Tiene Ba Gayot Jardin de Eden?

SABE ba tu el istoria acerca con kanda Adan y Eva y el jardin de Eden? Familiar con este el maga gente na entero mundo. Si quierre tu le con este, puede tu con este incuntra na Genesis 1:26–3:24. Este el maga importante idea acerca na jardin de Eden:

Si Dios Jehova * ya forma con el un gente estaba na polvos, ya nombra con ele Adan y ya pone con ele na un jardin que ta llama Eden. El Dios mismo el ya hace con este jardin. Tiene este manada agua y abundancia de maga pono que tiene fruta. Na medio de este, puede incuntra con el “pono de saber del bueno y malo.” Ya prohibi el Dios con el maga gente que come con el fruta de este pono y ya habla que hay muri sila si desobedece sila. Despues de cuanto tiempo, ya saca si Jehova un custillas estaba con Adan y ya crea con el primer mujer, si Eva. Ya dale kanila trabajo el Dios que cuida con el jardin y ya habla kanila que tene maga anak y llena con el tierra.

Cuando solo-solo si Eva, yan cuento con ele el un culebra y ya engaña con ele para come con el fruta que ya prohibi. Ya clama el culebra que yan imbusterias el Dios con Eva y ta esconde con ele un buen cosa que puede con ele hace igual con el Dios. Ya creé el mujer con el culebra y ya come con el fruta que ya prohibi. Despues, ya sigui tambien con ele si Adan para desobedece con Dios. Como resulta, ya sentencia si Jehova con Adan, Eva y con el culebra. Despues arria con el maga gente, ya vicia el maga angel con el entrada del jardin.

De antes, manada maga educao persona, scholar y historian el ta creé que deverasan el maga suceso que ya escribi na libro de Genesis na Biblia. Pero ahora, manada gente el tan duda con el cosa ta habla el Biblia. Pero, cosa el basejan del diila duda na cosa ta habla el Genesis acerca con Adan, Eva y el jardin de Eden? Examina kita con el cuatro de ese.

1. Un deverasan lugar ba el jardin de Eden?

Porque el cuanto tan duda con ese? Posible por causa na maga idea del gente. Por cuanto año, el maga lider del religion ta pensa si ta existi pa ba siempre el jardin de Eden. Pero, ya puede influencia con el maga iglesia el maga Greek philosopher, igual kanda Plato y Aristotle, quien ta creé que imposible tiene cosa perfecto aqui na tierra. Na cielo lang tiene cosas perfecto. Poreso, el maga theologian ta creé que el original Paraiso cerca na cielo. * El cuanto ta habla que el jardin de Eden encima del un bien alto monte y lejos na tierra que defectoso; el otro ta pensa que talli se na North Pole o na South Pole; mientras el otro ta creé que talli se cerca o talli mismo na luna. Como resulta, el maga gente ya principia pensa que el Eden gendeh un deverasan lugar. El cuanto maga experto ahora ta habla que gendeh puede confia con el cosa ta habla el Biblia acerca na locacion del jardin de Eden poreso gendeh sila ta creé que ya existi ese.

Pero, gendeh ansina el cosa ta dale mira el Biblia acerca na jardin de Eden. Na Genesis 2:8-14, puede kita aprende manada detalle acerca na ese lugar. El jardin puede incuntra na este parte del region que ta llama Eden. Tiene este cuatro rio que el agua estaba na un rio. Ya nombra con ese cuatro rio y tiene corto detalle acerca con ese. Base na este maga detalle, el maga scholar del Biblia ya pricura busca con el locacion del jardin de Eden. Pero, nuay sila puede incuntra cay otro-otro el diila opinion. Quierre decir ba falso o istoria-istoria lang el maga detalle acerca na jardin de Eden y el maga rio de este?

Considera este: Seis mil año ya el ya pasa desde el tiempo que ya existi el jardin de Eden. Claro que si Moises el quien ya escribi con el maga detalle acerca con ese base na maga istoria que posible ya puede le oi o na maga documento que ta existi na de suyu tiempo. Pero, 2,500 año ya el ya pasa cuando ya principia si Moises escribi acerca na aquel maga suceso. Ese tiempo nuay mas ya el Eden. Ahora el pregunta, posible ba cambia el maga landmark, igual con el maga rio, despues pasa el cuanto siglo? Ta pasa el tiempo, ta cambia el forma del tierra. Pirmi tan temblor na lugar donde posible el Eden y alli ya sucede el cerca 17 por ciento del de con todo fuerte temblor na mundo. Na ansina maga lugar, normal lang ta tiene cambio el forma del tierra. Mas pa, por causa na Grande Avenida na tiempo de Noe posible manada cosas el ya cambia na tierra que no sabe kita ahora. *

