El Biblia Puede Cambia con el Vida

PAQUEMODO el un joven mujer quien tiene mal experiencia cuando bata ya tiene un deverasan proposito na vida? Cosa ya manda move con el un violente rebelde na autoridad para cambia y queda un predicador del buen noticia? Le con el diila maga istoria para sabe el contestacion.

“Ta Desea Yo que Ama Conmigo.”​—INNA LEZHNINA

AÑO QUE YA NACE: 1981

NACION ONDE YA NACE: RUSSIA

BACKGROUND: VICTIMA DE MALTRATAMIENTO CUANDO BATA

DE MIO VIDA DE ANTES: Ya nace yo apa y el de mio mayores apa tambien. Enbuenamente el de mio vida del primer seis año. Despues, ya man divurcio el de mio mayores. Maskin bata pa yo, sabe yo si cosa quierre decir del divurcio y duele conmigo el cosa ya sucede. El de mio tata y mayor hermano ya esta na Troitsk, mientras ya lleva conmigo el de mio nana na Chelyabinsk. Nuay dura, ya casa oleh de mio nana. Burrachon el de mio padrasto y pirmi le ta hace sinti duele con el de mio nana y conmigo.

Del 1993, yan lumus el de mio hermano. Ese suceso ya tiene gayot grande efecto na diamon familia. Ya queda tambien burrachon el de mio nana y igual con el de mio padrasto, ya principia tambien le maltrata conmigo. Ya pricura yo tene mas enbuenamente vida. Ta desea yo que ama conmigo. Ya pruba yo entra na diferente maga religion para tene comforta pero nuay yo se puede experiencia.

SI PAQUEMODO EL BIBLIA YA PUEDE CAMBIA CON EL DE MIO VIDA: Cuando 13 año yo, el de mio classmate que un Testigo de Jehova, ya cunta conmigo cuanto istoria estaba na Biblia. Ya gusta yo el cosa yo ta aprende acerca na maga caracter na Biblia igual con Noe y Job, quien ya sirvi con Dios maskin tiene maga dificultad. Nuay dura, yan Bible study yo junto con el maga Witness y ya atende na diila maga miting.

El de mio estudiada ya ayuda conmigo para puede yo entende con el manada verdad na Biblia. Alegre yo cuando ya puede yo sabe que tiene nombre el Dios. (Salmo 83:18) Bilib gayot yo si paquemodo de exacto el Biblia ya predicta con el maga condicion na “ultimo maga dia.” (2 Timoteo 3:1-5) Y excited yo cuando ya aprende yo acerca el esperanza de resureccion. Queber, puede yo mira otravez con el de mio hermano!​—Juan 5:28, 29.

Pero, gendeh todo alegre na cosa que ta dale conmigo alegria. El de mio nana y padrasto no quierre con el maga Testigo de Jehova. Ya pricura sila conmigo manda descanza man Bible study. Pero, quierre-quierre yo el cosa yo ta aprende y determinao yo que gendeh descanza.

Gendeh facil enfrenta con el oposicion estaba na de mio familia. Acabar, tiene ya tambien otro tragedia ya sucede. Yan lumus tambien el de mio menor hermano quien ta sigui conmigo atende na maga miting del maga Testigo de Jehova. Pero, nuay gayot conmigo deja el maga Witness. Ya puede yo experiencia kanila el amor que ya dura ya yo ta desea. Asigurao yo que este el verdadero religion. Del 1996, ya bautiza yo como uno del maga Testigo de Jehova.

SI PAQUEMODO YO YA BENEFICIA: Del ya pasa seis año, ya casa yo con el un amable hombre, si Dmitry. Junto kame ta sirvi na branch office del maga Testigo de Jehova na St. Petersburg. Ya pasa el cuanto tiempo, ya cambia el mirada del de mio mayores na de mio creencia.

Ta rindi gayot yo gracias que ya conoce yo con Jehova! Ya tiene deverasan proposito el de mio vida cay ya sirvi yo con ele.

“Manada Pregunta na De Mio Pensamiento.”​—RAUDEL RODRÍGUEZ RODRÍGUEZ

AÑO QUE YA NACE: 1959

NACION ONDE YA NACE: CUBA

BACKGROUND: UN REBELDE NA AUTORIDAD

DE MIO VIDA DE ANTES: Ya nace yo na Havana, Cuba, y ya engranda yo na un pobre comunidad que donde pirmi tiene ta sucede gulu. Nuay dura, ya tiene yo interes na judo y na otro combat sports.

