El Biblia Puede Cambia con el Vida

PORQUE el un mujer que mas de 60 ya el edad ya descanza adora na idolo? Cosa ya manda move con el un padre de Shinto para deja con el de suyu trabajo na templo y queda un siervo de Jehova? Paquemodo el un mujer con quien ya adapta ya enfrenta con el tristeza cay ya abandona con ele? Le con el diila experiencia.

“Gendeh Mas Yo Esclavo de Maga Idolo.”—ABA DANSOU

AÑO QUE YA NACE: 1938

NACION ONDE YA NACE: BENIN

BACKGROUND: TA ADORA IDOLO

DE MIO VIDA DE ANTES: Ya engranda yo na So-Tchahoué, un lugar que ma-agua y cerca na lago o lake. El maga gente aqui ta pesca, ta cuida maga vaca, cabrito, carnero, puerco y pajaro. Nuay calzada na este lugar poreso el maga gente ta usa bangca y baroto como el diila transportacion. El diila casa hacido de palo y cogon pero el cuanto hacido de ladrillo o brick. Pobre el mayoria del maga gente aqui. Pero, nuay tanto crimen aqui si compara na maga ciudad.

Cuando bata yo, el diamon tata ya lleva conmigo y con el de mio hermana na convento del espiritista, donde ya enseña kanamon acerca na diila tradicion. Cuando ta engranda yo, ya principia yo adora con Dudua (Oduduwa), el dios del maga Yoruba. Ya planta yo un altar para na este dios y regular yo ta ofrece maga camote, aceite de palma, manok, paloma y otro pa maga animal. Magasto este maga ofrecimiento y aqui ta acaba el de mio sen.

SI PAQUEMODO EL BIBLIA YA PUEDE CAMBIA CON EL DE MIO VIDA: Cuando ya principia yo estudia con el Biblia, ya aprende yo que si Jehova amo el solamente deverasan Dios. Ya aprende tambien yo que gendeh aceptable con ele el usada del maga idolo na adoranza. (Exodo 20:4, 5; 1 Corinto 10:14) Ya realiza yo si cosa yo necesita hace. Poreso, ya buta yo todo el de mio maga imagen y ya quita na de mio casa el todo cosas que tiene que hace na adoranza de idolo. Ya descanza yo consulta acerca na futuro con el maga quien ta practica adivinacion y nuay mas yo participa na maga religioso ceremonia.

Mas de 60 año ya yo poreso gendeh facil para conmigo que hace aquel maga cambio. El de mio maga amigo, pariente y vecinos yan contra y ya gangguia conmigo. Pero, ya reza yo con Jehova que dale conmigo el fuerza para hace si cosa el justo. Ta anima conmigo el maga palabra na Proverbio 18:10 que ta habla: “El nombre de Jehova amo un fuerte torre. Alla ta anda el recto y ele hay ricibi proteccion.”

Ya puede tambien ayuda conmigo el atendida na maga miting del maga Testigo de Jehova. Ya experiencia yo alla el Cristiano amor y ya gusta gayot yo kanila cay ta pricura sila vivi asegun na maga alto principio na moral del Biblia. El cosa yo ya mira amo el ya convinci conmigo que el maga Testigo de Jehova amo el deverasan religion.

SI PAQUEMODO YO YA BENEFICIA: Cuando ya aplica yo con el maga principio na Biblia, ya puede este ayuda para queda mas enbuenamente el de mio relacion na de mio maga anak. Ya sinti tambien yo alivio cay del antes, ta gasta yo con el de mio sen na maga imagen que nuay yo cosa ya beneficia. Pero ahora, ta adora ya yo con Jehova quien ta dale solucion na todo diaton problema. (Revelacion 21:3, 4) Alegre gayot yo cay gendeh mas yo esclavo de maga idolo sino esclavo ya yo de Jehova! Ya sinti yo el deverasan seguridad y proteccion con ele.

