1, 2. Cosa el Maga Hebreo 13:4 ta anima kanaton que hace?

 ALEGRE ba tu ta honra con Jehova? Asigurao, alegre tu! Conviene le ricibi el de tuyu honor y ya promete le que honra tambien le contigo. (1 Sam. 2:30; Prov. 3:9; Rev. 4:11) Quierre tambien le que honra tu con el maga gente, igual con el maga oficial na gobierno. (Roma 12:10; 13:7) Pero, tiene un aspeto donde debe gayot tu dale mira honor—na de tuyu matrimonio.

² Si apostol Pablo ya escribi: “Tene ustedes todo grande respeto con el matrimonio y no mancha con pecado el cama del maga maridable.” (Heb. 13:4) Nuay lang si Pablo dale de suyu observacion. Sino, el texto ta anima con el maga Cristiano que honra con el matrimonio y mira con este como precioso. Ansina ba el de tuyu mirada na matrimonio, particularmente na de tuyu mismo matrimonio si casao tu?

3. Cosa importante consejo ya dale si Jesus acerca na matrimonio? (Mira con el letrato na principio del articulo.)

³ Si Jesus el de con todo buen ejemplo cay ya honra le con el matrimonio. Cuando el maga Fariseo ya pregunta con Jesus acerca na divurcio, ya menciona le el cosa ya habla el Dios acerca na primer matrimonio: “Por eso ganeh ay deja el hombre con su tata y nana y ay man junto con su mujer. Y sila dos ay queda un solo cuerpo.” Si Jesus ya omenta: “El cosa ya uni el Dios, el gente no puede separta.”—Le con el Marcos 10:2-12; Gen. 2:24.

4. Cosa quierre si Jehova para na maga matrimonio?

⁴ Ya dale mira si Jesus que el matrimonio estaba con Dios y que quierre Le que permanente este. Nuay habla el Dios con Adan y Eva que puede termina el matrimonio por medio na divurcio. Cuando ya introduci si Jehova con el primer matrimonio, quierre le que un permanente relacion este entre na un hombre y un mujer.

5. Cosa el efecto del muerte na un matrimonio?

⁵ Pero sabe kita que por causa na culpa de Adan, ya tiene maga cambio. Ya tiene muerte y este puede afecta con el matrimonio. Puede se kita mira na cosa ya escribi si Pablo cuando ya explica le que el maga Cristiano gendeh mas bajo na Ley de Moises. Ya revela le que el muerte ta termina con el matrimonio y el marido o mujer quien ya queda puede casa otravez.—Roma 7:1-3.

6. Cosa el Ley de Moises ta dale mira acerca na mirada del Dios na matrimonio?

⁶ El Ley que ya dale el Dios con el nacion de Israel ta contene maga detalle acerca na matrimonio. Ta permiti este con el poligamia, un practica que ta existi ya antes pa dale el Dios con el de suyu Ley na Israel. Pero, ya hace le maga ley para protege con el maga mujer. Por ejemplo, si ya casa el un Israelita na un esclavo y despues ya tiene segundo mujer, debe le siempre dale con el de suyu primer mujer el todo cosa este necesita. Quierre el Dios que protege y cuida le con el de suyu mujer. (Ex. 21:9, 10) Gendeh kita bajo na Ley pero puede siempre kita mira alli que interesao si Jehova na matrimonio. Gendeh ba ta manda se move kanaton para honra con el matrimonio?

7, 8. (a) Cosa el Deuteronomio 24:1 ta habla acerca na divurcio? (b) Cosa el mirada de Jehova na divurcio?

⁷ Cosa el Ley ya habla acerca na divurcio? Maskin bien precioso con Dios el matrimonio, ya permiti le con el divurcio. (Le con el Deuteronomio 24:1.) El un hombre Israelita puede man divurcio con el de suyu mujer si “tiene le cosa ya mira que bien malo con este.” Nuay menciona el Ley si cosa quierre decir del “bien malo.” Asigurao que un maka-huya o serioso cosa este y gendeh un diutay kamali lang. (Deut. 23:14) Maka-triste cay na tiempo de Jesus, manada maga Judio el yan divurcio “maskin cosa lang el [diila] razon.” (Mat. 19:3) Gendeh gayot kita quierre que imita kanila.

