El Biblia Puede Cambia con el Vida

COSA ya manda move con el un rebelloso joven hombre para aprende ama y pricura ayuda con otro? Cosa ya motiva con el un hombre na Mexico para deja con el de suyu imoral manera de vida? Porque el un professional cyclist na Japan ya descanza man carrera para sirvi con Dios? Le con el diila istoria.

“Nuay Yo Respeto, Arogante y Agresivo.”​—DENNIS O’BEIRNE

AÑO QUE YA NACE: 1958

NACION ONDE YA NACE: ENGLAND

BACKGROUND: UN REBELLOSO JOVEN HOMBRE

DE MIO VIDA DE ANTES: De Ireland el familia del de mio tata y ya engranda yo como un Catolico. Maskin gendeh yo quierre anda na iglesia, interesao yo siempre acerca con Dios. Pirmi yo ta reza con el Rezo del Señor y ta acorda yo que si ta acusta ya yo na de mio cama si denoche, ta pensa yo si cosa quierre decir del cada frase de este.

Cuando maga 16 año yo, ya queda yo envuelto na Rastafarian movement. Ya queda tambien yo interesao na politica igual na Anti-Nazi League. Pero, el ya puede gayot influencia conmigo amo el rebelloso custumbre del punk rock movement. Halos cada dia yo ta usa droga, especialmente el marijuana. Nuay yo queber na maskin cosa. Ta toma yo por demas, ta pone na peligro con el de mio vida y gendeh ta trata enbuenamente con otro. No quierre yo man junto con otro y gendeh yo ta converza si gendeh importante el discusion. No quierre tambien yo que letrata conmigo. Si ta acorda yo con ese, ta puede yo realiza que nuay yo respeto, arogante y agresivo. Bueno yo y bondadoso con aquellos lang quien cerca conmigo.

Cuando maga 20 año yo, ya queda yo interesao na Biblia. El de mio amigo quien ta vende droga ya principia le con el Biblia cuando talla le na preso. Ya tarda kame man cuento acerca na religion, na Iglesia y na papel de Satanas na mundo. Ya cumpra yo un Biblia y ya principia estudia con ese solo-solo. Ta le kame del de mio amigo cuanto porcion del Biblia, tan junto kame para discuti con el cosa kame ya aprende y ta hace kame maga conclusion. Ya continua kame se hace por cuanto mes.

Este el cuanto maga conclusion que ya puede kame hace base na cosa kame ya puede le: que ta vivi kita na ultimo maga dia de este mundo; que debe predica el maga Cristiano acerca el buen noticia del Reino del Dios; que gendeh sila debe queda parte de este mundo, incluido na politica; y que ta dale el Biblia maga buen principio acerca na moral. Claro kame ya puede mira que deverasan el Biblia y asigurao tiene un verdadero religion. Pero, cosa religion gaha? Ya considera kame con el maga grande religion que tiene maga grande iglesia y maga ritual, y tambien el diila participacion na politica. Ya mira kame que gendeh ansina si Jesus. Sabe kame que gendeh kanila ta usa el Dios poreso ya decidi kame que considera con el maga religion que gendeh tanto conocido para mira si cosa kame puede aprende kanila.

Tan cuento kame con el maga gente de ese maga religion y tiene kame maga cuanto pregunta para kanila. Sabe kame si cosa ta habla el Biblia acerca na cada pregunta poreso ta puede kame dayun mira si uyun el diila contestacion na Palabra del Dios. Cada vez kame acaba man cuento kanila, ta reza yo con Dios, ‘Si ta representa sila con el verdadero religion, pabor manda move conmigo para man cuento kanila otravez.’ Pero despues del cuanto mes, nuay siempre yo puede incuntra un grupo que ta contesta con el diamon maga pregunta usando el Biblia y nuay tambien yo tiene el deseo que man cuento otravez con el maskin uno kanila.

