Controla con el Tomada

EL UN hombre que si Tony ya tene manada problema na de suyu vida cay no quierre le admiti que fuerte le toma alcoholico tomada. Pero cay gendeh le pronto man burracho, nuay le pensa que el sobra tomada amo un problema. Porque gendeh justo el cosa le ta pensa?

Por causa cay sobra le ta toma, gendeh le ta puede pensa enbuenamente. Sabe man se si Tony o gendeh, el de suyu utuk que amo el ta controla con el de suyu pensamiento y emocion, gendeh mas ta trabaja enbuenamente por causa na sobra de alcohol. Si mas manada le ta toma, mas ta queda menos el abilidad del de suyu utuk que examina con el de suyu condicion.

El segundo razon si porque ansina ta pensa si Tony amo cay no quierre le descanza toma. El un hombre que si Allen no quierre tambien admiti del una que tiene le problema na alcoholico tomada. “Ta toma yo pa-escondido,” ele ya admiti, “y tan razon yo que gendeh lang man yo sobra ta toma. Un cosa lang yo quierre—gendeh yo descanza toma.” Maskin pa ta puede mira el otro que controlao ya del alcoholico tomada el vida de Tony y Allen, ta dale lang siempre sila mira que nuay lang se problema. El cada uno kanila necesita hace accion para puede controla con el diila tomada. Pero, cosa accion?

Hace Accion!

Manada el quien ya puede descanza toma por demas, el ya hace accion uyun na cosa ya habla si Jesus: “Poreso si el de tuyu ojos ta causa contigo para man tisut, arranca con ese y buta. Cay mas bueno pa perde el un parte del de tuyu cuerpo contra guinda el de tuyu entero cuerpo na Gehena.”—Mateo 5:29, NWT.

Siempre, gendeh quierre decir de Jesus que hace kita sinti duele con el diaton mismo cuerpo. Sino, ya enseña le na figurativo manera que debe kita quita con el maga cosa que puede hace malo con el diaton relacion con Dios. Deverasan, posible dificil hace con este cambio. Pero, hay protege este kanaton para evita queda alcoholic. Poreso, si tiene quien habla contigo que sobra ya el de tuyu tomada, hace dayun accion para controla con ese. * Si gendeh tu puede controla con el de tuyu tomada, mas bueno que descanza ya lang tu toma. Posible gendeh este facil pero necesita tu con este hace para gendeh queda malo el de tuyu vida.

Maskin gendeh tu fuerte toma, tiene ba tu tendencia que toma manada? Si ansina, cosa maga practical manera que puede tu hace para puede controla con el de tuyu tomada?

Cosa Puede Ayuda Contigo?

1. Tene fe que si Jehova ayuda contigo si reza tu con ele pirmi y con todo corazon. El Biblia tiene consejo para con aquellos quien quierre hace alegre con Dios Jehova: “Si tiene ustedes necesidad, manda sabe con ese con el Dios por medio del de ustedes maga rezo y peticion junto con maga dalida de gracias. Y entonces el paz del Dios, ese paz que noay quien ta puede entende, ay guarda el de ustedes maga corazon y maga pensamiento unido con Cristo Jesus.” (Filipo 4:6, 7, El Nuevo Testamento na Chavacano) Cosa tu reza para tene el paz na pensamiento?

Honesto admiti que tiene tu problema na tomada, un problema que etu mismo el responsable. Habla con Dios el cosa tu quierre hace y hay bendici le con el de tuyu esfuerzo para evita mas serioso maga problema. “El quien ta tapa con el de suyu maga culpa gendeh tiene buen exito, pero hay dale mira lastima con el quien ta confesa y ta abandona con ese.” (Proverbio 28:13) Ya habla tambien si Jesus que puede kita reza: “No deja canamon cai na tentacion, sino libra canamon del mal.” (Mateo 6:13) Despues tu reza, cosa tu debe hace y onde tu puede incuntra contestacion na de tuyu maga rezo?

