Debe Ba Tu Paga Maga Impuesto?

MAYORIA del maga gente no quierre paga impuesto. Manada el ta sinti que gendeh ta usa na justo manera con el diila maga impuesto. El maga residente na un lugar na Middle East ya explica si porque sila no quierre paga diila maga impuesto: “No quierre kame suporta con el gobierno para cumpra bala que hay mata con el diamon maga anak.”

Manada el ta sinti ansina y gendeh se nuevo. El un lider de politica na India ya explica si porque gendeh con ele ta permiti el de suyu conciencia para paga maga impuesto: “Aquellos quien ta suporta con el un Estado que ta usa maga soldao​—directa man o gendeh directa—​ta participa na de este pecado. El cada joven o de edad hombre ta participa na pecado si ta paga sila maga impuesto na Estado.”

El un American philosopher no quierre tambien paga impuesto para suporta na guerra. Ta pensa le que gendeh justo para na maga politico que forza con el maga gente para suporta con el cosa que contra na diila conciencia. Debe este personal decision base na diaton conciencia.

Por causa de ese, malingasa tambien el maga Cristiano cay claro ta enseña el Biblia que debe sila mentena un limpio conciencia na todo cosas. (2 Timoteo 1:3) Pero, ta habla tambien el Biblia que tiene autoridad el gobierno para colecta maga impuesto. Este ya habla: “Todo el maga gente necesita obedece con el autoridad del gobierno, cay todo el autoridad ta sale con el Dios y Ele amo el quien ya pone con esos todo. Entonces, necesita ustedes obedece, gendeh lang por causa del miedo na castigo, sino por causa tamen del de ustedes conciencia. Este amo tamen el razon por que ustedes necesita paga maga impuesto: cay el maga oficial del gobierno amo maga oficial del Dios para hace ese trabajo. Paga el de ustedes maga debe con todo. Con quien ustedes debe maga impuesto, paga el maga impuesto.”​—Roma 13:1, 5-7, El Nuevo Testamento na Chavacano.

Por causa de ese razon, el maga Cristiano del primer siglo conocido que ta paga maga impuesto, maskin pa el grande parte de ese sen ta guinda na militar. Deverasan tambien se na maga Testigo de Jehova na moderno tiempo. * Porque kita ta paga impuesto para paga con el cosa que gendeh kita ta suporta? Debe ba ignora el un Cristiano con el de suyu conciencia si tiempo ya para paga impuesto?

El Impuesto y el Conciencia

Na tiempo del maga Cristiano del primer siglo, grande parte del impuesto que ta paga sila ta guinda na militar. Ese el razon si porque el politico de India y el American philosopher que ya menciona de enante no quierre paga impuesto.

Nota que ya obedece el maga Cristiano con el mandamiento na Roma capitulo 13 gendeh lang cay quierre sila evita con el castigo sino “por causa tamen del [diila] conciencia.” (Roma 13:5) Poreso maskin pa no quierre el un Cristiano con el manera si paquemodo ta usa con el impuesto, ta paga siempre le con este para puede le tene un limpio conciencia. Para mas entende con este, debe kita sabe si paquemodo ta trabaja el conciencia. Igual este na un voz que ta habla kanaton si justo ba o mali el cosa kita ya hace.

Todo kita tiene ese voz pero gendeh con ese pirmi puede confia. Para puede kita hace alegre con Dios, el diaton conciencia debe uyun na de suyu maga principio na moral. Gane, necesita kita man adjust con el diaton pensamiento o mirada para queda igual del Dios cay el de suyu pensamiento mas alto que con el diaton. (Salmo 19:7) Poreso, debe kita pricura entende si cosa el mirada del Dios na gobierno del gente. Cosa el de suyu mirada?

Nota que ya llama si apostol Pablo con el maga gobierno del gente como “maga oficial del Dios.” (Roma 13:6) Cosa se quierre decir? Na mas simple maga palabra, quierre decir de este que ta mentena sila orden y ta hace maga valuable trabajo para na maga gente. Gane, maskin el de con todo corrupt gobierno ta dale ese maga servicio, igual na imbiada de carta, educacion, proteccion na quema y maga polis. Maskin pa sabe el Dios con el maga mal trabajo que ta hace el maga autoridad tiene vez, ya permiti le kanila existi y quierre le que dale kita mira el diaton respeto kanila y paga maga impuesto.

Ya permiti el Dios que rula el maga gobierno del gente pero temporario lang este. Voluntad de suyu que el de suyu Reino na cielo hay cambia con este todo y quita con el maga mal resulta que ya causa el rulanza del gente na maga gente desde antes. (Daniel 2:44; Mateo 6:10) Pero mientras tanto, quierre el Dios que obedece el maga Cristiano con el maga autoridad y paga con el diila impuesto.