“Ta Busca Yo con Dios Desde Bata Yo.”—SHINJI SATO

AÑO QUE YA NACE: 1951

NACION ONDE YA NACE: JAPAN

BACKGROUND: PADRE DE SHINTO

DE MIO VIDA DE ANTES: Ya engranda yo na un diutay ciudad na Japan. Bien religioso el de mio mayores. Desde bata yo, ya enseña sila conmigo que adora na maga dios de Shinto. Cuando bata yo, pirmi yo ta pensa acerca na de mio salvacion y tiene el fuerte deseo que ayuda con el maga gente quien ta sufri. Ya acorda yo cuando na elementaria yo, ya pregunta el diamon maestro si cosa el diamon ambicion si queda grande. Especifico el contestacion del de mio maga classmate, igual como queda cientista. Ya habla yo que el de mio ambicion amo que sirvi con Dios. Todo sila ya re conmigo.

Despues del high school, ya entra yo na escuela de aquellos quien quierre queda maestro de religion. Durante aquel tiempo, ya conoce yo un padre de Shinto quien ta le con el de suyu libro que tiene negro cover durante na de suyu vacante hora. Un dia, ya pregunta le conmigo, “Sato, sabe ba tu si cosa este libro?” Ya nota yo con el cover del libro poreso ya contesta yo, “El Biblia.” Ya habla le, “Todo aquellos quien quierre queda padre de Shinto debe le con este libro.”

Ya anda dayun yo cumpra un Biblia. Ya pone yo con el Biblia na lugar onde con este pronto puede mira y ya cuida con este enbuenamente. Pero, nuay yo tiempo para le con ese cay bien ocupao yo na escuela. Cuando ya acaba yo entra escuela, ya principia yo sirvi na templo como un padre de Shinto. El de mio ambicion cuando bata yo ya cumpli.

Pero nuay tarda, otro el cosa yo ya discubri na cosa yo ta expecta na un padre de Shinto. Mayoria del maga padre nuay amor o queber con otro. Manada tambien el falta fe. Uno del maga alto-alto alla ya habla conmigo: “Si quierre tu tene buen exito aqui, debe tu man cuento acerca na filosofia lang. No tu man cuento acerca na fe.”

Cuando ya oi yo con el cosa le ya habla, ya perde el de mio gana na religion de Shinto. Maskin pa ya continua yo con el de mio trabajo na templo, ya principia yo examina con el otro maga religion. Pero, dol igual-igual lang sila todo. Mas manada religion yo ta examina, mas tan luya yo. Ya sinti yo que nuay verdad na maskin cosa religion.

SI PAQUEMODO EL BIBLIA YA PUEDE CAMBIA CON EL DE MIO VIDA: Del 1988, ya conoce yo un Budista quien ya anima conmigo que le con el Biblia. Ya acorda yo con el padre de Shinto de antes quien ya anima tambien conmigo que hace ansina. Ya aplica yo con ese consejo. Cuando ya principia yo le con el Biblia, ya gusta gayot yo con el cosa yo ta le. Tiene vez, ta le yo con ese entero noche hasta man aga.

El cosa yo ya le amo el ya manda move conmigo que reza con el Dios del Biblia. Ya principia yo con el modelo rezo na Mateo 6:9-13. Ta repiti yo con este rezo cada dos hora—maskin pa ta sigui yo hace el de mio servicio na templo de Shinto.

Bien manada gayot yo pregunta acerca na cosa yo ta le. Casao ya yo na ese tiempo y sabe yo que el maga Testigo de Jehova ta enseña acerca na Biblia cay ya visita sila de antes con el de mio mujer. Ya busca yo uno del maga Testigo y manada yo cosa ya pregunta con ele. Yan bilib gayot yo cuando ya usa le con el Biblia para contesta con el cada uno de ese maga pregunta. Ya pidi le con el un hermano que man Bible study junto conmigo.

Nuay tarda, ya principia yo atende maga miting del maga Testigo de Jehova. Nuay yo realiza aquel tiempo que el cuanto maga Testigo talla amo aquellos con quien nuay yo trata enbuenamente de antes. Maskin pa ansina, yan greet sila conmigo y ya ricibi enbuenamente.

Na aquel maga miting, ya aprende yo que el Dios ta expecta con el maga marido que dale mira amor y honor na maga miembro del diila familia. Durante aquel tiempo, mas yan focus yo na de mio trabajo como un padre poreso nuay mas yo cuida enbuenamente con el de mio mujer y dos anak. Ya principia yo realiza que bien enbuenamente yo ta oi con el maga gente quien ta anda adora na templo pero nunca yo ya oi con el cosa ta habla el de mio mujer.