Na uliji, ya puede kame man cuento del de mio amigo con el maga Testigo de Jehova. Igual lang el diamon maga pregunta pero ya contesta sila usando el Biblia. Uyun gayot el cosa sila ta habla na cosa kame ya aprende. Poreso, ya pregunta kame kanila acerca na otro maga cosas que nuay pa kame incuntra el contestacion na Biblia—por ejemplo, acerca na mirada del Dios na pumada y droga. Ya puede sila otravez contesta usando el Palabra del Dios. Ya conforma kame que atende un miting na Kingdom Hall.

Dificil para conmigo que atende miting. Maskin bueno sila todo y mudao, no quierre yo man cuento kanila. Gendeh yo ta confia con el cuanto kanila y no quierre mas yo atende maga miting. Pero como cosa yo pirmi ta hace, ya reza yo con Dios para dale conmigo el deseo que man junto otravez con este maga gente si ta representa sila con el verdadero religion. Y ya tiene yo grande deseo que estudia con el Biblia junto con el maga Testigo.

SI PAQUEMODO EL BIBLIA YA PUEDE CAMBIA CON EL DE MIO VIDA: Sabe yo que necesita yo descanza usa droga y ya puede yo se dayun hace. Pero, bien dificil para conmigo que descanza puma. Manada beses yo ya pricura descanza puma pero nuay yo se puede hace. Cuando ya puede yo oi que el otro ta puede lang buta con el diila cigarillo y gendeh mas puma otravez, ya reza yo con Jehova acerca con ese. Despues, na ayuda de Jehova, ya puede yo descanza puma. Ya puede yo aprende que bien importante que habla el todo con Jehova na rezo.

El otro grande cambio que necesita yo hace amo el de mio ichura y mudada. Na de mio primer atendida na Kingdom Hall, pa-agudo el de mio pelo que tiene color azul. Despues, ya tiñi yo con este orange. Ya usa yo maong y leather jacket que tiene maga escribido palabra. Nuay yo sinti que necesita yo cambia maskin pa ya explica conmigo enbuenamente el maga Testigo acerca con este. Pero na uliji, ya pensa yo acerca el 1 San Juan 2:15-17: “No ustedes ama con el mundo ni con el maga cosa-cosa na mundo, cay si quien ta ama con el mundo, el amor del Tata gendeh ta esta adentro con ele.” (El Nuevo Testamento na Chavacano) Ya puede yo pensa que el de mio ichura ta dale mira que ta ama yo con el mundo y para dale yo mira el de mio amor con Dios, necesita yo cambia. Poreso, ya hace yo maga cambio.

Despues del cuanto tiempo, ya realiza yo que gendeh lang el maga Testigo el quierre que atende yo na maga miting. El Maga Hebreo 10:24, 25 ta dale mira que quierre el Dios que hace yo se. Despues del cuanto tiempo que ta atende yo con el todo maga miting y ya conoce yo con el maga gente alla, ya decidi yo que dedica el de mio vida con Jehova y bautiza.

SI PAQUEMODO YO YA BENEFICIA: Ta aprecia gayot yo cay ta permiti kanaton si Jehova que tene cerca relacion con ele. El de suyu compasion y amor ya manda move conmigo que imita con ele y sigui con el ejemplo del de suyu Anak, si Jesucristo. (1 Pedro 2:21) Ya aprende yo que puede siempre yo tene de mio mismo personalidad maskin ta pricura yo cultiva con el personalidad del un Cristiano. Ya hace yo grande esfuerzo para queda un amable persona. Ta pricura yo imita con el Cristo na manera si paquemodo yo ta trata con el de mio mujer y anak hombre. Y ta ama gayot yo con el de mio maga hermano y hermana na fe. Cay ya sigui yo con el ejemplo del Cristo, ya tiene yo dignidad, respeto na cuerpo y abilidad para dale mira amor con otro.

“Ya Trata Sila Conmigo con Dignidad.”​—GUADALUPE VILLARREAL

AÑO QUE YA NACE: 1964

NACION ONDE YA NACE: MEXICO

BACKGROUND: TIENE IMORAL MANERA DE VIDA

DE MIO VIDA DE ANTES: Siete kame man hermano y hermana que ya engranda na Hermosillo, na Sonora, Mexico, un lugar donde manada pobre. Ya muri el diamon tata cuando bata yo poreso necesita trabaja el diamon nana para suporta kanamon. Mas mucho, tan pies-pies lang yo cay nuay kame sen para cumpra sapatos. Maskin joven pa lang yo, ya principia ya yo trabaja para ayuda na maga gasto del diamon familia. Igual na manada maga familia, bien diutay el diamon casa.

