Profecia 2. Hambre

“Ay tene . . . maga calamidad de hambre.”​—MARCOS 13:8.

● Un hombre el ya anda na barrio de Quaratadji, Niger. Ya llega tambien alla el maga primo, prima, hermano y hermana del hombre por causa na hambre na diila lugar. Pero, solo-solo lang el hombre acustao na petate na tierra. Porque le solo? “No puede le dale come [con el de suyu familia] y no puede le aguanta mira kanila con hambre,” ya habla si Sidi, el lider na barrio.

COSA TA DALE MIRA EL MAGA REPORT? Na entero mundo, cerca 1 na 7 persona el gendeh ta puede come bastante comida cada dia. Pero, mas grabe el situacion na sub-Saharan Africa que donde 1 na 3 el nuay comida por largo tiempo. Imagina con el un familia que tiene tata, nana y un baby. Si tiene lang comida para na dos persona, quien el man con hambre? El tata? el nana? el baby? Ese el decision que necesita hace el maga familia alla cada dia.

COSA TA HABLA EL CUANTO? El tierra ta produci bastante comida para na todo. Necesita lang distribui enbuenamente con el producto del tierra.

DEVERASAN BA SE? Deverasan, el maga siembrador puede produci y distribui mas manada comida compara de antes. Poreso, puede lang era el gobierno de gente distribui bastante comida para na todo para solva el problema na hambre. Pero maskin pa ya dura ya sila ta pricura hace con ese, nuay se sila siempre puede hace.

PARA CONTIGO? Ta cumpli ya ba el Marcos 13:8? Maskin pa na progreso na tecnologia, afectao ba el maga gente na escasez de comida na entero mundo?

El maga temblor y hambre tiene vez ta resulta pa na otro maga problema que parte tambien del señal del ultimo maga dia.

“Mas de 33 por ciento del maga bata quien ta muri na pneumonia, diarrhea y otro pa maga enfermedad el puede era salva si gendeh lang era sila falta nutricion.”​—ANN M. VENEMAN, EXECUTIVE DIRECTOR DE ANTES DEL UN CHILDREN’S FUND.

[Picture Credit Line]

© Paul Lowe/​Panos Pictures