TIENE ba beneficio si reza kita? El Biblia ta habla que tiene. El rezo del maga fiel siervo del Dios ya puede gayot ayuda kanila. (Lucas 22:40; Santiago 5:13) Gane, el rezo bueno gayot para kanaton na espiritual, emocional y maskin na fisical. Paquemodo?

Pone kita que tiene tu un anak quien ya ricibi un regalo. Hay enseña ba tu con ele que bastante ya sinti apresacion con ese? O enseña tu con ele que dale mira apresacion? Mas grande el efecto si ta pone kita na palabra el cosa kita ta sinti. Deverasan ba tambien se si tan cuento kita con Dios? Si! Considera con el cuanto ejemplo.

Rezo para rindi gracias. Si ta rindi kita gracias con el diaton Tata na maga buen cosas que ya ricibi kita, tan focus kita na diaton maga bendicion. Como resulta, hay sinti kita mas apresacion, mas alegre y mas positivo.—Filipo 4:6.

Ejemplo: Ya rindi gracias si Jesus cay ya oi y ya contesta el de suyu Tata con el de suyu maga rezo.—Juan 11:41.

Rezo para pidi perdon. Si ta pidi kita perdon con Dios, ta hace kita fuerte con el diaton conciencia, ta hace kita deverasan el diaton arripintimiento y ta entende kita si paquemodo de importante que obedece con Dios. Y gendeh tambien kita sinti sobra de culpable.

Ejemplo: Ya reza si David para dale mira que ya arripinti le y triste na cosa le ya hace.—Salmo 51.

Rezo para na guia y sabeduria. Si ta pidi kita con Jehova que guia kanaton o dale kanaton sabeduria para hace maga buen decision, puede este ayuda kanaton para queda deverasan humilde. Puede este hace acorda kanaton el diaton maga limitacion y ayuda kanaton para mas confia con el diaton Tata na cielo.—Proverbio 3:5, 6.

Ejemplo: Humilde ya pidi si Solomon el guia y el sabeduria para rula na Israel.—1 Rey 3:5-12.

Rezo na tiempo de sufrimiento. Si habla kita con Jehova si cosa kita ta sinti na tiempo que bien triste kita, hay queda calma el diaton corazon y hay confia kita con Jehova en vez con el diaton mismo cuerpo.—Salmo 62:8.

Ejemplo: Ya reza si Rey Asa cuando ya enfrenta le manada contrario.—2 Cronicas 14:11.

Rezo para na bien del otro. Ese clase de rezo puede ayuda kanaton que gendeh lang pensa con el diaton mismo cuerpo y para dale mira compasion y empatia.

Ejemplo: Ya reza si Jesus para na bien del de suyu maga siguidores.—Juan 17:9-17.

Rezo de alabanza. Si ta alaba kita con Jehova por causa na de suyu maga bonito trabajo y calidad, el diaton respeto y apresacion para con ele hay queda mas hondo. Ese clase de rezo puede tambien ayuda kanaton que queda mas cerca con el diaton Dios y Tata.

Ejemplo: Ya alaba si David con Dios por causa na De Suyu creacion.—Salmo 8.

El otro bendicion si ta reza kita amo que tiene kita el “paz que noay quien ta puede entende.” (Filipo 4:7) Un bendicion gayot que sinti calma na este mundo que lleno de problema. Gane, tiene tambien este maga beneficio na diaton cuerpo. (Proverbio 14:30) Pero, resulta ba este del diaton mismo lang esfuerzo? O tiene pa envuelto que mas importante?