Pero, este el cuanto informacion que sabe kita: El Genesis ta dale mira que un deverasan lugar el jardin de Eden. El dos na cuatro rio que ya menciona na ese libro—el Eufrates y el Tigris o Hidekel—ta existi hasta ahora y el agua que ta corre na ese maga rio estaba na un lugar. Ya menciona tambien el Biblia el maga detalle acerca na maga lugar onde ta pasa el rio. El maga gente del Israel de antes familiar con ese maga detalle.

Ansina ba el maga istoria-istoria que ya hace lang el maga gente? O gendeh se inclui maga especifico detalle que puede confirma si deverasan ba se o gendeh? “Un dia na un lejos lugar”—ansina el principio del maga istoria que ta hace-hace lang. Pero, el historia ta inclui maga importante detalle, igual como cosa puede mira na istoria acerca na Eden.

2. Maka-creé ba que el Dios ya crea con Adan estaba na polvos y con Eva estaba na custillas de Adan?

El ciencia ya discubri que el diaton cuerpo hacido de diferente clase de elemento que puede incuntra na tierra—igual como el hydrogen, oxygen y carbon. Pero, paquemodo ese maga elemento yan junto-junto para forma un vivo creatura?

Asegun na teoria del maga cientista, el vida accidente lang ya abuya. Ya principia se na maga simple organismo y despues del millones de año, hinay-hinay se ya queda mas complicao. Pero, gendeh kita puede habla que “simple” el todo maga vivo cosa cay maskin el maga organismo que tiene un bien diutay celula bien complicao. Nuay ni uno quien ya puede dale prueba que el vida bigla lang ya abuya. Sino, el todo vivo cosas ta dale prueba que tiene un bien inteligente persona quien ya diseña con ese. *—Roma 1:20.

Si puede tu oi un bonito musica o mira un bale painting o un complicao maquina, hay habla ba tu que nuay quien ya hace con ese? Siempre gendeh! Pero ese maga cosas, nuay lang si compara con el cuerpo del gente. Poreso, porque man kita pensa que nuay quien ya crea con el gente? Mas pa, el libro de Genesis ta explica que na todo vida aqui na tierra, solamente con el maga gente el ya crea na imagen del Dios. (Genesis 1:26) Amo se el razon si porque solamente el maga gente el ta puede hace musica, art y tecnologia. Debe ba kita espanta que el Dios mas bueno hace maga cosas que kanaton?

Si acerca con el mujer que ya crea por medio na un custillas estaba na hombre, dificil ba se para hace el Dios? * Puede era el Dios usa otro manera pero por medio na manera que ya crea le con Eva, puede le dale mira que si casa el hombre y mujer puede sila queda cerca na uno y otro que dol “un laman” sila. (Genesis 2:24) El manera si paquemodo ya hace con el hombre y mujer y el capacidad diila que queda cerca na uno y otro y man ayudajan, ta dale mira que el Dios sabio y ta ama le kanaton.

Mas pa, manada experto ta creé que todo maga gente estaba lang na un hombre y un mujer. Gendeh ba ansina el cosa ta dale mira el libro de Genesis?

3. El pono de saber y el pono del vida dol gendeh deverasan.

El libro del Genesis gendeh ta enseña que este maga pono tiene maga especial poder. Pero, ya dale si Jehova con este maga pono un especial representacion.

Gendeh ba ta hace tambien ansina el maga gente tiene vez? Por ejemplo, posible el un juez hay dale aviso que dale mira respeto durante na corte. Ta habla se el juez, gendeh para respeta con el banco, mesa y el maga dindin adentro del corte sino para respeta con el sistema de justicia que ta representa el corte. Manada tambien maga rey el ya usa con el cetro y el corona como simbolo del diila autoridad.

Entonces, cosa ta representa el dos pono? Manada complicao teoria el ya hace el maga gente. Pero, el deverasan contestacion simple y bien importante. El pono de saber del bueno y malo ta representa con el privilegio que el Dios lang tiene—el derecho para determina si cosa el bueno y cosa el malo. (Jeremias 10:23) Poreso, gendeh maka-estraña que un crimen que ruba na aquel pono! El pono del vida ta representa con el regalo que el Dios lang el puede dale—el vida hasta para cuando.—Roma 6:23.

