Como cosa kita puede mira na letrato, manada gente el ta pensa que na Dia de Juzgamiento hay lleva con el billones de maga alma adelante na trono del Dios para juzga kanila asegun na maga cosa sila ya hace de antes​—hay premia con el cuanto vida na cielo y con el otro hay castiga na infierno. Pero, el Biblia ta dale mira que el proposito del Dia de Juzgamiento amo para salva con el maga gente desde na injusticia. (Salmo 96:13) Ya iscuji el Dios con Jesus para queda el Juez quien hay dale justicia con el maga gente.​—Le con el Isaias 11:1-5; Maga Actividad 17:31.

Cuando intencional yan rebelde el primer gente que si Adan, ya pone le con el de suyu maga descendiente bajo na pecado, sufrimiento y muerte. (Roma 5:12) Para corecta con ese injusticia, si Jesus hay hace vivi otravez o resucita con el billones de maga gente quien ya muri. El libro de Revelacion ta revela que hay sucede este durante el un mil año rulanza de Cristo Jesus.​—Le con el Revelacion 20:4, 11, 12.

Hay juzga con aquellos quien hay resucita, gendeh base na cosa sila ya hace antes muri, sino na cosa sila hay hace si revela ya con el laman del maga rollo que ya menciona na Revelacion capitulo 20. (Roma 6:7) Incluido con aquellos quien hay resucita y tene el oportunidad para aprende acerca con Dios amo “el maga gente bueno y el maga pecador,” como cosa ya habla si apostol Pablo.​—Le con el Maga Actividad 24:15.

Aquellos quien ya muri que nuay puede conoce con Dios Jehova y sirvi con ele hay tene el oportunidad para hace cambio y hace maga buen cosas. Si hace sila se, hay vivi sila hasta para cuando. Pero, el otro kanila gendeh hay acepta el oportunidad que aprende acerca na maga manera de Jehova. El resulta, sila hay “queda condenao.”​—Le con el Juan 5:28, 29; Isaias 26:10; 65:20.

Na fin del un mil año Dia de Juzgamiento, perfecto ya otravez el condicion del vida del maga obediente gente. (1 Corinto 15:24-28) Bien bonito esperanza se para con el todo maga obediente persona! Na ultimo probanza, el Dios hay hace sale con Satanas Diablo na hondura, onde hay pone con ele por un mil año. Hay pricura otravez si Satanas influencia con el maga gente para deja con Jehova. Pero aquellos quien hay resisti con Satanas hay tene vida hasta para cuando na tierra.​—Le con el Isaias 25:8; Revelacion 20:7-9.

El Biblia ta usa tambien con el termino “dia del juzgada” para refiri na un suceso que hay termina con el presente sistema de maga cosas. Derepente este hay llega igual na Grande Avenida na tiempo de Noe, donde ya destroza con el entero generacion de maga mal gente. Maka-alegre cay si destroza ya con el maga mal gente, hay tene ya un nuevo mundo donde el “justicia ay reina.”​—Le con el 2 Pedro 3:6, 7, 13.