Paquemodo el Maga Tata Queda Cerca na Diila Anak Hombre?

“PANG, porque bien manada tu cosa sabe?” Ya pregunta ya ba contigo el de tuyu anak igual ansina? Na ese tiempo, posible ya sinti tu proud como un tata. Pero si mas pa con ese el cosa ya hace el de tuyu anak—ya aplica le con el de tuyu buen consejo y ya beneficia con ese—asigurao hay queda tu mas alegre. *—Proverbio 23:15, 24.

Pero, na maga año que ya pasa, igual ba siempre el mirada del de tuyu anak hombre contigo? O hinay-hinay se ta perde mientras ta engranda le? Paquemodo tu esta cerca na de tuyu anak hombre mientras ta engranda le? Una, discuti kita el cuanto maga dificultad que ta enfrenta el maga tata.

Tres Comon Dificultad

1. FALTA EL TIEMPO: Na manada nacion, el maga tata amo el ta trabaja para na familia. Mas manada, lejos sila ta trabaja na diila familia. Na cuanto maga lugar, bien diutay tiempo lang ta dale el maga tata na diila maga anak. Por ejemplo, na un reciente survey na France, ta dale mira que el maga tata alla bajo lang na 12 minuto na un dia el tiempo que ta dale sila para cuida con el diila maga anak.

PENSA ESTE: Paquemodo de manada tiempo tu ta dale na de tuyu anak hombre? Adentro na uno o dos semana, porque gendeh pruba escribi el hora que ta dale tu con ele cada dia? Posible hay espanta tu con el resulta.

2. GENDEH BUEN EJEMPLO EL DIILA MISMO TATA: El cuanto hombre ta habla que nuay dale tiempo kanila el diila tata cuando ta engranda sila. “Ralo lang kame tan junto del de mio tata,” ya habla si Jean-Marie, quien ta queda na France. Paquemodo se ya afecta con Jean-Marie? “Ya tiene yo maga problema que gendeh yo ta expecta,” ya habla le. “Por ejemplo, tan dificil yo tene buen comunicacion na de mio maga anak.” Na otro maga situacion, conoce gayot el maga hombre con el diila tata pero nuay sila buen relacion. Si Philippe que 43 año ya habla: “El de mio tata tan dificil dale mira amor conmigo. Como resulta, tan dificil tambien yo dale mira amor na de mio anak.”

PENSA ESTE: Ta sinti ba tu que el relacion de tuyu na de tuyu tata ta afecta con el manera si paquemodo tu ta trata con el de tuyu anak? Ya puede ba tu nota que ta sigui tu con el buen o mal ejemplo del de tuyu tata? Na cosa manera?

3. FALTA BALANCE CONSEJO: Na cuanto cultura, ta hace de menos con el papel del tata que hace engranda con el maga anak. “Onde yo ya engranda,” ya habla si Luca, quien ya engranda na Europe, “ta pensa el maga gente que trabajo lang del maga nana que cuida con el maga anak.” Na otro maga cultura, ta expecta con el maga tata que disciplina lang con el diila maga anak. Por ejemplo, si George quien ya engranda na Africa ya habla: “Na diamon cultura, el maga tata gendeh ta juga junto con el diila maga anak cay baka perde el diila autoridad como tata. Poreso, tan dificil yo man junto con el de mio anak.”

PENSA ESTE: Na de ustedes comunidad, cosa el responsibilidad del maga tata? Ta mira ba como trabajo lang del maga nana el cuidada del maga anak? Ta anima ba con el maga tata que expresa el diila amor na diila maga anak o gendeh se aceptable na comunidad?

Si etu un tata quien ta enfrenta uno o mas pa de este maga dificultad, cosa tu hace? Considera con el siguiente sugestion.

Principia Mientras Diutay pa el De Tuyu Anak

El maga anak tiene el natural deseo para imita con el diila maga tata. Poreso mientras diutay pa el de tuyu anak, usa con ese oportunidad. Paquemodo tu puede hace con ese? Y cuando tu con ese puede hace?

Si posible, inclui con el de tuyu anak na de tuyu maga actividad cada dia. Por ejemplo, si ta hace tu maga trabajo na casa, manda ayuda con ele. Dale con el de tuyu anak hombre un diutay escoba o un diutay pala. Asigurao alegre le man junto y imita contigo. Posible, dura acaba el trabajo pero hay queda ustedes cerca y puede tu enseña con ele queda buen trabajador. De antes pa, el Biblia ta anima con el maga tata que inclui con el diila maga anak na diila maga actividad cada dia y usa con ese maga ocasion para comunica y enseña kanila. (Deuteronomio 6:6-9) Ese consejo aplicable siempre na diaton tiempo.

Puera trabaja junto con el de tuyu anak hombre, dale tiempo para juga junto con ele. El juego gendeh lang basta un oportunidad para queda ustedes dos alegre. Na research ta dale mira que si el maga tata ta juga junto con el diila maga anak, ta anima se kanila para queda animoso y aprende cosas nuevo.

Tiene pa otro razon si porque importante que junto juga el tata con el de suyu anak. “Por medio na juego,” ya habla el un researcher que si Michel Fize, “el un bata mas ta puede comunica con el de suyu tata.” Durante el juego, puede expresa el un tata con el de suyu amor na de suyu anak por medio na maga palabra y accion. Por medio de ese, ta enseña le con el de suyu anak si paquemodo tambien dale mira amor. “Cuando diutay pa el de mio anak hombre,” ya habla si André, un tata quien ta queda na Germany, “pirmi kame ta juga junto. Ta abraza yo con ele y ya aprende tambien le dale mira amor conmigo.”

