El Biblia Puede Cambia con el Vida

COSA ya puede discubri el un hombre de Scotland que mas importante contra na de suyu negocio? Cosa ya ayuda con el un hombre de Brazil que descanza con el de suyu imoral manera de vida y adiccion na droga? Paquemodo ya puede descanza toma por demas el un hombre de Slovenia? Le con el diila istoria.

“Dol Bonito el De Mio Vida.”—JOHN RICKETTS

AÑO QUE YA NACE: 1958

NACION ONDE YA NACE: SCOTLAND

BACKGROUND: RICO NEGOCIANTE

DE MIO VIDA DE ANTES: Ya engranda yo na un rico familia. El de mio tata amo un oficial na maga soldao de Britain poreso el diamon familia pirmi ta cambia lugar. Puera na Scotland, ya queda tambien kame na England, Germany, Kenya, Malaysia, Ireland y Cyprus. Principia na edad de ocho, ya entra yo escuela na maga boarding school na Scotland. Na uliji, ya gradua yo na Cambridge University.

Na edad de 20, ya principia yo trabaja na maga negocio de gasolina y ya continua este por ocho año. Primero, ya hace yo este na South America, despues na Africa y na uliji, na Western Australia. Despues cambia na Australia, ya principia yo de mio mismo negocio que na uliji ya vende yo.

Grande el sen que ya puede yo tiene cuando ya hace yo quel donde gendeh ya yo necesita trabaja maskin 40 año pa lang yo. Ya usa yo con el de mio tiempo para man viaje na diferente maga lugar. Dos beses yo yan libut na Australia de motor y ya viaja yo na entero mundo. Dol bonito el de mio vida.

SI PAQUEMODO EL BIBLIA YA PUEDE CAMBIA CON EL DE MIO VIDA: Antes pa yo man retiro, quierre yo busca cuanto manera para puede rindi gracias con Dios na vida que tiene yo. Ya principia yo atende na Anglican Church donde ta atende yo cuando bata pa yo. Pero, este religion gendeh tanto ta enseña estaba na Biblia. Sunod, ya estudia yo junto con el maga Mormon pero ya perde el de mio interes cay el diila maga enseñanza gendeh base na Biblia.

Un dia, el maga Testigo de Jehova ya anda na de mio casa. Ya puede yo mira dayun que el diila maga enseñanza base gayot na Biblia. El un texto que ya dale sila mira conmigo amo el 1 Timoteo 2:3, 4. Ese maga versiculo ta habla que voluntad del Dios que “todo el maga gente ay salva y ay alcanza el completo conocimiento del verdad.” (El Nuevo Testamento na Chavacano) Yan bilib gayot yo cay el maga Testigo ya habla que necesita kita aprende si cosa gayot ta enseña el Biblia.

Cuando ya estudia yo con el Biblia junto con el maga Testigo de Jehova, ya aprende yo si cosa gayot ta enseña el Biblia. Por ejemplo, ya puede yo aprende que el Dios y si Jesus gendeh parte del Trinidad; sino, sila dos diferente persona. (Juan 14:28; 1 Corinto 11:3) Alegre gayot yo puede sabe con este simple verdad. Pero, rabiao tambien yo cay ya gasta yo bien largo tiempo para pricura entende con el un falso enseñanza!

Nuay dura, ya principia yo atende na maga miting del maga Testigo de Jehova. Yan bilib yo cay bien friendly gayot sila y tiene alto principio na moral. El diila deverasan amor ya convinci conmigo que ya incuntra ya yo con el verdadero religion.​—Juan 13:35.

SI PAQUEMODO YO YA BENEFICIA: Despues yo bautiza, ya conoce yo con el un buen mujer que si Diane. Ya engranda le como uno del maga Testigo de Jehova y tiene le maga bonito calidad que ya gusta gayot yo. Ya llega el tiempo, ya casa kame. Ta rindi gayot yo gracias con Jehova cay ya dale le conmigo un amable mujer quien ta suporta conmigo.

Quierre kame de Diane que predica na un lugar donde manada gente el quierre oi con el buen noticia estaba na Biblia. Del 2010, ya cambia kame na Belize, Central America. Aqui, ta predica kame con el maga gente quien ta ama con Dios y quierre aprende mas acerca con ele.

