El Biblia Puede Cambia con el Vida

COSA ya manda move con el un Rastafarian para curta con el de suyu largo pelo y quita con el odio contra na maga blanco gente? Y cosa ya puede ayuda con el un violente joven hombre quien ta colecta sen para na maga quien ta vende droga para cambia con el de suyu vida? Considera si cosa sila hay habla.

“Ya Puede Yo Quita con el De Mio Discriminacion.”​—HAFENI NGHAMA

EDAD: 34

NACION ONDE YA NACE: ZAMBIA

BACKGROUND: RASTAFARIAN

DE MIO VIDA DE ANTES: Ya nace yo na un refugee camp na Zambia. De mio nana ya cambia para na Namibia durante el tiempo de guerra y ya entra na South West Africa People’s Organization (SWAPO). Este organizacion tan contra con el gobierno del South Africa que ya rula na Namibia durante aquel tiempo.

Ya queda yo na diferente refugee camp durante el primer 15 año del de mio vida. Ya enseña con el maga jovenes na este maga campo que sila man una na este organizacion que pensaba kame amo este el puede libra kanamon. Ya aprende tambien kame que odia con el maga blanco gente.

Cuando 11 año yo, quierre yo queda un Cristiano y queda un miembro del iglesia alla na campo. Yan cuento yo con el un pastor pero nuay le conmigo anima que hace con ese. Desde aquel tiempo, ya queda yo un ateista. Cuando 15 año yo, quierre-quierre yo oi reggae music y quierre yo hace descanza con el maga injusticia que ta experiencia el maga negro Africano poreso ya queda yo Rastafarian. Ya hace yo largo y ya hace trenzas con el de mio pelo, ya puma marijuana, ya descanza come carne y ya man cuento con otro si paquemodo libra con el maga negro. Pero, ya continua yo siempre con el de mio imoral vida o mira maga violente salida. Y ya continua yo usa maga mal palabra.

SI PAQUEMODO EL BIBLIA YA PUEDE CAMBIA CON EL DE MIO VIDA: Del 1995, cuando 20 año yo, ya principia yo pensa enbuenamente acerca si cosa yo quierre hace na de mio vida. Ya estudia yo con el todo publicacion de Rastafarian que puede yo incuntra. El cuanto de ese maga libro ya menciona acerca na Biblia pero gendeh yo ta entende el cosa yo ta le. Poreso, ya decidi yo que iyo mismo le con el Biblia.

Nuay dura, el un amigo de mio que Rastafarian ya dale conmigo un libro que ta usa para estudia con el Biblia que yan publish el maga Testigo de Jehova. Solo-solo yo ta estudia con este publicacion junto con el de mio Biblia. Despues, ya conoce yo con el maga Testigo de Jehova y ya continua con el de mio Bible study junto kanila.

Ya hace yo grande esfuerzo y ya puede quita con el pumada y por demas de tomada. (2 Corinto 7:1) Ya cambia yo con el de mio ichura, ya curta con el de mio largo pelo, ya descanza mira pornografia y maga violente salida, y ya descanza usa mal palabra. (Efeso 5:3, 4) Nuay dura, ya puede yo quita con el de mio discriminacion contra na maga blanco gente. (Maga Actividad 10:34, 35) Para hace con ese maga cambio, necesita yo descanza oi maga cancion que ta anima para odia con el maga blanco gente y descanza asocia con el de mio maga amigo que ta influencia conmigo que bira otravez na de mio manera de vida de antes.

Despues hace con ese maga cambio, ya busca yo un Kingdom Hall del maga Testigo de Jehova cay quierre yo queda uno diila. Ya continua yo estudia con el Biblia junto kanila. Cuando ya decidi yo que bautiza como uno del maga Testigo de Jehova, el de mio familia gendeh alegre. El de mio nana ya manda conmigo iscuji otro “Cristiano” religion pero no lang na maga Testigo de Jehova. El uno del de mio maga tio pirmi ta insulta conmigo na de mio decision que asocia junto na maga Testigo.

Pero, ya aprende yo acerca si paquemodo si Jesus ya trata con el maga gente y ya pricura yo imita con el de suyu ejemplo. Este ya ayuda conmigo para enfrenta con el diila oposicion y gangguiada. Cuando ya compara yo si cosa ta enseña el maga Testigo na cosa el Biblia ta habla, ya queda yo convincido que ya puede ya yo incuntra con el deverasan religion. Por ejemplo, ta sigui sila con el mandamiento del Biblia que predica con otro. (Mateo 28:19, 20; Maga Actividad 15:14) Y gendeh sila ta participa na politica.—Salmo 146:3, 4; Juan 15:17, 18.

SI PAQUEMODO YO YA BENEFICIA: Cuando ya aplica yo con el maga principio na Biblia, ya ayuda este conmigo na manada manera. Por ejemplo, por causa cay gendeh ya yo ta usa marijuana, gendeh yo tan usik manada sen. Gendeh mas yo tan hallucinate y tiene ya alivio el de mio mental y fisical salud.

Tiene ya direccion y proposito el de mio vida, un cosa que quierre yo desde joven yo. Y mas importante, ya queda yo cerca con Dios.—Santiago 4:8.