2. El Biblia puede ayuda contigo. “El Palabra del Dios vivo y efectivo . . . ta puede se jusga con el maga pensamiento y maga intencion del corazon.” (Maga Hebreo 4:12) Ya puede ayuda con el manada tomador de antes el lehida y meditacion del maga texto na Biblia cada dia. “Alegre el gente quien gendeh ta camina asegun na consejo del maga malo,” ya escribi el un salmista, pero “el de suyu alegria talli na ley de Jehova y ta le ele con el De Suyu ley na hinay voz dia y denoche. . . . todo cosa le hace hay tiene buen exito.”—Salmo 1:1-3.

Si Allen, quien ya puede quita con el alcoholico tomada por medio na estudiada del Biblia junto con el maga Testigo de Jehova ya habla, “Convincido yo que si nuay pa el Biblia y el maga principio de este que amo el ya ayuda conmigo descanza toma, ya muri ya era yo.”

3. Tene control na cuerpo. El Biblia ya menciona que el maga burrachon de antes adentro na Cristiano congregacion ya queda limpio por medio na “Espiritu del diaton Dios.” (1 Corinto 6:9-11) Paquemodo? El sagrao espiritu de Jehova ya ayuda kanila para cultiva control na cuerpo y descanza toma sobra. “No llena el de ustedes cuerpo con vino, cay ese ta lleva na alegria malo, sino llena el de ustedes cuerpo con el Espiritu.” (Efeso 5:18; Galacia 5:21-23) Si Jesucristo ya promete: ‘El Tata na cielo ay dale Espiritu Santo [“sagrao espiritu,” NWT] con aquellos quien ta pidi con ele.’ Poreso, “pidi ustedes y ay recivi.”—Lucas 11:9, 13.

Aquellos quien quierre hace alegre con Jehova puede cultiva control na cuerpo por medio na lehida y estudiada del Biblia y regular rezo que estaba na corazon. Si ta sinti tu que dol gendeh tu puede cambia, acorda con el promesa na Palabra del Dios: “Si quien ta siembra na maga deseo malo del cuerpo, ele ay cosecha maga fruta de muerte alli na disuyo mismo cuerpo. Si quien ta siembra na Espiritu, ele ay cosecha el Vida Eterno alli na Espiritu. No kita descansa de hace el maga cosa-cosa bueno cay, si gendeh kita perde el animo, ay tene kita el cosecha na justo tiempo.”—Galacia 6:8, 9.

4. Iscuji buen asosacion. “El quien ta sigui junto con el sabio hay queda sabio, pero el quien tan junto con el estupido hay resulta na mal.” (Proverbio 13:20) Habla con el de tuyu maga amigo que ya decidi ya tu que gendeh toma manada. Pero, el Biblia ta dale aviso que si descanza tu con el “borracherias, ambrentadas de comida y tomada,” el de tuyu maga amigo de antes ‘hay espanta y hay abusa sila contigo.’ (1 Pedro 4:3, 4) Queda determinao que descanza asocia con el de tuyu maga amigo quien ta pricura contigo dale toma manada.

5. Pone limitacion. “No ustedes sigui con el maga custumbre de este mundo, sino cambia el de ustedes maga custumbre por medio del de ustedes maga pensamiento nuevo. Ansina ay puede ustedes discubri el voluntad del dios y sabe si cosa el bueno, cosa el ta gusta Le, cosa el perfecto.” (Roma 12:2) Si decidi tu si paquemodo de manada tu debe toma, pensa si cosa el Biblia ta habla en vez na cosa ta habla el de tuyu maga amigo quien gendeh ta sirvi con Jehova. Si hace tu se, hay queda alegre contigo si Jehova. Pero, paquemodo tu determina con el de tuyu limitacion?

Maskin poco lang tu toma pero si ta hace este contigo dificil para pensa enbuenamente, sobra ya este para contigo. Poreso, necesita tu pone especifico limitacion na de tuyu tomada para gendeh tu queda burracho. Queda honesto acerca si paquemodo tu de manada debe toma. Determina si paquemodo de manada lang tu puede toma. No toma que mas pa con ese.