Ahora cay sabe ya yo el verdad acerca con Dios y con el de suyu Palabra, el Biblia, ya dale este conmigo paz na pensamiento. Como un full-time predicador, ya tiene yo el alegria que enseña con el Biblia na manada gente. Bien bonito gayot mira que el verdad ta hace enbuenamente con el vida del un persona​—igual na cosa ya sucede conmigo. Ya puede ya gayot yo incuntra el de con todo buen manera para rindi gracias con Dios na vida que tiene yo.

“Bien Bueno Gayot Sila Conmigo.”​—MAURÍCIO ARAÚJO

AÑO QUE YA NACE: 1967

NACION ONDE YA NACE: BRAZIL

BACKGROUND: TIENE IMORAL MANERA DE VIDA

DE MIO VIDA DE ANTES: Ya engranda yo na Avaré, un diutay barrio na São Paulo. Pobre el mayoria del quien ta queda alla.

Ya muri el de mio tata cuando na barriga pa lang yo del de mio nana. Cuando bata yo, ta usa yo con el maga camisa del de mio nana si nuay le na casa. Ya principia yo actua como mujer y el maga gente ya habla que mareng yo. Ya llega el tiempo, ya principia yo man sex na otro maga hombre.

Cuando maga 20 año yo, ta busca yo maga hombre y mujer con quien yo puede man sex​—na maga bar, nightclub y maskin na maga iglesia. Na tiempo de holiday, ta muda yo como un mujer y ta baila na maga parade. Bien popular gayot yo.

Tiene yo amigo maga mareng, prostitute y aquellos maga adicto na droga. El cuanto kanila ya influencia conmigo que pruba droga y yan addict yo con ese. Tiene vez, tan droga kame entero noche. Na otro tiempo, solo-solo yo tan droga entero dia. Ya queda yo bien flaco poreso el maga gente ta habla que tiene yo AIDS.

SI PAQUEMODO EL BIBLIA YA PUEDE CAMBIA CON EL DE MIO VIDA: Na ese tiempo, ya puede yo conoce con el maga Testigo de Jehova. Bien bueno gayot sila conmigo. Uno na maga texto na Biblia que ya le sila conmigo amo el Roma 10:13, donde ta habla: “El todo quien ta llama con el nombre de Jehova hay salva.” (New World Translation) Este texto ya dale mira conmigo que bien importante que usa con el nombre de Jehova. Manada beses que despues yo man droga entero noche, ta abri yo con el de mio bentana, ta mira arriba na cielo y llurando ta reza con Jehova que ayuda conmigo.

Tan lingasa yo acerca na de mio nana, quien ya sufri gayot por causa na de mio problema na droga poreso ya decidi yo que descanza con ese hace. Nuay dura despues quel, ya acepta yo Bible study na maga Testigo. Ya asigura sila conmigo que el estudiada puede ayuda conmigo para descanza man droga y deverasan, ya ayuda gayot este conmigo!

Mientras ta continua yo estudia con el Biblia, ya realiza yo que necesita yo hace cambio na de mio manera de vida. Yan dificil yo descanza con el maga practica de homosexualidad ciendo amo ya se el cosa yo ta hace desde bata. El un cosa que ya ayuda conmigo para cambia amo que ya descanza yo man junto con el de mio maga amigo y ya descanza tambien yo anda na maga bar y nightclub.

Dificil hace con este maga cambio. Pero, ya aprende yo que si Jehova ta cuida conmigo y ta entende con el maga dificultad que ta experiencia yo y ese ya puede dale conmigo comforta. (1 San Juan 3:19, 20) Del 2002, ya descanza yo con el todo practica de homosexualidad y na ese tambien año, ya bautiza yo como uno del maga Testigo de Jehova.

SI PAQUEMODO YO YA BENEFICIA: Yan bilib gayot el de mio nana na maga cambio que ya puede yo hace poreso ya principia tambien le estudia con el Biblia. Pero, yan stroke le. Maskin pa ansina, ya continua le tene amor con Jehova y na verdad na Biblia.

Ocho año ya yo ta sirvi full-time, donde ta usa yo con el mayoria del de mio tiempo para enseña el Biblia con otro. Ta admiti yo que tiene vez, necesita yo resisti con el maga mal deseo. Pero, tiene yo coraje cay sabe yo que si gendeh yo sigui con ese maga deseo, puede yo hace alegre con Jehova.

Cay tiene yo cerca relacion con Jehova y ta vivi na manera que ta hace alegre con ele, ya tiene yo respeto na cuerpo. Ahora, alegre ya yo.