Bueno yo na clase y el de mio mayores ya manda conmigo entra escuela na un universidad. Mientras talla yo, ya sinti yo que necesita cambio el sistema del politica na diamon nacion. Poreso, ya principia yo man rebelde na autoridad. Yan talabangan kame de mio classmate con el un polis y ya pricura saca con el de suyu pusil. Por causa con aquel, grabe ya iri na cabeza el polis. Yan preso kame por causa na cosa kame ya hace y ya sentencia kanamon muerte por medio na firing squad. Veinte año pa lang yo quel pero para muri ya yo!

Mientras na preso yo, yan practice yo si cosa yo hace adelante del firing squad. No quierre yo dale mira que tiene yo miedo. Pero na ese mismo tiempo, manada pregunta na de mio pensamiento. Ya pensa yo: ‘Porque bien manada injusticia na mundo? Ansina lang ba gayot el vida?’

SI PAQUEMODO EL BIBLIA YA PUEDE CAMBIA CON EL DE MIO VIDA: En vez de muerte, ya sentencia ya lang kanamon 30 año man preso. Na ese tiempo, ya conoce yo con el cuanto maga Testigo de Jehova quien yan preso por causa na cosa sila ta creé. Bilib gayot yo con el maga Witness cay animoso sila pero ta pricura mentena el paz con otro. Maskin pa gendeh era debe kanila hace preso, nuay sila rabia o siembra agrabio.

Ya enseña conmigo el maga Witness que tiene proposito el Dios para na maga gente. Ya dale sila mira conmigo na Biblia que hay hace le paraiso con el tierra que donde nuay mas crimen y injusticia. Ya aprende yo que el maga buen gente amo el quien queda na tierra y hay tene sila el oportunidad vivi hasta para cuando con perfecto vida.​—Salmo 37:29.

Quierre-quierre yo el cosa yo ta aprende na maga Witness pero bien diferente el de mio personalidad contra kanila. Ya pensa yo que imposible para conmigo queda neutral na politica o tene paz con otro. Poreso, ya decidi yo que iyo mismo le con el Biblia. Cuando ya acaba yo hace con este, ya realiza yo que el maga Testigo de Jehova lang el quien ta actua igual con el maga Cristiano de antes.

Na de mio estudiada del Biblia, ya mira yo que necesita yo hace maga grande cambio na de mio vida. Por ejemplo, necesita yo hace maga cambio na de mio converzada cay anad yo habla maga mal palabra. Necesita tambien yo descanza puma. Y necesita tambien yo queda neutral na politica. Gendeh facil hace con ese maga cambio pero na ayuda de Jehova, hinay-hinay ya puede yo con ese hace.

Uno na maga de con todo dificil cambio que necesita yo hace amo aprende controla con el de mio rabia. Pirmi siempre yo ta pidi na de mio rezo que puede yo se hace. Ya puede gayot ayuda conmigo el maga texto na Biblia igual con el Proverbio 16:32 que donde ta habla: “El quien gendeh pronto rabia mas bueno pa contra con el un gente poderoso. Y el quien ta controla con el de suyu rabia mas bueno que con el quien ya ganá contra con el un ciudad.”

Del 1991, ya bautiza yo como uno del maga Testigo de Jehova. Ya hace con el bautismo na un barril de agua na preso. Pagka-sunod año, ya larga con el cuanto kanamon y ya imbia para na Spain cay tiene kame maga pariente alla. Cuando ya llega alla, ya atende dayun yo na maga miting del maga Testigo de Jehova. Yan welcome sila conmigo que dol ya dura ya yo kanila tan junto y ya ayuda sila conmigo para tene un nuevo vida.

SI PAQUEMODO YO YA BENEFICIA: Alegre yo ahora ta sirvi con Dios junto con el de mio mujer y con el diamon dos anak mujer. Un privilegio para conmigo que ta puede yo dale mas grande tiempo para ayuda con otro aprende con el Biblia. Tiene vez, ta puede siempre yo pensa con el tiempo cuando cerca yo muri y ta aprecia yo con el cosas que ya puede yo experiencia desde aquel tiempo. Puera que vivo yo ahora, tiene yo esperanza​—vivi na un Paraiso que donde hay tene justicia y “nunca mas ay tene muerte.”​—Revelacion 21:3, 4.

[Blurb]

“Alegre yo cuando ya puede yo sabe que tiene nombre el Dios”

[Letrato]

Alegre kame man maridable predica na maga apa