Pero paquemodo si igual con el politico de India, ta sinti tu siempre que gendeh justo paga impuesto que ta suporta con el maga guerra? Igual si paquemodo mas claro kita ta puede mira con el un cosa si subi kita na altura, mas facil tambien kita puede man adjust con el diaton pensamiento para queda igual del Dios si pensa kita si paquemodo le de mas sabio y mas tiene saber que kanaton. Por medio con profeta Isaias, el Dios ya habla: “Igual si paquemodo el cielo mas alto que con el tierra, el de mio maga manera mas alto que con el de ustedes maga manera y el de mio maga pensamiento que con el de ustedes maga pensamiento.”​—Isaias 55:8, 9.

Pirmi Obedece Kanila?

Maskin pa ta enseña el Biblia que necesita kita paga impuesto, gendeh se quierre decir que el maga gobierno del gente puede ya pidi que pirmi obedece kanila el maga gente. Ya enseña si Jesus que limitao lang el autoridad que ya dale el Dios con este maga gobierno. Cuando ya pregunta con Jesus si justo ba na ojos del Dios que paga impuesto na gobierno de Roma que ta rula na aquel tiempo, ele ya contesta: “Devolve ustedes con Caesar el cosa de Caesar, y devolve con Dios el cosa de Dios.”​—Marcos 12:13-17.

Si “Caesar” que ta representa con el maga gobierno ta produci sen y ta ayuda determina el valor de este. Poreso na ojos del Dios, tiene sila el derecho para pidi kanaton que paga impuesto. Pero, ya dale mira si Jesus que el maga gobierno del gente gendeh puede pidi con el “cosa de Dios”​—el diaton vida y adoranza. Si el ley del maga gente tan contra na maga ley del Dios, el maga Cristiano “necesita . . . obedece con el Dios, y gendeh con el maga gente.”​—Maga Actividad 5:29.

Posible, el maga Cristiano ahora no quierre si paquemodo ta usa con el cuanto del diila maga impuesto pero gendeh sila tan contra con el maga gobierno o gendeh ta paga impuesto. Cay si hace sila se, ta dale sila mira que gendeh sila ta confia que hay solva el Dios con el problema del maga gente. En vez, con paciencia sila ta espera con el justo tiempo del Dios para ayuda con el maga gente por medio na rulanza del de suyu Anak, si Jesus, quien ya habla: “El dimio Reino gendeh de este mundo.”​—Juan 18:36.

Maga Beneficio si Sigui con el Enseñanza na Biblia

Puede tu tene manda bendicion si sigui tu con el enseñanza del Biblia acerca na pagada de impuesto. Hay evita tu con el castigo para con aquellos nuay sigui con ese ley y gendeh tambien tu tiene miedo que baka cuji contigo. (Roma 13:3-5) Y mas importante, hay tene tu un limpio conciencia adelante del Dios y puede honra con ele por medio na de tuyu buen conducta. Maskin pa posible mas poco el de tuyu sen si compara con aquellos quien gendeh ta paga o tan maru na diila impuesto, puede tu confia con el promesa del Dios que hay cuida le con el de suyu maga leal siervo. El escritor na Biblia que si David ya habla: “Joven yo de antes y ahora viejo ya, pero nuay pa yo mira maskin quien recto que ya queda abandonao, ni el de suyu maga anak ta busca comida.”​—Salmo 37:25.

Y el ultimo, si entende tu y sigui con el mandamiento del Biblia que paga impuesto, hay dale este contigo paz na pensamiento. Gendeh tu responsable con Dios si paquemodo el gobierno ta usa con el de tuyu maga impuesto, igual si paquemodo gendeh tu responsable na cosa ta hace el dueño del tierra con el renta que ta paga tu. Antes le sabe el verdad na Biblia, el un gente que si Stelvio, quien ta queda na southern Europe, ya pricura quita con el injusticia na de suyu nacion. Para explica si porque le ya descanza na cosa le ta hace, ele ya habla: “Necesita yo admiti que el gente gendeh puede lleva justicia, paz y unidad na mundo. Solamente el Reino del Dios el deverasan puede cambia con este mundo y hace con este mas enbuenamente.”

Igual con Stelvio, si con lealtad tu “devolve con Dios el cosa de Dios,” hay tene tambien tu este bonito esperanza. Hay mira tu el tiempo cuando el Dios hay rula con el entero tierra y quita con el injusticia y mal resulta que ya causa el rulanza del gente.

[Footnote]

[Blurb]

Necesita kita man adjust con el diaton mirada para queda igual del Dios cay el de suyu pensamiento mas alto que con el diaton

[Blurb]

Si ta paga impuesto el maga Cristiano, hay tene sila un limpio conciencia adelante del Dios y puede sila dale mira que ta confia sila con ele que dale el diila maga necesidad

[Maga letrato]

“Devolve ustedes con Caesar el cosa de Caesar, y devolve con Dios el cosa de Dios”

[Credit Line]

Copyright British Museum