Profecia 4. Nuay Amor

“El maga gente . . . ay queda gayot nuay amor para con uno y otro.”​—2 TIMOTEO 3:1-3, El Nuevo Testamento

● Si Chris ta trabaja na un grupo na North Wales que ta ayuda con el maga victima de violencia adentro na familia. “Ya acorda yo tiene un mujer ya anda kanamon que bien bobotiao y gane nuay mas yo con ele puede conoce,” ya habla si Chris. “El otro maga mujer, por causa na mal tratamiento, ta sinti que nuay sila valor poreso no puede sila contigo mira na ojos.”

COSA TA DALE MIRA EL MAGA REPORT? Na un nacion na Africa, tiene maga 1 na cada 3 mujer el ya experiencia sexual abuso cuando bata pa sila. Na un survey que ya hace na ese mismo nacion, mas de 33 por ciento del maga hombre ta sinti que aceptable lang gulpia con el diila mujer. Pero, gendeh lang el maga mujer el ta queda victima del violencia que ta sucede adentro na familia. Na Canada por ejemplo, cerca 3 na 10 hombre el quien ta experiencia mal tratamiento o abuso desde na diila mujer.

COSA TA HABLA EL CUANTO? Pirmi ya ta sucede el violencia adentro na familia. Mas ya pone lang con ese atencion ahora contra de antes.

DEVERASAN BA SE? Deveras, mas tan cuento el maga gente ahora acerca na violencia adentro na familia. Pero, ese ba quierre decir que mas poco ya gente el con quien ta maltrata na casa ahora? Gendeh. Gane, mas ya queda nuay amor el maga gente ahora.

PARA CONTIGO? Ya cumpli ba el 2 Timoteo 3:1-3? Mas manada ba el ya queda nuay amor na diila familia que debe era tiene?

El ika-cinco profecia que hay discuti kita amo acerca na diaton planeta Tierra. Mira kita si cosa ta habla el Biblia acerca con este.

[Blurb]

“Manada del maga gente el gendeh ta reporta na polis si ta maltrata kanila na casa. Na average, 35 beses gulpia con el mujer el de suyu marido antes pa este reporta na polis.”​—UN SPOKESWOMAN DE WALES DOMESTIC ABUSE HELPLINE.