6. Aprende habla gendeh. “Asigura que el de ustedes ‘Si’ quierre decir si, el de ustedes ‘Gendeh,’ gendeh.” (Mateo 5:37) Si tiene contigo quien ya ofrece tomada y sobra na cosa tu ya decidi, puede tu habla con respeto, gendeh. “Hace el de ustedes conversada alegre y interesante. Contesta con cada uno con abilidad, como conviene.”—Colosa 4:6.

7. Pidi ayuda con otro. El maga buen amigo quien ta ama con Jehova hay respeta con el de tuyu decision que gendeh toma manada. Poreso, pidi ayuda kanila que controla con el de tuyu tomada. “El dos mas bueno que con el uno cay tiene sila buen premio na diila trabajo. Cay si el uno diila tumba, el de suyu uban puede con ele ayuda hace levanta.” (Eclesiastes 4:9, 10; Santiago 5:14, 16) El National Institute on Alcohol Abuse and Alcoholism na United States ta dale tambien aviso: “Dificil tiene vez descanza toma. Pidi ayuda con el de tuyu familia y amigo para puede tu alcanza con el de tuyu goal.”

8. Queda determinao que controla con el de tuyu tomada. “Obedece el cosa ta habla el Palabra y no ustedes conforma oi-oi lang con ese cay, si ansina, ta engaña lang ustedes con el de ustedes mismo cuerpo. Alegre gayot el gente quien ta mira fijo con el Ley perfecto del libertad y ta continua queda fiel con ese. Gendeh le igual con el gente quien ta oi-oi lang con el Ley y despues ta olvida dayun, sino ta pone le na practica.”—Santiago 1:22, 25.

Si Paquemodo Puede Quita con Ese Vicio

Gendeh todo quien ta toma manada ta queda tomador. Pero el cuanto quien ta toma manada—o pirmi—ta queda addict na alcoholico tomada. Cay si el un persona quien addict na alcoholico tomada puede enferma si bigla ele descanza toma, posible necesita sila ayuda del doctor. “Cuando ya descanza yo toma, tiene gayot este grabe efecto na de mio cuerpo,” ya habla si Allen. “Ya realiza yo que el de mio estudiada del Biblia gendeh bastante que ayuda conmigo para descanza toma, necesita tambien yo anda na doctor.”

Manada gente el quien quierre descanza toma para hace alegre con Jehova necesita ayuda del doctor. * El cuanto necesita anda na hospital cay ta enferma sila si descanza sila toma. El otro necesita medicina para menora el diila deseo que toma o ayuda kanila para descanza toma. Si Jesus ya habla: “Gendeh el maga gente bueno el cuerpo quien necesita doctor, sino el maga emfermo.”—Marcos 2:17.

El Maga Beneficio si Obedece con el Instruccion de Jehova

El Dios ta habla kanaton na Biblia si paquemodo usa na justo manera el alcoholico tomada cay quierre ele queda kita alegre ahora y hasta para cuando. Despues del 24 año ya descanza con el alcoholico tomada, si Allen ya habla: “Bien bonito gayot el cosa yo ya sinti cuando ya puede yo cambia y sabe que si Jehova quierre ayuda conmigo que corecta con el de mio maga mali na vida y ele . . .” Ya descanza si Allen cay ta puede le llura si ta acorda le con el de suyu pasada de antes. “Um, . . . bien bonito gayot para sabe que si Jehova ta entende, ta cuida y ta dale necesita ayuda.”

Poreso, si tiene tu problema acerca na alcoholico tomada, posible tu sinti que gendeh mas tu puede cambia pero no perde el esperanza. Si Allen y el otro ya experiencia igual de tuyu situacion y ya puede sila controla con el diila tomada o quita con el diila vicio. Nuay sila cosa ya arripinti y etu tambien.

Si decidi tu controla con el de tuyu tomada o quita gayot con ese, acorda con el amable consejo del Dios: “Si pone lang tu atencion con el de mio maga mandamiento, el de tuyu paz hay queda como igual na un rio y el de tuyu justicia hay queda igual na maga marijada del mar.”—Isaias 48:18.

