1, 2. (a) Cosa kita debe sabe hace y porque? (b) Cosa kita hay considera na este articulo?

 COMO maga verdadero Cristiano, necesita sabe kita examina con el maga informacion y hace maga justo conclusion. (Prov. 3:21-23; 8:4, 5) Cay si gendeh, mas pronto puede influencia con el diaton pensamiento si Satanas y el de suyu mundo. (Ef. 5:6; Col. 2:8) Siempre, puede lang kita hace maga justo conclusion si tiene kita maga justo informacion. Como cosa ta habla na Proverbio 18:13, “si el uno ta contesta dayun na un cosa antes de oi el verdad, de locuras se y maka-huya para con ele.”

² Na este articulo, hay considera kita cuanto maga razon si porque posible dificil obtene maga justo informacion y hace maga justo conclusion. Omento pa, hay considera kita maga practical principio na Biblia y maga ejemplo que puede ayuda kanaton para examina enbuenamente con el maga informacion.

3. Porque kita necesita aplica con el principio na Biblia que puede incuntra na Proverbio 14:15? (Mira con el letrato na principio del articulo.)

³ Ahora, bien manada informacion ta puede ricibi el maga gente. Dol nuay acabada el maga informacion alli na Internet, TV y na otro pa maga media. Manada tambien ta ricibi informacion el maga gente por medio na maga e-mail, text y maga noticia que estaba na maga amigo y conoce. Ciendo comon ya que ta hace calayat con el maga falso informacion, debe kita queda con cuidao y examina enbuenamente con el cosa kita ta puede oi. Cosa principio na Biblia el puede ayuda kanaton? El Proverbio 14:15 ta habla: “El inocente ta creé con el todo cosa le ya oi, pero el sabio ta pensa antes hace paso.”

4. Paquemodo el Filipo 4:8, 9 puede ayuda kanaton para iscuji enbuenamente si cosa le y porque importante que obtene kita maga justo informacion? (Mira tambien con el cajon “ Cuanto Provision Para Puede Kita Obtene Maga Justo Informacion.”)

⁴ Para hace maga buen decision, necesita kita maga justo informacion. Entonces, necesita kita queda con cuidao y iscuji enbuenamente si cosa informacion kita le. (Le con el Filipo 4:8, 9.) Gendeh kita debe hace sayang con el diaton tiempo que mira maga cuestionable noticia na Internet o le maga report que ya hace calayat por medio na e-mail. Y bien importante que evita kita con el maga website del maga apostata. El diila proposito amo que hace malo con el maga siervo del Dios y con el verdad. El maga falso informacion puede causa que puede kita hace maga gendeh justo decision. No hace no vale nada con el efecto del falso informacion na de tuyu pensamiento y corazon.​—1 Tim. 6:20, 21.

5. Cosa falso noticia el ya oi el maga Israelita y paquemodo quel kanila ya afecta?

⁵ Peligroso si creé kita con el maga falso informacion. Por ejemplo, considera si cosa ya sucede na tiempo de Moises cuando el 10 na 12 maga espia quien ya anda na Tierra Prometido ya lleva un mal noticia. (Num. 13:25-33) Por causa con este, yan luya el maga siervo de Jehova. (Num. 14:1-4) Porque ansina el reaccion del maga gente? Posible ya pensa sila que ciendo el mayoria del maga espia ya lleva un mal noticia, deverasan el cosa sila ta habla. Nuay el maga gente oi con el buen noticia que ya lleva kanda Josue y Caleb​—maga hombre con quien puede confia. (Num. 14:6-10) En vez examina con el maga informacion y dale mira confianza con Jehova, ya iscuji sila creé con el mal noticia. De locuras gayot quel!

