CUANDO taqui si Jesus na tierra, ya dale le mira na perfecto manera el personalidad del de suyu Tata y si paquemodo si Jehova ta hace con el maga cosas. Ele ya habla: “Gendeh yo ta hace ni nada na dimio lang mismo autoridad, pero ta habla yo el cosa ya insiña conmigo el Tata. . . . Ta hace yo firmi el cosa Le ta gusta.” (Juan 8:28, 29; Colosa 1:15) Poreso si mira kita si paquemodo si Jesus ya trata con el maga mujer, puede kita sabe si cosa el mirada del Dios na maga mujer y si cosa le ta expecta kanila.

Base na Evangelio, manada del maga scholar el ya puede habla que bien diferente el mirada de Jesus na maga mujer na mayoria na de suyu tiempo. Na cosa manera? Y el mas importante, el de suyu enseñanza ba ta dale mas libertad con el maga mujer ahora?

Nuay mira si Jesus con el maga mujer na imoral manera. El cuanto Judio religioso lider ta pensa que si el un hombre hay man cuento con el un mujer hay guia se na mal deseo. Poreso, ya habla sila que el maga mujer gendeh puede man cuento con el maga hombre na publico y necesita tapa con el diila cabeza de velo si sale sila apuera. Pero, si Jesus ya dale consejo con el maga hombre que necesita sila controla con el diila deseo de laman y trata con el maga mujer con dignidad en vez de gendeh kanila manda man cuento na publico.—Mateo 5:28.

Ya habla tambien si Jesus: “El hombre quien ta separta con el disuyo mujer, y ta casa con otro mujer, ta comete adulterio contra con el disuyo mujer.” (Marcos 10:11, 12) Entonces, gendeh aceptable con ele el comon enseñanza del maga religioso lider que ta permiti con el hombre que man divurcio con el de suyu mujer na ‘maskin cosa lang razon.’ (Mateo 19:3, 9) Gendeh familiar el mayoria del maga Judio con el idea que comete adulterio contra con el de suyu mujer. El diila maga rabbi ta enseña que nunca puede comete adulterio el un marido contra con el de suyu mujer—solamente el mujer el ta queda gendeh fiel! Asegun na un referencia na Biblia, “cuando ya habla si Jesus que el maga hombre necesita tambien queda fiel na diila mujer, ya dale le mira que ta trata le con el maga mujer con respeto y dignidad.”

El efecto del de suyu enseñanza ahora: Na Cristiano congregacion del maga Testigo de Jehova, el maga mujer puede adora y man cuento junto con el maga hombre na maga miting. Pero, gendeh sila necesita man lingasa que hay mira kanila na gendeh justo manera o queda sobra de familiar kanila cay el maga hombre Cristiano ta trata enbuenamente ‘con el maga vieja como ta trata sila con el diila mismo nana. Con el maga mujer joven, ta trata kanila como el diila mismo maga hermana y con un corazon limpio.’—1 Timoteo 5:2.

Ya dale tiempo si Jesus para enseña con el maga mujer. Diferente na cosa ta enseña el maga rabbi que el maga mujer nuay cosa sabe, si Jesus ya enseña y ya anima con el maga mujer que habla con el diila opinion. Cuando ya permiti si Jesus con Maria que esta y oi con el cosa le ta enseña, ya dale le mira que el papel del maga mujer gendeh lang para hace con el maga trabajo na casa. (Lucas 10:38-42) El hermana de Maria, si Marta, ya beneficia tambien na de suyu enseñanza, como cosa kita puede mira na de suyu contestacion con Jesus despues muri si Lazaro.—Juan 11:21-27.

Interesao si Jesus con el opinion del maga mujer. Na aquel tiempo, mayoria del maga Judio mujer ta pensa que para queda sila alegre necesita tiene sila anak hombre quien queda prominente y si posible, queda un profeta. Cuando uno del maga mujer ya habla: “Alegre el mujer quien ya carga contigo na su vientre,” ya usa si Jesus con aquel oportunidad para habla con ele acerca na un cosa que mas importante. (Lucas 11:27, 28) Si Jesus ya dale mira que gendeh necesita un anak hombre el un mujer para queda alegre cay el de suyu relacion con Dios amo el hace con ele alegre.—Juan 8:32.

El efecto del de suyu enseñanza ahora: El maga maestro na Cristiano congregacion ta oi con el maga comento del maga mujer na maga miting na congregacion. Ta respeta sila con el maga mature mujer por causa na diila “ejemplo de buen custumbre,” na privado man o na publico. (Tito 2:3) Ta confia tambien sila kanila que predica con el buen noticia del Reino del Dios.—Salmo 68:11; mira con el cajon  “Ya Prohibi Ba si Apostol Pablo que Man Cuento el Maga Mujer?” na pagina 9.

Tiene queber si Jesus con el maga mujer. Na tiempo del Biblia, mas valoroso el maga anak hombre contra na maga anak mujer. Ansina tambien el cosa ya habla el Talmud: “Alegre le si el de suyu maga anak amo maga hombre y maka-lastima con ele si el de suyu maga anak amo maga mujer.” El cuanto del maga mayores ta pensa que problema lang el maga mujer—necesita sila busca marido para con ele y dale dowry y gendeh sila puede depende con ele para suporta kanila si de edad ya sila.