Mientras ta progresa el de mio estudiada, ya aprende yo manada cosas acerca con Jehova que ya causa conmigo para queda cerca con ele. Ya alcanza gayot na de mio corazon el maga versiculo igual na Roma 10:13 que ta habla: “Todo aquellos quien ta reza na Nombre del Señor [Jehova] ay salva.” Ta busca yo con Dios desde bata yo y ahora ya incuntra ya yo con ele!

Ya principia yo sinti que no quierre ya yo queda parte del templo. Del una, yan lingasa yo acerca si cosa hay pensa el otro si deja yo con el religion de Shinto. Pero, pirmi yo ta habla na de mio mismo cuerpo que hay deja yo con ese si ya incuntra ya yo con el deverasan Dios. Poreso del 1989, ya decidi yo que sigui con el de mio conciencia. Ya deja yo con el templo y ya pone yo el de mio vida na mano de Jehova.

Gendeh facil que deja con el templo. El maga alto-alto conmigo ya rabia y ya pricura conmigo man pressure que esta alla. Pero, el mas tormento amo que habla este na de mio mayores. Pa-andada na diila casa, yan lingasa gayot yo y gane ya duele el de mio pecho y ya queda maluya el de mio pies. Manada beses yo ya descanza na camino para reza con Jehova que dale conmigo fuerza.

Cuando ya llega yo na casa del de mio mayores, ya tiene gayot yo miedo man cuento acerca con este. Ya pasa el cuanto hora. Na uliji despues del manada rezo, ya explica yo el todo na de mio tata. Ya habla yo con ele que ya incuntra yo con el deverasan Dios y deja ya yo con el religion de Shinto para puede yo sirvi con Ele. Espantao gayot el de mio tata y yan triste. El otro maga pariente ya anda na diamon casa y ya pricura cambia con el de mio pensamiento. No quierre yo hace sinti duele con el de mio familia pero sabe tambien yo que el justo cosa que hace amo sirvi con Jehova. Ya llega el tiempo, ya respeta el de mio familia con el de mio decision.

Maskin pa ya descanza ya yo anda na templo, necesita siempre yo man adjust con el de mio pensamiento ciendo ya queda este importante parte na de mio vida. Ya hace yo esfuerzo para ulvida con ese pero maskin onde yo mira, dol tiene cosa conmigo ta hace acorda con el de mio vida de antes.

Tiene dos cosas que ya puede ayuda conmigo para quita con ese maga influencia. Una, ya busca yo con el maga cosas na de mio casa que tiene que hace na de mio religion de antes. Despues, ya quema yo con este todo—maga libro, letrato y maskin el maga caro cosas que ya colecta yo de antes. Ika-dos, ya busca yo manada oportunidad para puede man junto na maga Testigo. El diila asosacion y suporta ya puede gayot ayuda conmigo. Hinay-hinay, ya perde ya na de mio pensamiento el maga cosas que ta hace yo de antes.

SI PAQUEMODO YO YA BENEFICIA: Del antes, gendeh yo ta cuida con el de mio mujer y maga anak poreso ya sinti sila bien triste. Pero cuando ya principia yo dale tiempo para man junto kanila, como cosa ta enseña el Biblia que hace el maga marido, ya queda kame mas cerca. Ya llega el tiempo, yan junto conmigo el de mio mujer que sirvi con Jehova. Junto na diamon anak hombre, anak mujer y de suyu marido, ahora unido kame na verdadero adoranza.

Si ta pensa yo acerca na cosa yo quierre de antes cuando bata yo que sirvi con Dios y ayuda con el otro maga gente, ya realiza yo que ya incuntra yo el todo cosa yo ta busca—y mas pa. Gendeh yo puede habla na palabra si paquemodo yo ta rindi gracias con Jehova.

