• AÑO QUE YA NACE: 1963

• NACION ONDE YA NACE: BRITAIN

• BACKGROUND: TIENE UN PRESTIGIOSO CARRERA

DE MIO VIDA DE ANTES:

Ya nace yo na Croydon, South London. Iyo el ika-seis na nueve man hermano y hermana. El de mio mayores de St. Vincent, un isla na Caribbean. Si Mamang miembro del Methodist church. Nuay yo interes acerca con Dios pero tiene maga cosas que quierre-quierre yo estudia y aprende. Si vacacion na escuela pirmi yo ta anda na un lago o lake na diamon lugar y ta le con el maga libro que ya presta yo na library.

Cuanto año despues yo entra escuela, ya realiza yo que quierre yo ayuda con el maga gente quien ta necesita. Ya principia yo trabaja na un trabajo que ta ayuda con aquellos quien nuay casa y tiene problema na fisical y tan dificil aprende. Despues ya saca yo un curso na un universidad que tiene que hace na medicina. Despues yo gradua, sunod-sunod ya queda alto el de mio posicion na trabajo y puede ya yo cumpra con el maskin cosa yo quierre. Como un freelance management consultant y social researcher, laptop lang y Internet el necesita yo na de mio trabajo. Tiene vez ta anda yo na diferente maga nacion por dos semana, ta esta na de mio favorito hotel, tan enjoy con el maga bonito lugar, tan spa y tan gym. Ta pensa yo que bien bonito gayot el de mio vida. Pero, nuay yo descanza pensa con aquellos maga gente quien tiene dificultad na vida.

SI PAQUEMODO EL BIBLIA YA PUEDE CAMBIA CON EL DE MIO VIDA:

Ya dura ya yo ta pensa, ‘Porque kita taqui y cosa el proposito del vida?’ Pero, nuay gayot yo pricura busca con el maga contestacion na Biblia. Un dia del 1999, el de mio menor hermana que si Margaret, quien ya queda un Testigo de Jehova, ya visita conmigo junto con el de suyu Testigo amiga quien ya dale mira personal interes conmigo. Nuay yo expecta que acepta yo que estudia con el Biblia junto con el amiga del de mio hermana pero hinay el de mio progreso cay bien ocupao yo.

Amediao del año 2002, ya cambia yo para na southwest England. Alla ya continua yo estudia na un universidad para puede yo saca mas educacion y queda doctorate. Ya principia yo regular atende na maga miting na Kingdom Hall junto con el de mio anak hombre. Maskin tan enjoy yo estudia na un universidad, el de mio estudiada na Biblia ya puede ayuda conmigo para mas entende el maga problema na vida y cosa el solucion de ese. Ya realiza yo que deverasan el cosa ta habla na Mateo 6:​24 que no puede kita sirvi na dos amo. Necesita kita iscuji si con Dios ba o con el riqueza. Sabe yo que necesita yo hace decision acerca na de mio prioridad na vida.

Antes pa de ese año, pirmi yo ta atende na un grupo del maga Testigo de Jehova que ta estudia con el Biblia na casa usando el libro Is There a Creator Who Cares About You? * Ya queda yo convincido que ele diaton Creador lang que si Jehova el puede dale solucion na maga problema del gente. Na universidad ta enseña que gendeh kita necesita con Dios na diaton vida. Bien rabiao gayot yo. Despues del dos meses, ya descanza yo entra escuela y ya decidi que dale mas tiempo para na maga espiritual cosas.

El texto na Biblia que ya manda move conmigo para hace maga cambio na de mio vida amo el Proverbio 3:​5, 6: “Confia con Jehova con todo de tuyu corazon y no confia con el de tuyu mismo entendimiento. Considera con ele pirmi na todo cosa tu hace, y hay hace le derecho el de tuyu camino.” El cosa yo ta puede aprende acerca na diaton amable Dios mas pa na maga riqueza o posicion que puede yo tene si man doctorate yo. Mientras mas ta queda manada el cosa yo ta puede aprende acerca na proposito de Jehova na tierra y el papel de Jesus que ya dale le el de suyu vida para kanaton, mas ya queda fuerte el de mio deseo para dedica con el de mio vida na diaton Creador. Ya bautiza conmigo del Abril 2003. Despues, hinay-hinay yo ya hace simple con el de mio vida.