Halos entero dia, nuay el diamon nana para protege kanamon maga bata. Cuando 6 año yo, ya queda yo un victima de sexual abuso del un 15 año hombre. Ya continua este abuso por largo tiempo. Por causa con ese, yan libug yo acerca na de mio sexualidad. Pensaba yo normal lang que quierre yo maga hombre. Cuando ya pidi yo ayuda con el maga doctor y padre, ya asigura sila conmigo que nuay yo problema y normal lang el cosa yo ta sinti.

Cuando 14 año yo, ya decidi yo que actua y muda como homosexual. Ya continua yo se hace por 11 año y gane, ya queda yo junto na diferente maga hombre durante este tiempo. Na uliji, ya estudia yo para queda un hair stylist y ya abri yo un parlor. Pero, gendeh yo alegre. Pirmi yo ta sufri y ta traiciona conmigo el otro. Ya puede yo pensa que gendeh justo el cosa yo ta hace. Ya pregunta yo con el de mio mismo cuerpo, ‘Tiene pa ba gaha maga buen gente con quien puede confia?’

Ya acorda yo con el de mio hermana. Ya estudia le con el Biblia junto na maga Testigo de Jehova y na uliji, ya bautiza. Ya habla le conmigo el cosa le ta aprende pero gendeh yo ta pone atencion. Maskin pa ansina, bilib yo na de suyu vida y na de suyu matrimonio. Ta puede yo mira que ele y el de suyu marido ta ama y ta respeta gayot con uno y otro. Ta trata sila enbuenamente con uno y otro. Despues del cuanto tiempo, ya principia yo estudia con el Biblia junto na un Testigo de Jehova. Del primero, ya conforma lang yo maskin nuay yo gana. Pero na uliji, ya tiene cambio.

SI PAQUEMODO EL BIBLIA YA PUEDE CAMBIA CON EL DE MIO VIDA: Ya invita conmigo el maga Testigo na uno del diila maga miting y ya anda yo. Nuevo se para conmigo cay mayoria del maga gente ta gangguia conmigo pero nuay se hace el maga Testigo. Yan greet sila conmigo y ya trata sila conmigo con dignidad. Ya aprecia gayot yo con aquel.

Mas yan bilib yo con el maga Testigo cuando ya atende yo un asemblea. Ya puede yo mira que maskin na grande grupo, este maga gente igual na de mio hermana—deverasan sincero sila. Ya pregunta yo con el de mio mismo cuerpo si este ya ba gaha el grupo del maga buen gente con quien yo puede confia que ya dura ya yo ta busca. Yan bilib yo na diila amor y unidad, y na diila usada del Biblia si ta contesta con el cada pregunta. Ya realiza yo que el Biblia el razon si porque sila maga buen gente. Y ya realiza tambien yo que necesita yo hace manada maga cambio para queda uno kanila.

Gane, necesita yo cambia con el todo na de mio vida cay ta vivi yo como un mujer. Necesita yo cambia con el de mio converzada, movimiento, mudada, estilo de pelo y maga amigo. El de mio maga amigo de antes ta gangguia conmigo y ta habla: “Porque man tu se ta hace? OK ya man si cosa tu. No mas ya estudia con el Biblia. Tiene ya man tu el todo.” Pero, el de con todo dificil para quita amo el maga imoral practica.

Maskin dificil hace con este maga cambio, sabe yo que posible este cay el maga palabra na 1 Corinto 6:9-11 ta habla: “Gendeh ba sabe ya ustedes que aquellos ta hace malo gendeh ay hereda el Reino del Dios? Entonces, no ustedes hace loco con el de ustedes mismo cuerpo, cay aquellos ta hace cosa immoralidad, o ta adora con el maga dios-dios, o ta comete adulterio, el maga hombre que ta hace cosa immoral con otro maga hombre . . . gendeh gayot ay hereda el Reino del Dios. Tiene de ustedes ansina tamen estaba. Pero ahora ya queda ustedes limpio.” Ya ayuda si Jehova con el maga gente de antes para cambia y ya ayuda tambien le conmigo. Manada año yo yan dificil para hace maga cambio pero el guia y amor del maga Testigo ya puede gayot ayuda conmigo.

