adora con Jehova, puede tambien se sucede contigo.

19. Paquemodo tu puede dale mira respeto na disciplina de Jehova?

¹⁹ Dale mira respeto na disciplina de Jehova. El de suyu disciplina hay tene buen resulta para na todo maskin pa na primero duele este. (Le con el Maga Hebreo 12:11.) Por ejemplo, ya habla kanaton si Jehova que “gendeh . . . man junto” con el maga disfellow. (1 Cor. 5:11-13) Maskin dificil, debe kita evita que man contact con el diaton familia quien disfellow por medio na telefono, text, carta, e-mail o social media.

20. Cosa kita puede esperanza?

²⁰ No perde esperanza. El amor “ta espera todo” poreso ta esperanza kita que aquellos quien ya deja con Jehova hay bira con ele. (1 Cor. 13:7) Si ya puede tu mira evidencia que ta hace le cambio na de suyu vida, puede tu reza que ojala hay tene le el fuerza por medio na Biblia y acepta con el invitacion de Jehova: “Bira conmigo.”​—Isa. 44:22.

21. Cosa tu debe hace si ta experiencia tu oposicion na familia cay ta sigui tu con Jesus?

²¹ Si Jesus ya habla que el diaton amor para con ele debe mas grande contra na diaton amor con maskin quien gente. Y asigurao le que el de suyu maga dicipulo tiene el coraje para esta leal con ele maskin tiene maga oposicion na familia. Poreso si tan contra contigo el de tuyu familia cay ta sigui tu con Jesus, confia con Jehova que ayuda le contigo enfrenta con ese. (Isa. 41:10, 13) Queda alegre cay si Jehova y si Jesus alegre contigo y hay premia sila contigo cay fiel tu.