Eden—Este Ba el Original Lugar Onde Ya Esta el Gente?

IMAGINA que talli tu na un jardin. Nuay contigo cosa destorba y nuay cosa alboroto que comon na maga ciudad. Bien grande este jardin y tiene paz aqui. Y el mas bonito, nuay tu lingasa, enfermedad, allergy o dolor. Man enjoy tu na cosa tu puede mira.

Alegre tu mira con el diferente color de maga flores, con el agua na rio que ta brilla y manada maga verde siembra y zacate na sol y na sombra. Ta puede tu sinti con el viento y ta puede tu oleh con el maga flores. Ta puede tu oi con el sonor del maga ojas, con el corentazo del agua, con el maga pajaro que ta canta y con el sonor del maga insecto. Mientras ta imagina tu con el ecsena, ta desea ba tu queda na ansina clase de lugar?

El maga gente na entero mundo ta creé que el maga primer gente ya vivi na ansina lugar del primero. Por cuanto siglo, ta enseña con el maga miembro del Judaismo, maga ta clama Cristiano y Islam acerca na jardin de Eden, donde el Dios ya pone con Adan y Eva para queda. Asegun na Biblia, alegre sila ta vivi con paz na ese lugar. Tiene sila paz entre con uno y otro, na maga animal y con Dios, quien ya dale kanila el esperanza que vivi hasta para cuando na tierra.—Genesis 2:15-24.

Tiene tambien diferente idea el maga Hindu acerca na paraiso de antes. El maga Budista ta creé que el diila maga lider, o Budha, estaba pa na tiempo cuando el mundo igual como un paraiso. Y manada maga religion na Africa ta enseña maga istoria que semejante na maga istoria acerca con Adan y Eva.

Gane, el idea acerca na paraiso que ya existi de antes puede mira na manada maga religion y tradicion. El un autor ya habla: “De antes, manada maga gente ta creé que el primer man maridable ya queda na un paraiso donde el todo cosa perfecto, tiene seguridad y tiene sila el todo cosa necesita para queda alegre. . . . Por causa con ese creencia, manada maga gente ta desea queda na ese paraiso que ya perde y ta pricura sila busca manera para hace bira con ese.”

Gendeh gaha uno lang onde estaba ese maga istoria y tradicion? Posible gaha que el diferente cultura tiene igual istoria acerca na paraiso cay el jardin de Eden y kanda Adan y Eva deverasan ya existi?

El maga critico ta cuestiona con ese idea. Manada gente ta pensa ahora que ese idea amo un istoria-istoria lang y gendeh deverasan. Gane, gendeh todo maga lider del religion ta creé que el jardin de Eden ya existi. Ta habla sila que ese amo un istoria que ya hace lang para enseña kanaton un leccion.

Deverasan, el Biblia ta contene maga istoria. Si Jesus mismo ya cunta maga istoria que manada gente el familiar. Pero, el cosa ya habla el Biblia acerca na jardin de Eden gendeh basta un istoria lang cay deverasan ese ya existi. Considera este: Si el maga suceso que ya menciona acerca na jardin de Eden nuay sucede, porque pa man kita puede confia con el otro parte del Biblia? Examina kita si porque el cuanto maga gente gendeh ta creé con el idea acerca na jardin de Eden y mira kita si tiene ba basejan el diila maga razon. Despues, hay considera kita si porque el existencia del jardin de Eden importante na cada uno kanaton.