SI PAQUEMODO YO YA BENEFICIA:

El de mio relacion con Jehova mas precioso contra na maskin cosa. Ya tiene yo deverasan paz y alegria cay ya conoce yo con ele. Y grande tambien el de mio alegria cay tan junto yo na maga deverasan siervo del Dios.

Quierre-quierre siempre yo aprende y ahora alegre yo aprende si cosa ta habla el Biblia y na maga miting. Alegre tambien yo habla con otro acerca na cosa yo ta creé. Ya queda este el de con todo importante actividad na de mio vida cay ta puede yo ayuda con el maga gente que experiencia bonito vida ahora y tene bonito vida na nuevo mundo. Desde Junio 2008, pioneer ya yo y alegre yo ahora y mas contento contra de antes. Ya tiene deverasan proposito el de mio vida y por causa con ese ta rindi gayot yo gracias con Jehova.

• AÑO QUE YA NACE: 1973

• NACION ONDE YA NACE: AUSTRIA

• BACKGROUND: JUGADOR

DE MIO VIDA DE ANTES:

Ya engranda yo na diutay ciudad na Braunau, Austria. Rico el maga gente aqui y gendeh comon el crimen. Catolico el de mio familia y ya engranda yo na ese religion.

El un suceso cuando bata yo ya tiene grande efecto conmigo. Del 1984, cuando maga 11 año yo, ya acorda yo que ta juga yo soccer junto con el uno del de mio maga cerca amigo. Na ese mismo tarde, ya muri le por causa na accidente na coche. Ya queda gayot yo bien triste cuando ya muri el de mio amigo. Por cuanto año despues del accidente, ya pensa yo si cosa sucede kanaton si muri kita.

Despues yo entra escuela, ya trabaja como un electrician. Maskin ya queda yo jugador y tan puesta grande cantidad de sen, nuay yo problema na financial. Ta usa tambien yo largo tiempo na sports y quierre-quierre yo con el heavy metal y punk rock music. Quierre-quierre yo anda na maga disco y party. Pirmi yo ta busca alegria y imoral el de mio vida pero gendeh yo alegre.

SI PAQUEMODO EL BIBLIA YA PUEDE CAMBIA CON EL DE MIO VIDA:

Del 1995, un de edad Testigo el yan tuktuk na de mio puerta y ya dale conmigo un libro que ta discuti con el contestacion del Biblia na pregunta, Cosa ta pasa con el maga muerto? Ta pensa siempre yo con el muerte del de mio amigo poreso ya saca yo con el libro. Y ya le yo gendeh lang con el capitulo acerca na muerte sino con el entero libro!

El cosa yo ya le ya contesta con el de mio maga pregunta acerca na muerte. Pero mas pa que con ese el ya aprende yo. Cay ya engranda yo como un Catolico, el de mio fe tan centro lang con Jesus. Pero, el de mio estudiada na Biblia ya ayuda conmigo que tiene un cerca relacion con el Tata de Jesus, si Dios Jehova. Bien alegre yo cuando ya sabe yo que si Jehova ta cuida kanaton y quierre le que conoce kita con ele. (Mateo 7:​7-​11) Ya aprende yo que si Jehova tiene sentido. Y ya aprende tambien yo que si Jehova pirmi ta cumpli con el de suyu maga promesa. Por causa con ese, ya queda yo bien interesao na maga profecia na Biblia y ya estudia yo enbuenamente para sabe si paquemodo se ya cumpli. El cosa yo ya sabe ya hace fuerte con el de mio fe con Dios.