⁸ Ya revela el profeta Malaquias si cosa el mirada del Dios na divurcio. Aquel tiempo, comon para na un hombre que man divurcio ‘con el mujer con quien le ya casa cuando joven pa le,’ posible para casa con el un mas joven y pagano mujer. Acerca na mirada del Dios, si Malaquias ya escribi: “Ta odia yo con el divurcio.” (Mal. 2:14-16) Uyun se na cosa ta habla el Palabra del Dios acerca na primer matrimonio: “El hombre hay . . . esta junto con el de suyu mujer y sila hay queda un laman.” (Gen. 2:24) Igual tambien el mirada de Jesus na matrimonio na de suyu Tata. Ele ya habla: “El cosa ya uni el Dios no puede el gente separta.”—Mat. 19:6.

9. Cosa quierre decir del maga palabra de Jesus na Marcos 10:11, 12?

⁹ Posible tiene quien pregunta, ‘Tiene ba valido razon para na un Cristiano para man divurcio y casa otravez?’ Bueno, si Jesus ya habla: “El hombre quien ta separta con el disuyo mujer, y ta casa con otro mujer, ta comete adulterio contra con el disuyo mujer. Y si el mujer ta separta con su marido y ta casa con otro hombre, ta comete tamen le adulterio.” (Mar. 10:11, 12; Luc. 16:18) Entonces, claro que ta honra si Jesus con el matrimonio y quierre le que ansina tambien hace el otro. Si el un hombre ya man divurcio con el de suyu leal mujer (o el un mujer con el de suyu leal marido) por causa lang na gendeh valido razon y ya casa con otro, ta comete le adulterio. Deverasan este cay si yan divurcio el man maridable por causa na gendeh valido razon, nuay siempre termina el diila matrimonio. Na mirada del Dios, “un laman” siempre sila. Mas pa, ya habla si Jesus que si man divurcio el un hombre con el de suyu leal mujer, posible queda este un razon para comete adulterio el de suyu mujer. Porque? De antes, el un divurciao mujer posible sinti que necesita le casa otravez para tene el cosa le necesita na financial. Si casa le otravez, ta comete le adulterio.

10. Cosa el solamente razon que puede man divurcio el un Cristiano y puede casa otravez?

¹⁰ Ya explica si Jesus el solamente razon que puede termina con el matrimonio: “Ta habla yo con ustedes, el hombre quien ta separta con su mujer—fuera lang si por causa de immoralidad [Griego, por·neiʹa]—y ta casa con otro mujer, ta comete adulterio.” (Mat. 19:9) Ansina tambien el cosa le ya explica na Sermon na Monte. (Mat. 5:31, 32) Na ese dos ocasion, ya converza si Jesus acerca na “immoralidad.” Incluido na ese termino el adulterio, prostitucion, sexual relacion entre na un hombre y mujer que gendeh casao, homosexualidad y bestialidad. Por ejemplo, si el un casao hombre ya tiene sexual relacion con otro, el de suyu mujer puede decidi si man divurcio ba le con ele o gendeh. Si yan divurcio le con el de suyu marido, ya termina ya el diila matrimonio na vista del Dios.