SI PAQUEMODO YO YA BENEFICIA: Ahora, normal ya el de mio vida. Casao yo y ta enseña kame del de mio mujer con el diamon anak hombre que vivi asegun na maga principio na Biblia. Gendeh mas gayot yo igual de antes. Tiene ya yo buen relacion con Jehova y alegre yo ta sirvi con ele. Ta sirvi yo como anciano na congregacion y ya puede yo ayuda con otro que aprende el verdad na Palabra del Dios. Bien alegre el de mio nana na maga cambio que ya hace yo y por causa con ese, ya acepta le un Bible study y na uliji ya bautiza. El de mio otro hermana quien ya tiene imoral manera de vida ya queda tambien uno del maga Testigo de Jehova.

El maga gente quien conoce conmigo de antes ya puede mira que ya queda mas bueno el de mio vida. Y sabe yo si cosa ya puede ayuda conmigo para hace con ese maga cambio. De antes, ya pidi yo ayuda na maga doctor pero ya ricibi lang yo maga gendeh buen consejo. Pero, si Jehova deverasan ya ayuda conmigo. Maskin ya sinti yo que nuay yo valor, ya nota le conmigo y ya trata conmigo con amor y paciencia. Ya tiene yo fuerza para hace con aquel maga cambio cay ya sabe yo que el un bien bueno, inteligente y amable Dios ya nota conmigo y quierre le que tene yo mas buen vida.

“Triste Siempre Yo y Gendeh Contento.”​—KAZUHIRO KUNIMOCHI

AÑO QUE YA NACE: 1951

NACION ONDE YA NACE: JAPAN

BACKGROUND: PROFESSIONAL CYCLIST

DE MIO VIDA DE ANTES: Ya engranda yo na un silencio ciudad na Shizuoka Prefecture, Japan. Ocho kame na familia y ta queda kame na un diutay casa. Tiene el de mio tata un shop de maga bicicleta. Desde bata yo, ya lleva le conmigo na maga carrera de bicicleta y ya queda yo interesao na este sport. Quierre el de mio tata que queda yo un professional cyclist. Antes pa yo man high school, yan train gayot le conmigo. Cuando high school yo, ya ganá yo na un national contest por tres siguidito año. Ya ofrece conmigo que estudia na un universidad pero ya decidi yo que anda na un escuela donde man train yo para queda un professional cyclist. Na edad de 19, ya queda yo un professional cyclist.

Aquel tiempo, goal de mio que queda el numero uno cyclist na Japan. Quierre yo tene manada sen para puede yo dale buen vida con el de mio familia. Ya pone gayot yo grande esfuerzo na training. Si ta sinti yo que bien dificil ya el un training o un carrera, ta habla yo con el de mio mismo cuerpo que ya nace yo para queda un cyclist y necesita lang yo continua. Amo se el cosa yo ya hace. Ya principia tene buen resulta el de mio maga esfuerzo. Na de mio primer año, ya ganá yo contra con el todo maga nuevo cyclist. Na segundo año, ya queda yo cualificao para participa na un carrera donde ta determina si quien el queda numero uno cyclist na Japan. Seis beses yo ya queda numero dos na ese carrera.

Ya continua yo ganá na maga carrera y ya principia el maga gente llama conmigo como “el mafuerza maga pierna de Tokai,” un lugar na Japan. Tan competencia gayot yo con otro para ganá. Ya llega el tiempo que ta tiene miedo conmigo el otro cay bien agresivo gayot yo si tan carrera. Ya tiene yo manada sen y ta puede yo cumpra con el maskin cosa yo quierre. Ya cumpra yo un casa que tiene un cuarto donde tiene maga buen clase de machine para usa na ejercicio. Ya cumpra tambien yo un bien caro coche que el valor halos igual ya na un casa. Para tene financial seguridad, ya principia yo man invest con el de mio sen na real estate y stock market.

