• AÑO QUE YA NACE: 1941

• NACION ONDE YA NACE: BENIN

• BACKGROUND: MANADA MUJER, TAN CONTRA CON EL MAGA TESTIGO DE JEHOVA

DE MIO VIDA DE ANTES:

De Cotonou iyo, un grande ciudad na Benin. Ya hace conmigo engranda como un Catolico pero gendeh yo regular ta anda na iglesia. Manada maga Catolico el manada mujer y legal el poligamia na aquel tiempo. Na uliji, ya tiene yo cuatro mujer.

Cuando ya sucede el revolucion del maga 1970, ya pensa yo que hay beneficia el de mio nacion con este. Ya suporta yo con el revolucion y ya queda envuelto na politica. No quierre el maga revolucionario con el maga Testigo de Jehova cay neutral el maga Testigo na politica. Uno yo del maga quien ya persigui con el maga Testigo. Del 1976, cuando ya manda sale con el maga misionario Testigo na diamon nacion, ya pensa yo que gendeh ya sila bira.

SI PAQUEMODO EL BIBLIA YA PUEDE CAMBIA CON EL DE MIO VIDA:

Ya acaba el revolucion del 1990. Ya espanta yo cay ya puede ya tambien yo mira maga misionario Testigo. Ya principia yo pensa que posible junto el Dios con este maga gente. Na aquel tiempo, ya cambia el lugar onde yo ta trabaja. Uno del maga nuevo uban de mio na trabajo amo un Testigo. Yan cuanto dayun le conmigo acerca na de suyu creencia. Ya dale le conmigo mira maga texto na Biblia donde ta menciona que si Jehova amo un Dios de amor y justicia. (Deuteronomio 32:4; 1 San Juan 4:8) Ya gusta yo con aquel maga calidad. Quierre yo aprende pa mas acerca con Jehova poreso ya acepta yo cuando ya ofrece le conmigo man Bible study.

Nuay tarda, ya principia yo atende na maga miting del maga Testigo de Jehova. Ya gusta yo con el amor que ya puede yo mira—nuay sila discriminacion na raza o estado na vida. Cuando mas tan junto yo con el maga Testigo, mas ya queda claro conmigo que maga verdadero siguidores sila de Jesus.—Juan 13:35.

Ya pensa yo que si quierre yo sirvi con Jehova, necesita yo deja con el Iglesia Catolico. Gendeh quel facil hace cay tiene yo miedo si cosa pensa el otro. Despues del largo tiempo y na ayuda de Jehova, ya tiene yo el coraje que deja con aquel religion.

Pero tiene pa un grande cambio que necesita yo hace. Ya aprende yo na Biblia que no quierre el Dios con el poligamia. (Genesis 2:18-24; Mateo 19:4-6) Na vista del Dios, el de mio primer matrimonio lang el valido. Poreso, ya registra yo con el diamon matrimonio y ya separta con el de mio maga otro mujer pero ta continua yo dale el diila material necesidad. Na uliji, ya queda maga Testigo de Jehova el de mio dos mujer de antes.

SI PAQUEMODO YO YA BENEFICIA:

Maskin pa ya esta Catolico el de mio mujer, ya respeta le con el de mio decision que sirvi con Jehova. Igual kame ya sinti que ya queda yo un mas buen marido.

Del otro, ta pensa yo que puede progresa el de mio comunidad por medio na politica pero nuay se sucede. Ahora, sabe ya yo que el Reino del Dios lang el puede dale solucion con el problema del maga gente. (Mateo 6:9, 10) Ta rindi yo gracias con Jehova cay ya dale le mira conmigo si paquemodo tene un deverasan alegre vida.

• AÑO QUE YA NACE: 1977

• NACION ONDE YA NACE: BRAZIL

• BACKGROUND: PASTOR NA PENTECOSTAL CHURCH

DE MIO VIDA DE ANTES:

Ya engranda yo na ciudad de Itu, na São Paulo State. Bien manada crimen ta sucede na este lugar.

Bien violente yo y imoral. Mas pa, ta vende yo droga. Ya llega el tiempo, ya realiza yo que este clase de vida hay lleva conmigo na preso o na cementerio, poreso ya descanza yo con este hace. Despues, ya entra yo na Pentecostal Church y ya queda un pastor na uliji.