“Dol un Barril daw Yo que Gendeh Ta Llena.”​—LUKA ŠUC

AÑO QUE YA NACE: 1975

NACION ONDE YA NACE: SLOVENIA

BACKGROUND: TA TOMA POR DEMAS

DE MIO VIDA DE ANTES: Ya nace yo na Ljubljana, na centro del Slovenia. Bonito el de mio vida hasta cuando cuatro año yo. Acabar, yan suicide el de mio tata. Despues ese tragedia, el de mio nana necesita trabaja gayot para puede dale el necesidad de mio y del de mio mayor hermano.

Na edad de 15, ya queda yo junto na de mio aguela. Alegre yo ta queda junto con ele cay manada del de mio amigo vecinos lang de suyu. Ya tiene tambien yo mas libertad. Na edad de 16, ya principia yo asocia con el maga gente quien ta toma cada Sabado y Domingo. Ya deja yo queda largo el de mio pelo, ya muda como buguy y ya principia puma.

Maskin ya pruba yo diferente clase de droga, mas ya quierre yo toma alcoholico tomada. Del primero, ta toma lang yo cuanto baso de vino pero nuay dura, ta toma ya yo mas de un botella. Bien bueno yo esconde que burracho yo. Mas mucho, ta puede lang sila sabe que tomao yo na olor del de mio boca. Pero, nuay quien sabe que posible manada litro de vino, beer y vodka ya yo ya toma!

Manada beses, iyo el quien ta ayuda con el de mio maga amigo si burracho sila despues man disco maskin pa mas manada yo ya toma contra kanila. Un dia, ya oi yo que ya habla el uno del de mio maga amigo que dol un barril daw yo que gendeh ta llena​—un maka-huya expresion na Slovenia para na un persona quien ta toma por demas. Ya sinti gayot yo duele na cosa le ya habla.

Ya principia yo pensa acerca na de mio vida. Ya sinti gayot yo nuay valor. Dol nuay proposito el de mio vida.

SI PAQUEMODO EL BIBLIA YA PUEDE CAMBIA CON EL DE MIO VIDA: Na ese tiempo, ya puede yo observa que el uno del de mio maga classmate ya cambia; ya queda le mas buen persona. Ya queda yo curioso poreso ya invita yo con ele na un coffee shop. Mientras tan cuento kame, ya explica le que ya principia le estudia con el Biblia junto con el maga Testigo de Jehova. Ya habla le el maga cosas que ya aprende le y todo se nuevo para conmigo ciendo desde antes, nuay yo anda na iglesia o le con el Biblia. Ya principia yo atende na maga miting del maga Testigo y ya estudia el Biblia junto kanila.

Por causa na estudiada del Biblia, ya puede yo aprende manada cosas que ya motiva conmigo para cambia con el de mio vida. Por ejemplo, ya puede yo aprende que ta vivi ya kita na tiempo que ta llama el Biblia como el “ultimo maga dia.” (2 Timoteo 3:1-5) Ya puede tambien yo aprende que gendeh dura hay quita el Dios con el maga mal gente aqui na tierra y dale oportunidad con el maga buen gente para queda alegre hasta para cuando na Paraiso. (Salmo 37:29) Ya tiene yo fuerte deseo que cambia con el de mio vida para queda yo uno de aquellos maga buen gente.

Ya principia yo habla na de mio maga amigo acerca na maga verdad na Biblia que ta aprende yo. Mayoria kanila ya gangguia conmigo pero el diila reaccion ya ayuda conmigo na manera que gendeh yo ta expecta. Ya ayuda este conmigo para mira que gendeh gayot sila deverasan maga amigo. Ya realiza yo que el de mio relacion con este maga gente amo un razon si porque yo ya toma por demas. Cada semana, ta espera sila con el Sabado y Domingo para puede sila man burracho otravez.

Nuay mas yo man junto kanila, sino ya principia yo asocia con el maga Testigo de Jehova. Ya anima gayot sila conmigo cay ta ama sila con Dios y ta pricura sila vivi asegun na de suyu maga principio. Hinay-hinay, ya puede yo quita con el de mio vicio que por demas toma.

SI PAQUEMODO YO YA BENEFICIA: Ta rindi gayot yo gracias con Jehova cay gendeh ya yo necesita con el alcoholico tomada para queda alegre. No sabe yo si cosa sucede conmigo si ya continua yo con el de mio manera de vida de antes. Pero convincido yo que mas bueno ya el de mio vida ahora.

Siete año ya yo ta sirvi na branch office del maga Testigo de Jehova na Slovenia. Ya tiene gayot proposito el de mio vida cuando ya conoce yo con Jehova y ya principia sirvi con ele.