“Esta Ustedes Fiel na Dimio Palabra”

“Si ay esta ustedes fiel na dimio Palabra, ay queda ustedes mi maga dicipulo, y ay sabe ustedes si cosa el verdad, y el verdad ay hace con ustedes libre.”—JUAN 8:31, 32.

Si Cosa Este Quierre Decir: El “Palabra” de Jesus amo el de suyu enseñanza que estaba con Dios. Si Jesus ya habla: “El Tata, quien ya imvia conmigo, amo el ya manda conmigo habla y comversa.” (Juan 12:49) Na de suyu rezo para na de suyu Tata na cielo, si Dios Jehova, si Jesus ya habla: “El de Uste Palabra amo el verdad.” Pirmi le ta menciona con el Palabra del Dios para suporta con el de suyu maga enseñanza. (Juan 17:17; Mateo 4:4, 7, 10) Poreso, el maga deverasan Cristiano ‘ta esta fiel na de suyu Palabra’—quierre decir ta acepta sila con el Palabra del Dios, el Biblia, como el “verdad” y alli solamente tan base el diila maga creencia y practica.

Si Paquemodo el Maga Cristiano del Primer Siglo Ya Sigui con Ese: Igual con Jesus, si apostol Pablo tiene hondo respeto na Palabra del Dios. Ele ya escribi: “Todo el maga Escritura inspirao de Dios y puede gayot usa con provecho.” (2 Timoteo 3:16) El maga hombre con quien ya iscuji para enseña con el maga Cristiano ‘necesita sigui firmi el deverasan doctrina que sila ya ricibi.’ (Tito 1:7, 9) Ya anima con el maga Cristiano del primer siglo que evita con el “saber de filosofia y maga insiñanza falso que ta sale na saber del maga gente y na maga espiritu que ta goberna con el saber del maga gente pero gendeh asegun con Cristo.”—Colosa 2:8.

Quien Ta Sigui con Ese Ahora?: Asegun na Dogmatic Constitution on Divine Revelation de Vatican que ya hace del 1965 y ya menciona na Catechism of the Catholic Church: “Gendeh lang estaba na Sagrao Escritura el enseñanza del Iglesia [Catolico]. Poreso, necesita acepta y trata con igual lealtad y respeto con el sagrao tradicion y Sagrao Escritura.” El un articulo de Maclean magasin ya menciona acerca na un ministro na Toronto, Canada, quien ya pregunta: “Porque man kita necesita el guia del un persona quien ya vivi dos mil año ya el ya pasa? Tiene kita maga bonito idea que ta queda lang nuay valor cay pirmi con este ta compara na enseñanza de Jesus y del Escritura.”

Acerca na maga Testigo de Jehova, el New Catholic Encyclopedia ya habla: “Tan base lang sila con el diila creencia na Biblia y ta aplica sila con ese na diila vida.” Na un ocasion, el un gente na Canada yan sabat con el uno del maga Testigo de Jehova mientras ta manda le conoce con el de suyu mismo cuerpo. “Sabe yo quien ustedes,” ya habla el hombre mientras ta insiña con el Biblia del un Testigo, “cay ta carga ustedes Biblia.”