Ya sinti yo que puede gayot yo ayuda con el maga gente por medio na de mio trabajo na iglesia. Ya tiene pa gane yo un programa na radio que ta discuti acerca na religion y como resulta, ya queda yo conocido na diamon lugar. Pero, hinay-hinay yo ya puede realiza que el iglesia gendeh deverasan interesao na bien del maga miembro de este—gane, mas malo ya con Dios. Ya sinti yo que quierre lang el iglesia que colecta sen. Poreso, ya decidi yo que sale na ese religion.

SI PAQUEMODO EL BIBLIA YA PUEDE CAMBIA CON EL DE MIO VIDA:

Cuando ya principia yo estudia con el Biblia junto con el maga Testigo de Jehova, ya puede dayun yo mira que diferente sila na otro religion. Bilib gayot yo kanila por causa na dos cosas. Una, gendeh lang basta tan cuento el maga Testigo de Jehova acerca na amor con Dios y na projimo, sino ta dale sila mira con ese. Ika-dos, gendeh sila ta queda envuelto na politica o guerra. (Isaias 2:4) Este dos cosas ya convinci conmigo que ya incuntra ya yo con el verdadero religion—el diutay camino que ta guia na vida hasta para cuando.—Mateo 7:13, 14.

Ya realiza yo que si quierre yo hace alegre con Dios, necesita yo hace maga grande cambio. Necesita yo dale mas atencion con el de mio familia. Necesita tambien yo queda mas humilde. Gendeh facil hace el maga necesita cambio pero na ayuda de Jehova, ya puede yo se hace. Yan bilib el de mio mujer cuando ya mira le con este maga cambio. Ya principia le estudia con el Biblia antes conmigo pero ahora, mas paspas le ya progresa na de suyu estudiada. Nuay tarda, ya sinti kame dos que quierre kame queda maga Testigo de Jehova. Ya bautiza kame na igual dia.

SI PAQUEMODO YO YA BENEFICIA:

Alegre kame man maridable cay ya puede kame ayuda con el diamon tres anak para tene un cerca relacion con Jehova. Tiene kame un alegre familia. Ta rindi yo gracias con Jehova cay ya guia le conmigo na verdad que puede incuntra na de suyu Palabra, el Biblia. Ta cambia gayot este con el vida del maga gente! Y un evidencia yo de ese.

• AÑO QUE YA NACE: 1957

• NACION ONDE YA NACE: AUSTRALIA

• BACKGROUND: TIENE MAL EXPERIENCIA

DE MIO VIDA DE ANTES:

Ya engranda yo na Newcastle, New South Wales. Iyo el mayor na siete man hermano y hermana que ya engranda que tiene un violente, tomador tata y un violente nana. Ta abusa conmigo el de mio nana na fisical y na palabra. Manada beses le ya habla conmigo que malo yo y hay castiga conmigo na infierno. El cosa le ya habla ya hace gayot miedo conmigo.

Pirmi conmigo ta gulpia de mio nana poreso tiene vez, gendeh yo ta puede anda na escuela. Na edad de 11, ya saca conmigo el gobierno na de mio mayores y nuay dura, ya queda yo na convento. Cuando ya queda yo 14, ya sale yo na convento. No quierre mas yo bolbe na casa poreso ya queda yo na maga calle na Sydney.

Mientras ta queda yo na maga calle, ya queda yo envuelto na maga droga, alcoholico tomada, pornografia y prostitucion. Un dia, ya tiene gayot yo miedo. Ta esta yo na apartment del dueño del un nightclub. Un noche, ya anda con ele el dos hombre. Ya manda le conmigo anda na cuarto pero ta puede yo oi con el cosa sila tan cuento. El dueño del club ta vende conmigo con este maga hombre. Hay esconde sila conmigo na un cargo ship y lleva conmigo na Japan para trabaja na un bar. Yan panic yo, ya salta yo na balcon y ya corre para pidi ayuda.

Ya puede yo conoce con el un hombre quien ta visita na Sydney y ya explica yo con ele el de mio situacion, y ta esperanza que hay dale le conmigo sen. En vez, ya invita le conmigo na lugar onde le ta esta para puede yo baña y come. Pero, nuay ya yo sale alla. Un año despues, ya casa kame.

