MANADA gente el bien quierre sabe si ta oi ba el Dios y ta contesta con el diaton maga rezo. El Biblia ta dale mira que ta oi si Jehova con el maga rezo na diaton tiempo ahora. Ta depende kanaton si oi ba el Dios o gendeh con el diaton maga rezo.

Ya condena si Jesus con el maga religioso lider na de suyu tiempo. Ya llama le kanila maga hipocrito cay ta reza sila para lang mira el maga gente. Ya habla le que ese maga gente ‘ya ricibi ya el diila premio.’ Quierre decir, ya ricibi ya sila con el cosa sila quierre—el atencion del maga gente—pero gendeh oi el Dios con el diila maga rezo. (Mateo 6:5) Na igual manera, manada ahora el ta reza asegun na cosa sila quierre y gendeh na cosa quierre el Dios. Si gendeh obedece el maga gente con el Biblia, gendeh oi el Dios con el diila maga rezo.

Pero, quetal tu? Hay oi ba el Dios y contesta con el de tuyu maga rezo? Gendeh este ta depende na de tuyu raza, nacionalidad o estado na vida. El Biblia ya asigura kanaton: “El Dios noay favorito, pero ta acepta le con todo aquellos quien ta adora con Ele [“quien tiene miedo con ele,” NWT] y ta hace cosa bueno, maskin de donde nacion sila.” (Maga Actividad 10:34, 35) Ansina clase ba tu de persona? Si tiene tu miedo con Dios, hay respeta gayot tu con ele y gendeh tu hace el maga cosas que ta hace con ele triste. Si ta hace tu el cosa bueno, ta pricura tu hace el cosa justo para con Dios y gendeh el cosa tu mismo quierre o el otro maga gente. Quierre ba gayot tu que oi el Dios con el de tuyu maga rezo? El Biblia ta dale mira si paquemodo tu reza para oi contigo el Dios. *

Siempre, manada el quierre que hay contesta el Dios con el diila maga rezo por medio na milagro. Pero maskin na tiempo del Biblia, ralo lang el Dios ya hace maga milagro. Despues sucede el un milagro, tiene vez cuanto siglo pa el ya pasa despues sucede el otro. Mas pa, el Biblia ta habla que ya termina el maga milagro despues muri el maga apostoles. (1 Corinto 13:8-10) Quierre decir ba de ese que gendeh mas ta contesta el Dios con el maga rezo ahora? Ta contesta le siempre! Considera con el cuanto ejemplo.

El Dios ta dale sabeduria. El todo deverasan sabeduria ta sale con Jehova. Bondadoso le se ta dale con aquellos quien ta pidi el de suyu guia y ta pricura aplica con ese.—Santiago 1:5.

El Dios ta dale el de suyu sagrao espiritu y el todo buen cosas que resulta de este. El sagrao espiritu amo el activo fuerza del Dios. Nuay mas otro que mas mafuerza con este. Puede este ayuda kanaton para aguanta na maga probanza. Puede este dale kanaton paz si tan lingasa kita. Puede tambien este ayuda kanaton para cultiva con el otro pa maga bonito calidad. (Galacia 5:22, 23) Si Jesus ya asigura con el de suyu maga siguidores que bondadoso el Dios ta dale con ese regalo.—Lucas 11:13.

El Dios ta ayuda con aquellos sincero ta busca con ele. (Maga Actividad 17:26, 27) Na entero mundo, tiene maga gente que sincero ta busca con el verdad. Quierre sila sabe acerca con Dios—cosa el de suyu nombre, cosa el de suyu proposito para na tierra y na maga gente, y si paquemodo sila queda cerca con ele. (Santiago 4:8) El maga Testigo de Jehova ta puede man cuento con el maga gente igual ansina y alegre sila dale mira el contestacion del Biblia na ese maga pregunta.

Amo ba se el razon si porque tu ya ricibi este magasin? Ta busca ba tu con Dios? Posible, este el de suyu contestacion na de tuyu rezo.