Si, na entero mundo tiene millones de maga mujer ministro el maga Testigo de Jehova. Un grande grupo sila quien ta predica con el buen noticia del Reino del Dios. El Salmo 68:11 ya menciona un profecia acerca con ese maga ministro: “Si Jehova ya dale el mandato; el maga mujer quien ta proclama el buen noticia igual como un grande grupo de soldao.”

Pero, el maga mujer ministro del maga Testigo de Jehova otro el cosa ta hace na maga clero mujer del otro maga religion. Na cosa maga manera diferente sila?

Mas mucho del maga clero mujer el ta enseña y ta guia adentro na diila iglesia. Pero, el maga mujer ministro del maga Testigo de Jehova ta predica apuera del congregacion, con todo quien sila puede man cuento na casa en casa y na otro pa maga lugar.

El otro manera que el maga mujer ministro del maga Testigo de Jehova diferente na otro maga religion amo el diila actividad adentro na congregacion. El maga clero mujer del otro religion ta guia y ta enseña con el maga miembro del diila iglesia acerca na doctrina del diila religion. Pero, el maga mujer ministro del maga Testigo de Jehova gendeh ta enseña adentro del congregacion si presente el maga bautizao hombre. El maga hombre lang con quien ya iscuji como maestro el ta hace con ese.—1 Timoteo 3:2; Santiago 3:1.

El Biblia ya menciona que con el maga hombre lang ya dale el responsibilidad para guia con el congregacion. Nota con el ejemplo que ya dale si apostol Pablo cuando ya escribi le con el un anciano que si Tito: “Ya deja yo contigo na Creta ese para puede tu . . . escuji maga Anciano na cada pueblo.” Si Pablo ya omenta que el cada hombre con quien ya iscuji debe “tiene buen custumbre, casao una vez lang [“uno lang el mujer,” NWT].” (Tito 1:5, 6) Semejante tambien el cosa ya habla si Pablo con Timoteo na de suyu carta: “Si quien quiere queda un Presidente del comunidad ta desea le un buen trabajo. Poreso, el maga Presidente necesita tiene gayot buen custumbre, una vez lang ya casa [“uno lang el mujer,” NWT], . . . sabe insiña.”—1 Timoteo 3:1, 2.

Porque na maga hombre lang ya dale el responsibilidad que guia con el congregacion? Si Pablo ya habla: “Gendeh yo ta dale permiso con el maga mujer para insiña o habla con el maga hombre si cosa hace. El maga mujer no conviene conversa, cay una ya hace con Adan, y despues con Eva.” (1 Timoteo 2:12, 13) Ciendo una ya crea con el hombre despues el mujer, ta dale este mira si porque el Dios ya dale el responsibilidad con el maga hombre que enseña y guia.

Todo el maga Testigo de Jehova ta sigui con el ejemplo del diila Lider, si Jesucristo. El dicipulo que si Lucas ya escribi acerca na ministerio de Jesus: “Si Jesus ya anda na maga pueblo y maga barrio ta predica y ta anuncia el Buen Noticia del Reino de Dios.” Despues, ya manda si Jesus con el de suyu maga siguidores que hace tambien igual ansina: “Ya camina sila y ya bultia na maga barrio, ya anuncia el Buen Noticia.”—Lucas 8:1; 9:2-6.

Ahora, el maga ministro de Jehova—hombre y mujer—activo ta hace con el cosa ya predicta si Jesus: “Este Buen Noticia acerca del Reino ay anuncia na entero mundo, para man testigo con todo el maga nacion. Entonces ay llega ya el fin.”—Mateo 24:14.