4. El un culebra que ta converza dol estaba lang na un istoria-istoria.

Deverasan, maka-libug este istoria na libro de Genesis, especialmente si gendeh kita considera con el otro istoria na Biblia. Pero, hinay-hinay ya hace claro el Escritura con este misterio.

Quien o cosa el ya causa con el culebra para converza? Tiene otro maga istoria el sabe el maga gente de Israel de antes que ya ayuda kanila para entende si cosa ya sucede na jardin de Eden. Por ejemplo, maskin pa sabe sila que gendeh tan cuento el maga animal, el un espiritu persona puede hace con el animal que dol tan cuento. Ya escribi tambien si Moises istoria acerca con Balaam donde ya imbia el Dios un angel para causa con el asno de Balaam que man cuento igual na un gente.—Numero 22:26-31; 2 Pedro 2:15, 16.

Puede ba hace maga milagro el otro maga espiritu, incluido aquellos maga enemigo del Dios? Si Moises ya puede mira con el maga sacerdote de Egipto quien ta practica magica que ya copia con el cuanto maga milagro del Dios, igual que hace con el baston un culebra. El diila poder ya sale na maga mal espiritu que enemigo del Dios.—Exodo 7:8-12.

Ta sale que si Moises tambien el quien ya escribi con el libro de Job. Ese libro ta enseña kanaton manada cosas acerca con el numero uno enemigo del Dios, si Satanas, quien ya cuestiona con el integridad del todo maga siervo de Jehova. (Job 1:6-11; 2:4, 5) Ya pensa ba el maga Israelita de antes que si Satanas el quien ya manipula con el culebra na Eden y ya causa con este para man cuento y engaña con Eva para desobedece con Dios? Grande el posibilidad que ansina.

Si Satanas ba el quien ya causa con el culebra para man cuento? Na uliji, ya refiri si Jesus con Satanas como un “embustero y tata del imbusterias.” (Juan 8:44) Gendeh ba el “tata del imbusterias” amo el persona quien ya habla con el primer imbusterias? El primer imbusterias puede incuntra na cosa ya habla el culebra con Eva. Gendeh igual na aviso del Dios que si come sila con el fruta hay muri sila, el culebra ya habla: “Gendeh gayot ustedes muri.” (Genesis 3:4) Claro que sabe si Jesus que si Satanas el quien ya manipula con el culebra. Na Revelacion que ya dale si Jesus con apostol Juan, especifico ya llama con Satanas “el daan Culebra.”—Revelacion 1:1; 12:9.

Imposible ba gayot para creé que puede el un poderoso espiritu persona manipula con el un culebra y hace con este sale que dol ta converza? Gane, maskin el maga gente puede hace sale que ta converza el un animal o un puppet.

El De Con Todo Maka-convinci Evidencia

Gendeh ba tu man uyun que nuay basejan el maga duda acerca na istoria na Genesis? Tiene fuerte prueba que deverasan el cosa ya habla na Genesis.

Por ejemplo, ya llama con Jesucristo como “el Testigo fiel y deverasan.” (Revelacion 3:14) Como un perfecto gente, nunca le yan imbusterias y nunca le ya cambia con el verdad na maskin cosa manera. Mas pa, ya enseña le que ya existi ya le antes pa el de suyu vida como un gente aqui na tierra—gane, ya esta le junto con el de suyu Tata, si Jehova, “cuando noay pa hace el mundo.” (Juan 17:5) Poreso ya existi ya le cuando ya principia el vida aqui na tierra. Cosa le ya habla?

Ya refiri si Jesus con Adan y Eva como maga real persona. Ya refiri le con el diila matrimonio cuando ya explica le que quierre si Jehova que na uno lang debe casa el un hombre o un mujer. (Mateo 19:3-6) Si nuay sila existi y un istoria-istoria lang el jardin onde sila ya esta, entonces ya engaña con Jesus o un imbustero le. Gendeh gayot se razonable! Estaba si Jesus na cielo y ya mira le con el maga cosas que ya sucede na jardin. Tiene pa ba otro evidencia que puede kita mas confia que con ese?

El deverasan, si gendeh kita ta creé na istoria na Genesis, gendeh kita ta creé con Jesus. Puera con ese, imposible tambien para kanaton que entende con el cuanto maga importante enseñanza y maga promesa na Biblia. Hay aprende kita mas na siguiente articulo.

[Maga footnote]