6. Porque kita gendeh debe estraña si oi kita maga negativo istoria acerca na maga siervo de Jehova?

⁶ Necesita kita queda mas con cuidao si ricibi kita maga noticia acerca na maga siervo de Jehova. Pirmi kita acorda que si Satanas el quien ta hace maga acusacion contra na maga fiel siervo del Dios. (Rev. 12:10) Poreso, si Jesus ya habla que aquellos quien tan contra kanaton hay “habla todo clase de chismis” contra kanaton. (Mat. 5:11, El Nuevo Testamento na Chavacano) Si creé kita con ese aviso, gendeh mas kita estraña si puede kita oi maga negativo istoria acerca na maga siervo de Jehova.

7. Cosa kita necesita considera antes imbia maga e-mail o text?

⁷ Quierre-quierre ba tu imbia maga e-mail y text na de tuyu maga amigo y conoce? Si ya puede tu sabe nuevo noticia o oi experiencia, dol news reporter ba tu que quierre habla una con ese? Antes tu imbia text o e-mail, pregunta na de tuyu mismo cuerpo: ‘Asigurao ba yo que deverasan este informacion? Sabe ba yo el todo detalle?’ Si gendeh tu asigurao, baka puede tu hace calayat falso informacion na diaton maga hermano y hermana. Si tan duda tu, no imbia sino borra con ese.

8. Cosa ya hace el maga quien tan contra kanaton na cuanto lugar y paquemodo kita gendeh intencional puede ayuda kanila?

⁸ Tiene pa otro peligro si dayun-dayun tu imbia maga e-mail y text. Na cuanto maga lugar, ya pone restriccion o prohibido el diaton trabajo. El maga quien tan contra kanaton na este maga lugar posible intencional ta hace calayat maga istoria para hace miedo kanaton o para suspecha kita con uno y otro. Considera si cosa ya sucede na Soviet Union de antes. El maga polis que conocido como el KGB ya hace calayat maga istoria que el cuanto maga conocido hermano ya traiciona con el maga siervo de Jehova. * Maka-triste cay manada maga hermano y hermana el quien ya creé con aquel maga falso istoria y ya deja con el organizacion de Jehova. Manada kanila el ya bira na uliji pero el cuanto nuay. Ya perde gayot el diila fe. (1 Tim. 1:19) Paquemodo kita puede evita que sucede este kanaton? No hace calayat maga negativo o gendeh confirmao istoria. No dayun creé con el cosa tu ta oi sino asigura que tiene tu maga deverasan detalle.

9. Cosa pa el otro razon si porque posible kita man dificil obtene maga justo informacion?

⁹ Tiene vez, ta puede kita oi maga istoria que cuanto parte lang el deverasan. El otro maga istoria gendeh ta dale el completo maga detalle. Poreso, tan dificil kita hace maga justo conclusion. Gendeh gayot kita debe creé con el un istoria si el cuanto parte lang el deverasan. Cosa kita puede hace para gendeh kanaton puede engaña este maga istoria?​—Ef. 4:14.

10. Porque el maga Israelita cerca ya man guerra con el diila maga hermano y paquemodo quel sila ya puede evita?

¹⁰ Considera si cosa ya sucede na maga Israelita quien ta queda na oeste parte del Rio de Jordan na tiempo de Josue. (Jos. 22:9-34) Ya ricibi sila un noticia que el maga Israelita quien ta queda na parte este del Jordan (el maga tribo de Ruben y Gad y el media tribo de Manases) ya hace un bien grande altar cerca na Jordan. Deverasan este parte del istoria. Base na este gendeh completo informacion, aquellos na parte oeste ya hace conclusion que el diila maga hermano yan rebelde contra con Jehova. Poreso, yan junto-junto sila para man guerra contra con aquellos quien ta queda na parte este. (Le con el Josue 22:9-12.) Bueno ya lang, antes de ataca, ya imbia anay sila un grupo de maga hombre con quien puede confia para sabe el todo detalle. Cosa ya sabe el maga hombre? El maga Israelita estaba na tribo de Ruben y Gad y el media tribo de Manases ya hace altar, gendeh para na maga sacrificio, sino para hace acorda con el maga Israelita na futuro que maga fiel siervo de Jehova tambien sila. Asigurao alegre el maga Israelita cay nuay sila mata con el diila maga hermano por causa lang na gendeh completo informacion sino ya dale sila tiempo para sabe el todo detalle!