SI PAQUEMODO EL BIBLIA YA PUEDE CAMBIA CON EL DE MIO VIDA:

Cuando ya principia yo estudia con el Biblia junto na maga Testigo de Jehova, otro-otro el cosa yo ya sinti. Ya sinti yo rabia cuando ya aprende yo que si Satanas amo el causa del maldad; cay del antes, pirmi conmigo ta enseña que el Dios amo el ta causa kanaton para sufri. Ya sinti yo alivio cuando ya aprende yo que gendeh le ta castiga con el maga gente na infierno, un enseñanza que ya tarda ya conmigo ta hace miedo.

Bilib gayot yo si paquemodo el maga Testigo ta hace decision base na Biblia. Ta actua sila na cosa sila ta creé. Dificil conmigo para ledia pero maskin cosa man yo habla o hace, ta trata conmigo el maga Testigo con amor y respeto.

El uno na maga tan dificil gayot yo amo el de mio sentido que nuay yo valor. Ta odia yo con el de mio mismo cuerpo y ya sinti yo este maskin pa ya dura ya yo bautizao como uno del maga Testigo de Jehova. Sabe yo que ta ama yo con Jehova pero convincido yo que nunca le ama con el un persona igual conmigo.

Pero, ya cambia se maga 15 año despues conmigo ya bautiza. Durante na un talk na Kingdom Hall del maga Testigo de Jehova, ya le el speaker con el Santiago 1:23, 24. Na ese maga versiculo, ya compara con el Palabra del Dios na un espejo donde puede kita mira con el diaton mismo cuerpo na manera si paquemodo si Jehova ta mira kanaton. Ya principia yo pensa si el cosa yo ta mira na de mio mismo cuerpo diferente na cosa conmigo ta mira si Jehova. Del una, nuay yo acepta con ese nuevo idea. Ta sinti siempre yo que gendeh gayot puede ama conmigo si Jehova.

Cuanto dia despues, ya le yo un texto que ya cambia con el de mio vida. Ese versiculo amo el Isaias 1:18, donde ya habla si Jehova: “Vene ustedes ahora y arregla kita el maga cosas entre kanaton, . . . Maskin pa el de ustedes maga culpa bien colorao, este hay queda blanco igual na nieve.” Ya sinti yo que dol ta converza conmigo si Jehova y ta habla: “Atraca qui, Vicky, arregla kita el maga cosas entre kanaton. Conoce yo contigo, sabe yo el de tuyu maga culpa y sabe yo si cosa el na de tuyu corazon—y ta ama yo contigo.”

No puede yo durmi aquel noche. Tan duda siempre yo que puede ama conmigo si Jehova pero ya principia yo pensa acerca con el rescate de Jesus. Dayun lang, ya puede yo realiza que hasta na este maga tiempo, tan paciencia si Jehova conmigo y ta dale mira conmigo el de suyu amor na bien manada manera. Pero, dol ta habla yo con ele: “El de tuyu amor gendeh bastante para ayuda conmigo. El sacrificio del de tuyu Anak gendeh bastante para tapa con el de mio pecado.” Dol aquel yo ta buta con el rescate para con Jehova. Pero ahora, por medio na meditacion del regalo de rescate, ya principia yo sinti que ta ama conmigo si Jehova.

SI PAQUEMODO YO YA BENEFICIA:

Ahora, ta sinti ya yo limpio y alegre na de mio vida. Mas ya queda enbuenamente el diamon matrimonio y alegre yo usa con el de mio experiencia para ayuda con otro. Ta sinti yo que mas ya queda yo cerca con Jehova.

• AÑO QUE YA NACE: 1974

• NACION ONDE YA NACE: RUSSIA

• BACKGROUND: QUIERRE-QUIERRE NA HEAVY-METAL MUSIC

DE MIO VIDA DE ANTES:

Ya nace yo na Votkinsk, el lugar onde ya nace el un conocido composer que si Pyotr Ilich Tchaikovsky. Pobre lang el diamon familia. Manada maga bonito calidad el de mio tata pero tomador le, poreso pirmi nuay paz na diamon casa.

Gendeh yo bright y ya llega el tiempo, ya principia yo sinti que nunca yo queda igual de bueno con otro. Pirmi yo tan solo-solo y nuay confianza con otro. Tan stress gayot yo na escuela. Por ejemplo, si necesita yo dale un report, gendeh yo ta puede explica maskin con el simple cosas que ta puede yo con ese hace na otro tiempo. Cuando ya gradua yo na high school, este el cosa escribido na de mio card: “Limitao el vocabulario y gendeh ta puede habla el cosa le ta pensa.” Aquel maga palabra ya hace gayot sinti duele conmigo y mas ya manda conmigo sinti que nuay yo valor. Ya principia yo pensa acerca na proposito del de mio vida.

