El Biblia Puede Cambia con el Vida

COSA ya manda move con el un hombre para bira otravez con el religion que ya deja le cuando joven le? Paquemodo el un joven hombre ya puede mira con Jehova como el de suyu tata? Le con el cosa sila ya habla.

“Necesita Yo Bira Otravez con Jehova.”​—ELIE KHALIL

AÑO QUE YA NACE: 1976

NACION ONDE YA NACE: CYPRUS

BACKGROUND: REBELLOSO ANAK

DE MIO VIDA DE ANTES: Ya nace yo na Cyprus pero ya engranda yo na Australia. El de mio mayores maga Testigo de Jehova y ya hace sila esfuerzo para ama yo con Jehova y con el de suyu Palabra, el Biblia. Cuando teenager yo, ya principia yo queda rebelloso. Ta escapa yo na casa si denoche para sigui con el de mio maga barcada. Ta ruba kame maga coche y ta hace manada locuras.

Del primero, secreto yo este ta hace cay ta tiene yo miedo que rabia el de mio mayores. Pero hinay-hinay, ya perde el de mio miedo. Yan barcada yo na maga gente que mayor conmigo y gendeh ta ama con Jehova, y ya tiene sila mal influencia conmigo. Na uliji, ya habla yo con el de mio mayores que no quierre yo queda un Testigo de Jehova. Con paciencia sila ya pricura ayuda conmigo pero nuay yo acepta con ese. Ya lleva se tristeza na de mio mayores.

Despues yo sale na casa, ya principia yo man droga, ta siembra y ta vende pa gane yo marijuana. Imoral el de mio vida y pirmi yo na night club. Pronto tambien yo rabia. Si tiene quien puede habla o puede hace un cosa que gendeh yo ta gusta, ta rabia dayun yo, ta grita y ta bombia dayun kanila. Ta hace yo el todo que ya enseña conmigo que gendeh debe hace el un Cristiano.

SI PAQUEMODO EL BIBLIA YA PUEDE CAMBIA CON EL DE MIO VIDA: Ya queda yo cerca na uno del de mio uban que tan droga de quien tata ya muri cuando joven le. Pirmi kame denoche ya gayot ta puede durmi por causa na diamon istoria. Na cuanto de aquel noche, ya habla le conmigo que tan miss gayot le con el de suyu tata. Cay ya engranda yo que sabe el esperanza de resureccion, ya habla yo con ele acerca con Jesus quien ya resucita maga muerto y ya promete que hace le con ese otravez na futuro. (Juan 5:28, 29) “Imagina que puede tu otravez mira con el de tuyu tata,” ya habla yo. “Todo kita puede vivi hasta para cuando na Paraiso tierra.” Ya puede gayot quel alcanza na de suyu corazon.

Na otro tiempo, el de mio amigo ya discuti acerca na ultimo maga dia o na doctrina del Trinidad. Ta usa yo con el de suyu Biblia y ta dale mira maga texto que ta revela el verdad acerca con Dios Jehova, con Jesus y na ultimo maga dia. (Juan 14:28; 2 Timoteo 3:1-5) Mientras mas ta discuti yo acerca con Jehova na de mio amigo, mas ta puede yo pensa acerca con Jehova.

Hinay-hinay ya acorda yo con el verdad na Biblia que el de mio mayores ya enseña conmigo y ya principia se afecta conmigo. Por ejemplo, tiene vez si talla yo na party y tan droga junto na de mio maga amigo, bigla lang ta puede yo pensa acerca con Jehova. Manada del de mio maga amigo ta clama que ta ama sila con Dios pero otro se na diila conducta. No quierre yo queda igual kanila y sabe yo si cosa yo debe hace. Necesita yo bira con Jehova.

Siempre, facil lang para habla pero dificil con ese hace. Tiene maga cambio que facil lang para hace, igual descanza man droga. Ya deja tambien yo con el de mio maga amigo de antes y ya principia estudia con el Biblia junto con el un anciano.