“Sabe Yo que Tiene Cosa Falta na De Mio Vida.”—LYNETTE HOUGHTING

AÑO QUE YA NACE: 1958

NACION ONDE YA NACE: SOUTH AFRICA

BACKGROUND: YA SINTI QUE YA ABANDONA CON ELE

DE MIO VIDA DE ANTES: Ya nace yo na Germiston, un lugar que tiene minajan y nuay tanto crimen. Cay ya sinti sila que gendeh sila puede cuida conmigo, el de mio mayores ya decidi que manda conmigo adapta con otro. Cuando 14 dia pa lang yo, ya adapta conmigo el un amable maridable con quien yo ya conoce como el de mio nana y tata. Pero cuando ya sabe yo que ya adapta conmigo, ya sinti yo que ya abandona conmigo. Ya principia yo sinti que gendeh yo deverasan parte na familia del quien ya adapta conmigo y gendeh gayot sila ta entende conmigo.

Cuando maga 16 yo, ya principia yo anda na maga bar, donde iyo y el de mio maga amiga ta baila y ta oi maga cancion. Na edad de 17, ya principia ya yo puma. Quierre yo queda flaco igual con el maga model que ta mira yo na maga advertisement de cigarillo. Cuando ya queda yo 19, ya principia yo trabaja na Johannesburg, donde pronto lang yo yan junto na maga mal asosacion. Nuay tarda, ta usa yo maga mal palabra, grabe ta puma y ta toma por demas cada Sabado y Domingo.

Maskin pa ansina, activo yo na sports. Regular yo tan aerobics, ta juga ladies’ soccer y otro pa juego. Ta trabaja tambien yo enbuenamente y gane ya queda yo conocido na computer industry. Como resulta, nuay yo problema na sen y ta considera el manada gente que enbuenamente el de mio vida. Pero el deverasan, gendeh gayot yo alegre. Sabe yo que tiene cosa falta na de mio vida.

SI PAQUEMODO EL BIBLIA YA PUEDE CAMBIA CON EL DE MIO VIDA: Cuando ya principia yo estudia con el Biblia, ya aprende yo que si Jehova amo un Dios de amor. Ya aprende tambien yo que ya demonstra le ese amor cuando ya dale le kanaton el de suyu Palabra, el Biblia. Dol aquel ya escribi le kanaton un carta para guia con el diaton vida. (Isaias 48:17, 18) Ya realiza yo que si quierre yo beneficia na amable guia de Jehova, necesita yo hace maga grande cambio na de mio vida.

El un cambio que necesita yo hace amo el de mio asosacion. Ya pensa yo enbuenamente con el maga palabra na Proverbio 13:20 que ta habla: “El quien ta sigui junto con el sabio hay queda sabio, pero el quien tan junto con el estupido hay resulta na mal.” Ese principio ya manda move conmigo para deja con el de mio maga amigo y amiga de antes y busca nuevo na maga Testigo de Jehova.

El de con todo grande cosa que yan dificil yo amo descanza puma ciendo bien addict yo con este. Mientras hinay-hinay yo ta enfrenta con ese, ya experiencia yo otro dificultad. Cay ya descanza yo man cigarillo, ya omenta 13.6 kilo el de mio pesades! Ya queda gayot bajo el de mio mirada na de mio mismo cuerpo y ya alcanza conmigo cerca diez año para hace bira con el de mio pesades de antes. Pero, sabe yo que justo si descanza yo puma. Ya continua yo reza con Jehova y ya dale le conmigo el fuerza para puede hace con ese.

SI PAQUEMODO YO YA BENEFICIA: Mas tiene ya yo buen salud ahora. Contento ya tambien yo—gendeh mas yo ta busca alegria na de mio trabajo, estado na vida y riqueza. Sino, ta queda yo alegre mientras ta habla con otro acerca el maga verdad na Biblia. Como resulta, tres na de mio maga uban de antes el ta sirvi ya ahora con Jehova junto conmigo y con el de mio marido. Antes muri el de mio mayores quien ya adapta conmigo, ya puede yo habla kanila acerca con el promesa del Biblia de resureccion na un paraiso tierra.

Cay tiene yo buen relacion con Jehova, nuay mas yo sinti que ya abandona conmigo. Ya manda le conmigo sinti que parte yo del un familia na entero mundo. Ya tene yo manada nana, tata, hermano y hermana.—Marcos 10:29, 30.

[Letrato]

Ya sinti yo Cristiano amor na maga Testigo de Jehova

[Letrato]

El templo de Shinto donde yo ta adora de antes