Maskin pa ansina, triste siempre yo y gendeh contento. Aquel tiempo, ya casa yo y ya tiene maga anak pero pirmi yo nuay paciencia kanila. Ta rabia yo con el de mio mujer y maga anak maskin na maga diutay cosas lang. Pirmi sila ta nervia y ta vicia con el expresion del de mio cara para mira si rabiao yo.

Pero ya llega el tiempo, ya estudia el de mio mujer con el Biblia junto na maga Testigo de Jehova. Por causa con ese, ya tiene manada cambio na diamon vida. Ya habla le que quierre le atende na maga miting del maga Testigo poreso ya decidi yo que anda kame como familia. Ta acorda yo siempre el noche cuando ya visita el un anciano na diamon casa y ya principia yo estudia el Biblia junto con ele. Ya tiene gayot grande efecto conmigo el cosa yo ya aprende.

SI PAQUEMODO EL BIBLIA YA PUEDE CAMBIA CON EL DE MIO VIDA: Gendeh gayot yo ulvida el efecto del Efeso 5:5 conmigo. Este ta habla: “Aquellos quien ta comete sexual imoralidad o aquellos mabuling o hambriento, que dol ta practica idolatria, gendeh puede hereda con el Reino del Cristo y del Dios.” (New World Translation) Ya puede yo mira que envuelto el maga juego de sen na maga carrera de bicicleta y ese sport ta causa con el maga gente para queda hambriento. Yan conciencia yo. Ya pensa yo que si quierre yo hace alegre con Dios Jehova, necesita yo descanza man carrera. Pero, dificil se para conmigo que hace.

Nuevo lang yo ya acaba con el de con todo buen carrera que ya tiene yo y quierre pa yo mas. Pero si ta estudia yo con el Biblia, ta queda yo calma y ta tiene paz na pensamiento—bien diferente ese na cosa yo necesita para ganá maga carrera. Tres beses lang yo yan carrera despues yo ya principia man Bible study pero na de mio corazon, quierre siempre yo man carrera. No sabe yo si cosa el otro manera que puede yo suporta con el de mio familia. Gendeh yo ta progresa na de mio sport y na de mio Bible study, y tan contra gayot conmigo el de mio maga pariente por causa na de mio nuevo creencia. Nuay gayot gusta el de mio tata con el de mio decision. No sabe yo si cosa yo hace. Ya queda yo bien stress y ya tiene ulcer.

Ya puede yo aguanta con aquel dificil tiempo cay ya continua yo estudia con el Biblia y anda na maga miting del maga Testigo de Jehova. Hinay-hinay, ya queda fuerte el de mio fe. Ya pidi yo con Jehova que oi con el de mio maga rezo y ayuda conmigo para mira que ta oi gayot le. Mas ya menora tambien el de mio stress cuando ya asigura conmigo el de mio mujer que gendeh le necesita queda na un grande casa para queda alegre. Hinay-hinay, ya progresa yo.

SI PAQUEMODO YO YA BENEFICIA: Ya aprende yo que deverasan gayot el maga palabra de Jesus na Mateo 6:33. Ele ya habla: “Busca ustedes una el disuyo Reino y hace el disuyo voluntad, y ay dale Le con ustedes todo esos maga cosa-cosa.” Nuay gayot kame falta na “maga cosa-cosa” que ya refiri si Jesus—el maga necesidad na vida. Maskin maga tres por ciento lang el de mio incuntrada ahora compara de antes cuando tan carrera pa yo, nuay gayot falta el de mio familia na maskin cosa na 20 año que ya pasa.

Mas pa, si ta trabaja yo o ta adora junto con el de mio maga hermano y hermana na fe, ta tene yo alegria y satisfaccion que nuay pa yo experiencia de antes. Paspas lang ta pasa el tiempo cay ta esta yo ocupao na servicio con Jehova. Mas ya queda tambien alegre el diamon familia. El de mio tres anak y el diila maga mujer ya queda maga fiel siervo de Jehova.