[Maga footnote]

[Cajon/​Letrato]

 Ta Controla Ya Ba Contigo el Alcoholico Tomada?

Puede tu pregunta na de tuyu mismo cuerpo:

• Mas manada ba yo ta toma ahora contra del una?

• Mas manada beses ba yo ta toma ahora?

• Mas fuerte ya ba el clase de tomada que ta toma yo ahora?

• Ta toma ba yo si stress yo o para ulvida con el de mio maga problema?

• Tiene ba yo un amigo o miembro na familia quien ya converza conmigo acerca na de mio tomada?

• El de mio ba tomada ya causa ya problema na casa, na trabajo o mientras tan viaje yo?

• Tan lingasa ba yo si gendeh yo ta puede toma na un semana?

• Tan otro ba yo si el de mio maga uban ta evita toma?

• Ta esconde ba yo con otro si paquemodo de manada yo ta toma?

Si oo el de tuyu contestacion na uno o mas pa na ese maga pregunta, necesita ya tu hace accion para controla con el de tuyu tomada.

[Cajon/​Letrato]

Si Paquemodo Hace maga Justo Decision Acerca na Alcoholico Tomada

Antes tu toma, considera con el siguiente:

• Debe ba yo toma o gendeh?

Recomendacion: Si gendeh tu ta puede controla con el de tuyu tomada, gendeh tu debe toma.

• Paquemodo de manada yo debe toma?

Recomendacion: Ciendo el alcoholico tomada puede contigo hace dificil para pensa enbuenamente, determina con el de tuyu limitacion antes tu toma.

• Cuando yo debe toma?

Recomendacion: Evita toma si maneja tu o si ta participa tu na maga actividad donde necesita tu queda alerto; no tambien toma si ta participa tu na maga religioso actividad, priñada tu o ta toma tu maga medicina.

• Onde yo debe toma?

Recomendacion: No anda na maga lugar donde posible tu puede toma sobra; no toma pa-escondido o enfrente del maga gente quien posible ofende contigo.

• Con quien yo debe man junto toma?

Recomendacion: Man junto con el maga amigo o miembro na familia quien tiene buen influencia contigo; no man junto con aquellos quien gendeh ta puede controla con el diila tomada.

[Cajon/​Letrato]

El Palabra del Dios Ya Puede Ayuda con el Un Tomador De Antes

Si Supot, de Thailand, bien tomador gayot. Del primero, de noche lang le ta toma. Pero nuay dura, ta toma ya le cada aga y media dia. Ta toma le para lang man burracho. Pero cuando ya estudia le el Biblia junto con el maga Testigo de Jehova, ya puede le aprende que gendeh aceptable con Dios Jehova el burracherias. Poreso, ya descanza le con el de suyu vicio. Pero cuanto tiempo ya pasa, ya queda le otravez tomador. Ya tiene gayot se mal efecto na de suyu familia.

Pero maskin pa ansina, si Supot ta ama siempre con Jehova y quierre le que adora con Dios na aceptable manera. El maga amigo de Supot ya continua ayuda con ele, y ya anima con el de suyu familia que dale mas tiempo para man junto con ele y no descanza ayuda con ele. Na ese tiempo, el franca maga palabra que puede incuntra na 1 Corinto 6:10 que ‘el maga burrachon gendeh gayot hay hereda el Reino del Dios,’ ya ayuda con Supot para mira si paquemodo de serioso el de suyu situacion. Ya puede le realiza que necesita le queda determinao hace esfuerzo para puede quita con el de suyu vicio.

Ahora, decidido ya si Supot que descanza con el de suyu vicio. Na uliji, por medio na poder del sagrao espiritu del Dios, na guia del Palabra del Dios y na ayuda del de suyu familia y del congregacion, si Supot ya tene fuerza para quita con el de suyu tomada. Alegre el de suyu familia cuando ya bautiza le como simbolo del de suyu dedicacion con Dios. Alegre ya le ahora cay tiene ya le cerca relacion con Dios y ta puede le usa con el de suyu tiempo para ayuda con otro na espiritual manera.