Ya realiza yo que el maga Testigo de Jehova lang el quien deverasan interesao ayuda con el maga gente para hace entende el Biblia. Cuando ya puede yo mira con el maga versiculo na publicacion del maga Testigo, ya busca yo este na de mio Catolico Biblia. Si mas ta estudia yo con el Biblia, mas ta puede yo realiza que ya puede yo incuntra con el verdad.

Na de mio estudiada del Biblia ya puede yo aprende que si Jehova quierre que obedece yo con el de suyu maga ley. Base na cosa yo ya puede le na Efeso 4:​22-​24 (El Nuevo Testamento na Chavacano), ya puede yo mira que necesita yo quita con el de mio daan personalidad, un ‘clase de vida que ta vivi yo de antes’ y que necesita yo “visti el camisa del Nuevo Naturaleza [o nuevo personalidad, NWT] creao na ichura del Dios.” Poreso, ya deja yo con el de mio imoral vida. Necesita tambien yo descanza juga con el maga juego de sen cay ta anima este con el maga gente queda materialistico y hambriento. (1 Corinto 6:​9, 10) Para hace con ese maga cambio, necesita yo descanza man junto con el de mio maga daan amigo y busca maga nuevo amigo quien ta hace alegre con Dios.

Gendeh facil hace con aquel maga cambio. Pero, ya principia yo atende na maga miting junto con el maga Testigo y ya principia yo hace maga nuevo amigo na congregacion. Ya continua tambien yo hace con el de mio personal study. Por medio con ese, ya puede yo cambia con el clase de cancion que ta oi yo, el maga cosas que quierre yo na de mio vida y maskin el de mio mudada. Del 1995, ya bautiza conmigo como uno del maga Testigo de Jehova.

SI PAQUEMODO YO YA BENEFICIA:

Ahora, tiene ya yo balance mirada na sen y na maga material cosas. Del primero, pronto lang yo rabia pero ahora mas calmao ya yo. Gendeh ya tambien yo sobra tan lingasa acerca na futuro.

Alegre yo queda parte del un grupo quien ta sirvi con Jehova. Ta puede yo mira con el maga gente na ese grupo quien tan dificil na diila maga problema pero ta continua sila sirvi fiel con Dios. Alegre yo ahora cay ta usa yo con el todo del de mio tiempo y fuerza, gendeh para satisfecha con el de mio mismo deseo sino sirvi con Jehova y hace buen cosas para con otro.

• AÑO QUE YA NACE: 1963

• NACION ONDE YA NACE: ENGLAND

• BACKGROUND: GENDEH ALEGRE NA VIDA

DE MIO VIDA DE ANTES:

Ya nace yo na England pero cuando siete año yo, ya cambia el de mio familia para na Australia. Ya esta kame na Gold Coast, un lugar que manada turista ta anda, na Queensland, Australia. Maskin gendeh rico el de mio familia, pirmi kame tiene el cosa kame necesita.

Maskin pa comfortable el de mio vida, gendeh gayot yo deverasan alegre. Bien tomador el de mio tata. Gendeh gayot yo ta ama con ele por causa na de suyu tomada y si paquemodo le ta trata con Mamang. Cuando ya sabe yo con el maga cosas que ya experiencia le como un soldao na Malaya, ya principia yo entende si porque le ta actua na ansina manera.

Ya principia yo toma manada cuando high-school. Na edad de 16, ya descanza yo entra escuela y ya entra na navy. Ya principia tambien yo pruba man droga y ya queda adicto na tabaco. Ya queda yo bien alcoholico. Del una, cada weekend lang yo ta toma pero nuay dura ya hace ya yo con ese todo el dia.

Cuando maga 20 año, ya principia yo man duda si tiene ba gayot Dios. ‘Si deverasan ta existi el Dios,’ ya pensa yo, ‘porque le ta permiti que sufri y muri el maga gente?’ Gane, ya escribi yo poem que ta disculpa con Dios na todo maldad na mundo.

