“Este Buen Noticia Acerca del Reino ay Anuncia”

“Este Buen Noticia acerca del Reino ay anuncia na entero mundo, para man testigo con todo el maga nacion. Entonces ay llega ya el fin.”—MATEO 24:14.

Si Cosa Este Quierre Decir: El escritor del Evangelio que si Lucas ya reporta que si Jesus “ya anda na maga pueblo y maga barrio ta predica y ta anuncia el Buen Noticia del Reino de Dios.” (Lucas 8:1) Si Jesus mismo ya habla: “Necesita Yo anuncia tamen na otro maga pueblo el buen Noticia del Reino de Dios, cay para ese ya imvia Comigo.” (Lucas 4:43) Ya imbia le con el de suyu maga dicipulo para predica con el buen noticia na otro maga lugar y barrio y na uliji ya manda kanila: “Ay queda ustedes dimio maga testigo . . . hasta na fin del Mundo.”—Maga Actividad 1:8; Lucas 10:1.

Si Paquemodo el Maga Cristiano del Primer Siglo Ya Sigui con Ese: El maga dicipulo de Jesus ya hace dayun con el cosa le ya manda kanila. “Gendeh sila ta descansa insiña y anuncia todo el dia na Templo y na maga casa el Buen Noticia de Cristo Jesus.” (Maga Actividad 5:42) Todo el ta predica, gendeh lang el un especial grupo. El un historian que si Neander ya observa que “si Celsus, el primer escritor que contra na Cristianidad, ya gangguia cay el maga ta hace lana [wool], sapatero, maga gente quien ta hace cuero y el maga de con todo ordinario gente amo el ta predica con el evangelio.” Na de suyu libro The Early Centuries of the Church, si Jean Bernardi ya escribi: “[El maga Cristiano] ta anda y tan cuento maskin onde y maskin con quien. Na maga highway y na maga ciudad, na maga plaza y na maga casa. Ta ricibi man kanila o gendeh el maga gente. . . . Hasta na entero parte del mundo.”

Quien Ta Sigui con Ese Ahora? “Cay gendeh serioso ta predica y ta enseña el iglesia amo el un razon si porque el mayoria del maga gente gendeh interesao que sirvi con Dios ahora,” ya escribi el un Anglican padre que si David Watson. Na de suyu libro Why Are the Catholics Leaving? si José Luis Pérez Guadalupe ya escribi acerca na maga actividad del maga Evangelical, Adventist y el otro y ya observa que “gendeh sila ta anda na casa en casa.” Acerca na maga Testigo de Jehova, ele ya escribi: “Ta anda sila casa en casa.”

Puede le el observacion de Jonathan Turley na Cato Supreme Court Review, 2001-2002: “Si menciona con el maga Testigo de Jehova, el mayoria del maga gente hay pensa con el maga predicador quien ta visita na diaton maga casa na maga hora que gendeh conveniente. Para na maga Testigo de Jehova, el predicacion na casa en casa gendeh lang para habla con otro acerca na diila creencia sino este mismo importante na diila fe.”

[Cajon]

Quien Tiene el Marca Ahora?

Base na cosa ya discuti na este maga articulo, para contigo quien ahora el tiene el marca del verdadero Cristiano? Maskin pa tiene miles de maga grupo y secta quien ta clama maga Cristiano, acorda con el cosa ya habla si Jesus na de suyu maga siguidores: “Gendeh todo el quien ta llama conmigo: Señor, Señor, ay entra na Reino del Cielo, sino aquellos lang quien ta hace el voluntad del dimio Tata na cielo.” (Mateo 7:21) Si sabe tu si quien ta hace el voluntad del Tata—el quien tiene el marca del verdadero Cristiano—y si asocia tu kanila, hay ricibi tu bendicion hasta para cuando bajo na Reino del Dios. Ta invita kame contigo que pregunta con el maga Testigo de Jehova, el quien contigo ya lleva este magasin, para na mas informacion acerca na Reino del Dios y na maga bendicion que hay lleva este.—Lucas 4:43.