El Todo “Cristiano” Ba Cristiano?

PAQUEMODO de manada el maga Cristiano? Asegun na Atlas of Global Christianity, del 2010 tiene cerca 2.3 billon Cristiano na entero mundo. Pero ya habla tambien ese mismo publicacion que ese maga Cristiano parte del mas de 41,000 secta que tiene el diila mismo maga doctrina y ley. Ciendo manada religion el ta clama “Cristiano,” puede kita entende si porque el cuanto tan libug y gane ya perde el gana. Posible ta pensa sila, ‘Todo ba aquellos quien ta clama Cristiano deverasan Cristiano?’

Pruba kita mira con ese na diferente anggulo. Si ta anda na otro nacion el un persona, necesita le habla con el oficial si de onde nacion le estaba. Necesita tambien le dale prueba que deverasan se por medio que dale mira documento que posible un passport. Na igual manera, el un verdadero Cristiano gendeh lang debe habla que ta creé le con el Cristo. Necesita le dale mira omento prueba. Cosa se?

El termino “Cristiano” ya principia usa cuanto tiempo despues del 44 C.E. El historian de Biblia que si Lucas ya habla: “Alla na Antioquia ya principia llama Cristiano con el maga dicipulo.” (Maga Actividad 11:26) Nota que aquellos con quien ya llama maga Cristiano amo maga dicipulo del Cristo. Paquemodo el un persona queda dicipulo de Jesucristo? El The New International Dictionary of New Testament Theology ya explica: “Para sigui con Jesus como un dicipulo quierre decir que necesita hace sacrificio el un persona na todo aspeto del de suyu vida . . . na de suyu entero vida.” Entonces, el un verdadero Cristiano amo aquellos quien completamente ta sigui con el maga enseñanza y instruccion de Jesus, el quien ya establicia con el Cristianidad.

Posible ba puede incuntra ese clase de maga gente entre con aquellos quien ta clama Cristiano ahora? Cosa ya habla si Jesus que marca del de suyu maga deverasan siguidores? Ta invita kame con ustedes que considera si paquemodo el Biblia ta contesta con ese maga pregunta. Na siguiente maga articulo, hay examina kita cinco cosas que ya habla si Jesus que ta ayuda kanaton identifica con el de suyu maga deverasan siguidores. Hay considera kita si paquemodo el maga Cristiano del primer siglo ya puede sigui con ese. Hay mira kita si quien de aquellos quien ta clama maga Cristiano ahora el ta sigui con ese ejemplo.