Si Porque el Eden Importante Contigo

CUANTO del maga gente gendeh ta creé con el istoria acerca na jardin de Eden cay ta habla sila que nuay menciona el otro parte del Biblia acerca con ese. Por ejemplo, el professor quien ta estudia acerca na religion que si Paul Morris ya escribi: “Despues del Genesis, nuay directa menciona el otro parte del Biblia acerca na jardin de Eden.” Posible manada “experto” el man uyun con ele pero contra se na verdad.

El deverasan, manada ta menciona na Biblia acerca na jardin de Eden, con Adan, con Eva y con el culebra. * Pero el kamali del cuanto scholar diutay lang si compara na cosa ta hace el maga religioso lider y el quien tan contra con el Biblia. Ese maga gente ta habla que gendeh deverasan el istoria na Genesis. Na ese manera, ta hace sila sale que gendeh tambien deverasan el entero Biblia. Paquemodo?

Necesita kita entende si cosa ya pasa na jardin de Eden para puede kita entende el otro parte del Biblia. Por ejemplo, ya diseña con el Palabra del Dios para ayuda kanaton busca con el maga contestacion del de con todo importante pregunta del maga gente. El contestacion del Biblia na ese maga pregunta tiene coneccion na cosa ya sucede na jardin de Eden. Considera con el cuanto ejemplo.

● Porque kita ta queda viejo y ta muri? Hay vivi era hasta para cuando kanda Adan y Eva si ya obedece sila con Jehova. Muri lang sila si man rebelde sila con ele. Na dia cuando yan rebelde sila, ya principia sila muri. (Genesis 2:16, 17; 3:19) Ya perde el diila perfecto vida y ya hace pasa pecado y imperfeccion na diila maga descendiente. El Biblia ta explica: “Por medio de un gente el pecado ya entra na mundo. Y, por medio del pecado, ya entra el muerte. Y el muerte ya alcanza con todo el maga gente, cay todo sila ya peca.”—Roma 5:12, El Nuevo Testamento na Chavacano.

● Porque el Dios ya permiti con el maldad? Na jardin de Eden, ya habla si Satanas que imbustero el Dios quien ta esconde buen cosas na de suyu maga creatura. (Genesis 3:3-5) Entonces, ya cuestiona le con el derecho de Jehova para rula. Si Adan y Eva ya iscuji sigui con Satanas; poreso nuay sila acepta con el soberania de Jehova y ya pensa que puede el gente decidi si cosa el bueno y malo para na de suyu mismo cuerpo. Bien sabio si Jehova poreso sabe le que el solamente manera para contesta con ese pregunta amo permiti con el maga gente que rula para na diila mismo cuerpo. Bajo na influencia de Satanas el maga gente y claro kita puede mira que gendeh kita puede rula con el diaton mismo cuerpo si nuay el Dios, igual na cosa ta habla el Biblia.—Jeremias 10:23.

● Cosa el proposito del Dios para na tierra? Cuando ya crea si Jehova con el jardin de Eden, ya dale le mira si cosa le quierre que queda el entero tierra. Ya manda le con Adan y Eva que llena con el tierra del diila maga anak y “goza con este” para queda este bonito igual na jardin de Eden. (Genesis 1:28) Poreso, el proposito del Dios para na tierra amo queda un paraiso y queda el perfecto, unido familia del maga descendiente de Adan y Eva. Manada ta menciona na Biblia si paquemodo cumpli con el original proposito del Dios.