“Ya Puede Yo Aprende Controla con el De Mio Rabia.”​—MARTINO PEDRETTI

EDAD: 43

NACION ONDE YA NACE: AUSTRALIA

BACKGROUND: TA VENDE DROGA

DE MIO VIDA DE ANTES: Cuando ta engranda yo, el de mio familia pirmi ta cambia lugar. Ya puede kame esta na un diutay pueblo, un grande ciudad y na cuanto tiempo, na un bien lejos lugar na Australia junto con el maga nativo. Alegre yo ta acorda el maga tiempo junto con el de mio maga primo y prima y maga angkol—ta pesca, ta pajarea, ta hace maga boomerang y otro pa maga cosas.

Boxingero el de mio tata y cuando bata pa yo, ya enseña le conmigo si paquemodo pelea. Ya engranda yo que violente y cuando teenager yo, pirmi yo ta toma na maga bar. Kame del de mio maga barcada pirmi ta busca peleajan. Ta lleva kame cuchillo y maga baseball bat para ataca con el grupo de 20 gente o mas pa.

Ta tiene yo sen por causa cay ta vende yo droga y ta ruba maga cosas estaba na maga trabajante del pantalan. Ta colecta tambien yo sen para na maga quien ta vende droga y ta usa maga pusil para hace miedo con el maga gente para dale sila conmigo sen. Quierre yo queda hired-killer. El de mio principio amo, Mata o conmigo mata.

SI PAQUEMODO EL BIBLIA YA PUEDE CAMBIA CON EL DE MIO VIDA: Ya puede ya iyo oi acerca na maga Testigo de Jehova cuando ta engranda yo. Cuando maga 20 año yo, ya acorda yo que ya pregunta yo con el de mio nana si sabe ba le si onde puede incuntra con el maga Testigo de Jehova. Dos dia despues, tiene un Testigo que si Dixon yan tuktuk na diamon casa. Despues kame man cuento na corto tiempo, ya invita le conmigo na un miting del maga Testigo de Jehova. Ya anda yo na aquel miting y ahora, mas de 20 año ya yo ta atende con ese. El todo del de mio maga pregunta ya contesta el maga Testigo usando el Biblia.

Alegre yo cuando ya sabe yo que si Jehova interesao con el cada individual, maskin con aquellos maga mal gente. (2 Pedro 3:9) Ya sabe yo que ele un amable Tata quien ta cuida conmigo maskin deja conmigo el otro. Ya dale tambien conmigo comforta cuando ya sabe yo que perdona le con el de mio maga culpa si cambia yo el de mio manera de vida. El maga texto na Biblia na Efeso 4:22-24 (El Nuevo Testamento na Chavacano) ya tiene gayot grande efecto conmigo. Ese texto ya anima conmigo que “quita con el daan naturaleza” o personalidad y “visti con el camisa del nuevo naturaleza creao na ichura del Dios.”

Ya pasa pa cuanto tiempo antes yo ya puede hace maga cambio na de mio manera de vida. Ya aguanta yo que gendeh usa droga adentro na cuanto dia pero si weekend y junto yo con el de mio maga barcada, ta puede yo usa oleh droga. Ya puede yo realiza que si quierre yo hace maga cambio, necesita yo esta lejos kanila poreso ya decidi yo que cambia na otro lugar. El cuanto del de mio maga amigo ya habla conmigo que sigui sila conmigo na de mio viaje y ya conforma tambien yo. Durante na viaje, ya principia sila puma marijuana y ya dale sila conmigo cuanto de ese. Ya habla yo kanila que ya deja ya yo con ese vicio y ya man separtajan kame na boundary del lugar onde yo anda. Nuay dura, ya puede yo sabe que el de mio maga barcada ya ruba na un banco usando el shotgun que ya hace corto.

SI PAQUEMODO YO YA BENEFICIA: Cuando ya descanza yo asocia con el de mio maga barcada, mas facil ya lang conmigo hace maga cambio na de mio vida. Del 1989, ya queda yo bautizao Testigo de Jehova. Despues del de mio bautismo, el de mio hermana, de mio nana y tata yan junto conmigo sirvi con Jehova.

Casao ya yo por 17 año y tiene tres anak. Ya puede yo aprende controla con el de mio rabia maskin pa tiene conmigo ta manda rabia. Y ya aprende yo ama con el todo maga gente estaba na “raza, tribo y lenguage.” (Revelacion 7:9) Ya sinti yo que deverasan para conmigo el maga palabra de Jesus. Ele ya habla: “Si ay esta ustedes fiel na dimio Palabra, ay queda ustedes mi maga dicipulo, y ay sabe ustedes si cosa el verdad, y el verdad ay hace con ustedes libre.”—Juan 8:31, 32.

[Blurb]

Para hace maga cambio, necesita yo descanza oi maga cancion que ta anima para odia con el maga blanco gente

[Blurb]

Kame del de mio maga barcada pirmi ta busca peleajan. Ta lleva kame cuchillo y maga baseball bat para ataca con el grupo de 20 gente o mas pa