El otro ocasion que puede hace fuerte el tata con el relacion na de suyu anak amo durante el tiempo antes sila durmi. Regular cunta con ele istoria y oi con ele mientras ta habla le si cosa el bueno o mal cosas que ya sucede con ele durante el dia. Si hace tu se, mas facil ya para con ele que continua man cuento contigo mientras ta engranda le.

Continua Hace Maga Cosas Junto con el De Tuyu Anak

El cuanto maga teenager anak hombre dol gendeh interesao si el diila tata ta pricura man cuento kanila. Si el de tuyu anak dol ta evita con el de tuyu maga pregunta, no pensa que no quierre gayot le contigo man cuento. Posible man cuento le contigo si cambia tu con el manera si paquemodo tu tan cuento con ele.

Si Jacques, un tata quien ta queda na France, tiene vez tan dificil man cuento con el de suyu anak que si Jérôme. Pero, en vez forza con el de suyu anak que man cuento, ya cambia le con el de suyu manera—ya juga le soccer junto con ele. “Despues kame juga,” ya habla si Jacques, “ta sinta kame na zacate y ta descanza unrato. Mas manada, na ese tiempo el de mio anak ta habla si cosa el na de suyu corazon. Cay kame lang dos junto, ya puede quel ayuda para queda kame mas cerca na uno y otro.”

Pero, paquemodo si no quierre na sports el de tuyu anak? Alegre ta acorda si André con el tiempo que ya usa le junto con el de suyu anak para mira con el maga estrellas. “Ta sinta kame apuera denoche,” ya habla si André. “Tan lucut kame na manta y ta agarra un baso de cha mientras ta mira na cielo. Ta discuti kame acerca con el Quien ya crea con el maga estrellas. Tan cuento tambien kame acerca na maga personal cosas. Tan cuento kame maskin cosa.”—Isaias 40:25, 26.

Paquemodo si gendeh tu ta gusta con el cuanto maga cosas que interesao el de tuyu anak? Na ese situacion, posible necesita tu hace con el cosas que no quierre tu hace. (Filipo 2:4) “Mas interesao yo na sports que con el de mio anak, si Vaughan,” ya habla si Ian, quien ta queda na South Africa. “Quierre-quierre le maga eroplano y man computer. Poreso, ya hace yo esfuerzo para queda interesao na ese maga cosas. Ta lleva yo con ele na maga air show y ta huga eroplano na computer. Ta sinti yo, cay alegre kame junto ta hace con el maga actividad, mas comfortable ya si Vaughan man cuento conmigo.”

Ayuda con Ele Tene Confianza na Cuerpo

“Pang, mira tu!” Ya grita ba igual ansina el de tuyu anak cuando ya puede le hace con el un nuevo cosa? Ahora que teenager ya le, posible gendeh mas le ta hace con ese. Pero, necesita le sabe que tiene le el de tuyu favor mientras ta queda le adulto.

Nota con el ejemplo de tratamiento de Dios Jehova na uno del de suyu maga anak. Cuando para principia ya si Jesus con el de suyu trabajo aqui na tierra, el Dios ya dale mira con el de suyu amor cuando ya habla le: “Este amo el dimio anak con quien ta ama gayot yo. Bien alegre yo con Ele.” (Mateo 3:17; 5:48, El Nuevo Testamento na Chavacano) Deverasan, tiene tu un obligacion que disciplina y enseña con el de tuyu anak. (Efeso 6:4) Pero, debe tambien tu busca manera para comenda con el de tuyu anak na buen cosas que ya habla le y ya hace.

El cuanto maga hombre tan dificil comenda y dale mira amor. Posible, ya engranda sila na un familia que el diila mayores ta vicia lang con el diila maga kamali en vez con el cosa sila ta puede hace. Si deverasan se para contigo, necesita tu hace grande esfuerzo para hace fuerte con el confianza del de tuyu anak. Paquemodo tu se puede hace? Si Luca, que ya menciona enante, regular ta trabaja junto con el de suyu 15 año anak que si Manuel mientras ta hace con el maga trabajo na casa. “Tiene vez,” ya habla si Luca, “ta habla yo con Manuel que puede le hace solo con el un trabajo y hay ayuda yo con ele si necesita le conmigo. Mas mucho, ta puede le hace solo con el trabajo. Si ta puede le se hace, ta dale se con ele alegria y ta omenta el de suyu confianza. Ta comenda tambien yo con ele. Si gendeh le ta puede hace con el cosa le ta expecta, ta manda yo siempre con ele sabe que ta aprecia yo con el de suyu esfuerzo.”

Puede tambien tu hace fuerte con el confianza del de tuyu anak si ayuda tu con ele alcanza maga grande goal na vida. Paquemodo si el de tuyu anak gendeh dayun ta alcanza con el de suyu maga goal? O paquemodo si el de suyu maga goal, maskin pa gendeh malo, diferente na goal que quierre tu para con ele? Si ansina, posible necesita tu cambia con el cosa tu ta expecta para con ele. Si Jacques que ya menciona de enante, ya habla: “Ta pricura yo ayuda con el de mio anak para hace maga realistico goal. Pero, ta pricura tambien yo asigura que de suyu se goal y gendeh de mio. Despues, ta hace yo acorda con el de mio mismo cuerpo que necesita le alcanza con ese goal depende na de suyu abilidad.” Si oi tu con el maga opinion del de tuyu anak, comenda con el cosa le bueno ya puede hace y anima con ele maskin pa nuay le puede alcanza con el cosa le ta expecta, puede tu ayuda con ele para alcanza con el de suyu maga goal.

Deverasan, hay enfrenta tu maga dificultad na de tuyu relacion kanila. Pero maskin pa ansina, posible hay esta cerca contigo el de tuyu anak. Siempre, quien ba no quierre esta cerca con el un persona quien ya ayuda contigo para tene buen exito?

[Footnote]