Pero, el otro maga cambio gendeh facil para hace. Bien dificil controla con el de mio rabia. Tiene vez ta puede yo se controla pero tiene vez, gendeh. Poreso tan luya yo y ta pensa que gendeh ya gayot yo puede hace cambio. Cay yan luya yo, ya atraca yo con el anciano quien tan Bible study conmigo. Paciencioso y bueno gayot le, y ya ayuda le conmigo na manada manera. Tiene quel tiempo, ya manda le conmigo le un articulo na The Watchtower acerca el importancia que gendeh gayot descanza hace maga cambio. * Ya discuti kame maga manera si cosa yo debe hace si rabia yo. Hinay-hinay, na ayuda del articulo y na regular rezo con Jehova, ya puede yo controla con el de mio rabia. Na uliji, del Abril 2000, ya bautiza conmigo como un Testigo de Jehova. Alegre gayot el de mio mayores.

SI PAQUEMODO YO YA BENEFICIA: Tiene ya yo ahora paz na pensamiento y un limpio conciencia cay sabe yo que gendeh mas yo ta hace mabuling con el de mio cuerpo na droga o imoralidad. Ahora, na todo cosa yo ta hace, mas alegre ya yo si compara de antes.

Ta rindi yo gracias con Jehova por causa na de mio mayores que nuay descanza ayuda conmigo. Ta acorda tambien yo con el maga palabra que ya habla si Jesus na Juan 6:44 (El Nuevo Testamento na Chavacano): “Noay quien ay puede anda conmigo si gendeh ay hala con ele el Tata, quien ya imvia conmigo.” Ta rindi gayot yo gracias que ya puede yo bira con Jehova cay ya hala le conmigo otravez.

“Quierre Yo Tene un Tata.”​—MARCO ANTONIO ALVAREZ SOTO

AÑO QUE YA NACE: 1977

NACION ONDE YA NACE: CHILE

BACKGROUND: MIEMBRO DEL HEAVY-METAL BAND

DE MIO VIDA DE ANTES: Ya hace conmigo engranda de mio nana na Punta Arenas, un bonito ciudad na Strait of Megellan cerca na sur del South America. Yan separtajan el de mio mayores cuando cinco año yo, poreso ya sinti yo que dol ya abandona conmigo. Quierre yo tene un tata.

El de mio nana ya estudia con el Biblia junto con el maga Testigo de Jehova y ta lleva le conmigo na maga miting na Kingdom Hall. Pero no quierre gayot yo anda na maga miting y pirmi yo tan pusak si anda ya kame para na Kingdom Hall. Cuando 13 año yo, ya descanza yo atende na maga miting.

Na ese tiempo, quierre-quierre yo music y ya discubri yo que tiene yo talento na music. Na edad de 15, ta tuca yo heavy-metal cancion na maga fiesta, bar y maga ocasion. Cay tan junto yo na maga musiquero, ya queda tambien yo interesao na classical music. Ya principia yo estudia na escuela que ta enseña music onde yo ta queda. Na edad de 20, ya cambia yo na centro del Chile na Santiago para estudia pa mas. Ya continua tambien yo tuca junto na maga banda que ta tuca heavy-metal.

Durante na ese maga tiempo, gendeh yo alegre. Para alivia con el de mio sentido, ta toma yo y ta usa droga junto con el de mio maga uban na banda con quien yo ta considera como de mio familia. Rebelloso yo y claro se puede mira na de mio ichura. Ta usa yo negro ropa, ya hace largo el de mio barbas y cerca ya alcanza na sintura el de mio pelo.

Por causa na de mio custumbre, pirmi yo ta incuntra peleajan. Como resulta, ta arresta conmigo el polis. Un tiempo, cuando burracho yo, ya ataca yo con el un grupo del maga ta vende droga quien ta mete conmigo y con el de mio maga amigo. Ya gulpia conmigo el maga ta vende droga poreso ya quebra el de mio sahgang.

Pero, el de con todo duele para conmigo amo el cosa ya hace el de mio maga cerca amigo. Un dia, ya puede yo sabe que el de mio novia tiene relacion na de mio best friend y ya esconde se conmigo el de mio maga amigo. Bien dolorido gayot yo.

