“Tiene Ustedes Amor con Uno y Otro”

“Ta dale yo con ustedes un mandamiento nuevo: Ama ustedes con uno y otro. Igual como ta ama yo con ustedes, ansina tamen ustedes ama con uno y otro. Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.”—JUAN 13:34, 35.

Si Cosa Este Quierre Decir: Ya habla el Cristo con el de suyu maga siguidores que ama con uno y otro igual si paquemodo le ya ama kanila. Paquemodo si Jesus ya ama kanila? Ta ama le con el todo maga gente maskin pa el mayoria na de suyu tiempo otro el tratamiento con aquellos otro el raza y na maga mujer. (Juan 4:7-10) Amor el ya manda move con Jesus para sacrificia de suyu tiempo y fuerza para ayuda con otro. (Marcos 6:30-34) Na uliji, ya dale mira el Cristo el de con todo grande amor. “Yo amo el buen pastor,” ya habla le. “El buen pastor ta dale su vida por causa del disuyo maga carnero.”—Juan 10:11.

Si Paquemodo el Maga Cristiano del Primer Siglo Ya Sigui con Ese: Del primer siglo, ta llama el maga Cristiano con uno y otro como “hermano” o “hermana.” (Filemon 1, 2) El maga Cristiano ta ricibi na congregacion con el maga gente de todo nacion cay ta creé sila que “noay mas diferencia entre maga Judio y maga Griego, cay uno lang el Señor diila todo.” (Roma 10:11, 12) Despues del Pentecostes 33 C.E., el maga dicipulo na Jerusalem ‘ya vende con el diila maga bienes y maga propiedad y ya distribui el sen entre kanila todo asegun el necesidad de cada uno diila.’ Para cosa? Para aquellos maga nuevo bautizao puede esta na Jerusalem y continua “man junto para oi el maga insiñanza del maga Apostol.” (Maga Actividad 2:41-45) Cosa ya motiva kanila para hace se? Nuay pa 200 año despues muri el maga apostoles, ya coteja si Tertullian con el cosa ya habla el otro acerca na maga Cristiano: “Ta ama gayot sila con uno y otro . . . y gane preparao sila muri para con uno y otro.”

Quien Ta Sigui con Ese Ahora? El libro The History of the Decline and Fall of the Roman Empire (1837) ya observa que del ya pasa maga siglo aquellos quien ta clama maga Cristiano “ya causa mas grabe maltratamiento con uno y otro que con el cosa sila ya experiencia con aquellos [gendeh maga Cristiano].” Ya puede sabe na un reciente estudiada na U.S. que manada religioso gente—mayoria que ta clama como maga Cristiano—el tiene discriminacion con aquellos otro el raza. Mayoria del maga ta anda na iglesia na un lugar nuay queber con aquellos maga gente que igual el religion na otro lugar y como resulta, gendeh sila ta puede ayuda o ta sinti que necesita sila ayuda con uno y otro si tiene necesidad.

Del 2004, despues tupa con el Florida cuatro tifun adentro de dos mes, ya chequia el chairman del Emergency Operations Committee del Florida para asigura si ta usa enbuenamente con el diila supply. Ya habla le que nuay otro grupo el igual de organizao con el maga Testigo de Jehova y ya habla le que dale le maskin cosa supply que necesita el maga Testigo. Del 1997, un grupo de maga Testigo de Jehova quien ta lleva medicina, comida y maga ropa el ya viaja para na Democratic Republic of Congo para ayuda con el diila maga hermano y hermana, y con el otro quien necesita ayuda. El maga Testigo na Europe ya dona maga supply que tiene valor un millon dollar (U.S.).