11. (a) Paquemodo ya queda victima si Mefiboset de injusticia? (b) Paquemodo era ya puede evita si David con este injusticia?

¹¹ Como individual, posible tambien kita queda victima de injusticia por causa na gendeh completo informacion que yan calayat acerca kanaton. Considera con el ejemplo de Rey David y Mefiboset. Bondadoso y bueno si David con Mefiboset y ya debolbe le con este el todo tierra del de suyu aguelo que si Saul. (2 Sam. 9:6, 7) Pero na uliji, ya puede sabe si David un negativo noticia acerca con Mefiboset. Maskin nuay le confirma con el informacion, ya saca otravez si David con el todo propiedad de Mefiboset. (2 Sam. 16:1-4) Na uliji, cuando yan cuento si David con Mefiboset, ya realiza si David que ya puede le hace kamali y ya debolbe le otravez con Mefiboset el cuanto porcion del propiedad. (2 Sam. 19:24-29) Pero, ya puede era evita con este injusticia si ya dale lang tiempo si David para sabe con el todo detalle en vez de dayun-dayun actua base na gendeh completo informacion.

12, 13. (a) Cosa ya hace si Jesus cuando el maga gente ya habla imbusterias acerca con ele? (b) Cosa kita puede hace si tiene quien ya hace calayat imbusterias acerca kanaton?

¹² Pero paquemodo si tiene quien ya hace calayat maga imbusterias acerca contigo? Ya sucede este con Jesus y Juan Bautista. (Le con el Mateo 11:18, 19, El Nuevo Testamento.) Cosa ya hace si Jesus? Nuay le usa con el todo del de suyu tiempo y fuerza para defende con el de suyu mismo cuerpo. Sino, ya anima le con el maga gente para sabe si cosa el deverasan​—mira con el cosa le ya hace y cosa le ya enseña. Si Jesus ya habla: “El sabiduria de Dios bien verdadero gayot, cay puede kita mira el resulta de ese.”​—Mat. 11:19, El Nuevo Testamento.

¹³ Tiene kita importante leccion que puede aprende aqui. Tiene vez, posible habla el maga gente maga negativo cosas acerca kanaton. Y baka man lingasa kita cay puede este hace malo con el diaton reputacion. Pero el diaton manera de vida puede dale mira con otro si cosa clase de persona gayot kita. Como cosa kita ya aprende na ejemplo de Jesus, el diaton buen conducta puede dale prueba que gendeh deverasan el maga acusacion contra kanaton.

14, 15. Na cosa manera puede queda un trampa si ta confia kita con el diaton mismo entendimiento?

¹⁴ Ya puede kita aprende que tiene vez, malisud tene justo conclusion cay dificil obtene maga justo informacion. El otro problema tambien amo el diaton imperfeccion. Posible ta sirvi ya kita con Jehova por manada año y ya puede cultiva con el abilidad para pensa enbuenamente. El otro posible ta respeta kanaton cay tiene kita este abilidad. Pero, posible ba que queda tambien se trampa para kanaton?

¹⁵ Si, puede queda un trampa si ta confia kita con el diaton mismo entendimiento lang. El diaton maga emocion y idea posible influencia si paquemodo kita ta pensa. Posible kita principia sinti que ta entende kita con el situacion maskin nuay kita el todo maga detalle. Bien peligroso gayot este! Ta dale aviso el Biblia que gendeh kita debe confia con el diaton mismo entendimiento.​—Prov. 3:5, 6; 28:26.

