“Ya Manda Yo Canila Conoce el De Uste Nombre”

“Ya manda yo conoce el de Uste Nombre con aquellos que ya saca Uste na mundo y ya dale conmigo. . . . Ya manda yo canila conoce el de Uste Nombre y ay manda pa yo canila conoce.”—JUAN 17:6, 26.

Si Cosa Este Quierre Decir: Ya manda conoce si Jesus con el nombre del Dios cuando ya usa le con este na de suyu ministerio. Si ta le si Jesus con el Escritura, como cosa le pirmi ta hace, asigurao ta usa le con el personal nombre del Dios. (Lucas 4:16-21) Ya enseña le con el de suyu maga siguidores que reza: “Tata, santo [“santifica,” NWT] el de Uste Nombre.”—Lucas 11:2.

Si Paquemodo el Maga Cristiano del Primer Siglo Ya Sigui con Ese: Si apostol Pedro ya habla con el maga de edad hombre na Jerusalem que el Dios ya saca na maga nacion “un nacion para na de suyu nombre.” (Maga Actividad 15:14, NWT) El maga apostoles y el otro ya predica que “todo quien ta suplica con el Nombre del Señor [“Jehova,” NWT] ay salva.” (Maga Actividad 2:21; Roma 10:13) Ya usa tambien sila con el nombre del Dios na diila maga escribida. El The Tosefta, un coleccion del maga ley del maga Judio que ya completa del maga 300 C.E., ya habla acerca na maga escribida del maga Cristiano que ya quema el maga quien tan contra kanila: “Gendeh sila ta salva na fuego con el libro del maga Evangelio y con el libro del minim [que ya creé que ta refiri na maga Judio Cristiano] pero ya permiti sila que quema este maskin pa talli el nombre del Dios.”

Quien Ta Sigui con Ese Ahora? El Revised Standard Version del Biblia que ya aproba el National Council of the Churches of Christ na United States ta habla na de este preface: “Gendeh justo para na maga Cristiano Iglesia que usa con el nombre del solamente Dios ciendo gendeh con ele necesita compara na otro maga dios. El Judaismo ya descanza usa con el nombre del Dios por largo tiempo ya antes nace si Jesus.” Poreso, ya cambia sila con el nombre del Dios na un titulo, “SEÑOR.” Na mas reciente, el Vatican ya manda con el maga obispo: “Gendeh debe usa o menciona na maga cancion y rezo con el nombre del Dios que na forma del tetragrammaton YHWH.” *

Quien ahora ta usa y ta manda conoce con el personal nombre del Dios? Cuando teenager si Sergey na Kyrgyzstan, ya mira le un salida que ta habla que Jehova el nombre del Dios. Por diez año, nuay mas le oi otravez con ese nombre. Na uliji, cuando ya cambia si Sergey na United States, dos del maga Testigo de Jehova el ya visita na de suyu casa y ya dale mira con ele el nombre del Dios na Biblia. Alegre si Sergey cuando ya sabe le que tiene un grupo quien ta usa con el nombre Jehova. El Webster’s Third New International Dictionary ya habla si cosa quierre decir del nombre “Jehovah God”: “El de con todo alto Dios y solamente Dios que ta adora el maga Testigo de Jehova.”

[Footnote]