MILLONES del maga Cristiano el ya iscuji que gendeh celebra Pascua. Cosa sila ta sinti acerca na diila decision? Ta sinti ba sila que tiene cosa falta na diila vida? Ta sinti ba el diila maga anak que tiene cosa gendeh ta dale kanila? Considera si cosa ta habla el maga Testigo de Jehova na entero mundo acerca con ese.

Comemoracion con Jesucristo: “Antes yo queda uno del maga Testigo de Jehova, ralo lang yo ta anda na iglesia. Si ta atende yo, ta anda lang yo na tiempo del Pascua o Easter. Pero maskin aquel tiempo, gendeh gayot yo ta pensa acerca con Jesucristo. Gendeh mas yo ta celebra Pascua pero ta atende yo na maga miting na congregacion dos beses na un semana y gane, ta enseña yo con otro cosa ta habla el Biblia acerca con Jesus!”​—EVE, AUSTRALIA.

El alegria na dalida: “Alegre yo si ta dale conmigo el otro regalo na tiempo que gendeh yo ta expecta con ese. Quierre-quierre yo si tiene conmigo quien tan surprise! Ta gusta tambien yo hace maga card y man painting para con otro cay ta hace se kanila alegre y ta hace tambien se conmigo alegre.”​—REUBEN, NORTHERN IRELAND.

Ayuda con aquellos quien ta necesita: “Alegre kame cuci comida para con el maga enfermo. Tiene vez, ta lleva kame kanila flores, cake o un regalo para hace kanila alegre. Ta gusta kame este cay ta puede kame visita con este maga gente na maskin cosa tiempo del año.”​—EMILY, AUSTRALIA.

Man junto-junto como un familia: “Si el diamon familia tan junto-junto, el diamon maga anak ta puede conoce con el diila maga angkol, anti, aguelo y aguela, primo y prima. Ciendo ta hace kame con este gendeh lang na un particular fecha del año, gendeh kame ta sinti pressure y sabe el diamon familia que ta visita kame kanila cay ta ama kame kanila.”​—WENDY, CAYMAN ISLANDS.

Paz: “Durante el tiempo del Pascua, bien ocupao gayot el todo que dol poco ya lang el ta pensa acerca na paz. Ya sinti yo alivio cay ya puede yo sabe si cosa el maga promesa del Biblia para na maga gente. Ya puede yo entende que hay tene un alegre futuro el de mio maga anak.”​—SANDRA, SPAIN.