Ya bira yo na Punta Arenas donde ya principia yo enseña music y ya trabaja como ta tuca cello. Ya continua tambien yo tuca y man record junto na maga banda que ta tuca heavy-metal. Ya puede yo conoce con el un bonita mujer que si Sussan y ya principia kame queda junto. Cuanto tiempo despues, ya sabe si Sussan que el de suyu nana ta creé na doctrina de Trinidad y iyo gendeh. “Cosa ba gayot el verdad?” ya pregunta le. Ya contesta yo que sabe yo que falso el doctrina de Trinidad pero gendeh yo ta puede dale prueba estaba na Biblia. Pero sabe yo si quien puede hace con ese. Ya habla yo con ele que el maga Testigo de Jehova puede dale mira con ele el verdad estaba na Biblia. Despues, ya hace yo con el un cosa que ya dura ya yo nuay hace—ya reza yo con Dios y ya pidi el de suyu ayuda.

Cuanto dia despues, ya mira yo con el un hombre con quien yo ta conoce y ya pregunta con ele si uno ba le del maga Testigo de Jehova. Maskin pa ta nervia por causa na de mio ichura, ya contesta le con el de mio maga pregunta acerca na maga miting na Kingdom Hall. Convincido yo que contestacion este del de mio rezo. Ya anda yo na Kingdom Hall y ya sinta na atras silla para nuay quien puede nota conmigo. Pero, manada el ya conoce conmigo y ya acorda que ta atende yo cuando bata yo. Yan welcome sila conmigo, ya abraza conmigo y ya sinti yo paz. Dol aquel ya bolbe yo na de mio casa. Cuando ya mira yo con el hombre quien yan Bible study conmigo cuando bata yo, ya pidi yo con ele que man Bible study otravez conmigo.

SI PAQUEMODO EL BIBLIA YA PUEDE CAMBIA CON EL DE MIO VIDA: Un dia, ya le yo con el Proverbio 27:11 que ta habla: “Queda sabio, mi anak y hace alegre con el de mio corazon.” Bien bilib gayot yo cuando ya sabe yo que puede hace alegre el un gente con el Creador del universo. Ya puede yo realiza que si Jehova amo el Tata que ta busca yo na de mio entero vida!

Quierre yo hace alegre con el de mio Tata na cielo y hace el de suyu voluntad. Pero, ya queda yo esclavo na droga y alcoholico tomada por manada año. Ya puede yo entende con el enseñanza de Jesus que escribido na Mateo 6:24 que ta habla que “noay gente quien puede sirvi con dos amo.” Mientras tan dificil yo pricura hace maga cambio, el 1 Corinto 15:33 tiene grande efecto conmigo: “El maga barcada malo ta hace cambia el custumbre bueno de un gente.” Ya realiza yo que gendeh yo puede quita con el de mio mal vicio si continua yo anda na igual lugar y man junto con el mismo maga gente. Claro el consejo del Biblia: Necesita yo hace dayun cambio para desaleja con el maga cosas que ta hace conmigo tisut.—Mateo 5:30.

El de con todo dificil decision que ya hace yo amo que deja con el de mio hilig na heavy-metal cancion. Pero na ayuda del de mio maga amigo na congregacion, ya puede yo con ese quita. Ya descanza yo toma y usa droga. Ya curta tambien yo de mio pelo, ya afeita de mio barbas y gendeh ya yo pirmi ta usa negro ropa. Cuando ya habla yo con Sussan que quierre yo curta de mio pelo, ya queda le curioso. Ya habla le, “Sigui yo contigo para mira si cosa ba tiene na Kingdom Hall!” Ya gusta le el cosa le ya mira alla y nuay dura ya principia tambien le man Bible study. Na uliji, ya casa kame de Sussan. Del 2008, ya bautiza kanamon como maga Testigo de Jehova. Alegre kame sirvi con Jehova junto con el de mio nana.

SI PAQUEMODO YO YA BENEFICIA: Ya deja yo con el un mundo que ya dale lang conmigo falso alegria y maga falso amigo. Quierre-quierre siempre yo music pero ta iscuji ya yo el cosa yo oi. Ta usa yo con el de mio maga experiencia para ayuda con el de mio familia y con otro, especialmente con el maga jovenes. Quierre yo ayuda kanila para mira que mayoria del cosa ta ofrece este mundo dol bonito pero el deverasan igual este “como basura.”—Filipo 3:8.

Ya puede yo incuntra maga leal amigo na Cristiano congregacion donde tiene deverasan amor y paz. Mas pa na todo, cay ya queda yo cerca con Jehova, ya puede yo incuntra el de mio Tata.

[Footnote]

[Blurb]

“Ya puede yo bira con Jehova cay ya hala le conmigo otravez”