Cuando teenager yo, ya principia yo toma maga alcoholico tomada. Na primero, si ta toma yo, bonito el cosa yo ta sinti. Pero si sobra ya el de mio tomada, tan conciencia yo. Dol nuay proposito el de mio vida. Ya principia yo queda mas depress que tiene vez, gendeh yo ta sale na casa por cuanto dia. Ya principia yo pensa man suicide.

Cuando maga 20 año yo, ya incuntra yo un temporario alivio. Ya principia yo oi heavy-metal music. Ta dale este conmigo fuerza y quierre yo man junto con aquellos quien ta oi tambien con este. Ya hace yo largo con el de mio pelo, ya pone aretes y ya muda igual na maga musician que quierre-quierre yo. Hinay-hinay, ya queda yo nuay queber con otro y agresivo y pirmi yo ta pelea con el de mio familia.

Pensaba yo puede conmigo hace alegre si oi yo con el maga heavy-metal music pero otro el cosa ya sucede. Ya cambia el de mio custumbre! Y cuando ya sabe yo maga mal cosas acerca na musician con quien yo ta gusta, ya sinti yo que dol ya traiciona conmigo.

Ya pensa yo otravez man suicide y este tiempo, quierre ya gayot yo hace con este. El un cosa que ya puede lang sangga conmigo amo cay ya pensa yo si cosa el efecto de este na de mio nana. Ta ama gayot le conmigo y manada cosas le ya hace para conmigo. Bien dificil gayot el de mio situacion. No quierre ya yo vivi pero gendeh yo ta puede man suicide.

Para sinti yo alivio, ya principia yo le maga literatura de Russia. Ya le yo un istoria acerca na un hero quien ta sirvi na iglesia. Derepente lang, ya sinti yo el fuerte deseo que hace un cosa para con Dios y para na otro maga gente. Ya reza yo con Dios con todo corazon, un cosa que nuay pa gayot yo hace de antes. Ya pidi yo con Dios que enseña conmigo si paquemodo tiene proposito el de mio vida. Durante ese rezo, ya sinti gayot yo alivio. Tiene pa bonito cosas ya sucede despues con ese. Dos hora lang despues, uno del maga Testigo de Jehova yan tuktuk na de mio puerta y ya ofrece man Bible study. Sabe yo que este el contestacion del de mio rezo. Ese el primer dia del de mio un nuevo y alegre vida.

SI PAQUEMODO EL BIBLIA YA PUEDE CAMBIA CON EL DE MIO VIDA:

Maskin pa bien dificil, ya buta yo con el todo cosas que tiene yo que tiene que hace na heavy-metal music. Pero, ya esta se na de mio pensamiento por largo tiempo. Si ta puede yo pasa na lugar onde ta tuca ese musica, ta acorda dayun yo con el de mio vida de antes. No quierre yo que mezcla el mal cosas na buen cosas que tiene ahora na de mio pensamiento y corazon. Poreso, ta evita yo pasa na ese maga lugar. Y si ta acorda yo con el de mio vida de antes, sincero yo ta reza. Si ta hace yo se, ta sinti yo “el paz del Dios.”—Filipo 4:7, El Nuevo Testamento na Chavacano.

Mientras ta estudia yo con el Biblia, ya aprende yo que el maga Cristiano tiene un obligacion que habla con otro el cosa sila ta creé. (Mateo 28:19, 20) Ya pensa yo que gendeh gayot yo con ese puede hace. Pero, el maga nuevo cosas que ta aprende yo ya dale conmigo deverasan alegria y paz. Sabe yo que necesita tambien aprende el otro con este verdad. Maskin pa tiene yo miedo, ya principia yo man cuento con otro acerca na cosa yo ta aprende. Y nuay gayot yo expecta que ya tene yo mas confianza na de mio mismo cuerpo si ta habla yo con otro acerca na Biblia. Mas ta penetra tambien na de mio corazon este nuevo creencia.

SI PAQUEMODO YO YA BENEFICIA:

Casao ya yo ahora y alegre y tiene yo el privilegio ayuda con el cuanto gente aprende acerca na Biblia, incluido ya el de mio hermana y nana. Ya tiene deverasan proposito el de mio vida cuando ya sirvi yo con Dios y ayuda con otro aprende acerca con ele.