11. Porque posible que decidi el un Cristiano que gendeh man divurcio maskin pa tiene valido razon para hace se?

¹¹ Importante que acorda kita que nuay habla si Jesus que si ya comete imoralidad (por·neiʹa) el marido o mujer, debe gayot sila man divurcio. Por ejemplo, posible iscuji el mujer que gendeh le man divurcio con el de suyu marido maskin ya comete este imoralidad. Posible que ta ama pa el mujer con el de suyu marido; baka conforme le perdona con este y man ayudajan para puede sila hace fuerte con el diila matrimonio. El deverasan, si decidi le man divurcio pero gendeh casa otravez, posible enfrenta le maga dificultad. Por ejemplo, quetal el de suyu material y sexual necesidad? Quetal si tan triste ele? Tiene ba sila maga anak que debe considera? Gendeh gaha mas dificil hace engranda kanila na verdad si iscuji le man divurcio? (1 Cor. 7:14) Claro que si iscuji man divurcio el un persona, hay enfrenta le maga dificultad.

12, 13. (a) Cosa ya sucede na matrimonio de Oseas? (b) Porque si Oseas ya acepta otravez con Gomer y cosa este ta enseña kanaton acerca na matrimonio ahora?

¹² Puede ayuda kanaton el cosa ya experiencia el profeta Oseas. Ya habla el Dios con ele que casa con el un mujer (si Gomer), quien hay queda “un mujer de prostitucion, y tene maga anak por medio de prostitucion. . . . Ya queda [si Gomer] priñada y ya pari un anak hombre.” (Os. 1:2, 3) Despues pasa el cuanto tiempo, ya tiene le un anak mujer y un anak hombre pero posible gendeh si Oseas el tata de ese. Maskin pa cuanto beses ya comete adulterio si Gomer, nuay man divurcio con ele si Oseas. Na uliji, ya deja el mujer con Oseas y ya queda un esclavo. Pero, ya cumpra siempre con ele otravez si Oseas. (Os. 3:1, 2) Ya usa si Jehova con Oseas para dale mira si paquemodo Le ya perdona manada beses con el maga Israelita quien nuay esta fiel con ele. Cosa kita puede aprende con este?

¹³ Si el mujer o marido del un Cristiano ya comete imoralidad, necesita le hace un decision. Ya habla si Jesus que tiene le valido razon para man divurcio y casa otravez. Pero si quierre le, puede le perdona y gendeh se malo. Si Oseas ya acepta otravez con Gomer. Si man birajan sila, gendeh debe tene relacion si Gomer na otro maga hombre. Nuay tene sexual relacion si Oseas con Gomer por cuanto tiempo. (Os. 3:3) Pero ya pasa el cuanto tiempo, ta sale que ya tiene otravez sexual relacion si Oseas con Gomer y ese ta dale mira si paquemodo el Dios conforme perdona con el de suyu maga siervo y acepta otravez kanila. (Os. 1:11; 3:3-5) Cosa este ta enseña kanaton acerca na matrimonio ahora? Si el un persona ya decidi que no man divurcio y ya tiene otravez sexual relacion con el de suyu marido o mujer, ese ta dale mira que ya perdona le con este. (1 Cor. 7:3, 5) Si ese el cosa le ya decidi hace, nuay mas valido razon para man divurcio. Sila, como man maridable, debe hace el todo que puede sila hace para hace fuerte con el diila matrimonio.

14. Asegun na 1 Corinto 7:10, 11, cosa posible sucede na un matrimonio?

¹⁴ Igual con Jesus y con Jehova, el todo Cristiano debe pricura honra con el matrimonio. Pero, ta falla se hace el cuanto por causa na imperfeccion. (Roma 7:18-23) Poreso, gendeh kita debe espanta que el cuanto maga Cristiano del primer siglo ya tiene maga problema na diila matrimonio. Si Pablo ya escribi que “el mujer no puede separta con su marido”; pero na cuanto maga situacion, ta sucede se.—Le con el 1 Corinto 7:10, 11.

15, 16. (a) Maskin tiene problema el maga man maridable, cosa sila ta pricura hace y porque? (b) Paquemodo se puede aplica si el uno na man maridable gendeh ta sirvi con Jehova?

