COMPARA na otro maga rezo, mas manada Cristiano el ta repiti con este rezo. Deverasan man se o gendeh, el modelo rezo de Jesus—tiene vez ta llama como el rezo del Señor o el Padre Nuestro—amo el uno del maga rezo que gendeh ta entende el maga gente. Millones de maga gente el ta repiti con este rezo cada dia y posible manada beses pa gane na un dia. Pero, no quierre si Jesus que basta repiti lang con ese rezo. Porque kita puede habla con ese?

Antes menciona con ese rezo, si Jesus ya habla: “Si ta reza ustedes, no repiti que repiti.” (Mateo 6:7, El Nuevo Testamento) Yan contra ba si Jesus con el cosa le mismo ya habla y ya dale maga palabra para man memorize y repiti? Nuay! Sino, ya enseña kanaton si Jesus si acerca na cosa kita reza y ya habla le kanaton si cosa debe el diaton prioridad si ta reza. Discuti kita ahora si cosa le ya habla. El rezo puede le na Mateo 6:9-13.

Ya hace acorda si Jesus con el de suyu maga siguidores que el todo diaton maga rezo debe para con el de suyu Tata, si Jehova. Pero, sabe ba tu si porque bien importante el nombre del Dios y si porque con este necesita santifica o hace sagrao?

Na principio del historia del gente, manada imbusterias ya el ya habla acerca con el sagrao nombre del Dios. El enemigo del Dios, si Satanas, ya llama con Jehova imbustero y ta pensa lang con el De Suyu mismo cuerpo, quien nuay derecho para rula con el De Suyu maga creacion. (Genesis 3:1-6) Manada el quien ya suporta con Satanas y ya enseña que el Dios nuay queber, brutal y ta vengga mientras el otro ta habla que nuay Creador. El otro ya quita pa gane con el nombre Jehova na maga translation del Biblia y ya prohibi que usa con ese.

El Biblia ta dale mira que hay corecta el Dios con este maga injusticia. (Ezequiel 39:7) Por medio con ese, hay dale le el cosa tu necesita y solva con el de tuyu maga problema. Paquemodo? El contestacion puede incuntra na cosa sunod ya habla si Jesus.

Ahora, otro-otro el cosa ta enseña el maga lider del religion acerca na Reino del Dios. Pero como cosa sabe aquellos quien ya oi con el rezo de Jesus, tarda ya ya predicta el maga profeta del Dios que el Mesias, el Salvador con quien ya iscuji el Dios, hay rula con el Reino que hay cambia con el mundo. (Isaias 9:6, 7; Daniel 2:44) Hay santifica este con el nombre del Dios, dale mira que imbustero si Satanas y quita con Satanas y con el todo problema que ya causa le. El Reino del Dios hay termina con el guerra, enfermedad, escasez de comida—y maskin con el muerte. (Salmo 46:9; 72:12-16; Isaias 25:8; 33:24) Si ta reza tu que vene el Reino del Dios, ta reza tu que cumpli ese todo promesa.

El maga palabra de Jesus ta dale mira que asigurao cumpli el voluntad del Dios na tierra igual na cielo, donde ta queda el Dios. Nuay quien ya puede sangga con el voluntad del Dios que cumpli na cielo. Yan guerra el Anak del Dios contra con Satanas y con el de suyu maga demonio y ya buta kanila na tierra. (Revelacion 12:9-12) Igual na primer dos, el ika-tres cosa na modelo rezo ta ayuda kanaton para man focus na cosa que mas importante—gendeh el diaton mismo querrer sino el del Dios. Quierre el Dios con el de con todo bueno para na de suyu maga creacion. Poreso maskin el perfecto gente, si Jesus, ya habla con el de suyu Tata: “No hace el cosa yo quiere, sino el que cosa Uste quiere.”—Lucas 22:42.

El cosa sunod ya habla si Jesus ta dale mira que puede tambien kita reza con Dios acerca na cosa kita necesita cada dia. Gendeh malo que pidi con ese. Gane si pidi kita se, ta hace se acorda kanaton que si Jehova amo el “ta dale el vida y el resuello y todo maga cosa-cosa con todo el maga gente.” (Maga Actividad 17:25) El Biblia ta revela que ele un amable tata quien alegre dale con el de suyu maga anak si cosa sila necesita. Pero igual na un buen tata, gendeh le dale kanila el maga cosas que gendeh bueno para kanila.

Tiene ba gayot tu debe con Dios? Necesita ba gayot tu el de suyu perdon? Manada ahora el no sabe si cosa el pecado y si paquemodo este de serioso. Pero, ta enseña el Biblia que el pecado amo el causa del todo grabe problema cay amo este el razon si porque ta muri el maga gente. Cay ya nace kita que maga pecador, pirmi kita ta comete pecado y puede lang kita tene un buen futuro si perdona kanaton el Dios. (Roma 3:23; 5:12; 6:23) Poreso, ta dale gayot kanaton alivio cay el Biblia ta habla: “Etu, O Jehova, bueno y preparao para perdona.”—Salmo 86:5.

Sabe ba tu si paquemodo tu de necesita con el proteccion del Dios? Manada el gendeh ta creé que ta existi si Satanas. Pero, ya enseña si Jesus que deverasan si Satanas y ya llama pa gane con ele “el Principe de este mundo.” (Juan 12:31; 16:11) Si Satanas ya influencia y ya controla con el mundo y bien quierre le que influencia contigo cay no quierre le que tene tu un cerca relacion con el de tuyu Tata, si Jehova. (1 Pedro 5:8) Pero, mas mafuerza si Jehova contra con Satanas y quierre Le protege con aquellos quien ta ama con Ele.

Manada kita cosa ya aprende na modelo rezo de Jesus. Pero, tiene pa otro cosas que puede kita reza. Acorda con el cosa ya habla el 1 San Juan 5:14 acerca con Dios: “Maskin cosa ta pidi kita con Ele comforme na su querer, Ele ay oi canaton.” Poreso, no pensa que gendeh importante el de tuyu maga problema y puede tu se reza con Dios.—1 Pedro 5:7.

Pero, paquemodo el hora y el lugar? Importante ba tambien si cuando y onde kita reza?