TA OI ba el Dios con el todo rezo, maskin con quien pa ta reza el maga gente? Manada gente el ta creé con ese. Manada kanila el ta pensa que bueno el todo religion poreso gendeh mas importante si con quien sila reza. Pero, deverasan ba se?

El Biblia ta enseña que manada gente el gendeh ta reza con el verdadero Dios. Na tiempo cuando ya escribi con el Biblia, comon na maga gente que reza na maga imagen. Pero, manada beses el Dios ya dale aviso contra con ese practica. Por ejemplo, el Salmo 115:4-6 ta habla acerca na maga idolo: “Tiene sila maga orejas, pero gendeh sila ta puede oi.” Claro el punto. Porque tu reza con el un dios que gendeh ta puede oi contigo?

El un istoria na Biblia ta hace claro con ese punto. Si profeta Elias ya habla con el maga profeta de Baal que reza con el diila dios y despues, hay reza tambien le con el de suyu Dios. Ya habla si Elias que hay contesta el verdadero Dios y gendeh el falso dios. Ya reza el maga profeta de Baal por largo tiempo, gane gritando y llurando—pero nuay kanila contesta. El Biblia ya habla: “Nuay quien ya contesta y nuay quien ya pone atencion.” (1 Rey 18:29) Pero, cosa ya sucede cuando ya reza si Elias?

Despues reza si Elias, ya contesta dayun el de suyu Dios y ya imbia fuego estaba na cielo que ya quema con el ofrecimiento de Elias. Cosa el diferencia? Na rezo de Elias que puede le na 1 Rey 18:36, 37, puede kita entende si porque ya contesta con ele el Dios. Corto lang este rezo—tiene lang maga 30 palabra na original Hebreo lengguaje. Pero na ese corto rezo, tres beses ya menciona si Elias con el personal nombre del Dios, Jehova.

El nombre Baal quierre decir “dueño” o “amo” amo el dios del maga Canaanita y ya dale sila con ele diferente nombre depende na lugar onde sila ta queda. Pero, Jehova el nombre del solamente verdadero Dios. Ele ya habla con el de suyu maga siervo: “Iyo si Jehova. Ese el de mio nombre; gendeh yo dale de mio gloria con maskin quien.”—Isaias 42:8.

Porque ya contesta con el rezo de Elias pero gendeh del maga profeta de Baal? Parte na adoranza con Baal amo el prostitucion y sacrificia vida de gente. Pero, diferente el adoranza con Jehova. No quierre le que el de suyu maga siervo hay sigui con este maga umalin practica cay quierre le que adora sila con ele na limpio manera. Pensa este: Si quierre tu imbia carta na de tuyu amigo, necesita tu usa con el de suyu nombre. Si usa tu otro nombre de persona, puede ba tu expecta que llega se na de tuyu amigo? Asigurao gendeh!

Si ta reza tu con Jehova, ta reza tu con el Creador, el Tata del todo maga gente. * “Etu, O Jehova, el diamon Tata,” ya habla si profeta Isaias na de suyu rezo. (Isaias 63:16) Ya refiri si Jesus con Jehova cuando ya habla le con el de suyu maga siguidores: “Ay subi ya yo con el dimio Tata y de ustedes Tata, el dimio Dios y de ustedes Dios.” (Juan 20:17) Si Jehova amo el Tata de Jesus. Ele el Dios con quien ya reza si Jesus y con quien ya enseña si Jesus para reza el de suyu maga siguidores.—Mateo 6:9.

Ya habla ba el Biblia que reza kita con Jesus, con Maria, na maga santo o maga angel? Nuay—con Jehova lang. Considera con el dos razon si porque. Una, el rezo amo un forma de adoranza y el Biblia ta habla que con Jehova lang kita debe adora. (Exodo 20:5) Ika-dos, el Biblia ta habla que ele “el quien ta oi con el rezo.” (Salmo 65:2) Maskin pa ta delega trabajo si Jehova, nuay le dale ese responsibilidad na maskin quien. Ele el Dios quien ya promete que personal le oi con el diaton maga rezo.

Poreso si quierre tu que oi el Dios con el de tuyu maga rezo, acorda con el cosa ta habla el Biblia: “Todo quien ta suplica con el Nombre del Señor [Jehova] ay salva.” (Maga Actividad 2:21) Pero, ta oi ba si Jehova con el todo maga rezo? O tiene pa kita otro cosa necesita sabe para oi si Jehova con el diaton maga rezo?