Ya dale mira si Jesus que importante el vida del un bata mujer igual na un hombre—ya resucita le con el anak mujer de Jairo igual como cosa le ya hace na anak hombre del viuda na Naim. (Marcos 5:35, 41, 42; Lucas 7:11-15) Despues le cura con el un mujer quien “controlao de un espiritu que ya deja con ele emfermo por dies y ocho años,” si Jesus ya llama con ele como “anak de Abraham,” un expresion que gendeh familiar na maga Judio. (Lucas 13:10-16) Cuando ya usa le con este buen expresion, nuay lang le pensa que importante aquel mujer na comunidad sino ya revela tambien le que tiene fuerte fe aquel mujer.—Lucas 19:9; Galacia 3:7.

El efecto del de suyu enseñanza ahora: Asegun na maga de Asia: “Si ta hace tu engranda anak mujer, igual lang dol ta rega tu con el jardin del de tuyu vecinos.” El maga amable Cristiano tata gendeh debe queda influenciao na ese clase de pensamiento sino hay cuida sila enbuenamente con el todo del diila maga anak, hombre y mujer. El maga Cristiano mayores ta asigura que todo del diila maga anak ta ricibi justo educacion y tiene buen salud.

Ya confia si Jesus con el maga mujer. Na corte del maga Judio, el testimonia del un mujer igual lang na testimonia del un esclavo. Si Josephus, un historian del primer siglo, ya habla: “Gendeh debe acepta con el maskin cosa evidencia que estaba con el maga mujer cay gendeh kanila puede confia.”

Pero, gendeh ansina si Jesus. Ya iscuji le con el maga mujer para manda sabe acerca con el de suyu resureccion. (Mateo 28:1, 8-10) Maskin este maga mujer ya puede mira con el muerte y intierro del diila Señor, nuay dayun creé el maga apostoles con el cosa sila ya habla. (Mateo 27:55, 56, 61; Lucas 24:10, 11) Pero cay ya aparece una el Cristo con el maga mujer, ya dale le mira que conviene tambien sila man testigo igual con el otro maga dicipulo.—Maga Actividad 1:8, 14.

El efecto del de suyu enseñanza ahora: Na congregacion del maga Testigo de Jehova, el maga hombre quien tiene maga responsibilidad ta dale mira consideracion con el maga mujer si ta considera sila con el diila opinion. Si acerca na maga Cristiano marido, ‘ta trata sila con respeto’ con el diila mujer si ta oi sila enbuenamente kanila.—1 Pedro 3:7; Genesis 21:12.

Si ta imita el maga hombre con el Cristo, ta dale sila respeto y libertad con el maga mujer, igual como cosa el original proposito del Dios para kanila. (Genesis 1:27, 28) El maga Cristiano marido gendeh ta mira con el maga mujer como mas bajo sino ta sigui sila con el consejo del Biblia que ta hace alegre con el diila maga mujer.—Efeso 5:28, 29.

Cuando ya principia man Bible study si Yelena, nuay quien sabe que ta maltrata con ele el de suyu marido. Ya engranda le na un violente lugar donde comon el fisical abuso y tan kidnap el hombre con el un mujer con quien le quierre casa. “El cosa yo ya aprende na Biblia ya hace conmigo fuerte,” ya habla si Yelena. “Ya sabe yo que tiene un persona quien ta ama gayot conmigo, ta dale valor y ta cuida conmigo. Ya sabe tambien yo que si man Bible study el de mio marido, puede cambia el de suyu tratamiento conmigo.” Ya sucede el cosa le quierre cuando el de suyu marido ya conforma man Bible study y despues, ya bautiza como uno del maga Testigo de Jehova. “Ta puede ya le controla con el de suyu mismo cuerpo,” ya habla si Yelena. “Ya aprende kame perdona con uno y otro.” Cosa el de suyu conclusion? “El maga principio na Biblia ya manda conmigo sinti que valoroso yo y protegido na de mio matrimonio.”—Colosa 3:13, 18, 19.

Gendeh lang si Yelena el ya experiencia igual ansina. Millones del maga Cristiano mujer el alegre cay sila y el diila marido ta pricura aplica con el maga principio na Biblia na diila matrimonio. Ya sinti sila respeto, comforta y libertad mientras tan junto con el maga hermano y hermana.—Juan 13:34, 35.

El maga Cristiano hombre y mujer sabe que como maga imperfecto gente, parte sila del creacion del Dios que “ya queda bajo na pagka-nuay sirvi.” Pero, si queda sila cerca con el diila amable Dios y Tata, si Jehova, hay tene sila el esperanza “para queda libre na [diila] situacion ahora, donde todo maga cosa-cosa ta man buluk, y para puede tamen participa na libertad y na gloria del maga anak del Dios.” Un bien bonito esperanza gayot se para con el maga hombre y mujer bajo na cuidada del Dios!—Roma 8:20, NWT, 21.