16. Na este ecsena, cosa ya sucede na restaurant y cosa ya pensa si Tom?

¹⁶ Considera con este ecsena. Un noche cuando na restaurant, el un experienciao anciano que si Tom ya puede mira con el otro anciano que si John junto con el un persona que gendeh de suyu mujer. Ya mira kanila si Tom que ta re, alegre tan cuento y ya abraza con uno y otro. Ya queda bien malingasa si Tom y ya pensa, ‘Hay man divurcio ba gaha si John y el de suyu mujer? Cosa hay sucede na diila maga anak?’ Ya mira ya si Tom maga situacion igual ansina de antes. Cosa gaha tu sinti si etu si Tom?

17. Na este ecsena, cosa ya sabe si Tom na uliji y cosa el leccion para kanaton?

¹⁷ Pero ahora ya. Maskin ya pensa si Tom que ya traiciona si John con el de suyu mujer, tiene ba gayot le el todo detalle? Aquel mismo noche, ya llama si Tom con John. Imagina el alivio que ya sinti si Tom cuando ya puede le sabe que hermana gale de John el mujer, quien ta visita estaba na otro lugar. Nuay sila man mirajan por manada año. Ciendo cuanto hora lang puede esta el de suyu hermana, ya come ya lang sila junto na un restaurant. Nuay puede man junto el mujer de John kanila. Alegre si Tom cay nuay le hace calayat con otro el cosa le ta pensa del una. Cosa el leccion para kanaton? Maskin paquemodo de tarda ya kita ta sirvi con Jehova, necesita kita siempre sabe el todo maga detalle para puede kita hace maga justo conclusion.

18. Na cosa manera kita puede hace gendeh justo conclusion si gendeh kita tan uyun con el diaton hermano?

¹⁸ El otro pa razon si porque posible dificil examina enbuenamente con el un situacion amo si envuelto el un hermano con quien gendeh kita tan uyun. Si pirmi kita pensa acerca el diaton problema con ele, posible man duda ya kita con el diaton hermano. Como resulta, si ya puede kita oi un negativo noticia acerca con este hermano, baka creé kita dayun con ese. Cosa el leccion? Si tan sentimiento kita con el diaton maga hermano, puede kita hace maga conclusion que gendeh base na deverasan maga informacion. (1 Tim. 6:4, 5) Para puede kita evita con ese, debe kita gendeh envidia y man celos. Sino, debe kita acorda que obligacion diaton que ama y perdona con el diaton maga hermano y hermana.​—Le con el Colosa 3:12-14, El Nuevo Testamento.

19, 20. (a) Cosa maga principio na Biblia el puede ayuda kanaton para examina enbuenamente con el maga informacion? (b) Cosa kita hay discuti na sunod articulo?

¹⁹ Ahora, bien dificil obtene maga justo informacion y examina enbuenamente con ese. Porque? Cay manada del informacion que tiene ahora amo gendeh completo o el cuanto parte lang el deverasan. Mas pa, maga imperfecto kita. Cosa puede ayuda kanaton? El maga principio que puede kita incuntra na Palabra del Dios. Por ejemplo, el un principio ta habla kanaton que de locuras si contesta kita dayun que nuay pa sabe el todo maga detalle. (Prov. 18:13) El otro pa principio ta ayuda kanaton para mira que gendeh kita debe creé dayun con el cosa kita ta oi. (Prov. 14:15) Y maskin tarda ya kita ta sirvi con Jehova, gendeh kita debe confia con el diaton mismo entendimiento. (Prov. 3:5, 6) El maga principio na Biblia puede protege kanaton si usa kita maga justo informacion para puede kita hace maga justo conclusion y maga buen decision.

²⁰ Pero tiene pa otro dificultad. Como maga gente, pronto lang kita juzga base na cosa kita ta puede mira. Na sunod articulo, hay discuti kita con el maga cosas que posible causa kanaton que hace con este kamali y sabe tambien kita si paquemodo kita evita con este.