● Porque si Jesus ya vene na tierra? El rebelion na jardin de Eden ya causa muerte con Adan y Eva y na todo diila maga descendiente. Pero por causa na amor del Dios, ya imbia le con el de suyu anak aqui na tierra para dale el de suyu vida como rescate para salva con el maga gente. (Mateo 20:28) Cosa se quierre decir? Bueno, si Jesus “el ultimo Adan.” Pero gendeh igual con Adan, si Jesus pirmi ta obedece con Jehova. Despues, ya dale le el de suyu vida como sacrificio, o rescate, para el todo fiel gente hay ricibi perdon na diila maga culpa y despues hay tene el vida igual na cosa ya tiene kanda Adan y Eva na jardin de Eden antes sila culpa. (1 Corinto 15:22, 45; Juan 3:16) Entonces, por medio con Jesus, el proposito de Jehova que hace paraiso con el tierra igual na Eden hay cumpli. *

Bien claro el proposito del Dios para na tierra. Deverasan este. Igual na jardin de Eden que un deverasan lugar aqui na tierra que tiene maga deverasan animal y gente, el proposito del Dios para na futuro amo un realidad que cerca ya sucede. Quierre ba tu mira que sucede ese maga promesa? Ta depende se contigo. Ya dale el Dios este futuro para na todo, maskin con el maga gente quien ya puede hace mal cosas.—1 Timoteo 2:3, 4.

Cuando pamurida si Jesus, yan cuento le con el un gente quien un criminal y conviene muri. Pero ya busca le comforta y esperanza con Jesus. Cosa el contestacion de Jesus? “Ay esta tu na Paraiso junto comigo.” (Lucas 23:43) Si quierre si Jesus mira con este criminal de antes alla—resucitao y tiene el oportunidad vivi hasta para cuando na paraiso igual na Eden—gendeh ba tambien le quierre el igual bendicion para contigo? Quierre le! Quierre tambien se el de suyu Tata! Si quierre tu ese futuro para na de tuyu mismo cuerpo, hace el todo para aprende acerca con Dios quien ya hace con el jardin de Eden.

[Maga footnote]

[Cajon/Maga letrato]

UN PROFECIA QUE TA CONECTA CON EL ENTERO BIBLIA

“Hay pone yo pelea entre contigo [el culebra] y con el mujer y entre na de tuyu descendiente y na de suyu descendiente. Hay machaca le contigo na cabeza y hace tu iri con ele na talon.”—Genesis 3:15.

Ese el primer profecia na Biblia que ya habla el Dios na Eden. Quien el cuatro caracter: el mujer, de suyu descendiente, el culebra y el descendiente de este? Na cosa manera tiene “pelea” entre con este maga caracter?

EL CULEBRA

Si Satanas Diablo.—Revelacion 12:9.

EL MUJER

El organizacion de Jehova na cielo de maga angel. (Galacia 4:26, 27) Si Isaias ya habla que “el mujer” hay pari un espiritual nacion na futuro.—Isaias 54:1; 66:8.

EL DESCENDIENTE DEL CULEBRA

Aquellos quien ya iscuji hace el querrer de Satanas.—Juan 8:44.

EL DESCENDIENTE DEL MUJER

Si Jesucristo amo el de con todo importante parte del descendiente del mujer que parte del organizacion de Jehova na cielo. Incluido tambien na “descendiente” el maga espiritual hermano del Cristo quien hay rula na cielo junto con ele. El maga iscujido Cristiano hay queda un espiritual nacion, “el Israel del Dios.”—Galacia 3:16, 29; 6:16; Genesis 22:18.

EL IRIDA NA TALON

Un duele irida que ya causa con el Mesias pero gendeh permanente el efecto de este. Ya puede mata si Satanas con Jesus aqui na tierra y ya resucita con Jesus.

EL IRIDA NA CABEZA

El completamente destrozo con Satanas. Si Jesus hay quita con Satanas hasta para cuando. Antes pa con ese, hay quita si Jesus con el todo maldad que ya causa si Satanas na Eden.—1 San Juan 3:8; Revelacion 20:10.

Para na corto sumario acerca na importante tema del Biblia, mira con el brosyur The Bible—What Is Its Message? que yan publish el maga Testigo de Jehova.

[Letrato]

Ya sufri si Adan y Eva como resulta del diila pecado