Ya sale yo na navy na edad de 23. Despues de ese, ya tene yo diferente trabajo y gane ya viaja yo na diferente maga nacion por un año pero nuay se hace conmigo alegre. Nuay yo goal o maskin cosa que quierre yo hace na de mio vida. Gendeh yo interesao tiene casa, un buen trabajo o ricibi promocion. El cosa lang ta hace conmigo alegre amo el tomada y oida na maga cancion.

Ta acorda pa yo con el tiempo cuando ya puede yo sinti el grande deseo para busca proposito na vida. Cuando na Poland yo, ya visita yo con el un concentration camp na Auschwitz. Ya puede yo le acerca con el maga terrible cosas que ya sucede alla. Pero, cuando talla ya yo mismo y ya mira con el bien grande campo, ya queda gayot yo bien triste. Gendeh yo ta entende si porque el gente ta maltrata con el otro gente. Ta llura yo mientras ta camina na alrededor del campo y ya pregunta, ‘Porque?’

SI PAQUEMODO EL BIBLIA YA PUEDE CAMBIA CON EL DE MIO VIDA:

Del 1993, cuando ya bira yo na Australia, ya principia yo le con el Biblia para busca maga contestacion. Nuay tarda despues de ese, dos Testigo de Jehova el yan tuktuk na de mio puerta y ya invita conmigo que atende na un convencion que hace na un stadium que cerca kanamon. Ya atende yo.

Maga cuanto meses ya el ya pasa, ya puede yo anda na ese stadium para mira un juego pero otro gayot ese convencion. Bueno el maga Testigo y decente el mudada, y el diila maga anak gendeh tan salawayun. Ya espanta tambien yo na cosa yo ya puede mira durante el media dia. Manada maga Testigo ya sinta na plaza para come media dia pero cuando ya bira sila na diila maga bangco nuay maskin ni uno basura ya queda na plaza! Mas pa na todo, ese maga gente dol alegre y tiene paz​—ese el cosa que quierre yo. Gendeh yo ta acorda el maga talk na ese dia pero nuay yo ulvida con el conducta del maga Testigo.

Ese noche, ya acorda yo con el de mio primo quien ta le Biblia y ta estudia con el diferente religion. El maga año antes pa de ese, ya habla le conmigo que ya habla si Jesus que puede tu conoce con el deverasan religion por medio na fruta de ese. (Mateo 7:​15-​20) Ya puede yo pensa que debe yo examina si porque bien diferente el maga Testigo. Por primer vez, ya sinti yo que tiene yo esperanza para tene un alegre vida.

Pagka-sunod semana, ya bira el dos Testigo quien ya invita conmigo para atende na convencion. Ya ofrece sila conmigo un Bible study y ya acepta yo. Ya principia tambien yo atende na maga miting na congregacion junto kanila.

Mientras ta estudia yo con el Biblia, el de mio mirada con Dios ya cambia completamente. Ya puede yo aprende que gendeh ele el causa del maldad y sufrimiento, y ta sinti le duele si ta hace mal cosas el maga gente. (Genesis 6:6; Salmo 78:40, 41) Ya queda yo bien determinao que nunca hace sinti duele con Jehova. Quierre yo hace alegre con el de suyu corazon. (Proverbio 27:11) Ya descanza yo el de mio tomada, usada de tabaco y el de mio imoral vida. Del Marzo 1994, ya bautiza conmigo como uno del maga Testigo de Jehova.

SI PAQUEMODO YO YA BENEFICIA:

Deverasan ya yo alegre y contento. Gendeh mas yo ta mira con el alcoholico tomada como el solucion na de mio maga problema. Sino, ya aprende yo que buta con el de mio maga lingasa con Jehova.​—Salmo 55:22.

Diez año ya yo casao con el un bonita Testigo que si Karen y tiene un stepdaughter que si Nella. Alegre kame tres usa con el manada del diamon tiempo na ministerio y ayuda con otro para aprende el verdad acerca con Dios. Ahora, tiene ya proposito el de mio vida.