¹⁵ Nuay explica si Pablo si cosa posible el razon si porque yan separtajan el man maridable. Nuay menciona que el problema amo cay el marido imoral y como resulta, tiene valido razon el mujer para man divurcio y casa otravez. Ya escribi si Pablo que si el mujer ya separta con el de suyu marido, “no puede le casa, o, si quiere, puede le vira ole con su marido.” Entonces, na vista del Dios, unido pa sila dos. Ya conseja si Pablo que maskin cosa man el problema, basta nuay envuelto sexual imoralidad, debe sila pricura man birajan. Puede sila pidi ayuda na maga anciano na congregacion. Hay evita el maga anciano que tiene sila con quien man afavor pero puede sila dale maga consejo base na Biblia.

¹⁶ Pero, posible que mas complicao si uno lang na man maridable el quien ta sirvi con Jehova y ta pricura sigui con el maga principio del Dios. Si enfrenta sila maga problema, puede ba man separtajan el man maridable? Como cosa ya menciona, el Biblia ta dale mira que el valido razon para man divurcio amo el sexual imoralidad pero nuay se menciona el diferente maga razon que puede man separtajan el man maridable. Si Pablo ya escribi: “Si un mujer tiene un marido gendeh Cristiano y el marido ta comforma vivi junto con ele, no conviene le deja con su marido.” (1 Cor. 7:12, 13) Aplicable tambien se na diaton tiempo ahora.

17, 18. Porque el cuanto maga Cristiano ta decidi que esta na diila matrimonio maskin tiene maga grabe dificultad?

¹⁷ Pero, tiene maga situacion donde el “gendeh Cristiano” marido ta dale mira na de suyu maga accion que gendeh le “ta comforma vivi junto” con el de suyu mujer. Baka sobra le ta maltrata con el de suyu mujer donde ta sinti este que na peligro ya el de este salud o vida. O gaha gendeh le ta suporta con el de suyu mujer y familia. Baka ta pone le na peligro con el de este espiritualidad donde dol imposible ya para kanila que sirvi con Jehova. Por causa con ese, el cuanto maga Cristiano ya decidi que separta maskin pa ta habla el diila marido que no quierre le man separtajan. Pero el otro maga Cristiano tiene otro decision; ya aguanta sila y ya pricura solva con el maga problema. Porque?

¹⁸ Na ese maga situacion, maskin yan separtajan sila, casao siempre sila dos. Si gendeh sila ta queda junto, el cada uno kanila hay enfrenta maga dificultad, como ya menciona enante. Ya dale el apostol Pablo otro razon si porque esta junto el man maridable. Ya escribi le: “El marido gendeh cristiano ta queda consagrao por medio del disuyo mujer. Y el mujer gendeh Cristiano ta queda consagrao por medio del disuyo marido. Si gendeh ese ansina, pecador era el de ustedes maga anak. Pero como ahora, maga santo [“sagrao,” NWT] sila.” (1 Cor. 7:14) Manada maga leal Cristiano el ya esta junto na diila marido o mujer quien gendeh Cristiano maskin na maga bien dificil situacion. Alegre sila que ya aguanta sila cay el diila mujer o marido ya principia sirvi con Jehova na uliji.—Le con el 1 Corinto 7:16; 1 Ped. 3:1, 2.

19. Porque tiene manada maga alegre man maridable na maga Testigo de Jehova?

¹⁹ Ya discuti si Jesus acerca na divurcio y ya dale el apostol Pablo consejo acerca na separacion. Quierre sila que honra el maga siervo del Dios con el matrimonio. Na maga Testigo de Jehova na entero mundo, tiene manada alegre man maridable, igual como cosa tu puede mira na de ustedes congregacion. Este maga leal y amable marido y mujer ta dale mira que posible tene alegre matrimonio. Alegre kita que millones el ta dale prueba que deverasan el cosa ta habla el Palabra del Dios: “Poreso, el hombre ay deja con su tata y nana y queda unido con su mujer. Y el dos ay queda un cuerpo lang.”—Ef. 5:31, 33.